Ihapari Comaana Cantikhiye ni Luka 13:1-35
-
Uttharuwa awula ukwanyulaciya (1-5)
-
Nlattanihero no mwiri wo ifiiku woohiima itthu (6-9)
-
Nthiyana ahaakhitiri weemela nookweele naavonihiya isaapatu (10-17)
-
Nlattanihero no itthaka yankaani ni nofermentu (18-21)
-
Wiira ntthu akele nkhora woophurya haana eekurumicaka venci (22-30)
-
Herooti, “uyo khwanttyooyo” (31-33)
-
Yesu nawoonela ihaaya isittatti yo Yerusalemu (34, 35)
13 Uyo ukatyuuyo, atthu akhwaawe yahowa unhimerya Yesu wiira Pilatu ahowiiviha atthu yaakhuma u Kalileya yaawile uvaha itthuvo caya.
2 Uyo ahowaakhula, eeraka: “Nyuuva nnooniha wiira ayo akalileeyaayo yaari anamatampi waavikana akalileu akhwaawe, nlattu woopankiya nnyo citthunnyo?
3 Mi kinwiirelani mena; uhikhanle wiira nhottharuwa, otheene va nnohala ukwanyuliya inanna imocaaru.
4 Awula ale atthu 18 yaamoreliye niinupa yo Silowe yakhwaaka, nyuuva nnooniha wiira ayo yahaana itampi waavikana atthu ankhala u Yerusalemu?
5 Mi kinwiirelani mena; uhikhanle wiira nhottharuwa, otheene va nnohala ukwanyuliya inanna imocaaru.”
6 Vano, ahaahimeerya nlattanihero nimoca, eeraka: “Nlopwana mmoca, ahaala mwiryaawe wofiiku mmattani wawe yo uva ni ahokhuma wiira awehe mihokorokho, masi khaaphwanyile hataa mmoca.
7 Uyo ahomwiirela nlopwana aawacera imattooyo co: Ula mwaakha woneeraru kiwaaka uweha mihokorokho ula mwiryuula, masi akimphwanya hataa mmoca. Uthikile, kontha unaayeviha ikhato.
8 Masi, nlopwana aawacera imattooyo aheera: ‘Pwiiya, nhiye-tho mwaakha mmoca kinaahala uthipa nseresere waya ni kinaahala uhela isturume;
9 wahoolo, wakhala wiira cinaahala wiima mihokorokho, unaahala ureera masi, caahiimeke pooti uthikila.’”
10 Yesu aari nsinakooka isaapatu eetthucihaka.
11 Ahaavo nthiyana mmoca aavirihile myaakha 18 awerennyaka nlattu woovariya ni nciini; uyo nthiyanooyo khaakitiri weemela nookweele, masi eetta nooromile.
12 Yesu umoona wawe, ahomwaattamela ni ahomwiirela: “Nthiyana, irettaa ihovonihiya.”
13 Yesu ahonvara ni uyo nthiyanooyo aheemela woohipica, ni uyo ahopacera unttottopela Nluku.
14 Vano, nhooleli oosinakooka, aahonyoonyiya nlattu Yesu wonvoniha ntthu nihuku nosaapatu. Phimaana, ahowiirela atthwaayo coo: “Ahaavo mahuku 6 anvariya nteko, vano; nyuuva nweeke ayo mahukwaayo wiira mwaavonihiyeke, woohikhala nihuku nosaapatu.”
15 Vano, Apwiiya yahaakhula, yeeraka: “Anamootha! Tipani va, naphiyaka nihuku nosaapatu, hintthukula imopyaawe awula puurwaawe wiira yawurye maaci?
16 Khaalamuliya ula nthiyanoola, khanle mwaana Aparahaamu, Sotwani nhuvihilyaawe myaakha 18, uvonihiya irettaawe nihuku nosaapatu?”
17 Vano, awanannyaawe otheene weewilyaaya iyo itthwiiyo, yaahoona ihaaya, masi atthu akiina yahotteeliya nlattu wo citthu comaana caapankaawe.
18 Coo Yesu aaheera: “Umwene wa Nluku unlikana niisiyani? Ni kilattanihereke niisiyani?
19 Unlikanaca niitthaka yankaani yaalilyaawe nlopwana mmoca mmattani wawe ni iyo itthaakeeyo, yahonnuwa, nuukhala mwiri muulupale, ni inuni canwa uteka ipuuru caya.”
20 Yesu aheera-tho: “Umwene wa Nluku kinhala ulattanihera niisiyani?
21 Unlikana niifermentu nthiyana akusaawe atakaniheraka ni miphimo miraru cophepa ni ilovotariki.
22 Ni uyo ahovira alalyeeraka isittatti niisittatti, aliteeya naaliteeya, eetthucihaka, ni arwaaka iphiro yo Yerusalemu.
23 Nlopwana mmoca, ahonkoha eeraka: “Pwiiya, ari vakaani anoopoliya?” Vano Yesu ahomwaakhula, eeraka:
24 “Wiikurumice venci wiira ukele nkhora woophurya, kontha kinwiirela wiira atthu enci anaahala umananiha ukela uyo nkhorooyo, masi khanhala ukhitiri.
25 Masi, ukati mwaneene inupa unhalaawe wunwa ni utthuka nkhoraawe, nyuuva nnohala ukhala vate, ni nnaahala waatta nkhoraawe, mwiiraka: ‘Pwiiya, ninaawuulepeleni unitthukulela.’ Masi uyo naahala uwaakhulani, eeraka: ‘Akincuwela nipuro nnokhumeenyu.’
26 Ni nyuuva nnohala wiira coo: ‘Niholya ni nihowurya nkhayi ni nyuuva, ni nyuuva mwaaneetthucihaka mmaparapaarani wihu.’
27 Masi uyo nohala uwaakhulani, eeraka co: ‘Akinoocuwelani, nkhume vaa nyuuva nnopanka citthu coohisariya!
28 Nwo vatenwo phinhaleenyu wunla ni ukhuura miino, ukati nnohaleenyu umoona Aparahaamu, Isaaki, Yaakopi ni maporofeeta, muumweneni wa Nluku masi nyuuva nnari vate.
29 Uhiya commo, anaahala uwa atthu unkhumaaya ncuwa ni unkela ncuwa, uculu ilapo ni uhitto ilapo ni anaahala wunkoma wa meeca omuumweneni wa Nluku.
30 Nviriyane: Ahaavo atthu ookhicera anhala ukhala oopacera ni ahaavo atthu oopacera anhala ukhala ookhicera.”
31 Ule ukatyuule, mafariseu akiina yahomwaattamela ni yahomwiirela: “Ukhume va ni urwee nipuro nikhwaawe, kontha Herooti nopheela uwiiva.”
32 Vano, Yesu ahowiirela: “Nrwee mwanhimeerye uyo khwanttyooyo wiira: ‘Mi kinoomola maciini ni waavoniha atthu ilelo ni meelo, ni nrotto kinaahala umaleliya.’
33 Vano ilelo, meelo ni nrotto kihaana nanlelo kikhalaka vaa, kontha, khunreera porofeeta ukhwa nipuro nikhwaawe, uhikhanle u Yerusalemu.
34 Yerusalemu, Yerusalemu, nowiiva maporofeeta, ni naapwesakaca nimaluku ale anveleeliheriyaawe! Kihomananiha ikwaha cinci waathukumaniha asaanaa, khampa mwalakhu cinaathukumanihaawe asaanaawe vathi mapuphaawe! Masi nyuuva khantthunne.
35 Vano, inupeenyu khinhala ukhaliya-tho.Kinoohimeeryani wiira: Nyuuva khannohala ukoona-tho, mpaka nnohaleenyu wiira: ‘Ooreerihiya phuule nowa mwancina na Yehova!’”
