Ihapari Comaana Cantikhiye ni Luka 14:1-35
-
Yesu nanvoniha nlopwana eepakaciye mwiirutthuni wawe (1-6)
-
Mwalattuliyaka nipuro, mwiiyevihe (7-11)
-
Waalattule atthu ahinhala wuulivyaanihera (12-14)
-
Nlattanihero naatthu yaakhottile nlattulo (15-24)
-
Citthu cinlamuliyaawe upanka ntthu nopheela ukhala ntthari a Yesu (25-33)
-
Maakha anhiya uciva waya (34, 35)
14 Ikwaha imoca, Yesu ahorwaa ulya watthokoni wanhooleli o mafariseu, isaapatu, ni atthu yaari nne nipuronne yaanonweheeha Yesu.
2 Ni uhoolo wa Yesu, ahaavo nlopwana mmoca eepakaciye mwiirutthuni wawe.
3 Vano, Yesu, ahaakoha anamacuwelaca nlamulo, eeraka: “Unaatthunihiya unvoniha ntthu isaapatu awula mena?”
4 Masi ayo atthwaayo khayaakhunle itthu. Vano Yesu ahonvara nlopwanooyo, ahonvoniha ni ahomwiirela wiira arweeke.
5 Vano Yesu ahowiirela coo: “Tipani nohala uhinkumiha mwanawe awula imopyaawe, woohipica, yamorelaka nluusi, nlattu wookhala nihuku nosaapatu?”
6 Ni ayo khayoona itthu yoomwaakhula.
7 Yesu woona wawe wiira atthu yaalattuliye yaathanla mapuro oottitthimihiya, ahaahimyeera nlattanihero nimoca, eeraka:
8 “Wakhalaka wiira nnaalattuliya urwaa ufestani yo kacamentu, nhunkome mapuro oottitthimihiya. Kontha pooti ukhala wiira holattuliya ntthu nkhwaawe oottitthimihiya wuupwahani nyuuva.
9 Vano, ntthu oolattunleni ooyeeli naahala uwa ni uwiirelani: ‘Munhiye ula nlopwanoola onkome nipuro nonkomileenyunno.’ Vano, nyuuva nnaahala woona ihaaya nuurwaa wunkoma nipuro noomalihera.
10 Masi, mwalattuliyaka, monkomeke nipuro noomalihera, wiira awaaka ule oolattunleni, awiirelekeni: ‘Mpatthani, urwee wonkome nipuro noottitthimihiya.’ Ni nyuuva, nnaahala ukhala oottitthimihiya uhoolo waatthu otheene alattuliye.
11 Kontha, ule neettitthimiha naahala wuulihiihaciya muru, ni ntthu neeyeviha naahala uttitthimihiya.”
12 Ni ciicammo, Yesu ahonhimeerya ule anlattunle eeraka: “Watthenkacaka iyoolya yoothana awula yoohiyu, upheelaka waalattula atthu, uhaalattule paahi asipatthannyaa, asuulupalyaa, amucyaa ni amwaattamanannyaa mathaciri. Wapanka commo, naayo ciicammo, anaahala wuulattula ni iyo inhala ukhala wuulivyaanihera.
13 Masi, watthenkacaka iyoolya wiira waalattule atthu, waalattule amasikhini, oopahuwa, oottumpela, oohoona,
14 ni unaahala utteeliya. Kontha ayo, khaarina itthu wiira yuulivyaanihere, masi weeva, unaahala utthuveliya ukati unhalaaya wunwelelihiya anasariya.”
15 Ntthu mmoca aalattuliye, wiiwa wawe nnyo citthunnyo, aheera: “Ootteeliya phuule nolya iyoolya yo Umwene wa Nluku.”
16 Yesu ahomwiirela: “Nlopwana mmoca ahaalattula atthu enci wiira yalye uwannyawe.
17 Uphiya waya ukati woolya, uyo nlopwanooyo ahonveleeliha nantekwaawe wiira awiirele atthu yaalattuliye: ‘Nweeke, kontha iyoolyeeyo ihotthenkaciya.’
18 Masi atthu otheene yaalattuliye, yahopacera wiicoothereeriha citthu wiira ahirwee. Oopacerooyo enre: ‘Kihootthuma imattaaka ni kihaana urwaa woona, ukilevelele, akinhala ukhitiri.’
19 Ni nkinooyo enre: ‘Kihoothuma imope caka 10 ni kihaana urwaa uwehaweha. Ukilevelele akinhala ukhitiri.’
20 Ni nkinooyo enre: ‘Kithenle phiyaaru, phimaana akinlamuliya urwaa.’
21 Vano, ipottheeyo yahoturuwa ni yahaahimeerya citthu cotheene apwiiyaaya. Vano, apwiiyayaayo yaahoviruwa ni yaheerela-tho ipotthaayeeyo co: ‘Urwee wowaakuvya mmaparapaarani cuulupale ni cooyevaca, ni wawiihane amasikhini, oopahuwa, oohoona ni oottumpela.’
22 Uvira waya ukati, ipottheeyo yaahoturuwa ni yaaheera: ‘Pwiiya, kihovara nteko nkirumileenyuuyo, masi nanlelo ahaavo mapuro.’
23 Vano, apwiiyawe yaheerela tho ipottheeyo co: “Urwee, mmaparapaarani ni mmaphironi ni waakhanyererihe atthwaayo ukela, wiira inupaaka icariye.
24 Kinoohimeeryani ikhweeli wiira: Khaavo nanka mmoca nlattunlyaaka nohala ulawiha iyoolyaaka.”
25 Atthu enci yaanontthara. Vano uyo, ahorukunuwa ni ahowiirela:
26 “Akhala wiira haavo ntthu nokitthara ni hinaathanya athumwaane, anumwaane, amwaarawe, asaanaawe, asunnawe ni asirokorawe, hataa ukumyaawe, khanlamuliya ukhala nttharyaaka.
27 Ule hinteesa nipotto nawe noohuviheriya, ni hikittharaka, khanlamuliya ukhala nttharyaaka.
28 Wootakihera, tipani neera apheelaka uteka inupaawe, hinpacera wonkoma ni awehaceraka wakhala wiira haana nsurukhu wootosera wiira amalihe iyo inupeeyo?
29 Aahipankeke commo, uyo naahala waathipa aliseerusu ni uhikhitiri umaliha uteka inupeeyo, ni atthu otheene anhala uweha anaahala upacera unthyaa,
30 yeeraka: ‘Ula nlopwanoola ahopacera uteka masi khakhitinri umaliha.
31 Awula, wakhala wiira haavo mwene rina anatoropa 10.000, nopheela urwaa waana ikhotto ni mwene rina anatoropa 20.000, niireke khampacera wonkoma toko wiira oone wakhala wiira naahala ukhitiri untthema?
32 Uyo, oonaka wiira khanhala unkhitiri, naahala waaruma alopwanaawe urwaa unvaanelana wiira amalihe ikhotto nanlelo uyova nari uttayi.
33 Inanna imocaaru, khunla ntthu, aahihiyeke citthu cotheene cirinaawe, khanlamuliya ukhala nttharyaaka.
34 “Maakha, ikhanle itthu yomaana. Masi maakha yahiyaka uciva waya, anhala uturuwela cani uciva?
35 Ayo, khanhala ukhalana-tho ifayita hataa ariheliyaka vathi, awula upankiya isturume. Ayo anawiira urihiya paahi. Ule nopheela wiiwa, eewe.”
