Ihapari Comaana Cantikhiye ni Luka 15:1-32
15 Anamaliviha nsokho ni anamatampi, yaahontthukumanela Yesu wiira anviriyane.
2 Mafariseu ni anamantikha yanttekutta, yeeraka: “Ula nlopwanoola naawaakhelela anamatampi ni nawaalyaana.”
3 Vano Yesu aahaattonkela nlattanihero nimoca, eeraka:
4 “Nlopwanani va, narina ikhontwaa cawe 100 ni inrimelaka imoceeyo, hinhiya 99 muuthakoni ni uvira aavyaka ile irimenle mpaka uphwanya?
5 Ni aphwanyaka vale, naateesa mmakhatani ni unantteela nrima nlattu woophwanya.
6 Ni, aphiyaka uwannyawe, nawaathukumaniha apatthannyaawe ni amwaattamanannyaawe, ni naawiirela: ‘Ntteeliye nrima nkhayi ni miiva, kontha kihophwanya ikhontwaaka yaarimenle.’
7 Kinoohimeeryani wiira, inanna imocaaru, unaahala ukhala utteeliya wiirimu nlattu wanamatampi mmoca nottharuwa kahi nlattu waanasariya 99 ahirina itthu yoohala uttharuwa.
8 “Awula nthiyanani, neera akhalanaka misurukhu 10 co iparaata, unrimeelaka mmoca himparihela nthuko, ukweca mpaani wawe, ni waavya mpaka uphwanya?
9 Ni aphwanyaka vale, nawaathukumaniha apatthannyaawe, amwaattamanannyaawe ni naawiirela: ‘Ntteeliyeke nrima nkhayi ni miiva, kontha kihophwanya nsurukhu waakirimenle.’
10 Kinoohimeeryani ikhweeli wiira, inanna imocaaru, malayikha a Nluku anaatteeliya nlattu wanamatampi mmoca nottharuwa.”
11 Vano woohipica, uyo ahottonka nlattanihero nikhwaawe eeraka: “Nlopwana mmoca, ahaana asaanaawe eeli.
12 Ni omwankaannyuuyo aahowiirela athumwaane co: ‘Paapa, nkivahe mphantte womihakhu caka.’ Ni ayo yaahaakawelaca mihakhunnyo.
13 Uvira waya mahuku vakaani, mwanawe omwankaani aahothukumaniha mihakhu cawe cotheene ni ahorwaa ilapo yoottayi. Uphiya wawe nwo, ahopacera ukhalana makhalelo oohinamaana ni aahorihakaca mihakhu cotheene caarinaawe.
14 Umaliha wawe mihakhu cotheene, ilapo yaaryaawe yaahovola itala ni uyo aahopacera uhuva.
15 Mpaka uyo aahopacera waavarela nteko atthu o iyo ilapweeyo, yanrumile utakhwani wiira awacere ikuluwe.
16 Ni uyo ampheela cinene ulya iyoolya yaalyaaya ikuluwe, masi khaavo anvaha itthu.
17 “Uttharuwa wawe, uyo aahiiciirela: ‘Apaapa ahaana ananteko enci arina iyoolya, masi mi kinkhala uno yakivolaka itala!
18 Kinaaturuwela uwaani waapaapa ni kinrwaa uwiirela: “Paapa, kihokosa wiirimu ni kihookoserani nyuuva.
19 Khunkiphwanela-tho wiihaniya mwaninyu. Nkiwacere toko nantekhweenyu.’
20 Vano, aahokhuma ni aahoturuwela waathumwaane. Naryeene uttayi, athumwaane yaamomoona, yaahomoonela uthunku; yahontthawelela ni yahonkapatta nunpecari.
21 Vano, uyo aahowiirela athumwaannyaayo coo: ‘Paapa, kihottheka wiirimu ni kihootthekelani nyuuva. Khunkiphwanela-tho wiihaniya mwaninyu.’
22 Masi athumwaannyaayo yaaheerela ipottha caya co: ‘Mwaakuve! Nwaane ihancu yoorekama, yooreera, munwarihe, ni munwarihe aneli mmatatani wawe ni isantaaliya.
23 Nwaane ciicammo imope yooneneveeyo, nhite, nikhuure ni nipanke isukuhuulu,
24 kontha ula mwanakoola ahokhwa, masi hunwelela, ahorimela ni hophwanyiya.’ Ni yaahopacera utthapa yapankaka isukuhuulu.
25 “Mwanawe omuulupale aari umattani ni ukati waaturuwaawe aattamelaka uwannyawe, aahiiwa yarumaka macipo ni woona wiiniyaka.
26 Phimaana, aahomwiihana nanteko mmoca ni aahonkoha isiyani yeerannya.
27 Vano, nantekooyo aahomwaakhula, eeraka: ‘Mwaamunnaa hoowa ni athumwana ahohitiha imope yooneneva nlattu wooturuwa nari nkumi’
28 Masi uyo aahoviruwa ni khaatthunne ukela. Vano, athumwaane yaahokhumela vate ni yaahanca unlepela isontte wiira akele.
29 Vano, uyo aahowaakhula athumwaane, eeraka: ‘Kiihoovarelani miteko myaakha cinci khampa ipottha, ni nkinatoko uhiya uwiiwelelani. Uhookhalaru commo, nyuuva khannatoko ukivaha nanka ipuri wiira kipanke isukuhuulu naasipatthannyaaka.
30 Masi, uturuwa wawe mwaninyu rihakacile mihakhu naanamararuwa, nhonhitela imope yooneneva.’
31 Vano, athumwaane yaahomwaakhula, yiiraka: ‘Mwanaka, weeva ukati wotheene uri ni mi, ni citthu cotheene cirinaaka cikhanle cawaa.
32 Masi hiiva naahaana nipankaka isukuhuulu ni nitteeliyaka nrima, kontha mwaamunnaa ahokhwa, masi hunwelela, ahorimeela ni hophwanyiya.’”
