Ihapari Comaana Cantikhiye ni Luka 16:1-31
16 Vano, Yesu aahowiirela-tho attharyaawe co: “Nlopwana mmoca thaciri ahaana nanteko mmoca aawacera mihakhu cawe, ni uyo aahoothererihiya urihakaca mihakhu caapwiiyaawe.
2 Vano, uyo ahomwiihana anantekwaayo ni ahomwiirela: ‘Ila itthu kineewaakeela ikhanle yoohiloka. Phimaana, urwee wantikhe irelatoriyu inhimyaca mananna uvarenlyaa nteko nsurukwaaka, kontha khunhala-tho uwacera inupaaka.’
3 Vano, uyo aheeciirela: ‘Kinhala upankani? Ukhala wiira apwiiyaaka ahokihiiha uwacera inupaaya? Mi akirina ikuru wiira kithipe ni kinawoona ihaaya ulepela icimoola.
4 Kihoopuwela! Kinaacuwela itthu inhalaaka upanka, wiira koomoliyaka vale, atthwaayo akaakhelele mmapuwani waya.’
5 Ni uwiihana wawe atthu yaalokihiya naapwiiyaawe ahonkoha oopacerooyo co: ‘Apwiiyaaka anoolokiha kavi?’
6 Uyo ahaakhula, eeraka: ‘Iliituru 2.200 co makhura.’ Vano, ule aawacera inupa yaapwiiyaawe aahomwiirela: ‘Ukuse iwarakha ni wantikhe wowaakuvya iliituru 1.100.’
7 Vano, aahonkoha nkinooyo co: ‘Vano weeva, unlokihiya kavi?’ Uyo ahaakhula: ‘Isaakhu 100 cotiriku.’ Vano, nlopwana aawacera inupa yaapwiiyaawe aahomwiirela: ‘Wantikhe 80.’
8 Apwiiyaawe yaahonttottopela nlopwana aawacera inupooyo, hataa ukhalaka wiira aari oohikhuluvelya, kontha aahothoonyera ucuwelaca. Khweeliini, atthu o ila ituninyeela ahaana ucuwelaca waapwaha asaana a Nluku.
9 “Kinoohimeeryani wiira: Mwaapanke apatthani nimihakhu co ila ituninyeela, wiira coomalelakani awaakheleni mapuro ankhaliya mpaka.
10 Ntthu nokhuluvelya ni citthu cankaani, ciicammo naakhuluvelya ni citthu cuulupale, masi ntthu hinkhuluvelya ni citthu cankaani, khankhuluvelya ni citthu cuulupale.
11 Vano, mwaahithoonyereke ukhuluvelya nimihakhu co ula ulumwenku wootakhaloola, tipani nohala wuukhuluvelani mihakhu ceekhweeli?
12 Ni mwaahithoonyereke ukhala ookhkuluvelya ni citthu caakhunaninyu, tipani nohala wuukhuluvelani citthu cihiyeriyeenyu?
13 Khaavo nolamuliya waavarela nteko atthu eeli; kontha nohala unfenta mmoca, masi nkinooyo naahala unrusa, awula nohala unvaresesa mmoca, masi nkinooyo unthanya. Nyuuva khannolamuliya ukhala nanteko a Nluku ni nanteko omihakhu.”
14 Vano, ukhala wiira mafariseu waacivela venci cinene nsurukhu, wiiwa waya ayo moolumwaayo, yaahopacera unveeha Yesu.
15 Vano, Yesu aahowiirela: “Nyuuva nneehimya ukhala anasariya wameethoni waapinaatamu, masi Nluku naacuwela nrimeenyu, kontha itthu irina ifayita wamiithoni waapinaatamu ikhanle itthu yoohiirya wamiithoni wa Nluku.”
16 “Nlamulo ni cowantikhiya ni maporofeeta caaholalennya mpaka ukati wa Joau. Ukhuma uyo ukatyuuyo, ihapari comaana co Umwene wa Nluku cinaalalyeeriya, ni atthu olapo cotheene ni omakhalelo oovirikana anawiikurumica ukela Muumweneni wa Nluku.
17 Khweeliini, ikhanle itthu yoohirika irimu ni ilapo umala, masi khunhala uvira hataa mphantte mwankaani woleetera yonlamulo, citthu cotheene cihimiye munlamuloni cihiirannyeele.
18 “Ule naahiya amwaarawe anthelaka nthiyana nkhwaawe, neetta uluva, ni ule nonthela nthiyana oohinnya, ciicammo neetta uluva.
19 “Ahaavo nlopwana mmoca thaciri aawara ikuwo consurukhu mwinci, uyo antteeliya ni ampuha khula nihuku.
20 Masi ahaavo nlopwana mmoca masikhini, eehaniya Lazaru; uyo ahaana makhwatta menci ni eesiyaka wankhorani wawe uyo nlopwana thaciryuuyo.
21 Ni Lazaru ampheela ulya iyoolya yaamora wameecani wawe uyo thaciryuuyo. Hataa ciicammo alapwa yaanaawa ulata makhwaattaawe.
22 Uvira waya ukati, masikhinnyuuyo ahokhwa ni ahocisiya ni malayikha arwaaniyaka nipuro naaryaawe Aparahaamu.
“Ciicammo, thaciryuuyo ahokhwa ni ahorwaa usikhiya.
23 Ni mmahiye waaryaawe, anhuva cinene. Vano, uweha wawe uculu, ahomoona nttayi-nttayi Aparahaamu nari nkhayi ni Lazaru.
24 Phimaana, ahomwiirela Aparahaamu co: ‘apaapa Aparahaamu, nkoonele ikiriri ni mmwiirele Lazaru anaanihe nikokho nawe nimaaci, wiira anaanihe nliminaka, ukhala wiira umooroni woohittiphyoono kiryaaka kinaahuva.’
25 Vano, Aparahaamu ahomwaakhula, eeraka: ‘Mwanaka, unawuupuwela ukati weeva waarinaa mihakhu cinci, masi Lazaru ahuvaka? Vano nnaco, uyo naatteeliya. Masi weeva unaahuva.
26 Uhiya commo, iriyariihu hiiva ni nyuuva, nihaavo nlikitti nuulupale nowiisa. Phimaana, khunkhitirya atthu ari uno ukhuma yawaaka nwo, ni atthu ari nwo ukhuma yawaaka uno.’
27 Vano thaciryuuyo aheera: ‘Wakhala commo, kinawuulepelani wiira munrume Lazaru urwaa uwannyaya apaapa,
28 kontha miiva kihaana asunnaka athanu. Munrume Lazaru wiira aahimeerye wiira ahiwe nna nipuro kinhuvaakanna.’
29 Masi Aparahaamu ahomwaakhula, eeraka: ‘Ayo ahaana cowantikhiya ca Moceesi ni co Maporofeeta. Yiiweleleke cennyo.’
30 Masi, thaciryuuyo ahaakhula, eeraka: ‘Mena paapa Aparahaamu! akhumaka ntthu ookhwa arwaaka uwuulumana, ayo anaahala urukunusa nrimaaya.’
31 Masi, Aparahaamu ahomwaakhula, eeraka: ‘Wakhala wiira ayo khaaniiwelela cowantikhiya ca Moceesi ni co maporofeeta, khanhala wiiwelela hataa ukhalaka wiira ntthu ookhwa nawunwelelihiya ni urwaa uwuulumana.’”
