Ihapari Comaana Cantikhiye ni Luka 17:1-37
17 Vano, Yesu ahowiirela attharyaawe co: “Khula ukati, cinaakhumelela citthu cimmwiiriha ntthu uttheka. Masi, hotakhaliya ule nontthekiha nkhunanawe!
2 Phataari uyo ntthuuyo utthukeleliya nsilo nsikoni ni uvonyeriya mpahari, uhiya waatthekiha ala ooyevacaala.
3 Phimaana, ratta. Wakhala wiira munneenyu hookoserani, munttaruse ni attharuwaka munlevelele.
4 Hataa ootthekelakani imaara 7 khula nihuku ni ooweelakani ni eeraka: ‘Kihottharuwa’, nyuuva nhaana unlevelela.”
5 Maapostolu yahowiirela Apwiiya: “Muncerere waamini wihu.”
6 Vano, Yesu ahowiirela: “Nnarina waamini woolikana niitthaka yankaani, mwanhala wiirela ula mwiryuula: ‘Wiiphele vaa ni weephattye mpahari’, ni uyo wanhala uwiiwelelani.
7 Tipani vaa, narina ipotthaawe iri umattani awula inwacera inama, aahala wiirela yaturuwaka: ‘Uweeke wohipica va wameecani va waalyeeke’?
8 Uhiya upanka commo, uyo nohala wiireela co: ‘Utthenkace iyoolyaaka yoohiyu, uware ikuwo caa conteko ni ukivahe iyoolya wiira kilye ni kiwurye ni kamalihaka weeva ciicammo, pooti ulya?’
9 Vano, amalihaka ntekooyo, niireke naarwaa usukhurweela iyo ipottheeyo? Mena.
10 Inanna imocaaru, nyuuva mwavaraka miteko cotheene civahaceriyeenyu, mwiire: ‘Hi nikhanle ipottha coohifayita. Itthu nipankileehu, phiitthu yaalamuliyeehu upanka.’”
11 Ukati Yesu waarwaawe u Yerusalemu, ahovira ilapo yo Samariya ni yo Kalileya.
12 Uphiya wawe aliteeya amoca, alopwana 10 omakuttula yahowa umoonanana, masi yeemenle uttayi.
13 Ni ayo yahopacera ukhuwela, yiiraka: “Yesu, Mwiitthucihi, unoonele ikiriri!”
14 Uwoona wawe, uyo ahowiirela: “Nrwee mweethoonyihere waanankuttho.” Vano, ukati waakhumaaya yarwaaka, makuttulaaya yahovonihiya.
15 Namakuttula mmoca, woona wawe wiira ahovonihiya, ahoturuwela uttuli anttottopelaka Nluku akhuwelakoono.
16 Ni uyo ahokhoroma uhoolo wa Yesu, ni ahooroma mpaka vathi ansukhuruku. Uyo nlopwanooyo aari o Samariya.
17 Yesu ahomwiirela: “Alopwana 10 otheene ahovonihiya, keera? Vano, 9 akiinaayo ari vayi?
18 Nlattuni alopwana otheene avonihiye khaaturuwile uwa unttottopela Nluku, hikhanle ula nlopwana nokhuma ilapo ikinoola paahi?”
19 Vano ahomwiirela: “Wunwe ni urwee, waamini waa uhowiiriha uvoovona.”
20 Mafariseu yahonkoha Yesu nihukuni waahalaaya uwa Umwene wa Nluku, ni uyo ahowaakhula, eeraka: “Umwene wa Nluku khunhala uwa toko itthu inoonnya,
21 ni khaavo ntthu nohala wiira: ‘Mooneke, Umwene wa Nluku uri vaa!’ awula ‘Mooneke, uri vale!’ Masi ncuwele wiira Umwene wa Nluku uri iriyariinyu.”
22 Vano, Yesu ahowiirela attharyaawe co: “Anaahala uphiya mahuku, nyuuva nnohaleenyu upheela woona nihuku nimoca paahi na Mwaana Apinaatamu, masi khannohala woona.
23 Ni atthu enci anaahala uwiirelani: ‘Mmooneke, ri nwe! awula Mmooneke, ula va!’ Nhirwee ni nhaatthare.
24 Khweeliini, toko uverunya umpharelaaya ukhumaka mphantte mmoca wowiirimu mpaka mphantte nkiina wowiirimu, ciicammo phinhalaaya wiirannya nihuku na Mwaana Apinaatamu.
25 Yoopacera, uyo haana ahuvihiyaka venci ni uthanyiya naatthu ankhala ula ukatyuula.
26 Toko caaryaaya mahuku a Nowee, ciicammo phinhalaaya ukhala mahuku a Mwaana Apinaatamu.
27 Atthwaayo, yanlya, yanwurya, alopwanaayo yanthela ni athiyanaayo yantheliya, mpaka nihuku Nowee naakenlyaawe nkalawani, ni uwaaka ucara womaaci waatankanyaka atthu otheene.
28 Inanna imocaaru, inhala wiirannya khampa ile yeerannyeele mahuku a Lo: atthwaayo yanlya, yanwurya, yanthuma, yantumiha, yaanaala ni yantekateka.
29 Masi, nihuku Lo naakhumilyaawe u Sotoma, wahomora mooro ni enxofre, ni wahaakwanyulaca atthu otheene.
30 Inhala wiirannya itthu imocaaru nihuku Mwaana a Pinaatamu ninhalaawe uwa.
31 Uyo ukatyuuyo, ule nohala uphwanyiya nari waculu inupa, hikhuruwe wiira acise citthu cawe mpaani, ni ule nohala uphwanyiya umattani hituruwele uwannyawe wiira acise citthu cihiilyaawe.
32 Nwuupuwele amwaara a Lo.
33 Ule nomananiha woopola ukumyaawe, naahala uhaleela, masi ule nohaleela, naahala woopola.
34 Kinoohimeeryani wiira: Atthu eeli anhala ukhala nkori mmoca; mmoca naahala ucisiya, ni nkinakuuyo naahala uhiiya.
35 Athiyana eeli, anrwaa usila wa nsiloni nimoca; mmocooyo naarwaa ukusiya ni nkinakuuyo naahala uhiiya.”
36- -
37 Vano, attharyaawe yahonkoha, yeeraka: “Pwiiya, iyo inhala wiirannya vayi?” Yesu ahowaakhula eeraka: “Nipuro niryaawe ntthu ookhwa nwo ciicammo, anaahala ucara asaaka.