Ihapari Comaana Cantikhiye ni Luka 18:1-43
18 Vano Yesu, ahaahimeerya attharyaawe nlattanihero nimoca, apheelaka uwiitthuciha ifayita urinaaya ulompa ni uhihiyerera,
2 eeraka: “Isittatti imoca, ahaavo suwiisi ahaamoova Nluku ni ahanhisima ntthu.
3 Iyo isittattiiyo, ahaavo nthiyana nankhweli mmoca, ni uyo anrwaaka uwannyawe uyo suwiisyuuyo, ni aanonlepela eeraka: ‘Nkiphwanyihe isariya nlattu kirinaaka ninwanannyaaka.’
4 Wahovira ukati mwinci, uyo suwiisyuuyo ankhottelaka uyo nankhweelyuuyo, masi wahoolo aheeciirela: ‘Mi akimmoova Nluku ni akinonhisima hataa ntthu.
5 Masi, ukhala wiira ula nthiyanoola khanhiyerera uwa uwannyaka wiira kinvahe isariya, kinawacera uyo nlattuuyo wiira hiwee-tho ukinyoonyiha, kontha kihomoocya.’”
6 Apwiiya Yesu yaheera: “Nheewa itthu ihimilyaawe uyo suwiisyuuyo, hataa akhalaka ntthu ooheettela isariya?
7 Vano, niireke wiira Nluku khanhala waawacera niisariya ale aathanlilyaawe, anonlepela uthana ni uhiyu, nuuyo aavilelaka?
8 Kinoohimeeryani co: Uyo naahala waawacera ni isariya woohipicapica. Vano, niireke Mwaana a Pinaatamu ukati unhalaawe uwa, naahala waaphwanya atthu owaamini va watuninyani va?”
9 Uyo, ahohimya-tho nlattanihero nikhwaawe, awaacaka atthu yeecoona ukhalana isariya ni yahaavaha ifayita akhunanaya, eeraka:
10 “Alopwana eeli, yahorwaa ulompa utempulu, mmocooyo aari nfariseu ni nkhwaawyooyo aari namaliviha nsokho.
11 Vano, nfarisewuuyo aheemela ni ahopacera ulompa wanrimani wawe eeraka: ‘Oo Nluku kinawuusukhuru venci, kontha akinakhala toko atthu akhwaawe, akhanle malatarawu, atthu ooheettela isariya, aneetta uluva; hataa ciicammo toko ula namaliviha nsokhoola.
12 Kinantthuka ramatani ikwaha piili khula isumana, kinaavaha ncanko wonakhuumi wo citthu cotheene cimphwanyaaka.’
13 Masi namaliviha nsokhooyo, eemenle uttayi hataa khaapheela uweha wiirimu, ni aneecaatta ikhakaaca eeraka: ‘Oo Nluku, ukoonele uthunku, miiva namatampi.’
14 Kinoohimeeryani khweeli wiira: Ule namaliviha nsokhoole, aaturuwenle uwaani naphwanyihiye isariya, umpwaha ule nfarisewuule. Kontha ntthu neettitthimiha, naahala wuulihihaciya muru ni ule neeyeviha, naahala uttitthimihiya.”
15 Atthwaayo ciicammo yaanonwaanela asaana ommatatani, wiira uyo aavare. Masi, attharyaawe yanwaateeliha atthwaayo.
16 Vano, Yesu aholepela wiira awaaneliye asaana ommatatani otheene ni aheera: “Mwaahiye asinamwannyaayo, nhiwaateelihe uwa mpaka nipuro kiryaaka, kontha Umwene wo wiirimu, ukhanle waatthu anlikana naayova.
17 Kinoohimeeryani ikhweeli wiira: Ule nohala uhaakhelela Umwene wa Nluku khampa mwanhima, khweeliini khanhala ukela muumweneni wa Nluku.
18 Vano, nkhulupale mmoca aayuuta ahonkoha Yesu, eeraka: “Mwiitthucihi ooreera nrima, itthuni yomaana inlamuliyaaka upanka wiira kiphwanye ukumi woohimala?”
19 Vano, Yesu ahomwiirela: “Nlattuni unkiirelaa Mwiitthucihi omaana? Khaavo ntthu omaana hikhanle mmoca paasi, Nluku
20 Weeva unaacuwela malamulo aneera: ‘Uheette uluva, uhiive, uhinnye, uhimootherye itthu nkhunana, waattitthimihe athumwana ni anumwana.’”
21 Vano, uyo nlopwanooyo aahaakhula eeraka: “Mi kinawiiwelelaka ayo malamulwaayo otheene, ikhumelo inamwannyaaka.”
22 Wiiwa wawe iyo itthwiiyo, Yesu ahomwiirela: “Inawuuhaleela itthu imoca: urwee watumihe maalyaa ni nsurukhuuyo waavahe amasikhini, wapanka commo, unaahala ukhalana mihakhu wiirimu ni uwe wookhale nttharyaaka.”
23 Vano, uyo nlopwanooyo wiiwa wawe iyo itthwiiyo, ahokhuma nne nipuronne nariipiyeene nrima, kontha ahaana mihakhu cinci.
24 Vano, Yesu ahonweha uyo nkhulupalyooyo ni aheera: “Unaahala urika cinene thaciri ukela Muumwenen wa Nluku!
25 Kinawuuhimeeryani-tho wiira: Khunhala urika ikamelu uvira wamwiitheni wosinkano, uvirikana thaciri nohala upheela ukela Muumweneni wa Nluku.”
26 Vano, atthu otheene yeewile ayo moolumwaayo yaheera: “Vano tipani nohala woopwaa?”
27 Vano, Yesu aheera: “Citthu cihinkhitiryaa wamiithoni waapinaatamu, ni Nluku nyo cinaakhitirya.”
28 Masi Peturu aheera: “Pwiiya, hi nihohiya citthu cotheene caarineehu wiira nuutthareni.”
29 Vano, Yesu ahowakhula eeraka: “Kinawuukhuluvelihani wiira: Khaavo hiile inupaawe, aahiile amwaarawe, asihimaawe, athumwaane, anumwaane awula asaanaawe nlattu wo Umwene wa Nluku,
30 hinaakhela citthu cinci nenna co, ni hinhala waakhela muulumwenkuni unwa uhoolo, ukumi woohimala.
31 Vano, Yesu ahowiihana eetthucyaawe 12, ni ahowiirela: “Nkiviriyane, ninrwaa u Yerusalemu, naphiyaka nwo cinaahala wiirannya citthu cotheene cantikhiye ni maporofeeta aaciyaka Mwaana a Pinaatamu.
32 Wootakihera, uyo naahala uvahereriya mmatatani wa amalaponi ni ayo anaahala untarawaca, unhuviha ni ciicammo anaahala unsuwela.
33 Anaahala umuufyulaca ni umwiiva, masi nihuku noneeraru, naahala wunwelelihiya.”
34 Masi, attharyaawe khayaacuwelenle itthu yaataphulelaaya itthu yaahimilyaawe, kontha yaahoovitheliya ayo moolumwaayo wiira ahiiweehe.
35 Ukati Yesu waattamelaawe u Jeriko, ahaavo nlopwana mmoca, oohoona onkomile nseresere iparapaara, alepelaka icimoola.
36 Uwiiwa wawe atthu enci yaviraka, uyo ahokoha itthu yeerannya.
37 Aaheereliya: “Yesu Nnasareeno, phinvira.”
38 Vano, uyo ahokhuwela eeraka: “Yesu, mwaana a Davidi, ukoonele ikiriri!”
39 Masi atthu yaari uhoolo wawe, yahopacera umpwapwela yamwiirelaka wiira amaale. Masi, uyo aaneera utepa ukhuwela eeraka: “Mwaana a Davidi, ukoonele uthunku!”
40 Yesu aheemela, vano, aheera awaaneliye nlopwanooyo. Uwaaneliya wawe, uyo ahonkoha co:
41 “Umpheela wiira kuupankele isiyani?” Uyo aheera: “Kimpheela uturuwela woona.”
42 Vano, Yesu ahomwiirela: “Pooti woona. Waamini waa uhoovoniha.”
43 Ni woohipica, uyo ahopacera woona ni ahontthara Yesu, anttottopelaka Nluku. Hataa ciicammo, atthu otheene yoonile iyo itthwiiyo, yahopacera unttottopela Nluku.
