Ihapari Comaana Cantikhiye ni Luka 19:1-48
19 Vano, Yesu ahophiya u Jeriko ni aaneera uvira iyo isittattiiyo.
2 Nwo, ahaavo nlopwana mmoca eehaniya Zakeu, uyo aari nhooleli aanamaliviha nsokho ni aari thaciri.
3 Uyo ampheela umoona Yesu, masi, nlattu woocara atthu nne nipuronne uyo khaakhitiri umoona, kontha aari nlopwana ookhuvyaa.
4 Phimaana, Zakeu ahotthawelela uhoolo ni ahowela mmwiirini uneehaniya Sikoomoru, wiira ukati waahalaawe uvira Yesu, amoone.
5 Ukati Yesu waaphilyaawe nipuro naaryaaya uyo mwiryuuyo, ahoweha nculu ni aheera: “Zakeu, ukhuruwe woohipica, kontha ilelo kinlukama uwannyaa.”
6 Vano, uyo ahokhuruwa woohipica, ni uyo ahomwaakhela Yesu uwannyawe, natteeliye nrima.
7 Vano, atthu woona waya iyo itthwiiyo, yahancera uttekutta, yiiraka: “Uyo rweele ulukama wa namatampi.”
8 Zakeu ahunwa ni ahowiirela Apwiiya co: “Pwiiya, nkiviriyane, mphantte nkhwaawe wo mihakhu kirinaaka kinawaavaha amasikhini, ni citthu cotheene kinnyilyaaka kinawaaturusela asineene, kinwunceraka ikwaha cese.
9 Yesu ahomwiirela: “Ilelo ila inupeela uhokela woopwaa, kontha ula ciicammo, mwaana Aparahaamu.
10 Kontha Mwaana Apinaatamuo aawile uwaavya ni uwoopola ale yaarimenle.”
11 Ukati attharyaawe weewelelaaya nnya citthunnya, uyo ahaattonkela nlattanihero nimoca, kontha ayo yahaattamela u Yerusalemu ni ayo yoopuwela wiira Umwene wa Nluku waahala uwa woohipica.
12 Vano, Yesu aheera: “Nlopwana mmoca onloko no mamwene, ahorwaa ilapo yoottayi wiira akhale mwene ni nuuturuwa.
13 Aheehana ipottha cawe 10 ni ahovaha nsurukhu* ni aheerela: ‘Mumpanke nakoso nuula nsurukhuula mpaka kinhalaaka uturuwa.’
14 Masi atthu olapo yaakhalaawe yaanonthanya ni yahoruma ikhurupu yaatthu uttuli wawe wiira yiire: ‘Hi khanimpheela wiira ula nlopwanoola akhale mweneehu.’
15 Vano, uturuwa wawe nari mwene, aheehana ipottha cawe cotheene caavahilyaawe nsurukhunnyo, wiira acuwele iluukuru caaphwanyilyaaya umweetta waya nakoso.
16 Vano, oopacerooyo ahowaattamela ni aheera: ‘Pwiiya, nsurukhu mwaakihiyenreenyuyo, kihophwanyera iluukuru imaara 10.’
17 Vano, nlopwanooyo aheera: ‘Uhopanka saana nanteko omaana! Ukhala wiira weeva uheethoonyera ukhala ookhuluvelya ni itthu yankaani, ulamuleleke isittatti 10.’
18 Uwa wawe onayeelyuuyo, aheera: ‘Pwiiya, nsurukhu mwaakihiyenreenyu, kihophwanyera iluukuru imaara 5.’
19 Uyo nlopwanooyo ahomwiirela onayeelyuuyo co: ‘Weeva ciicammo ulamuleleke isittatti 5.’
20 Masi nkinooyo ahowa ni aheera: ‘Pwiiya nsurukhu mwaakihiyenrenyuuyo phuula, kaavithile munttapwattani.
21 Miiva kanwoovani, kontha nyuuva ntthu ootakhala nrima; nnaacisa itthu ihiri ihisunkileenyu ni nnaahepha ile ihanleenyu.’
22 Vano, uyo, aheera: ‘Nlattu womoolumacerwaa, mi kinawuuhukhumu, nanteko ootakhala nrima. Maanaaya weeva wancuwela wiira miiva kinkusa ihiri yawaka ni kinhepha itthu ihanlyaaka?
23 Vano, kontha isiyani uhirwannyaa usunka nsurukhwaaka upanku, wiira katuruwaka kiphwanye unoncereriye?
24 Vano, nlopwanooyo ahowiirela atthu otheene yaari nne nipuro nne: ‘Mmwaakhe nsurukhu urinaawe ni munvahe ule phwanyenre iluukuru imaara 10.’
25 Masi atthwaayo yahaakhula, yeeraka: ‘Pwiiya, uyo hophwanyera iluukuru imaara 10 nsurukhu mwanvahileenyu!’
26 Uyo ahowaakhula: ‘Kinoohimeeryani ikhweeli wiira ule rina citthu cinci, naahala wuncereriya; masi ule hirina hataa itthu, hataa irinaawe vakaani naahala waakhiya.
27 Uhiya commo, mwaawaane atthu otheene ahitthunne wiira mi kikhale mwene wiira kaalamulele ni nwiive kiwoonaka.’”
28 Umaliha wawe uhimya nnya citthunnya, uyo ahokhuma arwaaka u Yerusalemu.
29 Ni ukati waattamenlyaawe u Petifase ni u Petaaniya, uneehaniya umwaakoni wooliveera, ahaaruma attharyaawe eeli,
30 eeraka: “Nrwee aliteeya ari uhoolo winyu ni mwaphiyaka nwo, nnaahala umphwanya puuru mwankaani hinatoko uweliya, natthukeleliye. Muntthukule ni munwaane va.
31 Masi ntthu ookohakani: ‘Nlattuni nnontthukuleenyu?’ Mwiire: ‘Apwiiya anampheela.’”
32 Vano, ale yaavelelihiye yahorwaa ni yahomphwanya puuruuyo khampa Yesu caahimilyaawe.
33 Masi, ukati wantthukulaaya mwaapuuruuyo, asineennyaayo yahaakoha: “Nnontthukulelani mwaapuuruuyo?”
34 Ayo yahaakhula, yiiraka: “Apwiiya anampheela.”
35 Vano, yahonkusa mwaapuuruuyo mpaka nipuro naaryaawe Yesu ni yahaatala ikuwo caya coovate waculu mwaapuuruuyo wiira Yesu anwele.
36 Ukati Yesu weettaawe arwaaka uhoolo, atthwaayo yaanaatalaca ikuwo caya mparapaarani.
37 Vano, waattamela wawe iphiro inkhuruwela umwaakoni wooliveera, attharyaawe otheene yahopacera utteeliya, yanttottopelaka Nluku nlattu wo citthu cotheene cootikiniha yoonilyaaya,
38 yiiraka: “Ooreerihiya phuule nowa khampa Mwene mwancina na Yehova! Nikhale nnema wiirimu ni attitthimihiye Nluku owiirimu!”
39 Masi, mafariseu yaari iriyari yaayo atthwaayo, yahomwiirela: “Mwiitthucihi, mwaamaalihe attharyiinywaayo.”
40 Masi Yesu ahowiirela: “Kinoohimyeerani wiira ala atthwaala yaamanle, maluku phaahala ukhuwela.”
41 Ni, ukati Yesu waattamenlyaawe u Yerusalemu, ahoweha iyo isittattiiyo ni ahonlela,
42 eeraka: “Unari wiira nyuuva, iyee, nyuuva mwancuwela citthu caahala wuuwaanelani nnema. Masi vano nyuuva nhovitheliya nnyo citthunnyo.
43 Kontha anaahala uphiya mahuku, awananeenyu unhalaaya wuurukureeryani nimapotto oothokoliya, ni ayo anaahala wuwaanelani masakha.
44 Ayo anaahala wuukwanyulacani nyuuva naasaaniinyu, ni khanivo nluku hataa nimoca ninhala uhala vaa woohimalamalihiya, kontha uhophiya ukati woohukhumwiya, masi nyuuva khancuwelenle.”
45 Vano, ahokela ntempulu ni ahopacera uwoomola atthu yaatumihaca,
46 awiirelaka: “Uhantikhiya: ‘Inupaaka ikhanle inupa yomavekelo,’ masi nyuuva mpankile nikhuku nomalatarawu.”
47 Uyo khaahiyerera wiitthuciha ntempulu masi, ahooleli aanankuttho, anamantikha ni ahooleli aapoovu yammwaavya wiira amwiive.
48 Waahookhalaru commo, khayoona mananna oomwiiva, kontha apoovu otheene yaanonviriyana sana-saana.
Notas
^ Niikereeku: “imiina.” Imiina yaakereeku yaalemela ikaraama 340, ni yaavaleriki idracma 100. Imiina imoca, waakhala nsurukhu waakhelaawe nanteko avaraka nteko myeeri miraru.
