Ihapari Comaana Cantikhiye ni Luka 2:1-52
2 Ale mahukwaale, Seesari Akustu ahokumihera nlamulo neera wiira apoovu otheene yahaana yiicantikhihaka.
2 (Nwo wantikhiya* waatthunwo waapancere ukati Kiriinu waaryaawe Kovernatoore u siiriya.)
3 Vano, atthu otheene yahorwaa wiicantikhiha, khula ntthu usittatti wawe.
4 Yusufu ciicammo ahokhuma u Kalileya, waari isittatti yo Nasaree yaakhalaawe, ni ahorwaa u Yuteya, isittatti ya Davidi, yeehaniya Pelee, kontha aayariye nloko na Davidi.
5 Ahokhuma nkhayi ni Maria, amwaarawe, wiira yantikhiye ni yaahanle mahuku vakaani oopheela Maria uyara.
6 Anari wonwo, wahophiya ukati Maria woopheela uyara.
7 Ni Maria ahonyara mwaana mwanlopwana oopaceriya, ahonkhuneela niikuwo ni ahomwaatalela nipuro naalyaaya inama muncicini, kontha khanaarivo nipuro noopheela umaka.
8 Ciicammo, yooyo ncokooyo, yahaavo amakampuci yaakhala woonene ni yaakhaliha inama caya uhiyu.
9 Woohipica, nlayikha na Yehova nahaakhumelela yaale amakampucyaale, ni waarya wa Yehova wahaamwaleela ni ayo yahoova cinene.
10 Masi nlayikhanno nahowiirela co: “Nhoove, kiwaale vaa wiira kuuhimeeryeni ihapari comaana, cinhala waatteeliha nrima apoovu otheene.
11 Ilelo, isittatti ya Davidi, nhoyareliya moopoli, khanle Kristu, Apwiiya.
12 Ni nna phikhanle nthoonyero: nnaahala umphwanya mwaana ommatatani, nakhuneelaciye niikuwo nipuro ninlyaaya inama.”
13 Woohipica, yahowa malayikha menci owiirimu ni yahotakaneela ninne nlayikhanne, ni yahopacera unttottopela Nluku yeeraka:
14 “Attottopeliye Nluku o wiirimu, ni watuninyani vaa akhale ninnema ale anontteeliha nrima Nluku.”
15 Vano, malayikhaayo uturuwela waya wiirimu, amakampuci yaheerelana ayaayooru co: “Nttwee u Pelee noone citthu ciirannyeele, cinihimenryaawe Yehova.”
16 Ni yahorwaa woohipica ni yahomphwanya Maria ni Yusufu nkhayi ni mwaanooyo, naataleliye nipuro naalyaaya inama.
17 Umoona waya, yahohimyaca citthu cotheene yaahimeriyaaya, aaciyaka uyo mwaanooyo.
18 Ni atthu otheene yeewile citthu cotheene amakampuci yaahimilyaaya, yahokhala ootikhinihiya venci.
19 Masi Maria ansunka wanrimani wawe citthu cotheene ceewaawe ni wuupuwela citthu caataphulelaaya.
20 Vano, amakampuci yahoturuwa yanttitthimihaka ni yanttottopelaka Nluku, nlattu wo citthu cotheene ciiwilyaaya ni coonilyaaya, khampa caahimeriyaaya.
21 Upiiha wawe mahuku 8, ukati woopheela wuulihiya, ahovahiya ncina Yesu, ncina aavahiyaawe ninlayikha hinaaya uyariya.
22 Uphiya waya ukati woopheela otheene caya ureerihiya, toko naahimyaaya nlamulo na Moceesi, Yusufu ni Maria yahorwaa u Yerusalemu wiira yanvaherere mwaanooyo wa Yehova,
23 toko naahimyaaya nlamulo na Yehova: “Asaana asilopwana oopaceriya uyariya ahaana uvahereriya wa Yehova.”
24 Vano yahovaha itthuvo khampa nlamulo na Yehova caahimyaaya: “Maciya meeli awula ikhuntta piili cooyevaca.”
25 Ahaavo nlopwana mmoca u Yerusalemu eehaniya Simeawu, uyo aari nlopwana eettela isariya ni aamoova Nluku, anweherera umaalihiya waapoovu Asarayeli, ni nnepa wowaarya waari nuuyo.
26 Uhiya commo, ninnepa wowaarya, Nluku ahonhimyeerya wiira khaahala ukhwa hinamoona Kristu a Yehova.
27 Coo, ahooleliyaka ni nnepa wowaarya, Simeawu ahorwaa utempulu. Ni asithumwaane Yesu yahonrwaana ntempulu wiira yampanke itthu yaapankesiya, khampa caahimyaaya Nlamulo;
28 uyo ahonteesa mwanhimooyo, ahonttottopela Nluku ni aheera:
29 “Pwiiya, nna coo kinaahala ukhwa ninnema, toko caahimileenyu,
30 kontha kihomoona moopoli munrumileenyu,
31 muntthenkacileenyu iriyari yaapoovu otheene,
32 uyo khanle nthuko unhala umalamaliha ipiphi yaapinaatamu ni unhala uwaana uttitthimihiya waapoovweenyu, Asarayeli.”
33 Vano, athumwaane ni anumwaane mwaanooyo, yahokhala ootikhinihiya nlattu wo citthu yeewaaya cuulumiyaka aaciyaka uyova.
34 Uhiya commo, Simeau ahaacaaliha ni aahowiirela anumwaane mwaanooyo: “Nkiiwe! Nlattu wo ula mwaanoola Asarayeli akiina anaahala umora, ni enci aanaahala wunwa, ni iyo inhala nthoonyero wiira Nluku ri nuuyo, masi atthu enci anaahala unthanya.
35 Uyo hothanliya wiira athoonyihere mirima caatthu enci, masi weeva, unaahala uhuva khampa ntthu oohomiya nimwaalo woorekama.”
36 Yahaavo ciicammo, athiyana porofeeta yeehaniya Ana, yaari mwaana a Fanueli, nloko na Aseri, ayo athiyanaayo yaari owuuluvala ni yahoviriha myaakha 7 paasi anatheliye.
37 Ni ayo athiyanaayo yaari nankhweli, ni yaarina myaakha 84. Ayo khaayakhuma u tempulu, yavaraka miteko ca Nluku uhiyu ni uthana, yantthuka* ni anlompaka.
38 Ayo athiyanaayo yahaattamela nne nipuronne yooyo ukatyuuyo, ni yahopacera unttottopela Nluku. Ni amuulumaka mwaanooyo, ahaahimerya atthu otheene yaaweherera woopoliya u Yerusalemu.
39 Vano, wiirannya waya citthu cotheene toko caahimyaaya nlamulo na Yehova, yahoturuwela uwannyaya u Kalileya, isittatti yo Nasaree.
40 Ni uyo mwaanooyo khaahiyerera wunnuwa, ukhala okuru ni anvira atepaka ucuwelaca; ni Nluku khaahiyerera unkavihera.
41 Myaakha cotheene, asithumwaane Yesu yanrwaa u Yerusalemu wiira yeette Isukuhuulu* Yopaasikuwa.
42 Ni ukati Yesu aarinaawe myaakha 12, asithumwaane yahorwaa usukuhuuluni yopaasikuwa, khampa caalamalenlyaaya.
43 Umala waya isukuhuulu yopaasikuwa, ayo yahancera nkwaha wooturuwela uwaani, masi Yesu ahohala u Yerusalemu, asithumwaane woohicuwela.
44 Yoonihaka toko wiira Yesu aari nkhurupuni yaaturuwela uwaani wamoca naayova, ayo yaheetta ikwaha yo nihuku nimoca, vano yahopacera umwaavya, yaakohakohaka amucyaaya ni atthu yaacuwelaaya.
45 Masi ukhala wiira khayaamoona, yahoturuwela u Yerusalemu ni yahomwaavya khula nipuro.
46 Uvira waya mahuku mararu, yahomphwanya nari ntempulu nonkomile iriyari yaatthu yeetthuciha aaviriyanaka ni aakohakohaka.
47 Masi atthu otheene yanviriyana yankhala ootikhinihiya, nlattu womananna ceeweehaawe ni caakhulaawe.
48 Masi asithumwaane waamoonilyaaya, yahokhala ootikhinihiya ni anumwaane yahomwiirela: “Mwanaka unipankenleni ila itthwiila? Mi naathumwana nahosanka cinene ni khanimala uwaavya.”
49 Masi, Yesu ahowaakhula eeraka: “Nlattuni mwaakaavyeenyu? Nyuuva khamwaacuwela wiira mi kahaana kakhalaka nnupani waapaapa?”
50 Masi ayo khayeeweehile itthu Yesu yaahimilyaawe.
51 Vano, Yesu nkhayi naasithumwaane yahoturuwela u Nasaree, ni Yesu khaahiyerenre uwiiwelela asithumwaane. Ni anumwaane yansunka wanrimani waya khula itthu yaamwiiwaaya.
52 Ni Yesu aanonnuwa ni ucuwelaca wawe weera wuncereryaaka ni uyo ancivela wamiithoni wa Nluku ni waapinaatamu.
Notas
^ Awula: ntthitto
^ Nlattu wo ittiini, ahaavo mahuku ayuta yaalakelakaaya uhilya.
^ Awula: “ifesta.”