Ihapari Comaana Cantikhiye ni Luka 20:1-47
20 Nihuku nimoca, Yesu awiitthucihaka apoovu ntempulu ni alalyeeraka ihapari comaana, akhulupale aanankuttho, anamantikha ni mahumu aapoovu yahowa
2 ni yahonkoha yiiraka: “Unihimeerye, tipani oovahile ikuru yoopanka nnya citthunnya? Mena tipani oorumile wiira upanke nnya citthunnya?”
3 Yesu ahowaakhula, eeraka: “Ni miiva ciicammo, kinawuukohani itthu imoca ni nyuuva nkaakhule.
4 Mpattiso wa Joau, waari wa Nluku awula waari waapinaatamu?”
5 Ayova yaahancera woopela mwaha iyo itthwiiyo yiirelanaka: “Neeraka vale: ‘Wo wiirimu,’ uyo naahala unikoha co: ‘Vano kontha isiyani khammwaaminni?
6 Masi neeraka wiira waari waapinaatamu,’ atthu otheene anaahala univonyakaca nimaluku, kontha ayo ankupali wiira Joau aari porofeeta.”
7 Phimaana, yahomwaakhula Yesu yiiraka wiira khancuwela unkhumaaya.
8 Vano, Yesu aahowiirela co: “Ni miiva ciicammo akinoohimeeryani tipani kivahile ikuru yoopanka nnya citthunnya.”
9 Vano, Yesu ahopacera waahimeerya apoovu nlattanihero nimoca, eeraka: “Nlopwana mmoca ahaana imattaawe yo uuva, vano ahowaacimiha anamalima ni ahorwaa ilapo ikhwaawe. Ni nwo ahokhala ukati mwinci.
10 Waaphiyalyaaya ukati woohephiya mihokorokho co uuvannyo, mwaneene imattooyo ahonruma nantekwaawe urwaa uwoonanana anamalima yaawaacimihilyaawe imattaawe, wiira avahiye mihokorokho. Vano, anamalimaale yaahomwaattakaca ni yaahomoomola woohinvaha itthu.
11 Masi uyo nlopwanooyo ahonruma-tho nanteko nkhwaawe. Uyo ciicammo ahaattakaciya, wuulihiihaciya muru nuwoomoliya woohicisa itthu.
12 Uyo ahonruma-tho nanteko oneeraru ni uyo ciicammo ahorakalihaciya ni ahoomoliya.
13 Vano, mwaneene imattooyo aheeciirela: ‘Kinhala upankani?’ Kinanruma mwanaka kinonfentaaka. Atthunaka uyo anaahala unhisima.
14 Anamalimaayo umoona waya, yahanca wuupuwela ayaayoru, yiirelanaka: ‘Ula phinhala uhalana ila imatteela. Vano, nttwee nimwiive wiira imatteeyo ikhale yawihu.’
15 Vano, yahonvonyera vate waya imatteeyo ni yaahomwiivela wonwo. Vano moonelweenyu, mwaneene imattooyo aahala upankani?
16 Uyo naahala uwa ni uwiivakaca anamalima otheene, ni uwaacimiha imatteeyo anamalima akhwaawe.”
Atthwaayo wiiwa waya nno nlattaniheronno, yaheera: “Iyo itthwiiyo ihiirannye!”
17 Yesu aahaweheeha atthwaayo ni ahaakoha, eeraka: “Vano, intaphulela isiyani itthu yantikhiye yiiriyaka: ‘nluku anamateka naakhottilyaaya, nenno nihokhala nluku nootepa ukhalana ifayita?’
18 Ntthu nohala umorela waculu waya nno nlukunno, irutthwaawe inaahala ukawannyaaca. Ni ule ninhala ummorela nno nlukunno, naahala unyakatyaaca.”
19 Anamantikha ni akhulupale aanankuttho yaahaavya mananna oopheela unvara Yesu ule ukatyuule, kontha yaahoona wiira nlattanihero naapankilyaawe aawaaca ayova, masi yaanaawoova apoovu.
20 Ni unweheeha waya, yahaaruma alopwana mmwiitihoni wiira yiikhalihe khampa anasariya ni yanvarihace Yesu ni citthu cuulumaawe, wiira anrwaane waakhulupale okuvernu.
21 Vano, ayo yahonkoha co: “Mwiitthucihi, nnawuuluma ni nnawiitthuciha nimananna omaana ni khannonthanla ntthu, masi nniitthuciha iphiro ya Nluku, ikhanle yokhweeli:
22 “Niireke ikhanle itthu yomaana awula mena hiiva unliva nsokho Seesari?”
23 Masi Yesu ahocuwela moopuwelelwaaya ni ahowiirela:
24 “Nkoonihere itenaariyu imoca. Ila ilataratweela vaa ni nna ncinanna vaa naapani?” Ayo yahaakhula, yiiraka: “Ca Seesari.”
25 Yesu aahowiirela co: “Paasi, munvahe Seesari ile ikhanle ya Seesari, ni munvahe Nluku ile ikhanle ya Nluku.”
26 Ayo khayaakhitinri unvarihaca nimoolumwaawe. Vano, ayo yaahotikhinihiya nimananna yaakhunlyaawe ni yahomaala.
27 Vano masatuseu aneera wunwelela waatthu ookhwa khuuvo, yahorwaa mpaka nipuro naaryaawe Yesu ni yahonkoha:
28 “Mwiitthucihi, Moceesi honantikhela co: ‘Wakhala wiira nlopwana nakhwa ni nawaahiya amwaarawe woohaayarana asaana, mwaamunnawe haana anthelaka uyo nthiyanooyo wiira anyarele asaana munnaawe.’
29 Yahaavo alopwana 7 yaari ntthu ni mwaamunnawe. Oopacerooyo ahothela, masi uyo ahokhwa hinaaya waayara asaana,
30 vano onayeelyuuyo
31 ni oneeraruuyo aahonthela nankwelyuuyo. Alopwana 7 otheene yahonthela ni ayo yaahokhwaca woohaayara asaana.
32 Wiimaleloni, ciicammo ahokhwa nthiyanooyo.
33 Vano, waphiyaka ukati unhalaaya wunwelelihiya atthu, tipani nhala ukhala amwaarawe? Ukhala wiira alopwana otheene o 7 yaahonthela.”
34 Yesu ahowaakhula eeraka: “Atthu oola olumwenkuula anaathela ni anaatheliya,
35 masi ale anooniya wiira phinaaphwanela ukela ulumwenku woohoolo unwa, yonwelelihiyaka khaavo alopwana nohala uthela ni athiyana nohala utheliya.
36 Khweeliini, ayo khanhala-tho ukhwa, kontha anhala ukhala khampa malayikha, ukhala wiira anaahala wunwelelihiya wiira akhale asaana a Nluku.
37 Masi, naacaka wunwelelihiya waatthu ookhwa, hataa Moceesi hoonihera nlivuruni oopelaawe mwaha mwiri waapharela mooro, anhimyaka wiira Yehova khanle Nluku Aparahaamu, Nluku a Isaaki ni Nluku a Yakopi’.
38 Uyo khanakhala Nluku aatthu ookhwa, masi Nluku aatthu arina ukumi, kontha, wamiithoni wa Nluku atthu otheene ari akumi.”
39 Woomwaakhula, anamantikha akiina yaheera: “Mwiitthucihi, nhooluma saana.”
40 Kontha ayo khayoona-tho itthu yoopheela unkoha.
41 Vano, Yesu ahaakoha, eeraka: “Nlattuni nneereenyu Kristu mwaana a Davidi?
42 Kontha Davidi hantikha nsaalimuni eeraka: ‘Yehova homwiirela Pwiiyaaka: “Wonkome moonwaaka wonlopwana,
43 mpaka wanhalaaka uweesa awanannyaa vathi inyaa caa.’
44 Davidi nomwiihana Kristu Pwiiya. Vano, nokhala cani mwanawe?”
45 Ni ukati apoovu otheene yanviriyanaaya Yesu, uyo aahowiirela attharyaawe co:
46 “Ratta naanamantikha anwara ihancu coorekama, unaacivela usalaamihiya waatthuni ni wonkoma ikhatera coopacera mmasinakooka ni mmafestani,
47 ni ayo anawennya mihakhu caanankhweli ni ampanka mavekelo yuulumaka citthu cinci wiira yooniye. Uhukhumwiiya waya unhala ukhala wooweryaa cinene.
