Ihapari Comaana Cantikhiye ni Luka 21:1-38
21 Vano, ukati Yesu waawehaawe ikoofiri caaheliya nsurukhu, ahowoona mathaciri yahelaka nsurukhu mwinci nkoofirinimmo.
2 Ciicammo, ahomoona nankhweli mmoca owuuluvala ni masikhini arwaaka uhela misurukhu miili caarina ifayita vakaani paasi,
3 ni aheera: “Kinoohimeeryani ikhweeli wiira: Ule nankhweli masikhinnyuule, phivahile nsurukhu mwinci waavikana atthu otheene.
4 Kontha mathaciri otheene ahenle nsurukhu waahalannyaaya, masi ule nankhwelyuule nuuhuva wawe hovaha nsurukhu wotheene waakhuluvelaawe.”
5 Nuuwakatyaaya, ukati atthari a Yesu akiina yaattottopelaaya itempulu, mananna caareerihaciyaaya ni micanko caavahiyaawe Nluku,
6 uyo aheera: “Citthu cotheene nnooneenyu, unaahala uphiya ukati uhinhalaaya ukhala va hataa nluku nimoca, yakwanyulaciyaka.”
7 Attharyaawe yaahonkoha co: “Mwiitthucihi, nnyo citthunnyo cinhala wiirannya yaakhani? Ni isiyani inhala uthoonyera wiira nnyo citthunnyo cihanle wiirannya?”
8 Uyo aheera: “Ratta, wiira hikhale nohala wuuthepyani, kontha enci anaahala wiisipasipera ncinanaka, yeeraka: ‘Phi miiva,’ ni ‘Ukati waahimiye uhophiya.’ Nhiwiiwelele ni nhaatthare ayo atthwaayo.
9 Mwiiwaka cuulumiyaka ikhotto ni uhiiwananiya, nhoove, kontha nnyo citthunnyo cihaana cikhumelelaka tokoni, masi umala woolumwenku khuunaphiya ukatyaaya.”
10 Vano, ahowiirela: “Ilapo inaahala waanihana niilapo ikhwaaya, ni umwene unaahala waanihana nuumwene nkhwaaya.
11 Unaahala ukhala uttettemela wotthaya mapuro menci, inaahala uthwaa iyoolya, cinaahala ukhumelela iretta coovirikana ni atthu anaahala woona citthu cowoopiha ni mathoonyero moolupale wiirimu.
12 Masi, cihineerannya nnyo citthunnyo, nyuuva nnaahala utthukiya ni ulupatthiya, nnaahala urwaaniya waahooleli ommasinakooka, mmakhattya ni nnaahala urwaaniya womamwene ni waakhulupale nlattu woncina naka.
13 Ni iyo inaahala uwiirihani uvaha usaahiti.
14 Phimaana, nhimananihe wiitthenkaca wanrimani winyu mananna oorwaa wiicaakiha,
15 kontha mi kinaahala wuuvahani itthu yowuuluma ni ucuwelaca, mpaka awananiinyu khanhala ukhitiri uwaakhulani itthu.
16 Uhiya commo, nyuuva nnaahala uvarihiya hataa naasithumwaninyu, naamuciinyu, naapatthaniinyu ni akiina, iriyariinyu, anaahala wiiviihiya naayo atthwaayo,
17 ni nyuuva nnaahala uthanyiya naatthu otheene, nlattu woncina naka.
18 Masi hataa ikharari imoca yommuruni winyu khinhala urihyaa.
19 Nlattu woovilela winyu, nnaahala woopola ukumiinyu.
20 “Phimaana, moonaka isittatti yo Yerusalemu inarukureeriye naanatoropa, ncuwele wiira uhaattamela utankanyiya waya.
21 Vano, ale anhala uphwanyiya u Yuteya ahaana yatthawelaka mmamyaakoni, anhala uphwanyiya u Yerusalemu akhume, ni ale anhala uphwanyiya anari mmamattani ahituruwele nsittatti,
22 kontha ayo anhala ukhala mahuku Nluku nohalaawe waahukhumu atthu, wiira ciirannye citthu cotheene cihimiye nhina Cowantikhiya Cowaarya.
23 Ankootakhaliya athiyana eerukulu ni athiyana anhala ukhalana mwaana hinahiya waamwa uyo ukatyuuyo, kontha ayo mahukwaayo, anhala ukhala mahuku omasakha ni uviruwa wa Nluku unaahala waaphwanya ala apoovwaala.
24 Ni ayo anaahala wiivakaciya niikatana, ni anaahala ucisiya wiira yapankiye ipottha conlaponi cotheene, ni Yerusalemu naahala unyakeliya naamalaponi, mpaka unhalaaya umala ukati waamalaponi.
25 Uhiya commo, anaahala ukhala mathoonyero muncuwani, mmweerini ni ntthonttwani ni, watuninyani, atthu anaahala usanka, mpaka khanhala ucuwela itthu yoopanka.
26 Atthu anaahala woova cinene, yawehereraka citthu cinhala wiirannya ntuninyani motheene unkhaliya, kontha ikuru cowiirimu cinaahala uttikhinyiya.
27 Vano, anaahala umoona Mwaana a Pinaatamu awaaka mmahutteni, niikuru ni nuuttitthima uhinlikananiya.
28 Phimaana, capaceraka wiirannya nnya citthunnya, mweemele ni mweemese murwiinyu, kontha woopoliya winyu uhaattamela.”
29 Vano, Yesu ahaahimerya nlattanihero nimoca eeraka: Nweheehe mwiri wofiiku ni miri cotheene cikiina.
30 Ukati nnooneenyu ciphuwaka nnyo mirinnyo, nyuuva nnaacuwela wiira ilimwe ihaattamela.
31 Inanna imocaaru, moonaka nnya citthunnya ciirannyaaka, ncuwele wiira Umwene wa Nluku uri wakhiviru.
32 Kinawuukhuluvelihani wiira atthu o mahukwaala khanhala umalamala nnya citthunnya ciheerannyeele cotheene.
33 Irimu ni ituninya cinaahala uvira, masi moolumwaaka khanhala uvira hataa vakaani.
34 “Ratta wiira nhikhale niiwasiwaasi wanrimani winyu, nlyaaka venci ni nwuryaka venci ni nkhalelaka iwasiwaasi citthu co ila ituninyeela, wiira nno nihukunno nihuuphwanyeni woohicuwelela,
35 khampa itapha. Kontha nno nihukunno ninaahala waaphwanya atthu otheene owatuninyani.
36 Phimaana, nhiitthaale ni nlompe nlepelaka isontte woohihiyerera, wiira mwaakhitiri woopwa ceerannyaaka nnyo citthunnyo, ni mwaakhitiri weemela uhoolo wo Mwaana a Pinaatamu.”
37 Vano, uthana, eetthucihaka utempulu, masi wiilaka, uyo aarwa urupa umwaakoni wooliveera.
38 Ni apoovu otheene, yampeherya wicisuuru utempulu wiira yanviriyane Yesu.