Ihapari Comaana Cantikhiye ni Luka 22:1-71
-
Anankuttho anaaleehana umwiiva Yesu (1-6)
-
Utthenkaciya wo Paasikuwa oomalela (7-13)
-
Upacerihiya uliya Iyoolya Yoohiyu Yaapwiiya (14-20)
-
“Ule nohala ukivariiha ri nkhayi ni miiva va wameecani va” (21-23)
-
Atthari anaanyakuliherana tipani unomphwanela khanla muulupale iriyaryaaya (24-27)
-
Nleehano na Yesu no Umwene wa Nluku (28-30)
-
Yesu naahimya wiira Peturu naahala unkhotta (31-34)
-
Wiitthenkaca, ikatana piili (35-38)
-
Nivekelo naapankilyaawe Yesu u mwaakoni wo Oliveera (39-46)
-
Yesu naatthukiya (47-53)
-
Peturu nankhotta Yesu (54-62)
-
Yesu naatarawaciya waatthuni (63-65)
-
Yesu naahukhumwiya u Sinedriyu (66-71)
22 Yahaattamela ifesta yophaawu coohiheliya ifermentu, ineehaniya Paasikuwa.
2 Nlattu woowoova apoovu, ahooleli aanankuttho ni aanamantikha yaanaavya ukati womaana woopheela unvara Yesu.
3 Vano, Yuuta, eehaniya Iskariyote, aapanka mphantte wo maapostolu 12 a Yesu, ahokeliya ni Sotwani,
4 ni uyo ahorwaa uwoonanana ahooleli aanankuttho ni ahooleli ontempulu, wiira awuulumane mananna caahalaawe unvariiha Yesu.
5 Wiiwa waya iyo itthwiiyo, ayo wahaatteela nrima cinene ni yaahonkhuluveliha unvaha nsurukhu woparaata.
6 Phimaana, uyo ahotthuna ni ahanca waavya ukati womaana wiira anvariihe Yesu wohicuweleliya nintthu.
7 Nahophiya nihuku nofesta cophaawu coohiheliya ifermentu, nihuku caavahiya itthuvo co Paasikuwa;
8 Vano, Yesu ahonruma Peturu ni Joau, eeraka: “Nrwee, mwatthenkace iyoolya yo Paasikuwa wiira nilye.”
9 Ni yahomwiirela: “Nnopheela nantthenkaceke vayi?”
10 Ni uyo ahowiirela: “Nkiviriyane: Mwaphiyaka usittatti, naahala wuuphwanyani nlopwana nacisile mwaapu wo maaci. Muntthare ni nkele inupa nohalaawe ukela.
11 Ni mwaamwiirele mwaneene inupooyo co: ‘Mwiitthucihi enre: Irivayini isaala yaaletto wiira kinlye paasikuwa wamoca naattharyaaka?’”
12 Ni uyo nlopwanooyo naahala uwooniherani isaala yuulupale yooculu yorerihaciya. Vano mwantthenkace wonwo.”
13 Ni ayo yahorwaa ni yahophwanya citthu cottheene khampa Yesu caahimilyaawe, ni yahotthenkaca iyoolya yo Paasikuwa.
14 Uphiya waya iwoora, Yesu wamooca nimaapostolwaawe, yahonkomaca anaphitenrye meeca.
15 Ni ahowiirela: “Kampheela venci unlya ula Paasikuwoola nkhayi ninyuuva kihinaaya uhuva.
16 Kontha kinoohimeeryani wiira: Akinhala uturuwela-tho unlya Paasikuwa mpaka unhalaawe umaliheriya Muumweneni wa Nluku.”
17 Yesu ahaakhelela ikoopu yoviinyu, aholompa ni aheera: “Nciseke ila ni nkaweelaneke atthu otheene,
18 kinoohimeeryani wiira: Ikhumelo ilelo mpaka wahoolo, akinturuwela-tho uwurya iviinyu yo uva mpaka unhalaaya uwa Umwene wa Nluku.”
19 Uyo ciicammo ahocisa iphaawu, aholompa, ahomyaaniha ni ahaavaha attharyaawe, eeraka: “Ila inthoonyera irutthwaaka, inhala uvahiya wiira yuphwanyiheni ifayita. Nhihiyerere upanka ila itthwiila nkuupuwelelaka.”
20 Uyo ahopanka itthu imocaaru niikoopu yoviinyu, umaliha waya ulya, eeraka: “Ila iviinywiila inthoonyera iphomyaaka yonleehano nonaanaano, inhala umwarusiya wiira yuuphwanyiheni ifayita.
21 “Masi ncuwele wiira, ule nohala ukivariiha ri nkhayi ni miiva va wameecani va.
22 Khweeliini, Mwaana a Pinaatamu naarwaa, toko cantikhiyaaya, masi hotakhaliya ule nohala unvariiha!”
23 Vano, attharyaawe yahopacera ukohakohana yaayooru yapheelaka uncuwela tipani aahala upanka iyo itthwiiyo.
24 Masi, ayo ciicammo yahopacera unyakulihana yapheelaka uncuwela tipani aari muulupale iriyaryaaya.
25 Masi Yesu ahowiirela: “Mamwene o watuninyani ahaana ukhulupale ni atthu anaahoolelaaya, ni aneehaniya ‘atthu oopanka citthu comaana’.
26 Nyuuva kannolamuliya ukhala toko ayo. Masi ule khanle muulupale iriyariinyu haana akhalaka khampa mmirawo, ni ule nohoolela haana akhalaka khampa nanteko.
27 Tipani khanle muulupale: niireke ule onkomile wameecani awula ule novara nteko? Keera ule ri wameecani? Masi mi kiri iriyariinyu khampa nanteko.
28 “Masi, nyuuva mwaari ni miiva ukati waattehattehiyaaka;
29 ni miiva kinawuupankanani nleehano nomuumweneni, khampa Apaapa apankilyaaya nleehano nimiiva,
30 wiira nlye ni unwurye wameeca waka, Muumweneni waka ni munkome ikhatera ceemwene ni nhukhumu maloko 12 o Isarayeli.
31 “Simau, Simau, uviriyane: Sotwani mpheela wiira otheene cinyu nveeriye khampa itiriku.
32 Masi kinaalompaka kilepelaka isontte wiira waamini waa uhilolovace; wiira weeva, waturuwelaka, waalipihe mayamunnaa.
33 Vano, uyo aaheera: “Pwiiya, mi kiri owiitthenkaceene wiira kuutthareni nipuro thi nipuro nnohaaleenyu urwaa, pooti ukhala utthukeliya nkhattya awula ukhwa.
34 Masi Yesu ahomwiirela: “Peturu, kinoohimeerya eekhweeli wiira: Ileelo, nthupi uhinaaya wiipa, unaahala ukiruna imaara tthaaru wiira unaakicuwela.”
35 Vano, uyo ahowiirela-tho co: “Ikwaha kuurumilyaakani weetta woohinrupa unheliya nsurukhu, woohinrupa unheliya iyoolya ni woohisantaaliya, niireke ihaavo yoothwaaleni?” Vano, ayo yahaakhula yeeraka: “Mena!”
36 Vano, uyo aahowiirela: “Masi, nna co, ule rina nrupa unheliya nsurukhu ni unheliya iyoolya yonkwaha akuse, ni ule hirina ikatana, atumihe ikuwaawe wiira athume ikatana imoca.
37 Kinoohimeeryani wiira citthu cantikhiye kaaciyaka miiva cihaana ciirannyaaka: ‘Uyo hooniya ukhala toko atthu ahineewelela malamulo.’ Ni nnyo citthunnyo cineera cikirannyeelaka.
38 Vano, ayo yaahomwiirela: “Pwiiya, nihaana va ikatana piili.” Ni Yesu ahowiirela: “Cinaatosa.”
39 Yesu ukhuma wawe, aahorwaa mwaako wo Oliveera, toko caalemalenlyaawe, ni attharyaawe yaahontthara.
40 Uphiya waya nwo, Yesu aahowiirela: “Nhihiyerere ulompa, wiira nhikhitiriye mwattehiyaka.”
41 Ni Yesu ahaahiya attharyaawe, aheetta vakaani, ahokhoroma ni ahopacera ulompa,
42 eeraka: “Paapa, mwapheela vale, nkumihe ila ikoopwiila uhoolo waka. Masi uhiirannye utthuna waka, masi wiirannye utthuna winyu.”
43 Vano, naahowa nlayikha no wiirimu ni naahonlipiha.
44 Masi uyo aari ooriipiya nrima cinene, phimaana khaahiyerenre ulompa; ni nttukuttha nawe nahokhala toko iphome yaamorela vathi.
45 Umaliha wawe ulompa ni urwaa wawe nipuro naaryaaya attharyaawe, ahaaphwanya yarupaka, anoocyaale nlattu wooriipiya nrima.
46 Uyo ahowiirela: “Munrupa nlattuni? Munwe ni nhihiyerere ulompa, wiira nhikhitiriye mwattehiyaka.”
47 Oolumacakoono, yaahowa atthu enci, ninlopwana mmoca eehaniya Yuuta, aapanka mphantte waatthari 12 phaahoolela ayo atthwaayo, ni aahomwaattamela Yesu wiira ampecari.
48 Vano, Yesu ahomwiirela: “Yuuta, unonvaariiha Mwaana a Pinaatamu niipeecu?”
49 Vano, ale yaari ni Yesu, woona waya itthu yaahala wiirannya, yaheera: “Pwiiya, niwaattakananeke niikatana cihu?
50 Mpaka mmocooyo ahothikila nnyaru nomoono wonlopwana nananteko a nankuttho muulupale.
51 Masi Yesu ahomwiirela: “Wahotosa!” Ni aahovara nnyarunno ni ahonvoniha.
52 Yesu ahowiirela ahooleli anankuttho, ahooleli ontempulu ni mahumu apoovu yaarweele unvara: “Nkiwenle niikatana, ni niikopo toko wiira miiva kihookhala nakhirini?
53 Khula nihuku mi kaakhalaka ni nyuuva ntempulu, kiitthucihaka, masi khamwaakitthuka. Masi ula, ukhanle ukatiinyu ni ukati ipiphi inlamulelaaya.”
54 Vano, yahontthuka ni yahonrwaana uwannyawe nankuttho muulupale. Masi Peturu anaatthara uttayi-uttayi.
55 Uparihela waya mooro, yahonkomaca nkhayi, ni Peturu ahonkoma nkhayi naayo.
56 Vano, athiyana amoca nanteko, umoona waya Peturu ootthaka mooro, ayo yaheera: “Ula nlopwanoola aari nkhayi ni Yesu.”
57 Masi uyo aahoruna, eeraka: “Nyuuva athiyana, miiva akinoncuwela”
58 Uvira waya ukati vakaani, ahooniya nintthu nkiina ni aheereliya: “Weeva ciicammo nttharyaawe.” Masi, Peturu aheera: “Alopwana, miiva akinakhala.”
59 Uvira waya iwoora imoca, nlopwana nkhwaawe aahokhanyerera eeraka: “Ula nlopwaanoola khweeliini, aari nkhayi ni Yesu kontha nawoonnya wiira o Kalileya!”
60 Masi Peturu aheera: “Alopwana, akincuwela itthu inhimyeenyu.” Uyo ukatyuuyo oolumacakoono nthupi waaheepa.
61 Vano, Apwiiya yahorukunuwa ni yahonweha Peturu, ni Peturu ahoopuwela itthu Apwiiya yuulumilyaaya, yeeraka: “Ilelo, nthupi uhinaaya wiipa, weeva unaahala ukiruna imaara tthaaru.”
62 Vano, uyo aahokhuma nne nipuronne, ni ahopacera wunla cinene.
63 Vano, alopwana yanvanre Yesu yaahopacera unveeha yamwaattakoono;
64 ni, unkhuneela waya uwiitho, yahonkoha yeeraka: “Wakhala wiira weeva uporofeeta, unhimye tipani waattile?”
65 Ni yaanooluma moolumo onveeha Nluku uhoolo wawe.
66 Waaseele, yaahothukumana mahumu aapoovu, ahooleli aanankuttho, wamoca naanamantikha; ni yaahonkusa Yesu u Sinedriyu ni yaheera:
67 “Wakhala wiira weeva u Kristu unihimeerye.” Masi uyo, aaheera: “Hataa kuuhimeeryakani, nyuuva khannohala ukikupali hataa vakaani.”
68 Uhiya commo, miiva ciicammo kookohakani khannohala ukaakhula.
69 Phimaana, ukhuma nenna co, Mwaana Apinaatamu nohaala wunkona moono wonlopwana wa Nluku okuru cotheene.
70 Umwiiwa waya commo, atthu otheene yahonkoha: “Niireke weeva u Mwaana a Nluku?” Uyo ahowaakhula: “Thi nyuuva nneera.”
71 Vano ayo yaheera: “Nlattuni ninaapheeleehu-tho masaahiti? Kontha hiiva nihomwiiwa oolumaka mwaneennyaawe.”
