Ihapari Comaana Cantikhiye ni Luka 24:1-53
24 Nihuku noopacera nosumana, ayo athiyanaayo yahopeherya umahiye, anakusile makhura oonukhela yaatthenkacilyaaya.
2 Masi yahoona wiira nluku naari wamahiyenno nahokumihiya
3 ni, ukela waya mmahiyemmo, khayaaphwanyile irutthu ya Apwiiya Yesu.
4 Ukati waatikhinacaaya iyo itthwiiyo, yaahokhumelela alopwana eeli yaawanre ikuwo cowaarya.
5 Athiyanaayo yaahoova cinene mpaka yaahooromela vathi; vano, alopwanaayo yahowiirela co: “Kontha isiyani nnomwaavyeenyu umahiye ule ri nkumi?
6 Uyo hunwelelihiya, phimaana khaavo mu. Muupuwele wiira, ukati waaryaawe u Kalileya uyo ahowiirelani
7 wiira Mwaana a Pinaatamu anhala uvahereriya mmatatani waanamatampi, anhala wiiviya wanipottoni ni, nihuku noneeraru, anhala wunwelelihiya.”
8 Ni athiyanaayo vano yahoopuwela moolumo a Yesu;
9 phimaana, yaahoturuwa umahiyenwo ni yaahaattonkela maapostolu 11 ni atthu akhwaawe citthu cotheene ciirannyaale.
10 Ayo athiyanaayo yaari Maria Madalena, Joana ni Maria, anumwaane Tiyaku. Ciicammo athiyana akiina yaari nkhayi naayo yaahaattonkela maapostolu.
11 Masi, athiyanaayo waahimeerya waya nnyo citthunnyo, maapostolwaayo khayaawaaminni.
12 Masi Peturu, aahokhuma atthawaka arwaaka umahiye; ni ukela wawe mmahiyemmo, oonile paahi ikuwo caakhunelaciyaawe Yesu. Vano ahoturuwa, eekohaka isiyani yiirannyeele.
13 Masi, nenno nihukunno, alopwana eeli yaapanka nkhwahaaya yarwaaka aliteeya amoca aneehaniya u Mausi, caari ikilometuru 11 ukhuma u Yerusalemu mpaka wonwo
14 ni yoopela mwaha citthu cotheene ciirannyeele.
15 Ukati woopelaaya mwaha yuulumaka citthu ciirannyeele, Yesu ahowaattamela ni ahopacera uweettana,
16 masi ayo khayancuwelenle.
17 Yesu ahaakoha co: “Isiyani nnopeleenyu mwaha, mweettakoono?” Ayo yaaheemela, unaariipile nrima.
18 Nlopwana mmoca eehaniya Kleyopa ahomwaakhula, eeraka: “Niireke u Yerusalemunwo nyuuva nnokhala veekha, nhincuwela citthu ciiranyaale ala mahukwaala?”
19 Uyo ahaakoha eeraka: “Citthuni?” Ayo yahaakhula: “Ca Yesu, Nnasareeno, aari porofeeta okuru ni citthu caapankaawe ni moolumacerwaawe uhoolo wa Nluku ni waapoovu,
20 ni ahooleliihu aanankuttho ni anamalamulela ahonleva wiira eeviye akhomeliyaka wanipottoni.
21 Masi hi naaweherera wiira uyo nlopwanooyo paahala uwoopola Asarayeli. Uhiya commo, ciniiranyeeleene nnyo citthunnyo, ileelo ninaapiihera nihuku noneeraru.
22 Uhiya commo, athiyana yaari nkhayi nihiiva ahonitikhiniha cinene kontha yahopeherya umahiye,
23 ni, uphiya waya nwo, khayaaphanyale irutthu ya Yesu, ni yaahoturuwa yeeraka wiira yaahoona malayikha yaawiirenle wiira Yesu ri nkumi.
24 Vano, atthu akiina yaari nkhayi ni hiiva, yaahorwa umahiye ni yaahophwanya ciicammo toko ayo athiyanaayo caahimalyaaya, masi khayaamoonale Yesu.
25 Vano, uyo ahowiirela: “Nyuuva nkhanle atthu oohankhili ni nnaapica waamini citthu cuulumiye ni maporofeeta!
26 Niireke Kristu khaalamuliya upankiya nnyo citthunnyo wiira aphwanye uttitthimihiya wiirimu?”
27 Ni ahopacera waataphulela citthu cotheene cantikhiye cimwaacaka uyova, upacera Moocesi mpaka maporofeeta otheene.
28 Vano, yahaattamela aliteeya yaarwaaya ni Yesu ahiikhaliha toko naavira arwaaka uttayi.
29 Masi ayo yahonkhanyereriha, yeeraka: “Nrupeke vaava, kontha ncuwanno nihokela ni uhanle wiila. Vano uyo, aahotthuna ukhala ni ayova.
30 Ni, ukati waalyanaawe ahokusa iphaawu, aholompela, ahomyaaniha ni ahaavaha.
31 Yooyo ukatyuuyo, ayo yaahoncuwelela ni uyo ahorimyarimya.
32 Ni yaaneerelana: “Phimaana waanivaraaya nrima moolumwaawe, ukati waanuulumanaawe mparapaarani, anitaphulelaka Cowantikhiya Cowaarya sana-saana.
33 Ule ukatyuule, yaahokhuma woohipica ni yaahoturuwela u Yerusalemu ni yahaaphwanya maapostolu 11 ni atthu yaari nkhayi naayo,
34 ni yahowiirela: “Khweeliini, Apwiiya ahonwelelihiya ni yaahonkhumelela Simau!”
35 Vano, ayo yahaahimeerya mananna caamuulumannyaaya mparapaarani ni mananna yancuwenlelyaaya ukati waamyaanihilyaawe iphaawu.
36 Yuulumacakoono nnyo citthunnyo, Yesu ahaakhumelela ni ahowiirela: “Nnema nikhale ni ninyuuva”.
37 Masi ayo yaahosanka ni yaanoova, yuupuwelaka wiira yoona nnepa.
38 Phimaana, uyo aahowiirela: “Nnosankani ni kontha isiyani nnaanyihacereenyu wanrimani winyu?.
39 Nweheke matataaka ni inyaa caka wiira thi miiva. Nkivareke nnaahala ukicuwela, kontha nnepa khunkhalana ithayi ni makhuva toko miiva kirinaaka
40 Ni uwiirela wawe commo, ahowoonihera matataawe ni inyaa cawe.
41 Masi ayo nanlelo khayaakupali, kontha yaari ootteeliya ni ootikhinihiya. Vano, uyo ahowiirela: “Nhaana iyoolya vaa?”
42 Ayo, yahonvaha ipetaasu yohopa yowoosiya,
43 ni uyo ahokusa ni ahokhuura uhoolo waya.
44 Vano, uyo ahowiirela co: “Ala moolumo kuuhimenryaakani ukati waaryaaka nkhayi ni nyuuva, wiira citthu cotheene Cantikhiye ni Moceesi, maporofeeta, Anasaalimu akaacaka miiva cahaana ceerannyaaka.
45 Vano, uyo ahaakavihera wiiweeha citthu cintaphulelaaya Cowantikhiya Cowaarya
46 ni ahowiirela: “Kristu anhala wiiviya, ni nihuku noneeraru anhala wunwelelihiya.
47 ni mwancina nawe, wanhala ulalyeeriya uttharuwa, wiira aleveleliye atthu olapo cotheene itampi caya, upacera u Yerusalemu.
48 Nyuuva nnohala ukhala masaahiti o nnya citthunnya.
49 Ni ncuwele wiira, kinaahala wuuveleeliherani itthu ikhuluvelihiyeenyu ni Apaapa. Phimaana nhikhume mu nsittatti mu mpaka nnohaaleenyu waakhela ikuru cinweela wiirimu.
50 Vano, uyo aahaakusa attharyaawe aarwaanaka u Petaaniya, ahotaphula matataawe ni ahaacaaliha.
51 Ukati waacalihaawe, ahokusiya arwaaniyaka wiirimu.
52 Ni yahokhoroma uhoolo wawe ni yaahoturuwela u Yerusalemu anatteeliye nrima.
53 Ni khayaahiyerera urwaa utempulu unttottopela Nluku.
