Ihapari Comaana Cantikhiye ni Luka 3:1-38
3 Waapihilyaawe myaakha 15 Tipeeriyu Seesari alamulelaka, ni Ponsiyu Pilatu nari kovernatoore o Yuteya, Herooti nari kovernatoore oodistritu yo Kalileya, Filipe, munnaawe Herooti, nari kovernatoore oodistritu yo ncoko wo Itureya ni u Terakonite, ni Lisaniya nari kovernatoore oodistritu yo Pileeni,
2 ukati wa nankuttho muulupale Anasi, ni wa Kayifasi, Nluku ahomuulumana Joau, mwaana a Zakariya, nari muuthakoni.
3 Coo, Joau aheetta ncoko wotheene waattamenle u moolokoni Jordau, alalyeeraka mpattiso waathoonyera uttharuwa ni uleveleliya wo matampi,
4 toko cantikhiyaaya nlivuruni ya porofeeta Isaiya, wiira: “Haavo nokhuwela muuthakoni, eeraka: ‘Ntthenkace nttala wa Yehova! Mumpankele iphiro yowookwa.
5 Malikitti otheene awuhelelaciye ni myaako ni ittuttu cotheene cookoleliye, iphiro coocikuwa cihaana cookoleliyaka ni iphiro coothipakyaaca cihaana ciwuheleliyaka;
6 ni atthu otheene anaahala woona woopola wa Nluku.’”
7 Vano, Joau ahopacera uwiirela atthu yaawa upattisiya co: “Ucuulu wonwaa coohapala, tipani wiirenleni wiira nnaahala ukhitiri utthawa uviruwa wa Nluku unhala uwa?
8 Phimaana, mwiimihe mihokorokho cinthoonyera wiira nhorukunusa makhalelweenyu. Nhiiciirele imwaneeneenyu: ‘Nihaana apaapeehu Aparahaamu.’ Kinoohimeeryani ikhweeli wiira Nluku pooti utatusa ala malukwaala vaa asaana a Aparahaamu.
9 Khweeliini, ipaco iri yootthenkaciyeene wiira cithikilaciye mitithari co miri. Phimaana, mwiri uhineema mihokorokho comaana unaahala ukottoliya ni unaahala uvonyeriya wa mooroni.”
10 Vano, atthu yaanonkoha: “Vano nipankeke isiyani?”
11 Uyo aawaakhula, eeraka: “Ule rina ikuwo piili anvahe imoceeyo ule hirina, ni ule rina iyoolya anvahe ule hirina.”
12 Hataa ciicammo anamaliviha nsokho yahowa wiira apattisiye, ni ayo yahonkoha: “Mwiitthucihi, nipankeke isiyani?”
13 Joau ahomwaakhula, eeraka: “Nlivihe nsokho toko nlamulo cineeraaya, masi nhipwahihe.”
14 Anatoropa ciicammo yahonkoha: “Nipankeke isiyani?” Uyo aawakhula, eeraka: “Nhimoopopihe ni nhimootherye ntthu, masi nsukhurwele ile inaakheleenyu.
15 Apoovu yanweherera ni khayaahiya umuupuwelela Joau, yeeraka: “Niireke ula phikhanle Kristu?”
16 Joau ahaakhula, eeraka: “Mi kinoopattisani ni maaci, masi naawa ookivikana miiva, ni miiva khunkiphwanela utthukulaca mikhoyi cosantaliya cawe. Uyo naahala wuupattisani ninnepa wowaarya nimooro.
17 Uyo hocisa mmatatani wawe iposolo inaawanyaniheriya itiriku ni macaasi ni naahala ukweca wiira akawanihe itiriku nimacaasi; ni naahala ukweca-kweca sana-saana nipuro ninhala uveereliya itirikwiiyo. Vano, amalihaka upanka iyo itthwiiyo, naahala ucisa itirikwiiyo nuurwaana nnikhupini, masi macaasyaayo, naahala uttikhela wa mooroni uhinkhitiriya uttipihiya.”
18 Ciicammo, Joau aanaakurumica atthu nimoolumo makhwaawe ni khaahiyerera waalalyeera ihapari comaana.
19 Masi Joau anampwapwela Herooti, kovernatoore oodistritu, nlattu wa Herotiya, yaari amwaara a munnaawe, ni nlattu wo citthu cootakhala caapankilyaawe.
20 Phimaana, Herooti ahopanka-tho itthu ikhwaawe yootakhala: Ahontthukela Joau nkhattyaa.
21 Vano, umala waya apoovu otheene upattisiya, Yesu ciicammo ahopattisiya. Ukati waalompaawe, irimu yahohulyaa,
22 ni nnepa wowaarya wahonkhuruwela, woonnyaaka khampa ikhuntta ni ciicammo naheewannya ncu naakhuma wiirimu, neeraka: “Weeva ukhanle mwanaka nonfentaaka ni nokitteeliha nrima.”
23 Ukati Yesu wancenryaawe miteko cawe, aarina myaakha 30. Uyo aari, toko coopuweliyaaya,mwaana a Yusufu,mwaana a Eli,
24 mwaana a Matatimwaana a Levi,mwaana a Meliki,mwaana a Canayi,mwaana a Yusufu,
25 mwaana a Matatiyasi,mwaana a Amos,mwaana a Nawu,mwaana a Esili,mwaana a Nekayi,
26 mwaana a Maati,mwaana a Matatiyasi,mwaana a Simei,mwaana a Yosekhi,mwaana a Yoda,
27 mwaana a Yehowanaa,mwaana a Resa,mwaana a Soropapeeli,mwaana a Siyatiyeeli,mwaana a Neri,
28 mwaana a Meliki,mwaana a Hati,mwaana a Koosa,mwaana a Elimataa,mwaana a Er,
29 mwaana a Yesu,Mwaana a Eliyeseeri,mwaana a Jorimi,mwaana a Matati,mwaana a Levi,
30 mwaana a Simeau,mwaana a Yutaa,mwaana a Yusufu,mwaana a Yehowanaa,mwaana a Eliyakhi,
31 mwaana a Melea,mwaana a Meena,mwaana a Mataata,mwana a Nata,mwaana a Davidi,
32 mwaana a Yesee,mwaana a Opeti,mwaana a Powaasi,mwaana a Salimoni,mwaana a Naasoni,
33 mwaana a Aminatape,mwaana a Arini,mwaana a Esroni,mwaana a Peresi,mwaana a Yutaa,
34 mwaana a Yaakopi,mwaana a Isaaki,mwaana a Aparahaamu,mwaana a Tera,mwaana a Nahori,
35 mwaana a Seruki,mwaana a Rewuu,mwaana a Peliki,mwaana a Heperi,mwaana a Seela,
36 mwaana a Kayina,mwaana a Harixapati,mwaana a Sem,mwaana a Nowee,mwaana a Lamekhi,
37 mwaana a Metusale,mwaana a Enoki,mwaana a Cereti,mwaana a Mahalaleli,mwaana a Kayina,
38 mwaana a Enosi,mwaana a Sete,mwaana a Atamu,mwaana a Nluku.
