Ihapari Comaana Cantikhiye ni Luka 4:1-44
4 Yesu, unancanre nnepa wowaarya, ahokhuma mooloko wo Jordau ni ahorwaaniya ni nnepa wowaarya muuthakoni,
2 ahokhala mahuku 40 muuthakoni attehattehiyaka ni Tiyapu. Uyo khaalilye itthu nhina ayo mahukwaayo; ni umala waya ayo mahukwaayo, uyo yaahonvola itala.
3 Vano, Tiyapu ahomwiirela: “Wakhala wiira weeva mwaana a Nluku, utatuse nna nlukunna iphaawu.”
4 Masi, Yesu ahomwaakhula eeraka: “Uhantikhiya nnuulumoni na Nluku: ‘Pinaatamu khankhala nkumi nlattu wophaawu paahi.’”
5 Vano woohipica, ahoncisa nipuro noorekama ni ahonthoonyihera umwene wotheene wo watuninyani inkhaliya.
6 Vano, Tiyapu ahomwiirela: “Kinaahala wuuvaha ukhulupale ni uttitthimihiya waya ula umwennyoola, mi kihoovahiya ni miiva ciicammo kinanvaha ule nompheelaaka.
7 Phimaana, wakikhoromelaka uhoolo waka ni wakiswalelaka ikwaha imoca, kinawuuvaha umwene wotheene.
8 Vano, Yesu ahomwaakhula, eeraka: “Uhantikhiya nnuulumoni na Nluku: ‘Unswalele Yehova Nlukwaa, ni unvarele miteko co wuuswalini uyova paasi.’”
9 Vano, ahoncisa u Yerusaleemu, ahonrwaana waculu itempulu, ni ahomwiirela Yesu co: “Wakhala wiira weeva mwaana a Nluku, wiivonyere vathi,
10 kontha uhantikhiya nnuulumoni na Nluku wiira: ‘Nluku naahala uruma malayikhaawe wiira yuukhikicere’,
11 ni ‘ayo anaahala wuukaphula wiira inyaa caa cihiipwesanihe wanlukuni.’”
12 Woomwaakhula Yesu ahomwiirela: “Uhantikhiya nnuulumoni na Nluku: ‘Uhinttehattehe Yehova, Nlukwaa.’”
13 Vano, umaliha wawe unttehatteha, Tiyapu ahonhiya mpaka ukati nkiina wooreerana.
14 Yesu ahoturuwela u Kalileya cinancanre ikuru co nnepa wowaarya ni aanuulumiya saana micoko cotheene nlattu wo miteko cawe comaana.
15 Uhiya commo, uyo ahopacera wiitthuciha mmasinakooka waya ni aanhisimiya naatthu otheene.
16 Wahoolo waya Yesu ahorwaa u Nasaree, nipuro nonnuwenlyaawe ni toko caalamalenlyaawe upanka nihuku nosaapatu, uyo ahorwaa u sinakooka ni aheemela wiira asome.
17 Vano, ahovahiya iroolu ya porofeeta Isaiya, ni uyo ahotthukula ni ahophwanya nipuro nantikhiye co:
18 “Nnepa wowaarya wa Yehova uri ni miiva, ni uyo hokithanla wiira kaalalyeere ihapari comaana atthu oohuva. Hokiveleeliha wiira kaahimyeere ale atthukiye utaphuliya waya, ni uvoniha miitho aale ahinoona ni wiira kiwoopole ale anhuva,
19 wiira kilalyeere mwaakha woncivela Yehova.”
20 Vano, aahopinttaca iroolwiiyo ni aahonturusela ule aawacera iroolu ni ahorwaa wunkoma; ni atthu otheene yaari nsinakooka yaahanca unweheeha.
21 Vano, Yesu aahaahimyeera co: “Cowantikhiya ciiwileenyu, ciheerannya ilelo.”
22 Ni atthu otheene yammuuluma saana ni caanaacivela citthu coolumaawe, ni yaaniirelana co: “Ula khanakhala mwaana a Yusufu?”
23 Vano uyo ahowiirela: “Khweeliini, nyuuva nnahala ukiirela co: Meetiku wiivonihe mwaaneennya, citthu ciiwileehu wiira uhopanka u Kafarnau ciicammo upanke isittattyaa.’”
24 Vano, Yesu ahowiirela: “Kinoohimeeryani ikhweeli wiira, khaavo porofeeta notthuninya ilapwaawe.
25 Kinoohimyeerani ikhweeli wiira ukati wa Eliyasi, yahaavo anankhweli enci u Isarayeli, ukati waavirihalyaaya myaakha miraru ni myeeri 6 woohirupa ipula ni waavonlyaaya itala ilapo yotheene.
26 Waahookhalaru commo, Eliyasi khaarumiye waakavihera ayo anankhweelyaayo, masi unkavihera nankhweli mmoca paahi o Sarefaa ilapo yo Sitoni.
27 Yahaavo ciicammo, anamakuttula enci u Isarayeli ukati wa porofeeta Elisewu, waahookhalaru commo, khaavo aavonihiye hikhanle paasi Naama o Siiriya.”
28 Ni atthu otheene, wiiwalyaaya ayo moolumwaayo yaahoviruwa.
29 Vano, yaahonwa ni yahopacera unkakhaca Yesu ankumiheraka vate isittatti ni yaahonrweeha useresere mwaako waaphwanyannya iyo isittattiiyo wiira anvonyere vathi.
30 Masi uyo, aahokhuma iriyaryaaya ni aahorwaa.
31 Vano, Yesu ahorwaa u Kafarnau, isittatti yo Kalileya. Uyo aawiitthuciha atthu nihuku nosaapatu,
32 ni atthu yaahokhala ootikhinihiya cinene nlattu wo mananna yeetthucihaawe, kontha ooluma khampa ntthu rina ukhulupale.
33 Ahaavo nlopwana mmoca usinakooka aari ni maciini, uyo ahokhuwela venci eeraka:
34 “Haa! Unnipheelela isiyani Yesu Nnasarenu? Uwile unitankanya? Mi kinawuucuwela, weeva urumiye ni Nluku.”
35 Masi, Yesu ahopwapwela nno nciininno, eeraka: “Umaale, ni ukhume mwiirutthuni wawe.” Vano ummorosela waya vathi, iriyaryaaya, maciinnyaayo yaahonkhuma woohinrakaliha.
36 Vano atthu otheene yaahotikhinihiya ni yaaheerelana: “Moolumoni ala? Kontha uyo nawoomola maciini nuukhulupale, niikuru ni ayo anaakhuma!”
37 Phimaana, citthu cotheene caapankaawe caanoolumiya mapuro otheene.
38 Ukhuma wawe usinakooka ahorwaa uwannyawe Simau. Amaathyaawe Simau yanwerennya ikopo, ni aaholepeliya wiira aakavihere.
39 Vano, ahowooromela ni ahaavoniha, woohipica ayo yaahonwa ni yaahopacera uwaapyaacera.
40 Masi ucoocilo, Yesu aahowaaneliya atthu enci yaarina iretta coovirikana, ni uyo aanonvara khula ntthu ni aanaavoniha.
41 Maciini ciicammo yaakumihiya, yankhuwela venci yeeraka: “Weeva, mwaana a Nluku.” Masi Yesu ahomaaliha ni khaatthunihenre wiira yuulume kontha ayo yancuwela wiira uyo ari Kristu.
42 Unasileene, Yesu ahorwaa nipuro noohiviraviriya ni atthu enci yaahopacera umwaavya ni yaahophiya nipuro uyova naaryaawe, ni yaahomananiha unkhottiiha ukhuma ule ncokoole.
43 Masi uyo ahowiirela: “Kihaana kilalyeeraka ciicammo ihapari comaana co Umwene wa Nluku isittatti cikhwaawe, kontha kiveleelihiye wiira kivare uyo ntekooyo.”
44 Uyo khaahiyerenre ulalyeera mmasinakooka ni u Yuteya.