Ihapari Comaana Cantikhiye ni Luka 5:1-39
5 Ikwakha imoca, Yesu aari nseresere ntthiya no Genesaree ni atthu enci yamphunyana uhoolo wawe yapheelaka wiiwa nuulumo na Nluku.
2 Vano, Yesu ahoona ikalawa piili cineesiye nseresere ntthiya, masi ale yaavara ihopa anakhuruwileene ni yarapihaka matthavyaaya.
3 Yesu ahokela ikalawa imoca yaari ya Simau ni ahonlepela wiira acusihere vakaani mmaacini. Nonkomileene nkalawani, ahopacera uwiitthuciha atthwaayo.
4 Yesu, umaliha wawe wiitthuciha, ahomwiirela Simau co: “Urwee nipuro nowiisa ni uttikhele matthavyaa, wiira uvare ihopa.”
5 Simau ahomwaakhula, eeraka: “Mwiitthucihi, nihovara nteko uhiyu wotheene, masi khaniphwanyale itthu, masi ukhala wiira nhohimya kinaattikhela matthavyaayo.”
6 Vano, uttikhela waya matthavyaayo, yahovara ihopa cinci mpaka matthavi yahopacera waanyuwaca.
7 Vano, yahowiihanaca atthu yaavaranaaya nteko yaari ikalawa ikhwaawe, wiira yaakavihe ni ayo yahowa, yahocariha ikalawa caya mpaka cahopacera uttittha mmaacini.
8 Vano, Simau Peturu, woona wawe ile itthwiile, ahokhoroma uhoolo wa Yesu, ni aheera: “Ncuse va Pwiiya, ukhala wiira miiva kinamatampi.”
9 Kontha uyo naatthu yaari nkhayi nuuyo, yahokhala ootikhinihiya nlattu wohopa cinci yaavanryaaya,
10 ni iyo itthwiiyo yahowiirannyeela Tiyaku ni Joau, asaana a Sepeteu, aavaranaawe nteko Simau. Masi Yesu ahomwiirela Simau: “Uhoove ukhuma nenna co ni mpaka wahoolo nnhala waavariha atthu.”
11 Vano, yahokusa ikalawannyo ni yahokumihera vate ni yahohiya citthu cotheene ni yahontthara.
12 Ukati nkhwaawe, Yesu nari isittatti imoca, ahophwanyiya ni nlopwana aarina iretta yo makuttula! Umoona wawe Yesu, ahokhoroma uhoolo wawe ni ahooromela vathi, anlepelaka isontte eeraka: “Pwiiya, mwatthuna vale, nkivonihe.”
13 Vano, Yesu ahotaphula moono ni ahonvara uyo nlopwanooyo, eeraka: “Kinaapheela! uvoneke.” Woohipica makuttulaayo yaahomalamala.
14 Vano, Yesu ahomwiirela nlopwanooyo wiira hinhimeerye ntthu ile itthwiile ni ahoncerera, eeraka: “Masi urwee wiithoonyihe wa nankuttho, ni wavahe itthuvo yooreerihiya waa, toko nlamulo na Moceesi ninhimwaaya, wiira ucuweliye wiira khweeliini weeva uhovonihiya.”
15 Masi citthu caapankaawe caanoolumiya mapuro otheene ni atthu enci yaanthukumana wiira anviriyane ni wiira aavonihe iretta caya.
16 Ikwaha cinci, uyo anaarwaa mapuro ohiviraviriya wiira alompe.
17 Nihuku nimoca, Yesu eetthucihaka, yahowa mafariseu, amwiitthucihi onlamulo yaakhuma mmaaliteeya o Kalileya, o Yuteya ni o Yerusalemu, yahonkomaca nne nipuronne, ni ikuru ca Yehova caari ni Yesu wiira aavonihe atthu.
18 Vano, yahowa alopwana ananteesile ntthu owuntakya munrepani ni yahomananiha unkelana mpaani, nipuro naaryaawe Yesu.
19 Vano, ukhala wiira khayaakhitiri umpiiha mpaka nipuro naaryaawe Yesu nlattu woocara atthu, yahowela waculu inupa ni yaahonkurusela ukhuma waculu inupa mpaka iriyari yaatthu yaari ni Yesu.
20 Woona wawe waamini waarinaaya, uyo aheera: “Nlopwana, matampyaa aholeveleliya.”
21 Vano, anamantikha ni mafariseu yahopaceera wuupuwela mmuru waya yeeraka: “Ula tipani wiira anveehe Nluku? Tipani noorya ulevelela itampi, hikhanle Nluku paahi?”
22 Masi Yesu, ucuwela wawe itthu yoopuwelaaya, ahowiirela: “Nnoopuwela isiyani wanrimani winyu?
23 Irikale isiyani umwiirela ula nlopwana owuntakyoola: ‘Matampyaa aholeveleliya,’ awula: ‘Wunwe, ukuse nrepa naa ni weette’?
24 Masi wiira ucuwele wiira Mwaana Apinaatamu haana ukhulupale woolevelela matampi va watuninyani va . . .”, uyo ahomwiirela nlopwana owuntakyooyo co: “Kinwiirela: Wunwe, ucise nrepa naa ni urwee uwaani.”
25 Vano, nlopwanooyo ahonwa uhoolo waya, ahokusa nrepa nawe ni ahorwaa uwannyawe anttottopelaka Nluku.
26 Vano, atthu otheene yahokhala ootikhinihiya ni yahopacera unttottopela Nluku yoovaka ni yiiraka: “Ilelo nihoona citthu cootikhiniha!”
27 Ukhuma wawe nne nipuronne, ahomoona nlopwana mmoca aaliviha nsoko eehaniya Levi, nonkomile nipuro naaliviya nsokho, ni ahomwiirela: “Ukhale nttharyaaka.”
28 Ni Levi ahonwa ni ahohiya citthu cotheene ni ahontthara.
29 Vano, Levi ahonlattula Yesu uwannyawe ni nwo yahaavo anamaliviha nsokho enci ni atthu akhwaawe, yaalyanaawe nkhayi*.
30 Nlattu wo iyo itthwiiyo mafariseu ni anamantikha, yahopacera uttekutta, yawiirealaka atthari a Yesu co: “Nlattuni nnaalyaaneenyu ni nnaawuryaneenyu anamaliviha nsokho ni anamatampi?”
31 Vano, Yesu ahowaakhula, eeraka: “Atthu akumi khanrwa wa meetiku, masi aretta phanrwaa.
32 Mi akaawenle uwaavya anasariya wiira attharuwe, masi kaawenle anamatampi.”
33 Ayo yahomwiirela co: “Eetthuci a Joau ni o mafariseu khanhiyerera utthuka ni ulompa, masi eetthuciinyu anaalya ni anaawurya.”
34 Vano, Yesu ahowaakhula eeraka: “Niireke nnaakhitiri waapankiha apatthannyaawe mpakaneli uhilya, mpakanelyuuyo nari nkhayi naayo?
35 Masi khweeliini, unaahala uphiya ukati anhalaaya waakhiya mpakanelyuuyo, vano uyu ukatyuuyo phinhalaaya utthuka”
36 Vano, Yesu ahaahimeerya nlattanihero nimoca, eeraka: “Khaavo nothikila ikuwo yophiyaaru nuupankela icaapha ikuwo yokhalayi. Ntthu apankaka iyo itthwiiyo, inawaanyuwa ikuwo yokhalayiiyo ni icaapha yophiyaaru khinhala uphwanelana niikuwo yokhalayiiyo.
37 Inanna imocaaru, khaavo nohela iviinyu munrupani wo nttapala wokhalayi. Ntthu apankaka iyo itthwiiyo, iviinyu yophiyaaru inaahala upwesa uyo nrupooyo ni iviinywiiyo inaamwaryaa.
38 Phimaana, iviinyu yophiyaaru, inheliya munrupani wonttapala wophiyaaru.
39 Khaavo nowurya iviinyu yo khalayi phipheelaka-tho iviinyu yophiyaaru, kontha neera: “Iviinyu yokhalayi phinciva.”
Notas
^ awula: yaari wameeca
