Ihapari Comaana Cantikhiye ni Luka 6:1-49
-
Yesu, “Mwaneene isaapatu” (1-5)
-
Nlopwana oopahuwa ntata naavonihiya (6-11)
-
Maapoostolu 12 (12-16)
-
Yesu nawiitthuciha ni naapanka miiriirya (17-19)
-
Utteeliya ni woona uwerya (20-26)
-
Waafenta awanani (27-36)
-
Nhiye uhukhumu (37-42)
-
Ucuweleliya nlattu wo mihokorokho caya (43-45)
-
Inupa yootekiya saana; inupa yootekiya woohaaliseerse (46-49)
6 Nihuku nosaapatu, Yesu naattharyaawe yahovira imatta yotiriku ni eetthucyaawe yahopacera wuurula macaasi otiriku, uttikittha, nuukela ukhuura.
2 Vano, mafariseu makhwaawe uwoona waya, yahomwiirela: “Nlattuni nyuuva nnopankeenyu itthu ihintthunihiya upankiya isaapatu?”
3 Masi Yesu ahowaakhula, eeraka: “Nyuuva khannapaca usoma itthu Davidi yaapankilyaawe nkhayi naalopwana yaarinaawe ukati waavonlyaaya itala?
4 Uyo ahokela inupa ya Nluku ni ahaakhela iphaawu caavahereriya Nluku ni ahokhuura, ni ahaavaha alopwana yaarinaawe, hataa ukhalaka wiira nnyo iphawunnyo yaalamuliya ukhuura paasi anankuttho?”
5 Ni aheera-tho: “Mwaana apinaatamu phikhanle mwaneene isaapatu.”
6 Isaapatu ikhwaawe, Yesu ahokela nsinakooka ni ahopacera wiitthuciha. Ni ahaavo mommo nlopwana oopahuwa ntata.
7 Anamantikha ni mafariseu yaanonweheeha sana-saana Yesu wiira amoone wakhala wiira anhala unvoniha ntthu nihuku nosaapatu, yapheelaka wiira amootheryace.
8 Masi Yesu ancuwela itthu yoopuwelaaya. Vano, ahomwiirela coo nlopwana oopahuwa ntatooyo: “Wunwe ni weemele iriyariila va.” Ni nlopwanooyo ahonwa ni aheemela.
9 Vano, Yesu ahaakoha atthwaayo co: “Kinawuukohani: unaatthunihiya nihuku nosaapatu upanka itthu yomaana awula yootakhala, woopola ukumi awula wiiva?”
10 Waaweha wawe atthu otheene yaari nne nipuronne, ahomwiirela nlopwana aarina ntata noopahuwooyo co: “Utaphuleke ntatanno.” Ni uyo ahotaphula ntatanno ni woohipica, aahovona ni ntatanawe naahokhala saana.
11 Vano, anamantikha ni mafariseu yahoviruwa ni yahanca uleehana itthu yoopheela umpanka Yesu.
12 Ale mahukwaale, Yesu ahorwaa umwaakoni wiira alompe, ni ahoviriha uhiyu wotheene anlompaka Nluku.
13 Usa waya, Yesu ahowiihana attharyaawe otheene ni ahaathanla 12, aavahilyaawe ncina no maapostolu:
14 Simau anvahilyaawe ciicammo ncina na Peturu, Antere, munnaawe, Tiyaku, Joau, Filipe, Partolomeu,
15 Matewus, Tomee, Tiyaku mwaana a Alifeu, Simau, eehaniya Namwiikurumica,
16 Yuuta mwaana a Tiyaku, ni Yuuta Iskariyoti, aahala unvariiha Yesu.
17 Vano, Yesu ahokhuruwa nkhayi naattharyaawe ni aheemela nipuro nowoonnya; yaahaavo nno nipuronno attharyaawe enci ni atthu enci yaakhuma u Yuteya, u Yerusalemu, ncoko wo Tiro ni u Sitoni, yaawa umwiiwelela ni uvonihiya iretta caya.
18 Hataa ciicammo atthu yaahuvihiya ni maciini yanvonihiya.
19 Ni atthu enci yampheela unkwanya, kontha mwiirutthuni wawe cankhuma ikuru caavoniha.
20 Ni uyo ahaaweha attharyaawe, ni ahowiirela:
“Ootteeliya thi nyuuva amasikhini, kontha Umwene wa Nluku ukhanle wawinyu.
21 “Ootteeliya phaale avoliye itala, kontha anaahala urupala.
“Ootteeliya phaale anunla, kontha anaahala uthyaa.
22 “Nnaacaaliya nyuuva, atthu yoothanyakani, yookhottakani, yooruwanakani ni yoolaphakacakani, nlattu wo Mwaana Apinaatamu.
23 Ntteeliye nrima yeerannyaaka iyo itthwiiyo ni ntthape, ukhala wiira utthuveliya winyu unhala ukhala wuulupale wiirimu, kontha nnya phi citthu anhiyataataaya caapankaaya maporofeeta.
24 “Nhotakhaliya nyuuva mathaaciri, kontha nhaakhela citthu caahaleenyu waakhela.
25 “Nhotakhaliya nyuuva nrupanle nna co, ukhala wiira inrwaa wuuvolani itala.
“Nhotakhaliya nyuuva nnothyaa nna co, kontha nnaahala ucukula ni wunla.
26 “Nhotakhaliya nyuuva nnottottopeliya naatthu, kontha phiitthu yaapankaaya anhiyataataaya maporofeeta owootha.
27 “Masi kinaahimeerya atthu otheene ankiviriyana, co: Nhihiyerere waafenta ale ampheela wuupankani itthu yoohiloka, ni waathoonyera unamaana atthu anoothanyani,
28 ni mwaacaalihe ale anoolaphakacani, ni waalompela ale anooruwanani.
29 Ule nohala uwaattani ilathuma mphantte mmoca, munrukunusele mphantte nkinooyo, ule nohala uwaakhani ikuwo yo vate munvahe ciicammo yonhineeyo.
30 Ntthu oolepelani munvahe, ni ntthu awaakhani itthu yawinyu nhinlepele wuuturuselani.
31 “Phimaana, mananna anoocivelaayani uwaceriya, mwaawacereke ciicammo akhunaninyu.
32 “Mwaafentaka paahi ale anoofentani, nnohala uphwanyani? Hataa anamatampi anawaafenta ale anaafenta.
33 Mwaapankelaka citthu comaana ale anoopankelani, nnohala uphwanyani? Hataa anamatampi anaapanka iyo itthwiiyo.
34 Inanna imocaaru, mwaakopihaka ale anaaweherereenyu wuulivani, nnohala uphwanyani? Hataa anamatampi anawaakopiha anamatampi akhwaaya wiira aliviye.
35 Uhiya commo, nhihiyerere waafenta awananiinyu, waapankela citthu comaana ni waakopiha wohiweherera wuulivani; ni itthuvo cinyu cinhala ukhala cuulupale ni nnohala wiihaniya asaana a Nluku owiirimu, kontha uyo nawaathoonyera unamaana atthu oohisukhuru ni atthu ootakhala nrima.
36 Nhihiyerere uthoonyera ikiriri khampa Apaapeenyu owiirimu ukhanlyaaya nakiriri.
37 “Uhiya commo, nhiye waahukhumu akhunaninyu, wiira nyuuva ciicammo nhihukhumwiye. Ni nhiye, waattarusa akhunaninyu ni nyuuva khannohala uttarusiya. Nhihiyerere waalevelela akhunaninyu ni nyuuva nnaahala uleveleliya.
38 Nvaheke ni nyuuva nnaahala uvahiya. Ayo anaahala wiitthela waciroroni winyu mpaka umwaryaaca, kontha mananna cinaaphimeleenyu akhunaninyu, nyuuva ciicammo phinhaleenyu uphimeliya.”
39 Vano, ahaahimeerya nlattanihero nimoca, eeraka: “Niireke ntthu oohoona pooti unvarela moono ntthu oohoona nkhwaawe? Ooyeeli khanhala umoorela munlittini?
40 Ule neetthucihiya, khanonvikana ule nomwiitthuciha, masi eetthucihiyaka saana naahala unlikanana ule nomwiitthuciha.
41 Vano nlattuni nnoweheeheenyu ikokhola iri nniithoni na munneenyu, masi nhikhitiriki woona ikopo iri nniithoni winyu?
42 Awula, nnowa cani mmwiirelaka munneenyu co: ‘Munna nkani kuukumiheni ikokhola iri nniithoni winyu’ ni nyuuva nnarina ikopo nniithoni winyu? Atthu owootha! Mpacereke wiikumiha ikopo nniithoni winyu, vano phinhaleenyu woona mananna ookumiha ikokhola nniithoni na munneenyu.
43 “Kontha khuuvo mwiri womaana uniima mihokorokho cohinamaana, ni khuuvo mwiri wohinamaana uniima mihokorokho comaana.
44 Khula mwiri uncuweleliya nlattu wo mihokorokho caya. Wootakihera, khacinhephiya mihokorokho cofiiku mmwirini wo mwiiwa ni hataa nhokorokho wo uuva khunhephiya mmwirini womwiiwa.
45 Ntthu ooreera nrima nooluma citthu comaana ni ntthu ootakhala nrima nooluma citthu cootakhala; kontha malaku anooluma ile icanre wanrimani.
46 “Vano, nlattuni nnokihaneenyu ‘Pwiiya! Pwiiya!’, masi khannopanka ile inhimyaaka?
47 Ule nowa nipuro niryaaka ni eewelelaka moolumwaaka ni eettelaka, mi kinawuhimeryani ntthu nonlikananaawe:
48 Uyo nolikana ni nlopwana aatekile inupaawe, athipaka malikitti owiisa ni aatekaka aliseersu wamwalani. Vano, urupa waya ipula yinci, maaci yahocara ni maaci oomoolokoni yahaatta inupeeyo, masi khayaakhitinri umorosa, kontha yahotekiya saana.
49 Vano ule neewelela moolumwaaka, masi wooheettela, naalikanaca ni nlopwana aatekile inupaawe woohaaliseerusu wanhaavani, ni mooloko ucara waya maaci, yahaatta iyo inupeeyo ni woohipica yahomora, ni ihasaraaya yaari yuulupale.”