Ihapari Comaana Cantikhiye ni Luka 7:1-50
-
Waamini waathoonyenryaawe nkhulupale aanakhotto (1-10)
-
Yesu naamunweleliha mwaana a nankhweli aakhala u Nayi (11-17)
-
Joau Mpattisa naattottopeliya (18-30)
-
Atthu oohiwacera myaha ca Nluku anaahukhumwiya (31-35)
-
Athiyana omatampi anaaleveleliya (36-50)
-
Nlattanihero naalopwana yaalokihiya nsurukhu (41-43)
-
7 Umaliha wawe uwuulumana apoovu, uyo ahorwaa u Kafarnau.
2 Ni ipottha ya nhooleli aanakhotto, yaafentiya venci cinene naapwiiyaaya, yahowerennya venci ni yaahaleela vakaani ukhwa.
3 Ukati nkhulupale aanakhotto wiiwilyaawe oolumiyaka Yesu, ahaaruma mahumu makiina aayuuta urwaa unlepela Yesu wiira avonihe ipotthaawe.
4 Ayo yahorwaa umoonanana Yesu ni yahopacera unlepela isontte yankhanyererihaka yeeraka: “Uyo unamphwanela ukaviheriya ni nyuuva,
5 kontha uyo nawaafenta apoovweehu ni phitekile isinakookeehu.
6 Vano, Yesu ahokhuma nkhayi naayo, masi uhaleelaka ukati vakaani wiira aphiye uwannyawe nhooleli aanakhottooyo, uyo ahaaruma apatthannyaawe wiira yamwiirele: “Pwiiya, khunkiphwanela uwaakhelani mpaani waka.
7 Phimaana, koonile uhikiphwanela uwa uwoonananani. Masi mweeraru avone, uyo naahala uvona.
8 Kontha miiva ciicammo kinlopwana kinwiiwelela akhulupale, ni kihaana anatoropa kinaahoolelaaka, ni kinaamwiirelaka mmoca: ‘Urwee!’ nuuyo naarwaa, ni kinaamwiirelaka nkhwaawe: ‘Uwe!’ nuuyo naawa, ni kinawiirelaka ipotthaaka: ‘Upanke ila!’ niiyo inaapanka.
9 Ukati Yesu wiiwalyaawe iyo itthwiiyo, ahontikhinaca uyo nkhulupalyooyo ni ahaaweha atthu yantthara, ni aheera: “Kinoohimeeryani ikhweeli wiira, hataa u Isarayeli akimphwanyile ntthu owaamini toko ula.”
10 Ni uturuwela waya uwaani atthu yaarumiye, yaahophwanya ipottheeyo inavonne iretta yaawerennyaaya.
11 Wiirannya waya iyo itthwiiyo, uyo ahokhuma ni ahorwaa isittatti ineehaniya u Nayi ni attharyaawe ni atthu enci yahorwaa nkhayi nuuyo.
12 Yesu ahaleelaka uphiya usittatti, ahaakumanana atthu yaacisile nrepa nantthu ookhwa, aari mwaana anankhweli ni aarina yooyo paahi! Ni atthu enci onsittatti yaananveleela uyo nthiyanooyo.
13 Ukati Apwiiya waamoonilyaaya uyo nthiyanooyo, yahomoonela uthunku ni yahomwiirela: “mmaale wunlanwo.”
14 Vano, ahaattamela nrepanno ni ahovara ni atthu yaateesilyaayo yaheemela, ni uyo aheera: “Mmirawo, kinwiirela: Wunwe!”
15 Vano, mmirawooyo ahonkoma ni ahopacera wuulumaca, ni Yesu ahaavaha anumwaane.
16 Vano, atthu otheene yahoova ni yahopacera unttottopela Nluku yeeraka: “Hokhumelela porofeeta muulupale iriyariihu ni Nluku haacaaliha apoovwaawe.”
17 Ni nnyo ihaparinnyo, cahomwaryeela ilapo yo u Yuuta yotheene ni micoko cowaattamela.
18 Vano, atthari a Joau yahonttonkela citthu cotheene Joau.
19 Joau ahaaveleeliha attharyaawe eeli waapwiiya Yesu wiira yaakohe yeeraka: “Nyuuva phi yoole nowa, awula nihaana umwanriiha nkhwaawe?”
20 Uphiya waya nipuro naaryaawe Yesu, ayo alopwanaayo yahomwiirela: “Joau namapattisa, hooniruma wiira nuukoheni, wiira: ‘Nyuuva phi yoole nowa, awula nihaana ninwehereraka nkhwaawe?’”
21 Yooyo ukatyuuyo, uyo ahaavoniha atthu yaawerennya iretta cuulupale, iretta coovirikana ni aanoomola maciini ni anaavoniha atthu oohoona.
22 Uyo, ahowaakhula eeraka: “Nrwee mwanhimeerye Joau citthu ciniiweenyu ni cinooneenyu, atthu oohoona anawoona, atthu oottumpela anaweetta saana, atthu omakuttula anaavonihiya, atthu oohiiwa anawiiwa, atthu ookhwa anawunwelelihiya ni atthu oohuva anaalalyeeriya ihapari comaana.
23 Ootteeliya phi ule hinhiya waamini nlattu waawaka.”
24 Atthari a Joau ukhuma waya, Yesu ahancera umuuluma Joau iriyari yaatthwaayo, iiraka: “Isiyani yaarweeleenyu woona muuthakoni? Ntathi wooveverusiya niiphyoo?
25 Vano, mwaarweele woona isiyani? Mwaarweele umoona nlopwana nowara ikuwo coovevyaala? Kontha ale anwara ikuwo cooreera ni ale arina maali, ankhala mmanupani comamwene.
26 Khweeli-khweeliini mwaatthiva mwaarweenleni? Urwaa umoona porofeeta? Kinoohimeeryani ikhweeli wiira, uyo hompwaha porofeeta.
27 Joau phi yoole oolumiye weeriyaka wiira: ‘Woone! Kinaahala unveleeliha nrumyaaka ni uyo naahala utthenkaca nttala uhoolo waa.’
28 Kinoohimeeryani khweeli wiira, iriyari yaapinaatamu khaavo ntthu muulupale unvikana Joau, masi ule khanle mwankaani Muumweneni wa Nluku, phiri muulupale unvikana uyova.”
29 (Ukati atthu otheene weewilyaaya ni anamaliviha nsokho, yaaheera Nluku khanle nasariya, kontha yaapattisiye ni mpattiso wa Joau.
30 Masi mafariseu ni atthu yaacuwela saana nlamulo, khayaapheela upanka itthu Nluku yaapheelaawe kontha khayaapattisiya ni mpattiso wa Joau.)
31 “Vano, kaalikaniheke naapani ala atthu omahukwaala, ni ala ari toko apani?
32 Ala atthwaala, anlikanaca naamirawo ari wapacari ni anaakhuwelela akhunanaya yiiraka: ‘Nihowiipelani mpetta, masi nyuuva khamwiinile; nihowiipelani macipo ooriipiha nrima, masi nyuuva khanriipiye nrima.’
33 Inanna imocaaru, Joau Mpattisa, khaalya ni khaawurya, masi atthu yeera: ‘Ula haana maciini.’
34 Mwaana Apinaatamu naalya ni naawurya, masi ayo aneera: ‘Mmooneke! Nlopwana oolya cinene ni oowurya venci, mpatthani aanamaliviha nsokho ni aanamatampi’
35 Khweeliini, ntthu nooniya ucuwelaca ni citthu cimpankaawe.”
36 Vano, nfariseu mmoca ahonkhanyerera unlattula Yesu wiira alye uwannyawe. Vano Yesu ahorwaa uwannyawe uyo nfariseuuyo ni ahonkoma wa meeca.
37 Ile isittattiile ahaavo nthiyana mmoca, aacuweliya ukhala namatampi ni uyo ahocuwela wiira Yesu aarweele ulya uwannyawe uyo nfariseuuyo. Ni ahokusa ikaraafa yo makhura oonukhela.
38 Uyo ahokhoroma wamettoni ca Yesu ni ahopacera wunla. Vano, uyo ahopacera unaaniha inyaa ca Yesu nimiithoryaawe ni owutaca inyaa niikharari cawe. Ni ciicammo, uyo khaahiyerera upecari ni wiitthela makhura inyaa ca Yesu.
39 Woona wawe nfariseu anlattunle Yesu itthu yaapankaawe ule nthiyanoole, ahopacera wuupuwela mmuru wawe, eeraka: “Ula nlopwanoola nari porofeeta, eekhweeli ancuwela nthiyanani nonvara-vara ni anhala ucuwela makhalelwaawe, wiira ula namatampi.”
40 Vano, Yesu ahomwiirela Simau: “Ihaavo impheelaka wuuhimeerya.” Uyo ahaakhula eeraka: “Muulumeke mwiitthucihi!”
41 “Nlopwana mmoca, ahaakopiha nsurukhu alopwana eeli, mmocooyo ahokopha itenaariyu 500 ni nkinooyo aakophile 50.
42 Ukhala wiira alopwana ooyeeli khayaakhitiri unliva, uyo ahaalevelela ninrima wotheene. Vano, iriyari yaayo alopwana eelyaayo, phuuvi aahala utepa unfenta ule aakopihile nsurukhuule?”
43 Simau ahaakhula, eeraka: “Kinoona wiira phuule leveleliye nsurukhu mwincyuuyo.” Vano, Yesu ahomwiirela: “Uhaakhula saana.”
44 Yesu ahorukunuwa ni ahonweha nthiyanooyo, ni ahomwiirela Simau co: “Unaamoona ula nthiyanoola? Mi kihokela mpaani waa masi weeva khukivahile maaci oorapiha inyaa caka. Masi ula nthiyanoola, horapiha inyaa caka nimiithoryaawe ni howutaca niikharari cawe.
45 Weeva khukivahale ipeecu, masi ula nthiyanoola iweelwaaka va, khanhiyerera upecari inyaa caka.
46 Weeva khawiitthenle makhura mmuru waka, masi ula nthiyanoola hiitthela makhura oonukhela nnyaani waka.
47 Phimaana, kinoohimeerya ikhweeli: ula nthiyanoola, itampi cawe, cihookhalaru cinc, ciholeveleliya, kontha ula hoonihera ukifenta. Masi ule noleveleliya vakaani, nofenta vakaani”
48 Vano, Yesu ahomwiirela nthiyanooyo co: “Matampyaa aholeveleliya.”
49 Ale yonkomile nkhayi ni Yesu wa meeca yahopacera wiikoha, yeeraka: “Tipani ula wiira akhitiri ulevelela matampi?”
50 Masi, Yesu ahomwiirela nthiyanooyo co: “Waamini waa uhowoopola. Urweeke ninnema.”
