Ihapari Comaana Cantikhiye ni Luka 8:1-56
-
Athiyana yeetta nkhayi ni Yesu (1-3)
-
Nlattanihero na namalima (4-8)
-
Kontha isiyani Yesu eetthucihaawe nimalattanihero (9, 10)
-
Itthu intaphulelaaya nlattanihero na namalima (11-15)
-
Khaavo nokhuneela nthuko (16-18)
-
Anumwaane ni asihimaawe Yesu (19-21)
-
Yesu naamaaliha iphyoo yuulupale (22-25)
-
Yesu nawoomolela maciini mmakuluweni (26-39)
-
Mwaana a Jairo; athiyana amoca anaakwanya ikuwo ya Yesu (40-56)
8 Uvira waya ukati vakaani, Yesu ahopacera weetteetta isittatti niisittatti ni aliteeya naaliteeya, alalyeeraka ihapari comaana co Umwene wa Nluku ni maapostolu 12 yaari nkhayi nuuyo,
2 ciicammo, yahaavo athiyana akina yoomoliye maciini yaarinaaya ni yaavonihiye iretta caya. Ayo athiyanaayo phaala: Maria eehaniya Mataleena, yaankhumile maciini 7;
3 Joana, amwaara Kuusa, aavahaceriye uwacera inupa ya Herooti; Susana; ni athiyana enci akina yaankavihera nimihakhu caya.
4 Ukati atthu enci waatakanenlyaaya naatthu yaawa umoonanana Yesu yaakhuma isittatti cikina, uyo aahooluma ninlattanihero:
5 “Namalima mmoca aahorwaa waala ipyoo cawe. Ukati waalaawe, cikiina caahomorela nseresere iparapaara ni caahonyakeliya, ni inuni cahowa ni caholya.
6 Ipyoo cikiina, caamorenle watthayani yo maluku ni umela waya, caahooma kontha itthayeeyo yaari yowuuma.
7 Ipyo cikhwaawennyo caamorenle wamwiiwani ni miiwa wunnuwa waya nkhayi ninnyo, cahophunyaca ni khacoonuwile-to.
8 Masi cikina caamorenle watthayani yomaana ni umela waya, caaheema mihokhorokho ikwaha coopwahaka 100.” Waahimeerya wawe nno nlattaaniheronno, aahoolumaca eeraka: “Ule nopheela wiiwa, eewe.”
9 Masi attharyaawe yaahonkoha, isiyani yaataphulelaaya nno nlattaniheronno.
10 Uyo aahowiirela: “Nyuuva nhovahiya ucuwelaca isiiri co Umwene wa Nluku, masi atthu akina aneetthucihiya nimalattanihero, wiira awehe, masi hataa ukhalaka commo, ahoone ni wiira yiiwe masi hataa ukhalaka commo, ahicuwelele.
11 Itthu intaphulelaaya nlattanihero phiila: ‘Ipyoonnyo akhanle moolumo a Nluku.
12 Ipyoo caamorenle nseresere iparapaara cinlattaniheriya naatthu aneewa nuulumo, ni Tiyapu naawaa ni naakumiha nuulumo na Nluku wanrimani waya, wiira ahaamini ni ahoopwe.
13 Ipyoo caamorenle watthayani yo maluku, cinlattanihiya naatthu aneewa nuulumo, anaakhelela waatteelaka nrima masi ahinkhalana mitithari. Anawaamini ukati vakaani, masi waphiyaka ukati woottehattehiya, ayo anaahiya waamini.
14 Ipyoo caamorenle wamwiiwani, maanaaya atthu aneewa nuulumo, masi nlattu womasukhuli, mihakhu ni upheela upuha ni upheela citthu contuninyani, iyo itthwiiyo inaawiiriha ulolovaca ni uhiimiha mihokorokho.
15 Ipyoo caamorenle watthayani yomaana, cinlattanihiya naatthu aneera yiiwaka nuulumo, anawiiweeha sana-saana ni anaweesa wanrimani ni anawiimaha mihokorokho yavilelaka.
16 “Wapariheliyaka nthuko, khaavo neesa vathi waya mwaapu awula vathi waya nkori, masi uneesiya waculu wiira khula ntthu nokela mpaani ummwaleele.
17 Kontha khiivo hataa itthu ivithiye inhala uhihimiya, ni hataa khiiyo itthu ivithiye saana, inhinhala ucuweleliya.
18 Phimaana, mwiiweehe saana itthu nneeweleleenyu, kontha ule rina citthu cinci naahala wuncereriya, masi ule hirina, hataa ile inoopuwelaawe ukhalana naahala waakhiya.”
19 Anumwaane ni asihimaawe Yesu yaahowa, masi khayaakhitinri uphiya waaryaawe nlattu waatthu enci yaarivo.
20 Vano, atthwaayo yaahomwiirela: “Anumwaninyu ni asunninyu ari vate vaava ni anaapheela uwoonananani.”
21 Uyo aahowaakhula, eeraka: “Amaama ni asihimaaka phaale aneewelela Nuulumo na Nluku ni aneettela”
22 Nihuku nimoca, Yesu naattharyaawe yaahokela nkalawani ni uyo aahowiirela: “Nttwee mphantte nkina wo ntthiya.”* Vano yaahokhumaca.
23 Masi, yeettakoono Yesu aahorupa. Vano, yaahopacera iphyoo yuulupale ni ikalaweeyo yaahopacera ucara maaci ni yaahala vakaani uttittha.
24 Phimaana, yahonwusa, yeeraka: “Mwiitthucihi, Mwiitthucihi, nihanle ukhwa!” Uyo aahonwa ni aahopwapwela iphyoo ni maacyaayo yaaheemela ni waahomaalyaa.
25 Vano, uyo aahowiirela: “Waamini winyu uri vayi?” Masi ayo, yaahoovaca venci ni yaari ootikhinihaciya ni yaaneerelana: “Ula nlopwanoola tipani? Kontha hataa iphyoo ni ipahari cinaamwiiwelela.”
26 Ni yaahophiyaca mphantte nkina wopahari, ncoko wo maceraseenu, unkhala mphantte nkhwaawe wo Kalileya.
27 Yesu ukhuruwa wawe nkalawani, nlopwana mmoca aakhuma usittatti aarina maciini menci, ahorwaa umoonanana Yesu. Uyo, aahoviriha ukati mwinci woohiwara ikuwo ni aakhala umahiye.
28 Uyo, umoona wawe Yesu, aahokhuwela ni aahokhoroma uhoolo wawe ni aheera: “Isiyani inkipheelelaa Yesu, mwaana a Nluku Nkhulupale? Kinawuulepela sontte uhikihuvihe.”
29 (Kontha Yesu, aahiirela nno nciininno ninkhume nlopwanooyo. Nno nciininno, nanonkela ikwaha cinci ni antthukiyaka ikwaha cinci nuunyolo mmyoononi ni mmettoni, ni ankhalenliya, masi ankattula unyolooyo ni ankusiya ni nciininno ninrwaanaka mapuro oohiviraviriya.
30 Yesu aahonkoha eeraka: “Ncina naa tipani?” Uyo aahomwaakhula eeraka: “Nkupitti.” Kontha uyo, aahokeliya nimaciini menci.
31 Ni maciinnyaayo, yaanonlepela Yesu wiira hiivonyere munlikittini nowiisa.
32 Cahaavo nne nipuronne ikuluwe cinci caalya umwaakoni, phimaana, macinnyaayo yaahonlepela Yesu wiira aahiye ukela nkuluweni ni uyo ahotthunihera urwaa.
33 Vano, maciinnyaayo yaahonkhuma nlopwanooyo ni yahokela mmakuluweni; ni nnyo caahotupha umwaakoni waaryaaya cituphelaka mpahari ni caahottittha.
34 Masi, ale yaawacera ikuluwe woona waya itthu yiirannyeele, yahotthawa ni yaahorwaa uhimyaca mmasittatti ni mmaaliteeya.
35 Vano, atthu enci yaahorwaa woona itthu yiirannyeele. Waattamenlyaaya nipuro naaryaawe Yesu, yahomphwanya nlopwana yankhumile maciinnyuuyo nawanre ikuwo ni nari saana, nonkomile nkhayi ni Yesu ni ayo yaahopacera woova.
36 Atthu yoonile citthu cotheene ciirannyaaka, yahaahimerya mananna nlopwana aakeliye maciini menci caavonihiyaawe.
37 Ni atthu enci oncoko wo maceraseenu, yaahonlepela Yesu wiira akhume ncokhwaaya, kontha yaahoova cinene. Vano uyo, aahokela nkalawani wiira arwee.
38 Masi nlopwana yankenle macinnyuuyo ahonlepela wiira antthare, masi Yesu ahonkhottiiha amwiirelaka:
39 “Uturuwele uwaani ni uhihiyerere uhimyaca citthu Nluku copankenlyaawe.” Vano, uyo aahokhuma ni aahorwaa, alalyeeraka isittatti yotheene itthu Yesu yampankenlyaawe.
40 Yesu uturuwela wawe u Kalileya, aahaakheleliya saana, kontha atthu otheene yaanonweherera.
41 Vano, ahowa nlopwana mmoca eehaniya Jairo, uyo aari nhooleli oosinakooka ni aahokhoroma uhoolo wa Yesu ni aahopacera unlepela isontte wiira arwee uwannyawe,
42 kontha mwanawe mwanthiyana aarina myaakha 12, aahanle vakaani ukhwa.
Yesu arwaaka uwannyawe uyo nlopwanooyo, atthu enci yaanomphunya.
43 Yahaavo athiyana amoca yaavirihale myaakha 12 yawerennyaka iretta yookhuma iphome ni khaavo aakhitiri waavoniya.
44 Ayo, yahomwaattamela uttuli wawe ni yahokwanya nseresere ikuwo yaawanryaawe ni irettaaya yaahomalamala.
45 Vano, Yesu ahokoha: “Tipani kivanre?” Ukhala wiira atthu otheene yeera khaavo anvanre, Peturu aheera: “Mwiitthucihi, atthu otheene ala vaa ahowuurukureeryani ni anawuuphunyani.”
46 Masi Yesu aheera: “Haavo kivanre, kontha cihookhuma ikuru mwiirutthuni waka.”
47 Athiyanaayo woona waya wiira yaahocuweleliya, yaahomwaattamela Yesu yattettemelakoono ni yahokhoroma uhoolo wawe ni yaahohimya atthu otheene yiiwaka itthu yaawiirihile unvara ni mananna yaavonihiyaaya wowaakuvya.
48 Masi uyo aahowiirela athiyanaayo: “Mwanaka, urweeke, waamini waa uhowiiriha uvona.”
49 Yesu oolumacakoono, yahowa alopwana yaakhuma uwannyawe nhooleli oosinakookooyo, yeeraka: “Mwaninyu hokhwa. Nhiye unsupha Mwiitthucihi.”
50 Wiiwa wawe iyo itthwiiyo, Yesu ahaakhula, eeraka: “Uhoove, ukhalane waamini ni mwanaa naahala woopwa.”
51 Uphiya wawe watthokoni vaa, Yesu khaatthunne unkelana ntthu nkhwaawe, hikhanle Peturu, Joau ni Tiyaku, ni athumwaane ni anumwaane mwanthiyanooyo.
52 Masi atthu otheene yaanonla ni yaaneecaatta ikhakaaca, nlattu wooriipiya nrima. Phimaana, Yesu aheera: “Mmaale wunla! Ula khakhwile itthu, masi naarupa.”
53 Atthwaayo wiiwa waya iyo, yahancera unthya yanvyavyeehaka, kontha yancuwela wiira mwanthiyanooyo ahokhwa.
54 Vano, Yesu ahonvarela ntata ni ahomwiirela: “Mwanthiyana, wunwe!”
55 Ni uyo, ahoturuwela ukhala nkumi ni ahonwa woohipica, ni Yesu ahoruma wiira avahiye iyoolya.
56 Athumwaane ni anumwaane mwaanooyo, yaahokhala ootteeliya nrima venci. Masi Yesu ahowiirela wiira ahinhimeerye ntthu itthu yeerannyeele.
Notas
^ Awula: “ntapwi.”