Ihapari Comaana Cantikhiye ni Luka 9:1-62
-
Atthari 12 anaavahiya malakihero nhina nteko woolalyeera (1-6)
-
Herooti nansanka Yesu (7-9)
-
Yesu nawaavaha iyoolya atthu 5.000 (10-17)
-
Peturu naahimya wiira Yesu phiri Kristu (18-20)
-
Yesu naahimya wiira naahala wiiviya (21, 22)
-
Ntthari eekhweeli (23-27)
-
Yesu naatathuwaca (28-36)
-
Mmirawo aavariye nimaciini naavonihiya (37-43a)
-
Yesu naahimyaca-tho wiira naahala wiiviya (43b-45)
-
Atthari anaanyakuliherana tipani unomphwanela ukhala muulupale iriyaryaaya (46-48)
-
Ule hinnilupattha ri ni hiiva (49, 50)
-
Atthu o Samariya ananthanya Yesu (51-56)
-
Ule nopheela untthara Yesu (57-62)
9 Vano, Yesu ahowiihana maapostolwaawe 12, ahaavaha ikuru ni ukhulupale wiira yoomole maciini ni avonihe iretta.
2 Ni ahaaruma wiira yalalyeere Umwene wa Nluku ni yavonihe iretta.
3 Ni ahowiirela: “Ukati nnohaleenyu weetta nkwaha, nhicise itthu, hataa nttontto, ncako, iphaawu, ni nhicise nsurukhu ni hataa ikuwo yonayeeli.
4 Masi inupa-phiinupa nnohaleenyu ukela, nkhale mommo, mpaka nnohaleenyu ukhuma.
5 Khula ncoko unhaleenyu uhaakheleliya saana, wookhuma va nkukutthe ntthupi nonnyaani winyu, wiira nno naavahe usaahiti.”
6 Vano, ayo yahokhuma ni yaheetta aliteeya naaliteeya, yalalyeeraka ihapari comaana ni yaavonihaka aretta mapuro otheene.
7 Ni Herooti nsatoro o distritu, wiiwa wawe cuulumiyaka citthu cotheene caakhumelela, ahosanka, kontha atthu akiina yeera wiira Joau honwelelihiya,
8 akiina yeera wiira Eliyasi aahoowa ni akiina yeera wiira porofeeta okhalayi ahowunwelela.
9 Vano, Herooti aheera: “Mi kihomwiiva Joau. Vano, tipani uyo kineewaaka oolumiyaakooyo?” Vano, uyo ahopacera umwaavya wiira amoone.
10 Ukati maapostolu waaturuwilyaaya, yahonhimeerya Yesu citthu cotheene yaapankilyaaya. Vano, Yesu ahaakhumana nkhayi aarwaaka ncoko uneehaniya Petisayita, wiira yakhale veekha.
11 Masi, atthwaayo ucuwela waya wiira yankhumaca, yaahaattharaca. Ni Yesu ahowaakhela sana-saana ni ahopacera uwiitthuciha ihapari co Umwene wa Nluku, aavonihaka ale yaapheela uvonihiya.
12 Ucoocilo, maapostolu yahomwaattamela ni yahomwiirela: “Mwaaleve atthwaayo wiira arwee mmaaliteeya ni mapuro ankhaliya yaattamenleehu, wiira yaphwanye nipuro noomumula ni itthu yoolya, kontha nna nipuro niriihunna ukhanle uttayi ni waaliteeya.”
13 Masi Yesu ahowiirela: “Mwaavaheke nyuuva itthu yoolya.” Ayo yahomwaakhula, yeeraka: “Khanirina itthu, uhikhanle iphaawu 5 ni ihopa cooyevaca piili, kaahiki hiiva nikhume ni nirwee nathume iyoolya yowaatosera atthu otheene.”
14 Khweeliini, nne nipuronne yahaavo alopwana ookhalaka 5.000. Vano uyo, ahowiirela attharyaawe co: “Nwiirele atthu otheene yunkomace ikhurupu niikhurupu, khula ikhurupu atthu 50.”
15 Ni, ayo yahowiirela atthu otheene yunkome.
16 Vano, Yesu ahokusa iphaawu thanunnyo ni ihopa piilinnyo. Ahoweha wiirimu ni aholompela. Vano, ahomyaaniha ni ahopacera waavaha eetthucyaawe wiira yaakawele atthwaayo.
17 Ni, atthu yaaholya ni yahorupala, ni cahottotteliya ipetaasu cophaawu caahanle ni cahocara itthuttu 12.
18 Ukati waalompaawe nari veekha, attharyaawe yahomwaattamela ni uyo ahaakoha, eeraka: “Atthwaayo aneera wiira miiva kimpani?”
19 Vano, ayo yahaakhula yeeraka: “Ahaavo aneera Joau Mpattisa, akinaayo aneera Eliyasi ni akinakwaayo aneera porofeeta mmoca-mmoca okhalayi onwelenle.”
20 Vano, uyo ahaakoha-tho, eeraka: “Vano nyuuva, nneera miiva tipani?” Peturu ahomwaakhula, eeraka: “Kristu a Nluku.”
21 Vano, Yesu awoopanaka mwaha attharyaawe, ahowiirela wiira ahinhimeerye ntthu iyo itthwiiyo.
22 Masi, ahowiirela: “Mwaana a Pinaatamu naahala uhuva cinene, uthanyiya naahooleli a Yuuta, ahooleli aanankuttho ni anamantikha, ni ciicammo naahala wiiviya, ni nihuku ninhalaawe upiihera mahuku mararu nakhwileene, naahala wunwelelihiya.”
23 Vano, uyo ciicammo, ahowiirela atthu otheene: “Ntthu mpheela ukhala nttharyaaka haana eekhottaka mwaaneennyaawe, masi ateese nipotto nawe noohuviheriya ni akitthare mahuku otheene.
24 Kontha ule nopheela woopola ukumyaawe, naahala uhaleela, masi ule nohala uhaleela ukumyaawe nlattu waawaka, naahala woopola.
25 Khweeliini, pinaatamu nohala uphurani aakhelaka ituninya yotheene, masi ahalaka uhaleela ukumyaawe?
26 Kontha ule nohala woona ihaaya nlattu waawaka ni nlattu wo moolumwaaka, mwaana apinaatamu ciicammo, naahala woona ihaaya nlattu wo uyo ntthuuyo, ukati unhalaawe uwa muuttitthimani mwaathumwaane ni womalayikha owaarya.
27 Kinoohimeryani ikhweeli wiira ahaavo ari va, ahinhala ukhwa woohoona Umwene wa Nluku.”
28 Khweeliini, anavinreene mahuku 8 noolumileene ayo moolumwaayo, ahonkusa Peturu, Joau ni Tiyaku, ni ahorwaa umwaakoni wiira alompe.
29 Ukati waalompaawe, ikhovyaawe yahorukunuwa ni ikuwo cawe caahokhala cootteela cinene.
30 Ni yaahowa alopwana eeli yaamoopana mwaha: aari Moceesi ni Eliyasi.
31 Ayo yaawile nuuttitthima ni yahopacera woopela mwaha inanna caahalaawe Yesu ukhuma watuninyani. Waahala uyova wiirannya woohipica u Yerusalemu.
32 Peturu ni atthu yaari nkhayi nuuyo yahorupa, masi ukati wonwilyaaya, yahoona uttitthima wa Yesu ni alopwana eeli yeemenle nkhayi nuuyo.
33 Ni ukati waarwaaya ayo alopwanaayo, Peturu ahomwiirela Yesu: “Mwiitthucihi, uhoreera ukhala wihu va. Mwapheelaka vale, pooti wanaatthenkaceehu aheema araru: Heema mmoca awinyu, nkhwaawooyo a Moceesi ni nkinakuuyo a Eliyasi.” Uyo, khaacuwela itthu yoolumaawe.
34 Masi ukati woolumaawe, nahowa nihutte ni nahopacera waakhuneela. Ukati waakhunenlyaaya, yahoova cinene.
35 Vano, naaheewannya ncu nnihuttenimmo, neeraka: “Ula mwanaka kinthanlilyaaka. Mmwiiwelele.”
36 Masi ukati weewilyaaya ncu, Yesu ahohala veekha. Vano ayo, yahomaalana ni khayanhimenrye ntthu ale mahukwaale itthu yoonilyaaya.
37 Waaseele, ukati waakhuruwaaya umwaakoni, atthu enci yahorwaa umoonanana Yesu.
38 Iriyari yaatthwaayo, ahokhuwela nlopwana mmoca, eeraka: “Mwiitthucihi, kinawuulepelani sontte mwanwehe mwanaka, kontha uyo phirinaaka paahi.
39 Nihaavo nciini ninwa ninonkela, ni woohipica uyo naakhuwela ni nciininno ninanvonyera vathi athukumelaka ni anankhuma maphooru mmwano. Ninamoonihileene uweryaa, phinonhiyaaya.
40 Kihaalepela atthariinyu wiira yoomole, masi khaakhitinri.”
41 Vano, Yesu ahowaakhula, eeraka: “Atthu oohaamini ni ootakhala nrima, kinhala wuukhalanani mpaka yaakhani ni kinhala wuuvilelani mpaka yaakhani? Nkiwaanele va mwaninyuuyo.”
42 Ni ukati waamwaattamelaawe Yesu mwanhimooyo, nciininno nahonvonyera vathi ni ahopacera uthukumela venci. Masi, Yesu ahopwapwela nciininno ni nahonkhuma ni uyo ahaavaha athumwaane.
43 Ni atthu otheene, yahokhala ootikhinihiya niikuru ca Nluku.
Ukati atthu yaatikhinacaaya citthu cotheene Yesu caapankaawe, uyo ahowiirela attharyaawe co:
44 “Mwiiwelele ni nhiliyale ala moolumwaala: Mwaana a Pinaatamu naahala uvariya ni naahala uvahereriya mmatatani waatthu.”
45 Masi ayo khayeeweehile itthu yaahimilyaawe. Khweeliini, iyo yaahovithiya wiira ahiiweehe ni yaanoova unkoha iyo itthwiiyo.
46 Vano, ayo yahonyakulihana ukati waapheelacaaya acuwele tipani aahala ukhala muulupale.
47 Yesu ucuwela wawe itthu yoopuwelaaya wanrimani waya, aahonkusa mwanhima ni ahomweesa mphanttyaawe,
48 ni ahowiirela: “Ule nomwaakhelela mwaana mwancina naka, ciicammo naakaakhelela miiva, vano ule nokaakhelela miiva, nomwaakhelela ciicammo Ule kirumile. Kontha ule neeyeviha khampa mwanhima iriyariinyu, phikhanle muulupale.”
49 Joau ahomwaakhula eeraka: “Mwiitthucihi, nihomoona ntthu oomolaka maciini mwancina ninyu, ni hiiva nihomananiha umwaateeliha, kontha uyo khaneetta nkhayi ni hiiva.”
50 Masi Yesu ahomwiirela: “Munhiye, kontha ule hinoolupatthani ri mphantteenyu.”
51 Waattamela waya mahuku oopheela urwaa wiirimu, Yesu ahorwaa u Yerusalemu.
52 Ni uyo ahaaveleeliha atthu uhoolo wawe, ni ayo yahorwaa. Ni yahophiya aliteeya o Samariya wiira yatthenkace mananna caahalaaya umwaakhelela.
53 Masi atthu o Samariya khayaatthunile umwaakhela, kontha uyo aalakenle urwaa u Yerusalemu.
54 Ukati atthari Tiyaku ni Joau woonilyaaya iyo itthwiiyo, yaaheera: “Pwiiya, nnaapheela wiira nirumeke ukhuruwa mooro wiirimu wiira waatankanye ala atthwaala?”
55 Vano, Yesu ahaarukunuwela ni ahaapwapwela.
56 Ni yahorwaaca aliteeya akhwaawe.
57 Ukati weettaaya mparapaarani, ntthu mmoca ahomwiirela Yesu: “kinawuuttharani motheene munhaleenyu uvira.”
58 Masi Yesu, ahomwiirela co: “Akhwantte ahaana nipuro noorupa, inuni cihaana ipuuru, masi Mwaana a Pinaatamu, kharina nipuro noorupa.”
59 Vano, uyo ahomwiirela ntthu nkina: “Ukhale nttharyaaka.” Masi nlopwanooyo ahomwaakhula eeraka: “Pwiiya kimpaca toko urwaa waavitha apaapa.”
60 Masi uyo ahomwiirela: “waahiye atthu ookhwa yavithanaka ayaayoru, masi weeva, urwee ni walalyeere Umwene wa Nluku.”
61 Ni nkinooyo enre: “Mi kinawuuttharani Pwiiya, masi nkihiye toko kaaleehe amucyaaka.”
62 Yesu ahomwaakhula, eeraka: “Ule nolima iliinya ni nokhala awehaka uttuli, khunomphwanela ukela muumweneni wa Nluku.”
