Ihapari Comaana Cantikhiye ni Markus 1:1-45
-
Ulalyeera wa Joau Mpattisa (1-8)
-
Upattisiya wa Yesu (9-11)
-
Yesu naattehattehiya ni Sotwani (12, 13)
-
Yesu nawancera ulalyeera u Kalileya (14, 15)
-
Yesu nawaalattula attharyaawe oopacera (16-20)
-
Nciini ninawoomoliya (21-28)
-
Yesu nawaavoniha atthu enci u Kafarnau (29-34)
-
Yesu naarwaa ulompa veekha (35-39)
-
Yesu nanvoniha namakuttula (40-45)
1 Upacera wohapari comaana cimmuuluma Yesu Kristu, mwaana a Nluku.
2 Toko cantikhiyaaya nlivuruni ya porofeeta Isaiya: “(Woone! Kinaahala unveleeliha nrumyaaka ni uyo naahala utthenkaca nttala uhoolo waa.)*
3 Haavo nokhuwela muuthakoni, eeraka: ‘Ntthenkace nttala wa Yehova! Mumpankele iparapaara cowookwaa.’”
4 Joau Mpattisa,* aari muuthakoni, alalyeeraka mpattiso waathoonyera uttharuwa ni uleveleliya wo matampi.
5 Ni atthu otheene oncoko wo Yuteya ni yaakhala u Yerusalemu, yaanaarwaa mpaka nipuro naaryaawe wiira yapattisiye, ni uyo aanaapattisa* ayo atthwaayo mmoolokoni Jordau, yahimyaka uhoolo waatthu otheene matampyaaya.
6 Joau aawaraka ikuwo yomapururu okamelu ni isintu yonrapala nonama, ni aalyaaka icoroope ni urawo* wontakhwani.
7 Uyo anlalyeera, eeraka: “Uttuli waka, naawa ntthu oolipa ukipwaha miiva, ni khunkiphwanela wooroma ni utthukulaca mikhoyi cosantaaliya cawe.
8 Mi kuupattisileni ni maaci, masi uyo nohala wuupattisani ninnepa wowaarya.”
9 Yaayo mahukwaayo, Yesu ahokhuma u Nasare-Ookalileeya ni ahorwaa upattisiya ni Joau umoolokoni Jordau.
10 Woohipica, ukati waakhumaawe mmaacini, ahoona irimu yahulyaaka ni nnepa wowaarya unkhuruwelaka toko ikhuntta.
11 Ni naheewannya ncu wiirimu, neera: “Weeva ukhanle mwanaka nonfentaaka ni nokitteeliha nrima.”
12 Woohipica, nnepa wowaarya wahomwiiriha urwaa muuthakoni.
13 Vano, ahokhala mahuku 40 muuthakoni, ni ahottehattehiya ni Sotwani. Nwo aari niinama contakhwani ni malayikha yaanankavihera.
14 Vano, utthukiya wawe Joau, Yesu ahokela ilapo yo Kalileya alalyeeraka ihapari comaana ca Nluku,
15 eeraka: “Ukati waahimiye uhophiya, Umwene wa Nluku uhanle wancera ulamulela. Phimaana, nrukunuse makhalelweenyu ni mwaamini ihapari comaana.”
16 Ukati weettaawe nseresere ipahari yo Kalileya, ahomoona Simau ni Andre, mwanhimaawe Simau, yavonyeraka matthavi mpahari, kontha ntekwaaya waari uvara ihopa.
17 Vano, Yesu ahowiirela co: “Nkitthare ni mi kinaahala wuuvahani nteko woowaavya atthu.”
18 Ni woohipica, ayo yahohiya matthavyaayo ni yahontthara.
19 Weetta wawe vakaani, ciicammo ahomoona Tiyaku, mwaana a Sepeteu, nari nimwanhimaawe eehaniya Joau, anonkomacile nkalawani yalokihacaka matthavi,
20 ni woohipica, uyo ahowiihana. Vano, ayo yahaahiya athumwanaya nkalawani anari wamoca naanantekwaaya ni yahontthara Yesu.
21 Ni yahorwaa u Kafarnau.
Uphiya waya nihuku nosaapatu, uyo ahokela nsinakooka ni ahopacera wiitthuciha.
22 Ni atthu yaahokhala ootikhinihiya cinene nlattu wo mananna yeetthucihaawe, kontha uyo aawiitthuciha akaviheriyaka ni Nluku, kahi khampa ceetthucihaaya anamantikha.
23 Yooyo ukatyuuyo, ahaavo nlopwana nsinakooka aavariye ni nciini, ni ahokhuwela eeraka:
24 “Unnipheelela isiyani,* Yesu Nnasareenu? Uwile unitankanya? Mi kinawuucuwela: Wiira weeva urumiye ni Nluku!”
25 Masi, Yesu ahopwapwela nno nciininno, eeraka: “Umaale ni ukhume mwiirutthuni wawe!”
26 Ni nciininno, ummorosela waya vathi uyo nlopwanooyo, uyo ahopacera uttettemelaca ni, ukhuwela wawe niikuru cawe cotheene, nno nahonkhuma.
27 Atthu otheene yaahokhala ootikhinihiya ni yahopacera unyakulihana nlattu wo itthu yeerannyaale, yeeraka: “Isiyani ila itthwiila? Ala meetthucihero onaanaano! Uyo naakhitiri woomola malayikha ootakhala ni ayo anaamwiiwelela.”
28 Iyo yeerannyeeleeyo, woohipica yahocuweliya miphantte cotheene co ncoko wo Kalileya.
29 Vano, yaahokhumaca nsinakooka ni yaahorwaaca uwannyawe Simau ni Andre, nkhayi ni Tiyaku ni Joau.
30 Amaathyaawe Simau yaaphwanyiye aneecaatalenle, yaaweryaaka ikopo,* ni woohipica ahohimeriya Yesu iyo itthwiiyo.
31 Uyo ahorwa mpaka nipuro naaryaaya, ahaavarela ntata ni ahaawusa. Vano, ikopweeyo* yahovona ni ayo yaahorwa uwaapyaacera.
32 Ukela waya ncuwa, atthu enci yahonrweehela aretta ni atthu oovariya ni maciini;
33 ni atthu otheene owasittatti yaathukumanne wankhora vaa.
34 Uyo ahaavoniha atthu enci yaawerennya iretta coovirikana, ahoomola maciini menci, masi khaahiyerera ayo maciinnyaayo yoolumaka hataa itthu, ukhala wiira yancuwela wiira uyo aari Kristu.*
35 Mapikoosa, ahonwa ni ahorwaa nipuro naahalaawe ukhala veekha ni nwo ahancera ulompa.
36 Vano, Simau ni atthu yaari nkhayi nuuyova yaahovira yamwaavyaka.
37 Umphwanya waya, yahomwiirela co: “Atthu otheene anaawaavyani.”
38 Masi uyo ahowiirela co: “Nttwee nipuro nikiina, isittatti cowaattamela niila iryeehwiila, wiira ciicammo kalalyeere, ukhala wiira iyo phiitthu yaawilyaaka uvara.”
39 Ni uyo ahorwaa mpaka u Kalileya alalyeeraka mmasinakooka ni oomolaka maciini.
40 Namakuttula mmoca ahomwaattamela ni ahonlepela isontte nakhoromile, eeraka: “Mwatthuna vale, nkivonihe.”
41 Wiira wawe commo, Yesu ahomoonela ikiriri. Vano, ahonvara uyo nlopwanooyo ni ahomwiirela: “Kinaapheela! Uvoneke.”
42 Woohipica, makuttulaayo yaahomalamala ni uyo aahovona.
43 Vano, Yesu ahomwiirela arweeke, unhimerya wawe woohinkhuwakhuwa co:
44 “Ratta, uhinhimerye ntthu ila itthwiila. Masi urwee wiithoonyihere wa nankuttho ni waavahe itthuvo inlepeliya munlamuloni na Moceesi, wiira ucuweliye wiira khweeliini weeva uhovonihiya.”
45 Masi ukhuma wawe nne nipuronne, uyo nlopwanooyo ahopacera uhimyaca itthu yiirannyeele, mpaka Yesu aakela nsittatti eevitha-vithaka ni aakhala mmaseresere isittatti, mapuro yahaakhalaaya atthu enci. Waahookhalaru commo, atthu omicoko cotheene khayaahiyerera uwa mpaka nipuro naaryaawe.
Notas
^ Niikereeku: “uhoolo waya ikhovyaa.”
^ Niikereeku: “namapattisa.”
^ Awula: “aanaacuwya.”
^ Awula: “uravo.”
^ Awula: “Hi nirina naatani ni weeva.”
^ Awula: “ittekusa.”
^ Awula: “ittekuseeyo.”
^ Awula atthunaka: “yancuwela uyova ari tipani.”
