Ihapari Comaana Cantikhiye ni Markus 10:1-52
-
Uthelanaca ni umwalanaca (1-12)
-
Yesu nawaacaaliha asaana (13-16)
-
Nikoho nanlopwana mmoca thaciri (17-25)
-
Uleva citthu nlattu wo Umwene wa Nluku (26-31)
-
Yesu naahimyaca-tho wiira naahala wiiviya (32-34)
-
Itthu yaalepenlyaawe Tiyaku ni Joau (35-45)
-
Yesu, moopoli aatthu enci (45)
-
-
Nlopwana oohoona eehaniya Partimeu (46-52)
10 Yesu ahokhuma ni ahorwaa u Yuteya, mphantte nkhwaawe wo mooloko Jordau, ni atthu enci yaahonthukumanela-tho. Vano uyo aahopacera uwiitthuciha toko caapankesaawe.
2 Mafariseu yahorwaa mpaka nipuro naaryaawe ni yapheelaka unttehatteha, yahonkoha wakhala wiira nlopwana antthuniheriya waahiya amwaarawe.
3 Yesu ahowaakhula, eeraka co: “Moceesi enre mpanke isiyani?”
4 Ayo yahomwaakhula, yiiraka co: “Moceesi hotthunihera wiira nlopwana pooti waavaha amwaarawe itukumentu yoohimya wiira haamwalanana ni uwoomola.”
5 Masi Yesu aahowiirela: “Nlattu woohitthuna winyu uhimeriya, Moceesi howantikhelani nno nlamulonno.
6 Wiipaceroni wo citthu cowumpiya, ‘Nluku aamumpile nlopwana ni nthiyana.
7 Phimaana, nlopwana naahala waahiya athumwaane ni anumwaane,
8 ni ooyeeli anhala ukhala irutthu imoca.’ Vano, ayo khaanakhala-tho atthu eeli, masi akhanle irutthu imoca.
9 Vano, itthu ikumanihilyaawe Nluku, pinaatamu khanlamuliya waawanyaniha.”
10 Ukelaca waya-tho mpaani, attharyaawe yahonkoha-tho uyo mwahooyo.
11 Yesu aahowiirela: “Ule nohala waamwalanana amwaarawe ni unthela athiyana nkiina, neetta uluva;
12 ciicammo, nthiyana naamwalanana awannyawe, arwaaka utheliya ni nlopwana nkhwaawe, neetta uluva.”
13 Atthu yahopacera unwaanela asaana wiira aavare, masi attharyaawe yanwaateeliha atthwaayo.
14 Woona wawe iyo itthwiiyo, Yesu aahokhala ootikhinihiya ni aheera: “Mwaahiye asaanaayo, nhiwaateelihe uwa mpaka nipuro kiryaaka, kontha Umwene wo Wiirimu ukhanle waatthu anlikana naayova.
15 Kinoohimeryani ikhweeli wiira: Ule nohala uhaakhelela Umwene wa Nluku toko mwanhima, khanhala ukela muumweneni wa Nluku.”
16 Vano, Yesu aahacisa asaanaayo ni ahopacera waacaaliha, aavaraka nintata nawe.
17 Ukati Yesu waakhumaawe nne nipuronne, nlopwana mmoca ahowa atthawaka, ahokhoroma uhoolo wawe ni ahonkoha, eeraka co: “Mwiitthucihi omaana, itthuni inlamuliyaaka upanka wiira kiphwanye ukumi woohimala?
18 Yesu ahomwaakhula: “Nlattuni unkirelaa Mwiitthucihi omaana? Khaavo ntthu omaana, hikhanle mmoca paasi, Nluku.
19 Unaacuwela malamulo aneera: ‘Uhiive, uheette uluva, uhinnye, uhimootherye ntthu, uhoothe, waattitthimihe athumwana ni anumwana.”
20 Uyo mmirawooyo aahomwakhula Yesu, eeraka co: “Mwiitthucihi, miiva kinawiiwelelaka ayo malamulo otheennyaayo ikhumelo inamwannyaaka.”
21 Yesu ahonweha uyo nlopwanooyo ni, nlattu wonfenta, aahomwiirela: “Inawuuhaleela itthu imoca: urwee watumihe citthu cotheene cirinaa ni nsurukhuuyo waavahe amasikhini ni wapanka commo, unaahala ukhalana mihakhu wiirimu ni uwe wookhale nttharyaaka.”
22 Masi uyo ahokhala ooriipiya nrima nlattu wowiireliya commo, ni uyo ahokhuma nne nipuronne nariipiye nrima cinene, kontha ahaana mihakhu cinci.
23 Vano, Yesu ahowiirela attharyaawe co: “Unaahala urika ntthu rina mihakhu cinci ukela muumweneni wa Nluku!”
24 Masi attharyaawe yaahokhala ootikhinihiya niitthu yuulumilyaawe. Yesu aahowiirela-tho co: “Asaanaaka, unaarika ukela muumweneni wa Nluku!
25 Khunhala urika ikamelu uvira waphaani yo sinkano, uvirikana thaciri nohala upheela ukela Muumweneni wa Nluku.”
26 Attharyaawe yaahokhala-tho ootikhinihiya ni yaahonkoha co: “Vano tipani nohala ukhitiri ukela Muumweneni wa Nluku?”
27 Yesu ahaaweheeha ni aahowiirela: “Apinaatamu pooti wuupuwela wiira iyo itthwiiyo khinhala wiirannya, masi Nluku mena, kontha khiivo itthu inooceelaawe.”
28 Peturu aahomwiirela co: “Pwiiya, hiiva nihohiya citthu cotheene wiira nuutthareni.”
29 Yesu aaheera: “Mi kinawuukhuluvelihani wiira khaavo nohala uhiya inupaawe, asunnanawe, asirikorawe, anumwaane, athumwaane, asaanaawe awula imatta cawe, nlattu wawaka ni nlattu wo ihapari comaana,
30 hinhala waakhela imaara 100, nenna coo inupacawe, asunnawe, asirokorawe, mayaamaamaawe, asaana ni imatta, hataa yalupatthiyaka ni uhoolo, waakhela ukumi woohimala.
31 “Masi enci ari oopacera anhala ukhala oomalela; ni ari oomalela phinhala ukhala oopacera.”
32 Vano, Yesu naattharyaawe yaarwaa u Yerusalemu, ni Yesu aari uhoolo, ni attharyaawe yaari ootikhinihiya; masi atthu yantthara yaanoova. Yesu aahowiihana-tho attharyaawe 12 mphanttyaayaru ni aahancera waahimerya citthu cotheene caahala umwiirannyeela, eeraka:
33 “Nkiviriyane, vaa ninrwaa u Yerusalemu ni naphiyaka nwo, Mwaana a Pinaatamu naahala uhuvihaciya naahooleli aanankuttho, wamoca naanamantikha. Ni ciicammo ayo anaahala unleva wiiviya, ni anaahala waavaha amalaponi,
34 ni ayo anaahala unhuviha, unsuwela, umufyulaca ni umwiiva, masi yaphiyeraka mahuku mararu nakhwile, uyo naahala wunwelelihiya.”
35 Tiyaku ni Joau, asaana a Sepeteu, yaahomwaattamela Yesu ni yahomwiirela: “Mwiitthucihi, nimpheela nnipankele itthu inhaleehu wuulepelani.”
36 Uyo aahakoha, eeraka: “Nnopheela kuupankeleni isiyani?”
37 Ayo yahomwaakhula: “Ninaalepela wiira ukati unhaleenyu ulamulela muumweneni winyu, nneese mmocooyo moonweenyu wonlopwana ni nkinooyo moonweenyu wonthiyana.”
38 Masi Yesu aahowiirela: “Nyuuva mwaatthi vaa khannocuwela itthu nnolepeleenyu. Kiireke wiira nyuuva nnaahala ukhitiri uwurya itthu miiva inwuryaaka, awula upattisiya nimpattiso miiva umpattisiyaaka?”
39 Yaahomwaakhula, yiiraka: “Ninaahala ukhitiri.” Yesu ahowiirela: “Nyuuva nnaahala uwurerya ikoopu miiva inwureryaaka ni upattisiya nimpattiso miiva umpattisiyaaka.
40 Masi, kahi thi miiva kinonthanla ntthu nolamuliya ukhala moonwaaka wonlopwana awula wonthiyana. Ayo mapurwaayo anonkoma ale athanliye.”
41 Atthari akiinaayo ucuwela waya iyo itthwiiyo, yaahonviruwela Tiyaku ni Joau.
42 Yesu ahowiihana attharyaawe otheene ni ahowiirela co: “Nyuuva nnaacuwela wiira ale anooniya ukhala toko ahooleli anawaapuhera* atthu anaahoolelaaya ni anawaathoonyera ukhulupalyaaya.
43 Masi nyuuva khannolamuliya ukhala ciicammo; ule nopheela ukhala muulupale iriyariinyu, haana akupaliki ukhala ipottheenyu,
44 ni ule nopheela ukhala oopacera iriyariinyu haana ukupali ukhala ipottha yaatthu otheene.
45 Toko Mwaana a Pinaatamu hiwilyaawe uvareliya nteko, masi wile waavarela nteko atthu ni uvaha ukumyaawe wiira awoopole atthu enci.”
46 Yesu wamoca naattharyaawe yaahophiya u Jeriko. Masi, ukati Yesu, attharyaawe ni atthu enci yaakhumaaya u Jeriko, yahomphwanya nacimoola mmoca oohoona eehaniya Partimeu, (mwaana a Timewu), nonkomile nserese iparapaara.
47 Ukati weewilyaawe wiira Yesu, nnasareenu, anvira, uyo aahopacera ukhuwela, eeraka: “Yesu, mwaana a Davidi, ukoonele ikiriri!”
48 Vano, atthu enci yaanonpwapwela, yamwiirelaka amaale, masi uyo aanaatepa ukhuwela eeraka: “Mwaana a Davidi, ukoonele ikiriri!”
49 Yesu aheemela ni aheera: “Mmwiihane.” Vano aaheehaniya nlopwana oohoonooyo, eereliyaka: “Ulipe nrima! Uyo naawiihana, wunweke.”
50 Vano, uyo aahonwa ni aahorihela ikuwaawe vathi, ni aahorwaa nipuro naaryaawe Yesu aakuvyaacaka.
51 Vano Yesu ahonkoha co: “Umpheela wiira kuupankele isiyani?” Nlopwana oohoonooyo ahomwaakhula: “Raponi, kinaalepela uturuwela woona.”
52 Ni Yesu aahomwiirela co: “Urweeke, waamini waa uhowiiriha woona.” Ni, woohipica, ahopacera woona ni ahontthara Yesu iparapaara yaaviraawe.
Notas
^ Awula: “waalawa.”
