Ihapari Comaana Cantikhiye ni Markus 11:1-33
11 Waattamela waya u Yerusalemu, anari ncoko wo Petifase ni wo Petaaniya, umwaakoni wo Oliveera, Yesu ahaaruma attharyaawe eeli,
2 awiirelaka: “Nrwee aliteeya ari uhoolo winyu ni mwaphiyaka vale, nnaahala umphwanya mwaapuuru natthukeleliye, hinatoko uweliya. Mwantthukule ni nkiwaanele.
3 Ni ntthu ookohakani: ‘Nlattuni nyuuva nnopankeenyu iyo itthwiiyo?’ Nmwaakhule co: ‘Apwiiya anampheela ni anaahala unturusa woohipica.’”
4 Vano, yahorwaa ni yahomphwanya puuru mwankaani natthukeleliye vate, wankhora, waattamela nphironi, ni ayo yahontthukula.
5 Masi, atthu yaari nno nipuronno yaahaakoha co: “Nnopankani vaa? Nnontthukulelani mwaapuuruuyo?”
6 Ayo yahaahimerya atthwaayo itthu Yesu yaahimilyaawe, ni yahaahiya unkusa.
7 Vano, yahoncisa mwaapuuruuyo ni yahonrwaana nipuro naaryaawe Yesu, yahaatala ikuwo caya coovate waculu mwaapuuruuyo, ni Yesu ahonwela.
8 Ciicammo, atthu enci yaanaatalaca mparapaarani ikuwo caya coovate ni atthu akhwaawe yanthikila miritta co miri commattani nuumwarusela mparapaaranimmo.
9 Ni atthu yaari uhoolo wawe ni yaawa uttuli wawe yaanaakhuwela, yeeraka: “Sontte, Pwiiya Nluku, mmoopole! Ooreeriya phuule nowa mwancina na Yehova!
10 Woottitthimihiya ukhale Umwene unhala uwa, Umwene waapaapeehu Davidi! Sontte, ninaalepela, mmoopole nyuuva nnokhala wiirimu!”
11 Ni Yesu ahokela nsittatti yo Yerusalemu, ahorwaa utempulu ni ahopacera woona citthu cotheene caari ntempulu. Masi, ukhala wiira waaheela, uyo ahokhuma naattharyaawe ni ahorwaa u Petaaniya.
12 Waaseele waya, ukati waakhumacaaya u Petaaniya, Yesu yahonvola itala.
13 Naryeene uttayi-uttayi, ahoona mwiri wofiiku waarina mataakhuru oopipila, masi, uphiya wawe nwo, kaaphwanyale mihokorokho, masi aaphwanyile mataakhuru paasi. Uyo ukatyuuyo khawaari ukati uneemaaya ifiiku.
14 Vano, Yesu aheerela uyo mwiryuuyo: “Hikhale-tho ntthu nohala ulya nhokhorokwaa.” Ni attharyaawe yaaneewa itthu yoolumaawe.
15 Vano yahophiyaca u Yerusalemu. Uphiya waya nwo, Yesu ahokela ntempulu ni ahopacera uwoomola atthu otheene yaatumihaca ni yaathuma-thuma. Ni ahopinttulaca meeca aatthu yaakakhaniha nsurukhu ni ikhatera caatthu yaatumiha ikhuntta.
16 Ni khanhiya hataa ntthu ukhumana ntempulu itthu nateesile.
17 Uyo aaneetthuciha, eeraka: “Khayantikhiye wiira ‘inupaaka inhala wiihaniya inupa yomavekelo yaatthu otheene?’ Masi nyuuva mpankale nikhuku nomalatarawu.”
18 Vano, ahooleli aanankuttho ni anamantikha weewilyaaya iyo itthwiiyo, yahopacera waavya mananna oomwiiva Yesu, kontha yammoova, nlattu atthu enci yantikhinihiya nimananna eetthucihaawe.
19 Ucoocilo, yahokhuma nsittatti yo Yerusalemu.
20 Masi, uwicisu, ukati waaviracaaya wamwirini wofiiku, yaahoona wiira mwiryuuyo wahooma mpaka mitithari caya.
21 Peturu ahoopuwela ni aheera: “Rapi, mooneke! Mwiri nlaphakacileenyuuyo uhooma.”
22 Yesu ahomwaakhula, eeraka: “Mmwaamini Nluku.
23 Kinoohimeryani ikhweeli wiira: Ntthu akhalanaka waamini, pooti wiirela ula mwaakoola co: ‘Wiiphele ni wiivonyere mpahari,’ ni woohaanyihacera wanrimani wawe, ni waamini ile yuulumilyaawe wiira inaahala wiirannya, khweeliini inaahala wiirannya.
24 Phimaana, kinwiirelani: ‘Citthu cotheene nnolepeleenyu mwalompaka, mwaamini wiira nhaakhela, ni khweeliini nnaahala waakhela.’
25 Ni mweemelaka wiira nlompe, mwaalevelele ale anookoserani, wiira apaapeenyu owiirimu ciicammo yuuleveleleni makoosiinyu.”
26 ——
27 Yesu naattharyaawe yahoturuwela u Yerusalemu. Vano, ukati weetteettaawe ntempulu, ahooleli aanankuttho, anamantikha ni ciicammo mahumu apoovu yaahowa
28 ni yahonkoha co: “Tipani oovahale ikuru yoopanka nnya citthunnya? Ni tipani oorumale wiira upanke nnya citthunnya?”
29 Yesu ahowiirela: “Miiva ciicammo kimpheela wuukohani itthu imoca. Nkaakhule, ni miiva kinaahala wuucipwani tipani kivahile ikuru yoopanka nnya citthunnya.
30 Mpattiso wa Joau, waari wowiirimu awula waapinaatamu? Nkaakhule.”
31 Vano, ayova yahancera woopela mwaha ayaayoru, yiirelanaka: “Neeraka vale wowiirimu, uyo naahala unikoha: ‘Vano kontha isiyani khamwaamwaamini uyova?’
32 Masi niiraka vale: ‘Waari waatthu,’ isiyani inhala uniirannyeela’?” Ayo yaanoova, kontha atthu otheene yaamoona Joau ukhala porofeeta eekhweeli.
33 Vano, ayo yahomwaakhula Yesu, yeeraka: “Khanincuwela.” Yesu ahowiirela co: “Ni miiva ciicammo akinoohimeryani tipani kivahale ikuru yoopanka nnya citthunnya.”
