Ihapari Comaana Cantikhiye ni Markus 12:1-44
12 Vano, Yesu aahopacera uwiitthuciha atthu nimalattanihero, eeraka: “Nlopwana mmoca ahaana imattaawe yo uuva, aahotekelela iluwani iyo imatteeyo ni aahothipa mmattanimmo nlikitti naapankiya iviinyu yo uuva, ni ahoteka inupa ya kwaarta; vano, imaatteeyo ahowaacimiha anamalima ni ahorwaa ilapo ikhwaawe.
2 Waaphilyaaya ukati woohepha, mwaneene imattooyo ahaaruma anantekwaawe wiira yaawoonanane anamalima, wiira yanvahe mihokorokho.
3 Masi anamalimaayo yaahonvara, yaahomwaattakaca ni yaahomoomola woohinvaha itthu.
4 Vano, ahonruma-tho nanteko nkhwaawe, ni uyo ciicammo yahonrakalihaca mmuru ni yaahonveeha.
5 Tootho ahonruma nanteko nkhwaawe, ni uyo yahoomwiiva. Ahaaruma-tho ananteko akiina ikwaha cinci: Akhwaawyaayo yahowaattakaca, ni akiinaayo yahowiivakaca.
6 Vano, uyo nlopwanooyo ahaana mwanawe anfentaawe cinene. Ahonruma, eeraka: ‘Ukhala wiira mwanaka, anaahala unhisimu.’
7 Vano, anamalimaayo yaaheerelana co: ‘Ula phinhala uhalana imatteeyo. Phimaana, nttwee nimwiive, wiira imatteeyo nihalane hiiva.’
8 Vano, yaahonvara, yaahomwiiva ni yahonrihela vate waya imatteeyo.
9 Mwaneene imattooyo aahala upankani? Anhala uwa ni uwiivakaca anamalima otheene, ni uwaacimiha imatteeyo anamalima akhwaawe.
10 Nyuuva khannapaca usoma Cowantikhiya Cowaarya cineera: ‘nluku anamateka naakhottilyaaya, nenno nihokhala nluku nootepa ukhalana ifayita.
11 Nno ninkhuma wa Yehova ni khannoona wiira iyo ihotepa ukhala itthu yoonitikhiniha cinene’?”
12 Nlattu wo iyo itthwiiyo, anamantikha ni ahooleli aanankuttho yaanaapheela untthuka, kontha yancuwela wiira nlattanihero naapankilyaawe aawaaca ayova. Masi yanwoova atthwaayo, phimaana yaahonhiya ni yaahorwaaca.
13 Vano, yahaaruma mafariseu ni atthari a Herooti, wiira yanvarihace Yesu ni citthu cuulumaawe.
14 Uphiya waya nipuro naaryaawe Yesu, ayo yaheera co: “Mwiitthucihi, ninaacuwela wiira ukati wotheene nyuuva nnuuluma ikhweeli, nnawiitthuciha mananna omaana onswalela Nluku ni khannapheelaka itthu waatteeliha nrima apinaatamu, kontha nyuuva khannonthanla ntthu oopheela umwiitthuciha. Unaatthunihiya awula mena unliva nsokho Seesari?
15 Niliveke awula mena?” Ucuwela wawe moopuwelelwaaya oohinamaana, Yesu ahowiirela: “Kontha isiyani nnokittehatteheenyu? Nkiwaanele itenaariyu imoca koone.”
16 Vano, ahowaaneliya itenaariyu imoca ni uyo aahaakoha co: “Ila ilataratweela vaa ni nna ncinanna naapani?” Vano ayo yaahaakhula: “Ca Seesari.”
17 Yesu aahowiirela: “Munvahe Seesari ikhanle ya Seesari, ni munvahe Nluku ikhanle ya Nluku.” Ni ayo yaahokhala ootikhinihiya nlattu wo iyo itthwiiyo.
18 Vano, masatuseu yahaakupali wunwelelihiya waatthu, yahorwaa mpaka nipuro naaryaawe Yesu ni yahonkoha:
19 “Mwiitthucihi, Moceesi hantikha co: wakhalaka wiira nlopwana oothela naakhwa woohaayarana asaana amwaarawyaayo, mwaamunnawe haana anthelaka uyo nthiyanooyo wiira anyarele asaana munnaawe.
20 Yahaavo alopwana 7 yaari ntthu nimwaamunnawe. Oopacerooyo ahothela, masi ahokhwa hinaaya waayara asaana.
21 Ni onayeelyuuyo aahonthela-tho nankhwelyuuyo, masi aahokhwa woohaayara asaana, niiyo itthwiiyo yaahomwiirannyeela-tho oneeraruuyo.
22 Alopwana otheene o 7 yahokhwa ahinyanre mwaana. Nuuwakatyaaya, nthiyanooyo ciicammo aahokhwa.
23 Waphiyaka ukati unhalaaya wunwelelihiya atthu, tipani nohala ukhala amwaarawe? Ukhala wiira alopwana otheene o 7 yaahonthela.”
24 Yesu ahowaakhula: “Kahi phimaana nneethepyeenyu nlattu woohicuwela Cowantikhiya Cowaarya ni hataa ikuru ca Nluku?
25 Kontha yarwaaka wunwelelihiya atthu akhwile, alopwana khanhala uthela ni athiyana khanhala utheliya, masi anhala ukhala khampa malayikha owiirimu.
26 Nhina mwaha wowunwelelihiya atthu ookhwa khansomile, moolumo Moceesi yantikhilyaawe ukati Nluku waamuulumannyaawe wamwirini waapharela mooro, eeraka: ‘Mi kikhanle Nluku a Aparahaamu, Nluku a Isaaki ni Nluku a Yakopi’?
27 Uyo khanakhala Nluku aatthu ookhwa, masi aatthu akumi. Nyuuva nnawiithepya.”
28 Vano, namantikha mmoca aattamananne nne nipuronne ukati waanyakulihaniyaaya, woona wawe wiira Yesu aahaakhula saana, uyo ahonkoha co: “Nlamuloni nitepile ukhala nuulupale?”
29 Yesu aahomwaakhula, eeraka: “Nlamulo noopacera phinna: ‘Mwiiwelele, apoovu asarayeli: Yehova, Nlukweehu, ri mmoca paahi, Yehova.
30 Unfente Yehova Nlukwaa, ninrimaa wotheene, niiroohwaa yotheene, nimoopuwelelwaa otheene ni niikuru caa cotheene.’
31 Nonayeeli phinna: ‘Unfente nkhunanaa khampa cineefentaa.’ Khaavo-tho malamulo makhwaawe moolupale oovikana ala.”
32 Namantikhooyo aheera co: “Mwiitthucihi, nhuuluma saana, ni nhimilee ikhweeli: ‘Nluku ri mmoca paahi, ni khaavo-tho nkhwaawe hikhanle uyova;’
33 ni unfenta Nluku ninrima wotheene, nuucuwelaca wotheene, niikuru cotheene, ni unfenta nkhunanihu khampa cineefenteehu ikhanle itthu yofayita uvikana itthuvo coopahiya ni ciicammo mikuttho.”
34 Woona wawe wiira aahaakhula nuucuwelaca, Yesu aahomwiirela: “Weeva khuuri uttayi nuumwene wa Nluku.” Ukhumelo ule ukatyuule, khaavo-tho akhitinri ulipa nrima wiira ankohakohe.
35 Vano, nanlelo eetthucihaka ntempulu, Yesu aheera: “Kontha isiyani anamantikha uneeraaya wiira Kristu mwaana a Davidi?
36 Akaviheriyaka ninnepa wowaarya, Davidi aheera co: ‘Yehova howiirela Apwiiyaaka: “Wunkome moonwaaka wonlopwana, mpaka wanhalaaka uweesa awanannyaa vathi inyaa caa.”’
37 Davidi nomwiihana Pwiiya, vano nowa cani akhalaka mwanawe?”
Atthu enci yanviriyana Yesu yanciveliya nimoolumwaawe.
38 Yesu anwiitthuciha, eeraka: “Ratta naanamantikha anwara ihancu coorekama ni unaacivela usalamihiya mapuro ari atthu enci,
39 ni unaacivela wunkoma ikhatera coohoolo mmasinakooka ni mmafestani unaacivela wonkoma mapuro owoonnyaa.
40 Ayo anawinnya mihakhu caanankhweli ni anaapanka mavekelo yuulumaka citthu cinci, wiira yooniye. Uhukhumwiiya waya unhala ukhala wooweryaa cinene.”
41 Yesu aahonkoma wakhiviru niikoofiri caaheliya micanko, ni ahancera uwoona atthu enci mananna yaaheelaaya nsurukhu nkoofirini, ni aahowoona mathaciri yahelaka nsurukhu mwinci.
42 Vano, aahowa nthiyana mmoca nankhweli, aari masikhini, ni aahohela misurukhu miili caarina ifayita vakaani paasi.
43 Vano, Yesu aahowiihana attharyaawe ni aahowiirela: “Kinoohimyeerani ikhweeli wiira: Ule nankhweli masikhinnyuule phivahile nsurukhu mwinci waavikana atthu otheene.
44 Kontha atthu otheene avahile nsurukhu waahalannyaaya,* masi ule nankhwelyuule, nuuhuva wawe, hovaha nsurukhu wotheene waakhuluvelaawe.”
Notas
^ Awula: “avahile itoroko caya.”
