Ihapari Comaana Cantikhiye ni Markus 13:1-37
13 Ukati Yesu aakhumaawe ntempulu, mwiitthucyaawe mmoca ahomwiirela co: “Mwiitthucihi, nhoona malukwaayo ni inupannyo ureeranwo!”
2 Vano, Yesu ahomwiirela: “Unawoona nnya inupa cuulupalennya? Khanivo nluku hataa nimoca ninhala uhala vaa woohimalamalihiya.”
3 Vano, Yesu nonkomile wa mwaakoni wo Oliveera awehaka itempulu, Peturu, Tiyaku, Joau ni Antere, yahonkoha anari veekha:
4 “Nnihimyacere: Cinhala wiirannya yaakhani nnyo citthunnyo, ni isiyani inhala uthoonyera wiira nnya citthunnya cihanle uphiya wiimaleloni?”
5 Vano, Yesu ahopacera waahimerya, eeraka: “Ratta wiira hikhale nohala wuuthepyani.
6 Kontha enci anaahala usipa ncina naka, yeeraka: ‘Phi miiva,’ ni anaahala waathepya atthu enci.
7 Uhiya commo, mweewaka cuulumiyaka ikhotto ni ihapari cokhotto, nhituthuwe. Nnyo citthunnyo cihaana ciirannyaaka, masi nanlelo khunakhala umala wo ulumwenku.
8 “Kontha ilapo inaahala waanihana niilapo ikhwaaya, ni umwene nuumwene nkhwaawa, unaahala ukhala uttettemelaca wotthaya mapuro menci; ciicammo inaaha uthwaa iyoolya. Nnya citthunnya cinhala uthoonyera wancera womasankiho.
9 “Masi, nyuuva mwiikhikicere. Atthu anaahala wuurwaanani mmatiripunaali, uwaattakacani mmasinakooka ni anaahala wuurweehani uhoolo waahooleli ni womamwene, nlattu wawaka, wiira mwaavahe usaahiti.
10 Ciicammo, nlaponi motheene cihaana cilalyeeriyaka toko ihapari comaana.
11 Ni, yoorwaanakani waatthu anooholelani, nhikhale niiwasiwaasi niitthu yoohala wuuluma; masi muulume itthu nnohaleenyu wuupuseriya yeeyo iwooreeyo, kontha nohala wuuluma khannakhala nyuuva, masi nnepa wowaarya.
12 Uhiya commo, nlopwana naahala umwiiviiha munnaawe, ni nyari naahala umwiiviiha mwanawe, ni asaana anaahala waarukunuwela asipaapaaya ni uwiiviiha.
13 Ni nyuuva nnaahala uthanyiya naatthu otheene, nlattu wo ncina naka. Masi ntthu nohala uvilela mpaka wuumaleloni phinhala woopwa.
14 “Phimaana, moonaka itthu yoohiirya inwaana ihasara inari nipuro nahaalamuliyaaya ukhala (ntthu nosoma akhalane ankhili wiira eeweehe ila itthwiila), ale anhala uphwanyiya u Yuteya ahaana yatthawelaka mmamyaakoni.
15 Ntthu nohala uphwanyiya waculu inupa, hikhuruwe, ni hataa hikele mpaani wawe wiira akumihe itthu;
16 ni ntthu nohala uphwanyiya umattani, hituruwele uwaani wiira akuse ikuwaawe.
17 Ahotakhaliya* athiyana eerukulu ni athiyana anhala ukhalana mwaana hinahiya waamwa uyo ukatyuuyo!
18 Nhihiyerere ulompa wiira ukati unhaleenyu utthawa uhikhale ukati wooririya;*
19 kontha ayo mahukwaayo, anhala ukhala omasakha moolupale ahinapaca wiirannya ikhumelo nenne Nluku wumpilyaawe ituninya mpaka nna, ni khanhala waakulela-tho uwa.
20 Khweeliini, unari wiira Yehova khavukunle ayo mahukwaayo, khaavo aahala woopwa. Masi, nlattu wo ale aathanlilyaawe, uyo hovukula mahukwaayo.
21 “Vano, wakhalaka wiira ntthu naawiirelani co: ‘Mmooneke! Kristu ula va,’ awula, ‘Mmooneke! Ule vale,’ nhinkupali uyo ntthuuyo.
22 Kontha anaahala wiikhumeleliha akristu owootha, ni maporofeeta owootha, ni ayo anaahala upanka mathoonyero ni ciicammo miirirya wiira yaathepye atthu ni, wakhitiryaa vale, wiira yaathepye ale athanliye.
23 Phimaana, nhiitthaale. Mi kihoohimeeryani citthu cotheenennya cihinaaya wiirannya.
24 “Masi, ayo mahukwaayo, yamalaka masakha moolupale, ncuwa khaninhala upharela ni ciicammo mweeri khunhala woonnya,
25 itthonttwa cinaahala umorakaca wiirimu ni ikuru cowiirimu cinaahala uttikhinyiya.*
26 Vano, nnaahala umoona Mwaana a Pinaatamu awaaka mmahutteni, niikuru ni nuuttitthima wawe venci.
27 Ni uyo naahala uruma malayikha wiira yaathukumanihe atthu yaathanlilyaawe omiphantte cooceese cotuninya, ukhuma wiipaceroni ilapo mpaka wiimaleloni irimu.
28 “Mwiitthucere nna nlattanihero no mwiri wofiikunna: irittha conaanaano canceraka uphuwa ni mataakhurwaaya yanceraka woonnya, nyuuva nnaacuwelela wiira ilimwe ihaattamela.
29 Inanna imocaaru, moonaka nnya citthunnya ciirannyaaka, ncuwele wiira Mwaana a Pinaatamu ri wakhiviru, wankhorani.
30 Kinawuukhuluvelihani wiira atthu omahukwaala khanhala umalamala nnya citthunnya cihirannyeele cotheene.
31 Irimu ni ituninya cinaahala uvira, masi moolumwaaka khanhala uvira hataa vakaani.
32 “Nno nihukunno ni iyo iwooreeyo khaavo nocuwela, hataa malayikha o wiirimu, ni hataa mwaana a Nluku, masi Apaapa paasi phincuwela.
33 Nhirupe ni nhiitthaale, kontha khannocuwela ukati uthanliye.
34 Unaalikanaca ninlopwana mmoca eettile nkwaha muulupale ni waahiyera inupaawe anantekwaawe, khula nanteko nintekwaawe. Ni umwiirela nantekwaawe aakhaliha nkhorooyo wiira hiitthaale.
35 Phimaana, nhiitthaale, kontha khannocuwela nihuku ninhalaawe uwa mwaneene inupa, wakhala wiira unhala ukhala uthana, uhiyu iriyari, mapikoosa awula uwicisu,
36 wiira mwaneene inupooyo awaaka woohileeha, huuphwanyeni nrupaka.
37 Vano itthu inoohimeryaakani, kinaahimeerya atthu otheene: Nhihiyerere ukhala oohiitthaala.”
