Ihapari Comaana Cantikhiye ni Markus 15:1-47
15 Usa waya, ahooleli aanankuttho, ahooleli aayuuta ni anamantikha, isineetriyu yotheene yahothukumana wiira alakele itthu yoohala upanka Yesu. Vano, yahontthuka ni yahonrwaana wa Pilatu.
2 Vano, Pilatu ahonkoha co: “Thi weeva ukhanle Mwene aayuuta?” Yesu ahaakhula: “Thi nyuuva nnohimya.”
3 Masi ahooleli aanankuttho yammootherya citthu cinci.
4 Vano, Pilatu ahonkoha-tho, eeraka: “Khunoona yowaakhula? Wooneke, atthwaayo anaawootherya citthu cinci.”
5 Masi Yesu khaakhunle-tho itthu. Phimaana, Pilatu ahotikhinihiya venci.
6 Khula isikuhuulu yo Paasikuwa, Pilatu aanantthukulaka ntthu mmoca aatthukiye, atthwaayo yanlepelaaya.
7 Yaayo mahukwaayo, ahaavo nlopwana eehaniya Parapasi, aatthukeliye nkhatteya nlattu woomwiiva ntthu.
8 Vano, atthu enci yahomwaattamela ni yahopacera unlepela Pilatu wiira apanke itthu yaapankesaawe.
9 Uyo ahokoha, eeraka: “Nnopheela kintthukuleke Mwene aayuuta?”
10 Kontha Pilatu ancuwela wiira ahooleli aanankuttho yanvariihile nlattu wonkhalela nttima.*
11 Vano, ahooleli aanankuttho yaahaatheperya atthu wiira anlepele utthukuliya Parapaasi, kahi Yesu.
12 Pilatu ahokoha co: “Kimwiirihekeni ula nnomwiihaneenyu Mwene aayuutoola?”
13 Atthwaayo yahokhuwela-tho yiiraka: “Mwankhomele wanipottoni!”
14 Masi, Pilatu ahoturuwela waakoha-tho, eeraka: “Nlattuni? Isiyani ipankilyaawe yootakhala?” Nanlelo ayo yantepa ukhuwela: “Mwankhomele wanipottoni!”
15 Vano, nlattu Pilatu woopheela waatteeliha nrima atthu, ahoruma utthukuliya Parapasi; ni ahoruma wiira Yesu oofyulaciye ni ahonleva urwaa ukhomeliya wanipottoni.
16 Anatoropa yahonrweeha Yesu nluwani wa Pilatu, ni yahowiihana /anatoropa okhurupu cotheene.
17 Ayo yahonwariha ikuwo yooseerya ni yahopanka ikorowa yomwiiwa ni yaahonwariha mmuru wawe;
18 ni yahopacera unkhuwelela, yiiraka: “Salaama, Mwene aayuuta!”
19 Vano, yahomwaattakaca mmuru nintathi, unsuwela ni yahonkhoromela uhoolo, yoothereryaka unttitthimiha.
20 Umaliha waya unveehaca, yahonrula ikuwo yanwarihilyaaya yooseerya ni yaahonwariha ikuwo cawe. Ni yahonkumihera vate wiira yankhomele wanipottoni.
21 Ciicammo, nlopwana mmoca, aakhuma umattani, eehaniya Simau, o Sirene, yaari athumwaane Alexantere ni Ruufu ahovira nne nipuronne; uyo yahonkhanyereriha uteesa nipotto.
22 Vano, ahokusiya nipuro nineehaniya u Kolkota, nna nuulumonna nataphuleliyaka maanaaya wiira “nipuro caari myuru coohala makhuvaru.”
23 Nwo, ahovahiya iviinyu yootakaniheriya itthu yoohapala ineehaniya miira, masi Yesu khaatthunne uwurya.
24 Ni, unkhomela waya wanipottoni, yahokawana ikuwo cawe, yaapankaka mwaavi wiira alakele ikuwoni khula ntthu aahalalaawe uhalana.
25 Yaari 9 oora ukati aakhomeliyaawe wanipottoni.
26 Ni yahantikhiya moolumo owootherihiya, yeera: “Ula Mwene aayuuta.”
27 Uhiya commo, malatarawu eeli yahokhomeliya nkhayi nuuyo, mmoca moono wonlopwana ni nkiinooyo moono wonthiyana.
28 ——
29 Ni atthu enci yaavira nne nipuronne yaanonruwanakaca yanttikhinya muru, yeeraka: “Eekhu! Keera phi weeva weeraka wiira wanhala ukwanyulaca itempulu ni uteka mahuku mararu paahi?
30 Wiicoopoleke umwaneennya, ukhuruweke wanipottoni vaa.”
31 Ciicammo, ahooleli aanankuttho nkhayi naanamantikha yaanonveeha, yiiraka: “Uyo howoopola atthu akhwaawe, masi khankhitiri wiicoopola!
32 Munhiye Kristu, Mwene aasarayeli, akhuruwe wanipottoni va, wiira nimoone ni wiira nihiiva ninkupali.” Mpaka ciicammo atthu yaakhomeliye nkhayi ni uyova yaanonruwanakaca.
33 Uphiya waya 12 oora, yahoripela ile ilapweele yotheene, mpaka 15 oora.
34 Ni 15 oora, Yesu ahokhuwela, eeraka: “Eli, Eli, lama sabactâni?” ala moolumwaana yataphuleliyaka maanaaya wiira: “Nlukwaaka, Nlukwaaka, ukihiyenreni?”
35 Ni wiiwiya wawe iyo itthwiiyo, atthu yaari nne nipuronne yaheera: “Mmooneke! Nomwiihana Eliyasi.”
36 Vano, ahokhuma ntthu mmoca atthawaka ni ahorwaa unaaniha isponja nviinyuni yoonyuunya, ahotthukelela muntathini ni ahonrwaanela ni ahonvaha wiira awurye, eeraka: “Munhiye ciicammo! Noone wakhala wiira Eliyasi naawa umoopola.”
37 Vano, Yesu ahokhuwela cinene ni ahokhwa.
38 Ni yahaanyuwa ikortiina yontempulu, ukhuma uculu mpaka vathi.
39 Vano, ukati nhooleli aanakhotto woonilyaawe mananna caakhwilyaawe, aheera: “Ula khweeliini, aari mwaana a Nluku.”
40 Yaahaavo ciicammo athiyana yoona uttayi-uttayi citthu caakhumelela; iriyari wo ayo athiyanaayo ahaavo Maria Madalena, Maria, anumwaane Tiyaku o mwankaani, Yusufusi ni Salome.
41 Ayo athiyanaayo yaanonveleela ni yanonvarela nteko ukati waaryaawe u Kalileya. Ciicammo, yahaavo athiyana enci akiina yaarweele nkhayi nuuyo u Yerusalemu.
42 Vano, ukhala wiira waanawiila ni naari nihuku nootthenkaciya isaapatu, awula nihuku naattharana niisaapatu,
43 Yusufu o Arimateya, aholipa nrima ni ahowa umoonanana Pilatu ni ahonlepela irutthu ya Yesu. Uyo aari nlopwana oottitthimihiya, aapanka mphantte wotiripunaali yaayuuta. Ni uyo ciicammo anweherera Umwene wa Nluku.
44 Masi Pilatu aapheela ucuwela wakhala wiira Yesu ahokhwa; vano ahomwiihana nhooleli aanakhotto ni ahonkoha wakhala wiira Yesu ahokhwa.
45 Vano uhimeriya wawe wiira ahokhwa, Pilatu ahonlevela Yusufu ukusa irutthwiiyo.
46 Yusufu ahothuma ikuwo yoovevyaala ni ahokumiha irutthu ya Yesu wanipottoni; ukumiha wawe, ahovilinkelela nikuwo yoovevyaala ni ahorweeha mmahiye yaathipiye wamwalani. Uhela wawe irutthu ya Yesu mmahiye, ahopurulela nluku wankhorani wo mahiyaayo.
47 Masi, Maria Madalena ni Maria, anumwaane Yusufu, yaahohala yaweheehaka nipuro naavithiyaawe Yesu.
Notas
^ Awula: “wonrama.”
