Ihapari Comaana Cantikhiye ni Markus 2:1-28
2 Vano, uvira waya mahuku vakaani, ahoturuwela u Kafarnau ni wahiiwannyaa wiira ri uwannyawe.
2 Vano, yahothukumana atthu enci, mpaka wahaarivyaaya-tho ikhato, hataa ciicammo mphantte wonkhorani.
3 Ni aahowaaneliya ntthu owuntakya nateesiye naalopwana acese.
4 Masi, nlattu woocariya, ayo khayaakhitinri umpiiha mpaka nipuro naaryaawe Yesu. Phimaana, ayo alopwanaayo yahaattula waculu waya inupa yaaryaawe Yesu. Waattula waya, yaahokurusela nrepa naataleliyaawe ntthuuyo.
5 Yesu, woona wawe waamini waarinaaya, ahomwiirela nlopwana owuntakyooyo co: “Mwanaka, matampyaa aholeveleliya.”
6 Masi yaahaavo anamantikha yonkomile nno nipuronno, ni wanrimani waya yaanoopuwela, yiiraka:
7 “Kontha isiyani ula nlopwanoola noolumaawe ala manannaala? Ula nanveeha Nluku. Tipani nolamuliya ulevelela matampi hikhanle Nluku?”
8 Vano, woohipica, Yesu ahoona citthu yuupuwelaaya wanrimani waya ni ahowiirela co: “Kontha isiyani nnuupuweleenyu nnyo citthunnyo wanrimani winyu?
9 Irikale isiyani, umwiirela ula nlopwana owuntakyoola: ‘Matampyaa aholeveleliya,’ awula: ‘Wunwe, ni ukuse nrepanaa weette?’
10 Masi, wiira nyu acuwele wiira Mwaana a Pinaatamu haana ukhulupale woolevelela matampi va watuninyani va . . .”, uyo ahomwiirela nlopwana owuntakyooyo co:
11 “Kinwiirelaa: Wunwe, ucise nrepanaa ni urwee uwaani.”
12 Wiireliya wawe commo, uyo ahonwa, ahokusa nrepanawe ni ahokhuma eettaka, ooniyaka naathu otheene. Commo, atthu otheene yaahokhala ootikhinihiya ni yaahonttitthimiha Nluku, yiiraka: “Khaninapaca woona itthu toko ila!”
13 Yesu ahorwaa-tho nseresere ipahari; atthu enci yaahontthara ni uyo ahopacera uwiitthuciha.
14 Eettakoono, ahomoona Levi, mwaana a Alfeu, nonkomile nipuro naaliviya nsokho, ni ahomwiirela co: “Ukhale nttharyaaka.” Vano uyo ahonwa ni ahontthara.
15 Nuuwakatyaaya, Yesu anlya* uwannyawe Levi, wamoca naattharyaawe, anamaliviha nsokho ni ciicammo anamatampi, ukhala wiira atthu enci yaanonttharatthara.
16 Masi, ukati anamantikha o mafariseu waamonnyaaya Yesu alyaaka nkhayi naanamaliviha nsokho ni anamatampi, yaahaakoha eetthucyaawe, yiiraka: “Yesu nawaalyana anamaliviha nsokho ni anamatampi?”
17 Wiiwa wawe commo, Yesu ahowiirela co: “Atthu akumi khanrwa wa meetiku, masi areetta phanrwaa. Kontha mi akaawenle anasariya, masi kaawenle anamatampi.”
18 Eetthuci a Joau ni mafariseu yantthuka.* Vano, yaahomwaattamela Yesu ni yahonkoha co: “Kontha isiyani eetthuci a Joau ni eetthuci o mafariseu anaatthuka, masi eetthuciinyu khantthuka?”
19 Vano, Yesu ahowaakhula, eeraka: “Niireke apatthannyaawe mpakaneli,* ihaavo isariya yootthuka anaryeene nimpakanelyuuyo? Ukati mpakaneli nokhalaawe nkhayi naayo, khanlamuliya utthuka.
20 Masi unaahala uphiya ukati anhalaaya waakhiya mpakanelyuuyo, vano uyo ukatyuuyo phinhalaaya utthuka.*
21 Khaavo nokusa ikuwo yo naanaano nuupankela icaapha nkuwoni yo khalayi. Apankaka iyo itthwiiyo, ikuwo yonaananweeyo inaahala utthunyaca ikuwo yokhalayiiyo ni nipuro naanyuwilyaaya ikuwo yokhalayiiyo ninaahala utepaca.
22 Inanna imocaaru, khaavo nohela iviinyu munrupani wonrapala nokhalayi. Ntthu apankaka iyo itthwiiyo, iviinywiiyo inaahala upwesa nrupooyo, vano iviinyu hataa nrupooyo cinaahala uhaleeliya. Phimaana, iviinyu yophiyaaru inheliya munrupani wonrapala wophiyaaru.”
23 Yesu nkhayi ni eetthucyaawe, yanvira mmattani nihuku nosaapatu ni eetthucyaawyaayo yahopacera uvulula* itiriku yeettakoono.
24 Vano, mafariseu yahomwiirela co: “Nwooneke! Kontha isiyani ayo ampankaaya itthu inaateelihiya upanka isaapatu?”
25 Masi uyo ahowiirela co: “Khannasoma itthu yaapankilyaawe Davidi ukati waathwennyaawe, ukati uyo nkhayi naalopwana yaarinaawe waavonlyaaya itala?
26 Toko cinhimiyaaya nhantisini ya Apiyatari, nhooleli aanankutthu, wiira Davidi ahokela inupa ya Nluku, ukhuura iphaawu caavahereriyaawe Nluku ni waameela alopwana yaarinaawe, iphaawu cahaatthunihiya ukhuura ntthu nkiina, ahikhanle anankuttho paasi?”
27 Ni ahuncerera, eeraka: “Isaapatu iwile nlattu wapinaatamu, kahi wiira pinaatamu phiwile nlattu wosaapatu.
28 Phimaana, Mwaana a Pinaatamu phikhanle Mwaneene isaapatu.”
Notas
^ Awula: “naphitenrye meeca.”
^ Nlattu wo ittiini, ahaavo mahuku ayuta yaalakelakaaya uhilya.
^ Awula: “ntthu norwaa uthela.”
^ Awula: “uhilya.”
^ Awula: “wuurula.”
