Ihapari Comaana Cantikhiye ni Markus 3:1-35
3 Yesu ahokela-tho nsinakooka ni, mmo, ahomphwanya nlopwana oopahuwa* ntata.
2 Vano, atthu yaanonweheeha sana-saana, wiira amoone wakhala wiira anhala unvoniha uyo nlopwanooyo nihuku nosaapatu, yapheelaka wiira amootheryace.
3 Yesu aahomwiirela co uyo nlopwana oopahuwa* ntatooyo: “Wunwe ni uwe iriyariila vaa.”
4 Vano, ahaakoha atthwaayo co: “Unaatthunihiya nihuku nosaapatu upanka itthu yomaana awula yootakhala, woopola ukumi* awula wiiva?” Masi ayo khayaakhunle itthu.
5 Waaweha wawe atthu yaarivo nne nipuronne nasankile ni unanriipile nrima nlattu wootakhala waya nrima, uyo ahomwiirela nlopwanooyo co: “Utaphuleke ntatanno.” Ni uyo ahotaphula ni, woohipica, ahovona.
6 Vano, mafariseu yahokhuma, woohipica, nne nipuronne ni yaahancera uleehana* naatthu yantthara Herooti, wiira amwiive Yesu.
7 Masi Yesu ahokhuma naattharyaawe arwaaka upahari, ni atthu enci o Kalileya ni o Yuteya yaanontthara.
8 Atthu enci wiiwa waya citthu caapankaawe, yaahorwaa umoonanana, hataa ciicammo atthu o Yerusalemu, o Itumeya, omphantte nkhwaawe wo mooloko Jordau ni atthu yaakhala nseresere waya ncoko wo Tiro ni wo Sitoni.
9 Ni uyo ahaalepela eettucyaawe wiira awaane ikalawa yankaani yaahalaawe ukela, wiira hiphunyererihiye naatthu.
10 Ukhala wiira uyo aanaavoniha atthu enci, atthu otheene yaarina iretta cuulupale yaanancaranela wiira ankwanye.
11 Hataa ciicammo, maciini yamoonaka, yaankhoroma uhoolo wawe ni yankhuwela, yiiraka: “Weeva ukhanle mwaana a Nluku.”
12 Masi ikwaha cinci, aheerela ayo maciinnyaayo, woohikhuwakhuwa, wiira ahihimye wiira uyo aari mwaana a Nluku.
13 Uyo ahowela umwaakoni ni ahaalattula untthara ale yaathanlilyaawe, ni ayo yahontthara.
14 Vano, ahopanka ikhurupu yaalopwana 12, ni ahaavaha ncina no maapostolu, ale yaahalaawe uweettana ni yaahalaawe waaruma urwaa ulalyeera,
15 ni ciicammo yaahalaawe waavaha ikuru yowoomola maciini.
16 Ni nhina ikhurupu yaalopwana 12 yaathanlilyaawe, ahaavo Simau, (ule anvahilyaawe ncina na Peturu),
17 Tiyaku, mwaana a Sepeteu, Joau, mwanhimaawe Tiyaku (ciicammo ayo ahaavaha ncina na Powanerce, nno ncinanno maanaaya “asaana otari”),
18 Andre, Filipe, Partolomeu, Matewus, Tomee, Tiyaku, mwaana a Alifeu, Tatewu, Simau, aari Nkananewu,*
19 ni Yuda Iskariyote, ule wahoolo anvariihile Yesu.
Vano, Yesu ahokela inupa imoca,
20 ni atthu enci yaahothukumana-tho, mpaka uyo ni eetthucyaawe khayaakhitiri ukhalana ukati woolya.
21 Vano, amucyaawe waacuwenlyaaya itthu yiirannya, yahonrweela, kontha ayo yeera co: “Uyo hovahuwa.”
22 Ciicammo, anamantikha yaakhuma u Yerusalemu yeera co: “Uyo hoovariya ni Pelsepu* ni nokhitiri woomola maciini akaviheriyaka ninhooleli omaciini.”
23 Vano, uwiihana wawe, ahaahimeerya nimalattanihero, awiirelaka co: “Manannani Sotwani aahalaawe umoomola Sotwani?
24 Umwene weekawanihaka, uyo umwennyooyo unaamalamala;
25 ni itthoko ineekawanihaca mwaanennyaaya, iyo ciicammo inaamalamala.
26 Ciicammo, wakhalaka wiira Sotwani heerukunuwela ni heekawaniha, khanhala ulipa, masi utankanyiya wawe uri wakhiviru.
27 Khaavo nokela mpaani wanlopwana oolipa ni ukhitiri umwinnyera maalyaawe, uhikhanle wiira hoopacera toko untthuka uyo nlopwanooyo. Khweeliini, apanka commo naahala ukhitiri umwinnyacera.
28 Kinoohimeeryani ikhweeli wiira: Citthu cotheene apinaatamu cimpankaaya, anaahala uleveleliya, hataa ikhalaka itampi yuulupale ni hataa yoolumaka moolumoni ooveeha.
29 Masi ule noveeha nnepa wowaarya, khanhala uleveleliya. Uyo nohala uvara itampi ihinleveleliya.”
30 Yesu enre commo, kontha ayo yaamwiirela co: “Uyo ri ninciini.”
31 Vano, anumwaane nkhayi naasihimaawe yahowa, ni, anari vate, yahonruma ntthu wiira amwiihane.
32 Ukhala wiira aanoorukureeriya naatthu enci anonkomile, ayo yahomwiirela co: “Nyuuva! Anumwaninyu ni asunninyu ari vate vaava, anawuupheelani.”
33 Masi uyo ahowaakhula, eeraka: “Phaapani akhanle amaama ni asunnaka?”
34 Vano, uyo ahaaweha atthu yanrukuryenrye ni aheera: “Ala phiri amaama ni asunnaka!
35 Ule nopanka itthu inoncivela Nluku, phiri munnaaka, nrokoraka ni amaama.”
Notas
^ Awula: “onririya.”
^ Awula: “onririya.”
^ Awula: “irooho.”
^ Awula: “uvahana miruku.”
^ Awula: “owiikurumica cinene.”
^ Nna nikhanle ncina ninromoliyaka aaciyaka Sotwani.