Ihapari Comaana Cantikhiye ni Markus 4:1-41
-
MALATTANIHERO O UMWENE WA NLUKU (1-34)
-
Namalima (1-9)
-
Kontha isiyani Yesu aanwiitthuciha nimalattanihero (10-12)
-
Itthu inhimyaaya nlattanihero na namalima (13-20)
-
Nthuko khunkhuneeliya niitthuttu (21-23)
-
Nliko unaalikeleenyu akhunaninyu (24, 25)
-
Nlopwana naala ipyo ni norwaa urupa (26-29)
-
Itthaka yankaani (30-32)
-
Wiitthuciha nimalattanihero (33, 34)
-
-
Yesu naamaaliha iphyoo yuulupale (35-41)
4 Yesu ahopacera-tho wiitthuciha nari nseresere ipahari, ni atthu enci yahonthukumanela. Vano, uyo aahokela nkalawani ni ahonkoma mommo, ni ahokhala uttayi naatthu yaari nseresere ipahari.
2 Ni uyo ahopacera uwiitthuciha citthu cinci nimalattanihero, aawiitthuciha eeraka:
3 “Nviriyane: Namalima mmoca ahorwaa waala.
4 Ukati waalaawe, ipyo cikiina cahomorela nseresere iparapaara, vano inuni cahowa ni caholya.
5 Cikhwaawe cahomorela wamwalani, nipuro nahaari itthaya yinci ni cahomela woowaakuvya, ukhala wiira nno nipuronno khayaarivo itthaya yinci.
6 Masi ukati ncuwa waapharenlyaaya cinene, cahovya ni mititharinnyo cahonyaala, ukhala wiira khaceethipenle.
7 Ipyo cikiina caamorenle wamiiwani, vano miiwannyo cahoonuwa ni cahophunyaca mirinnyo ni nnyo khaceemile-tho mihokorokho.
8 Masi ipyo cikhwaawennyo, caahomorela watthayani yomaana, ni cahancera wiima mihokorokho; cikiina cahiima imaara 30, cikhwaawennyo imaara 60, ni cikinakunnyo imaara 100.”
9 Ahoncerera-tho eeraka: “Ule nopheela wiiwa, eewe.”
10 Vano, ukati Yesu waahanlyaawe veekha, eetthucyaawe 12 ni atthu yanrukurennrye, yaahorwaa unkohakhoha itthu yaataphulelaaya malattaniherwaayo.
11 Uyo ahowaakhula, eeraka: “Nyuuva nhovahiya ucuwela isiiri co Umwene wa Nluku, masi atthu akiina aneetthucihiya ni malattanihero,
12 wiira awehe, masi hataa ukhalaka commo, ahoone, ni wiira yiiwe, masi hataa ukhalaka commo, ahicuwelele; ni ayo khanhala urukunusa makhalelwaaya, wiira aleveleliye.”
13 Uhiya commo, Yesu ahowiirela-tho: “Nyuuva mwaahicuweleleke itthu intaphulelaaya nna nlattaniheronna, munhala ucuwelela-tho cani malattanihero makhwaawyaayo?
14 “Ipyo caalilyaawe namalima maanaaya nuulumo.
15 Vano, ipyo yaamorenle nseresere iparapaara akhanle atthu aneera, yeewaka nuulumo na Nluku, Sotwani awaaka uwaakha nuulumo naaliye wanrimani waya.
16 Inanna imocaaru, ipyo caaliye wamwalani anaaciya atthu aneera, yeewaka nuulumo na Nluku, woohipica anaakupaliki waatteelaka nrima.
17 Masi, ayo khaarina mitithaari, anaarweehela uhoolo ukati vakaani; vano yaakhumelelaka marikariko awula yalupatthiya nlattu wo nuulumo na Nluku, ayo anaahiya.
18 Cihaavo-tho ipyo cikhwaawe caaliye wamiiwani. Nnyo ipyonnyo maanaaya atthu aneewa nuulumo na Nluku,
19 masi masukhuli ontuninyani,* ikuru coothepya cirinaaya mihakhu, ni upheela citthu cikiina, unaaphunyaca nuulumo na Nluku, mpaka ayo khaneemiha mena nhokorokho mmoca.
20 Vano, woomalihera, ipyo caaliye itthaya yomaana anaaciya atthu aniiwa nuulumo na Nluku nuukupali, ni nuwiima mihokorokho imaara 30, imaara 60, ni mpaka uphwaha imaara 100.”
21 Ciicammo ahaahimyera eeraka: “Niireke unaacisiya nthuko phikhuneeliyaka niitthuttu* awula pheesiyaka nkitihina?* Keera uneesiya wameecani?
22 Khiivo itthu ivithiye ihinhala wooneleliya; ni khiivo itthu invithiya ihinhala ucuweleliya.
23 Ule nopheela wiiwa, eewe.”
24 Aahahimyeera-tho wiira: “Nviriyane itthu inoohimyeeraakani. Nliko unaalikeleenyu akhunaninyu, ni nyuuva nnohala ulikeliya yooyo ni unaahala wuncereriya.
25 Phimaana, ule rina, naahala wuncereriya, masi ule hirina, hataa ile irinaawe, naahala waakhiya.”
26 Vano, ahoolumaca-tho eeraka: “Umwene wa Nluku unlattaniheriya ninlopwana naala ipyo.
27 Uyo naarupa wiilaka ni nawunwa wasaaka, ipyo cawe cinaamela ni cinawunnuwa, hataa hicuwelaka mananna cineerannyaaya iyo iithwiiyo.
28 Itthaya, veekhaayaru, inawiimiha mihokorokho vakaani-vakaani, umpacera ntathi, phiweelelaka ncaasi, ni wiimaleloni cinaakhumelela itthaka cookhomaala.
29 Masi itthakannyo cakhomaalaka, naarwaa uthikila, ukhala wiira uhophiya ukati woohepha.”
30 Ni ahuncerera-tho, eeraka: “Isiyani inlamuliyeehu ulattanihera nuumwene wa Nluku, awula nitaphuleleke Umwene wa Nluku ninlattaniheroni?
31 Umwene wa Nluku unlikanaca itthaka yankaani.* Ukati unaaliyaaya inkhala yankaani uphwaha itthaka cotheene cowatuninyani.
32 Masi, yaaliyaka, mwiryaayooyo unkhala muulupale, uphwaha miri cikhwaawe cooliya ni unaakhalana mirittha cuulupale, mpaka asaanuni uphwanya nipuro nooteka ipuuru caya.”
33 Nimalattaanihero khampa ala, Yesu anwiitthuciha atthu moolumo a Nluku, mpaka waakhitiryaaya wiiweeha.
34 Khweeliini, khiivo itthu yaahimeeryaawe woohipanka malattanihero, ni anaataphulela attharyaawe citthu cotheene akhalaka naayova paasi.
35 Ni nenno nihukunno, uhiyu waya, ahowiirela eetthucyaawe co: “Nttwee mphantte nkhwaawe wopahari.”
36 Waaleva wawe atthwaayo wiira arweeke mmawannyaya, attharyaawe yahonkusa nkalawani ni atthu yaari ikalawa cikiina yaanonveleela.
37 Yahovuka* iphyoo yuulupale, mpaka nkalawanimmo yaahopacera ucara maaci nlattu wo mawimpi moolupale ni yahancera uttittha.
38 Uyo ari uttuliwaya ikalawa, anrupa naaphiteenrye almofaata. Ayo yaahorwaa onvusa ni yaahomwiirela: “Mwiitthucihi, khannoona wiira nihanle ukhwa?”
39 Vano, Yesu ahonwa, ahopwapwela iphyoo ni aheerela ipahari co: “Weemele! Umaale!” Ni iphyoo yaaheemela ni nne nipuronne wahomaalyaa.
40 Vano, ahowiirela co: “Nnotepelani woova commo?* Nanlelo khannakhalana waamini hataa vakaani?”
41 Ayo yaahoova venci ni mpaka yaahokohana, yiiraka: “Tipani ula nlopwanoola? Hataa iphyoo ni ipahari cinaamwiiwelela.”
Notas
^ Awula: “o ulumwenku wo citthu coohinamaana; o ala mahukwaala.”
^ Awula: “itthuttu yoophimeliya.”
^ Awula: “nkhwikwicira.”
^ Itthaka ineehaniya mostarta. Iyo mphwanyannya u Isarayeli, nryaaya unaaphiya imeeturu 4 ni unaakhalana irittha.
^ Awula: “Yahowa.”
^ Awula: “uyoona ukhala oohikhikiceryaa.”
