Ihapari Comaana Cantikhiye ni Markus 5:1-43
5 Vano, yaahophiyaca mphantte nkiina wopahari, ncoko wo maceraseenu.
2 Ni Yesu, ukhuruwa wawe nkalawani, nlopwana mmoca aavariye ni maciini aakhuma umahiye, ahowa nipuro naaryaawe Yesu.
3 Uyo aakhala umahiye, ni, mpaka ule ukatyuule, khaavo aakhitiri untthuka, hataa ukhalaka nuunyolo.*
4 Imaara cinci, uyo ahotthukiya mmettoni ni mmyoononi nuunyolo, masi ankwattulaca; ni khaavo aakhitiri unvara wiira antthuke.
5 Uhiyu nuuthana, uyo ankhuwela umahiye, mmamyaakoni ni aaneerakalihaca nimaluku.
6 Masi, umoona wawe Yesu uttayi-uttayi, ahontthawelela ni ahokhoroma uhoolo wawe.
7 Vano, uyo ahokhuwela cinene, eeraka: “Isiyani inkipheelelaa, Yesu, mwaana a Nluku Nkhulupale? Ulaphe mwancina na Nluku wiira khunhala ukihuviha.”
8 Kontha Yesu aahoomwiirela co: “We nciini, ukhume mwiirutthuni wawe ula nlopwanoola!”
9 Masi Yesu ahonkoha co: “Ncina naa tipani?” Uyo ahaakhula, eeraka: “Ncina naka Nkupitti, kontha niri enci”.
10 Ni aahonlepela Yesu wiira hoomolace maciini ule ncokoole.
11 Ule ncokoole cahaavo ikuluwe caalihiya umwaakoni.
12 Phimaana, maciinnyaayo yahonlepela isontte, yeeraka: “Nnoomolele mmakuluweni.”
13 Ni uyo ahotthunihera urwaa. Vano, maciinnyaayo yaahonkhuma nlopwanooyo ni yahokela mmakuluweni; ni nnyo caahotupha umwaakoni* waaryaaya cituphelaka mpahari, ni ikuluwe coophiyaka 2.000 cahowurya ituuthu.*
14 Atthu yaawacera ikuluwyaayo yahotthawa ni yaahorwaa uhimyaca mmasittatti ni mmaaliteeya, ni atthwaayo yaahorwaa wooneeha itthu yeerannyeele.
15 Vano, atthwaayo yaahomwaattamela Yesu ni yahomoona nlopwana aavariye nimaciinnyuuyo nonkomile, nawanre ni nakhanle saana; vano, ayo atthwaayo yahopacera woova.
16 Ciicammo, atthu yoonile itthu yeerannyaale yahaahimeerya atthu akiina itthu yaamwiirannyenle nlopwana avariye ni maciinnyuuyo ni ikuluwennyo.
17 Vano, yahopacera unlepela Yesu wiira akhume ule ncokoole.
18 Ukati Yesu waakelaawe nkalawani, nlopwana avariye nimaciinnyuuyo ahonlepela wiira antthare.
19 Masi, Yesu khantthunihenre, masi uyo aamwiirenle co: “Uturuwele uwaani, ni waattonkele amucyaa citthu cotheene Yehova cuupankenlyaawe ni mananna ciwoonenlyaawe uthunku.”
20 Vano, nlopwanooyo ahorwaa ni ahopacera ulalyaa u Tekaapoli* citthu cotheene Yesu campankenlyaawe; ni atthu otheene yantikhinaca.
21 Yesu ukela wawe nkalawani ni urwaa mphantte nkiina wopahari, atthu enci yahonthukumanela nseresere ipahariiyo.
22 Vano, aahowa nhooleli mmoca oosinakooka eehaniya Jairo, ni umoona wawe Yesu, ahokhoroma uhoolo wawe.
23 Uyo aahonlepela imaara cinci, eeraka: “Mwanaka mwanthiyana naawerennya cinene.* Sontte, nttwee mwamweeserere matateenyu,* wiira avone.”
24 Vano, Yesu ahorwaa nkhayi nuuyo nlopwanooyo, ni atthu enci yaanontthara ni yaanomphunya.*
25 Ni yahaavo athiyana amoca yaavirihale myaakha 12 yawerennyaka iretta yookhuma iphome.
26 Ayo athiyanaayo yahohuva venci* mmatatani womameetiku ni yaahorihakaca mihakhu caya cotheene, masi waahookhalaru commo, iretteeyo yaahowiira waatepaca.
27 Wiiwa waya oolumiyaka Yesu, ayo yaahomwaattamela uttuli wawe ni yahokwanya ikuwaawe,
28 kontha ayo yoopuwela co: “Kakwanyaru ikuwaawe paasi, kinaahala uvona.”
29 Ni woohipica, iphomeeyo yahomaala ukhuma, ni ayo yahoona wiira yaahovonihiya iretta yaasankihile.
30 Woohipica, Yesu ahoona wiira yaahonkhuma ikuru mwiirutthuni wawe. Phimaana ahorukunuwa ni ahaakoha atthwaayo: “Tipani kwanyile ikuwaaka?”
31 Eetthucyaawe yaahomwaakhula, yiiraka: “Khannoona wiira atthwaayo anawuuphunyani va?* Vano nnaakoha wiira tipani khwanyile ikuweenyu?”
32 Masi, uyo aanonwehaweha ntthu aakwanyile ikuwaawe.
33 Athiyanaayo nlattu woocuwela itthu yaawiirannyenle, yattettemelakoono nlattu wo woova, yaahorwaa ukhoroma uhoolo wawe ni yahonhimerya citthu cotheene caawiirannyenle.
34 Uyo, ahowiirela: “Mwanaka, waamini waa uhowiiriha uvona. Urwee ninnema ni uvone iretta yoosankihile.”
35 Oolumakoono, yahowa alopwana yaakhuma uwannyawe nhooleli oosinakookooyo ni yaheera: “Mwaninyu hokhwa! Vano nlattuni nnonsupheenyu Mwiitthucihi?”
36 Masi Yesu aheewa itthu yoolumilyaaya alopwanaayo ni aahomwiirela nhooleli oosinakookooyo co: “Uhoove,* ukhalane waamini paahi.”
37 Vano, Yesu khaaphenle uveleeliya naatthu akiina, uhikhanle paasi ni Peturu, Tiyaku ni Joau, mwanhimaawe Tiyaku.
38 Vano, waahophinnya uwannyawe nhooleli oosinakookooyo, ni Yesu ahowoona atthu yakhuwelaka ni yunlaka anariipiye nrima.
39 Ukela wawe mpaani, ahowiirela atthwaayo co: “Nlattuni nnokhuweleenyu munlaka? Uyo mwaaruusyuuyu khakhwile itthu, masi naarupa.”
40 Atthwaayo, wiiwa waya iyo, yahancera unthyaa. Masi, uwiirela wawe atthwaayo akhume nno nipuronno, ahaacisa athumwaane ni anumwaane mwaarusyuuyo, ni ciicammo atthu yaari wamoca nuuyova, ni yaahorwaa nipuro naataleliyaawe.
41 Vano, ahovarela ntata namwaarusyuuyo ni aahomwiirela: “Talita kumi”. Ala moolumwaala yataphuleliyaka, maanaaya: “Mwaaruusi, kinwiirela: Wunwe!”
42 Ni, woohipica, mwaarusyuuyo ahonwa ni ahancera weetta. (Uyo aarina myaakha 12.) Ni, wiirannya waya iyo, ayo yaahokhala ootteeliya cinene.
43 Masi uyo ahowiirela imaara cinci wiira ahinttonkele ntthu itthu yeerannyaale, ni ahowiirela wiira anvaheke itthu yoolya.
Notas
^ Awula: “ikwarenti.”
^ Awula: “wansepani.”
^ Awula: “cahokhwa.”
^ Awula: “ncoko wosittatti 10.”
^ Awula: “hanle ukhwa.”
^ Awula: “mwanvare.”
^ Awula: “yaanomphunyererihaca.”
^ Awula: “khayaamala uwerennya.”
^ Awula: “anawuuphuyererihani.”
^ Awula: “Uhiye woova.”
