Ihapari Comaana Cantikhiye ni Markus 6:1-56
6 Yesu ahokhuma nipuro naaryaawe ni ahorwaa isittattyaawe,* ni eetthucyaawe yahontthara.
2 Uphiya waya isaapatu, Yesu ahopacera wiitthuciha nsinakooka. Vano, atthu enci yanviriyana yahokhala ootikhinihiya ni yaheera: “Ula nlopwanoola eetthuca vayi nnya citthunnya? Kontha isiyani ula vahiyaawe ucuwelaca, ni nokhitiryaawe upanka miiriirya?
3 Keera ula phi yoole kalipinteeru, mwaana a Maria ni nyeenyaawe Tiyaku, Yusufu, Yuuta ni Simau? Ni keera asirokorawe ari nkhayi ni hiiva vaavaa?” Vano, ayova yahanca uhinkupali.
4 Phimaana, Yesu aheera co: “Khaavo porofeeta nottitthimihiya ncokhwaawe ni hataa uwannyawe.”
5 Ni Yesu khaapankile miiriirya cikiina, uhikhanle uweesera ntata aretta ni waavoniha.
6 Khweeliini, uyo ahotikhinihiya nlattu woohaamini waya, ni ahorwaa mmaaliteeya motheene owakhiviru, wiira etthucihe.
7 Yesu ahowiihana attharyaawe 12 ni ahopacera waaruma eeli-eeli urwaa ulalyeera, ni ahaavaha ikuru yowoomola maciini.
8 Ciicammo, uyo ahowiirela wiira, ukati waahalaaya weetta nkwaha, ahikuse itthu, uhikhanle nttonttwaaya; ciicammo ahikuse iphaawu, nrupa* ni nsurukhu* muncakoni,
9 masi ahowiirela wiira aware isantaaliya caya ni ahikuse ikuwo piili.*
10 Uhiya commo, uyo ahowiirela: “Inupa-phiinupa inhaleenyu ukela, nkhale mommo mpaka wanhaleenyu ukhuma.
11 Ni, wokhula ncoko unhaleenyu uhaakheleliya saana ni uhiiweleliya, wookhuma vaa nkukutthe ntthupi nonnyaani winyu, wiira nno naakhalele usaahiti.”
12 Vano, yahokhuma ni yahopacera waalalyeera atthu yawiirelaka wiira arukunuse makhalelwaaya;
13 ni ayova yaanoomola maciini, yaanawaattikitthela makhura aretta enci ni yaanaavoniha.
14 Ni mwene Herooti aheewa oolumiyaka Yesu, kontha ncina nawe nancuwelaciya cinene ni atthwaayo yeera: “Uyo phi Joau Mpattisa,* howunwelelihiya, phimaana rinaawe ikuru yoopanka miiriirya.”
15 Masi atthu akhwaawe yeera: “Uyo khanle Eliyasi.” Ni akhwaawe yeera: “Uyo porofeeta nolikanaca ni maporofeeta okhalayi.”
16 Herooti, wiiwa wawe iyo itthwiiyo, aheera: “Uyo Joau, yoole kinhitiihilyaaka, howunwelelihiya.”
17 Khweeliini, Herooti ahotoko uruma utthukeliya Joau nkhattya, nlattu wa Herotiya, amwaarawe Filipe, nyeenyaawe Herooti, ukhala wiira Herooti aahowaathela.
18 Kontha Joau, ahotoka umwiirela Herooti co: “Nyuuva khannotthuniheriya waathela amwaara aanyeenyeenyu.”
19 Phimaana, Herotiya ahonsunkera nruukwa* Joau ni ampheela umwiiva, masi khaalamuliya.
20 Kontha Herooti aanaamoova Joau, ukhala wiira aancuwela wiira uyo aaneettela isariya ni aari nswali a Nluku, phimaana aanonkhikicera. Khula ukati waamwiiwaawe oolumacaka, uyo ansanka, mpaka uhicuwela yoopanka; masi, hataa ukhalaka commo, aananviriyana sana-saana.
21 Masi nahophiya nihuku Herooti naapiheraawe mwaakha ni ahopanka ifesta; uyo ahaalattula ahooleli o ile ilapweele , ahooleli aanatoropa ni alopwana oottitthimihiya o Kalileya.
22 Ni mwaana mwanthiyana a Herotiya aheena wafestani vaa, ni Herooti ahotteeliya venci nkhayi naatthu yaalattunlyaawe. Vano, Herooti ahomwiirela mwaarusyuuyo co: “Ukilepele itthu impheelaa, ni mi kinaahala wuuvaha.”
23 Khweeliini, uyo aholapha, amwiirelaka: “Ukilepele itthu impheelaa, pooti ukhala mphantte nkiina woomwennyaaka, mi kinaahala wuuvaha.”
24 Vano, uyo ahorwaa waakoha anumwaane: “Kalepeleke isiyani?” Ayo yahomwaakhula, yeeraka: “Ulepele muru wa Joau Mpattisa.”*
25 Woohipica, uyo ahoturuwela wa Herooti athupuluwaka ni ahonlepela eeraka: “Kinaalepela woohipica, mpanteecani,* muru wa Joau Mpattisa.”
26 Hataa ukhalaka wiira iyo itthwiiyo yahonriipiha nrima cinene, Herooti khaakhottile itthu yaalepeliyaawe, nlattu woolapha ni nlattu waatthu yaalattunlyaawe.
27 Phimaana, mwene Herooti woohipica ahonruma kwaartaawe mmoca wiira awaane muru wa Joau. Vano, kwaartooyo ahorwaa unhita Joau nkhattya mommo,
28 ni ahowaana muruuyo mpanteecani,* ahonvaha mwaarusyuuyo ni uyo ahaavaha anumwaane.
29 Attharyaawe, wiiwa waya itthu yeerannyeele, yahorweela irutthwaawe ni yahorwaa usikha.
30 Maapostolwaayo yahothukumana nkhayi ni Yesu ni yahonhimerya citthu cotheene yaapankilyaaya ni yeetthucihilyaaya.
31 Ni uyo ahowiirela co: “Nttwee nipuro nowiipithyaa wiira namumule vakaani.” Kontha atthu enci yaanaawa ni yankhuma, ni ayo khayaarina ukati woomumula ni hataa woolya.
32 Phimaana, yahokhumaca niikalawa ni urwaa nipuro nowiipithyaa wiira yakhale veekha.
33 Masi atthwaayo yahowoona yakhumacaka ni atthu enci yahocuwela. Phimaana, atthu osittatti cotheene yahokhuma mwentta-vathi yarwaaka nno nipuronno ni ayo phaapacenre uphiya.
34 Vano, Yesu ukati waakhuruwilyaawe nkalawani, ahowoona atthu enci ni ahowoonela ikiriri,* kontha yaakhala toko ikhontwaa coohimakampuci. Ni ahopacera uwiitthuciha citthu cinci.
35 Ucoocilo, eetthucyaawe yahorwaa mpaka nipuro naaryaawe ni yahomwiirela co: “Nipuro niriihunna vaa khanviravira atthu ni uhiila.
36 Mwaaleve atthwaayo wiira arwee mmaaliteeya wiira yathume iyoolya.”
37 Vano, Yesu ahowaakhula, eeraka: “Ayo khanlamuliya urwaa; nyuuva pooti waavaha itthu yoohala ulya.” Ayo yahonkoha-tho, yiiraka: “Nirweeke nathumeke iphaawu cotenaariyu 200 wiira atthwaala akhuure?”
38 Uyo ahaakoha: “Nrinaa iphaawu kavi? Nrwee mwawehe!” Urwaa waya uweha, yaheera: “Nirinaa iphaawu thanu ni ihopa piili.”
39 Vano, Yesu ahowiirela atthwaayo yonkome nkhurupuni cankaani wamalasini makithi.
40 Vano, atthwaayo yahonkomaca ikhurupu caatthu 100 ni caatthu 50.
41 Vano, Yesu ahokusa iphaawu thanunnyo ni ihopa piilinnyo, ahoweha wiirimu ni aholompa. Umaliha wawe ulompanwo, ahomyaanihaca iphaawunnyo ni ahopacera waavaha eetthucyaawe wiira yaakawele atthwaayo, ni ciicammo ahaava ihopannyo wiira akawe.
42 Vano, atthu otheene yaaholya ni yahorupala;
43 uttotteliya waya iphaawu caahanle, cahocara itthuttu* 12, woohaalikelela ihopa caahanle.
44 Alopwana yaakhuurile iphaawaayo yaari 5.000.
45 Vano, woohipica, Yesu ahowiirela eetthucyaawe akele nkalawani ni arwee mphantte nkhwaawe wopahari, ncoko wo Petesaayita. Uyova aahanle aaleehaka atthwaayo.
46 Masi, waaleeha wawe atthwaayo, Yesu aarweele umwaakoni urwaa ulompa.
47 Wiila waya, ikalaweeyo yaari iriyari ipahari, masi uyo aari veekhaawe vate waya ipahariiyo.
48 Vano, unahanle vakaani usa, woona wawe wiira eetthucyaawe yaari mmasakhani nlattu wo mawimpi, uyo ahancera weetta waculu maaci, arwaaka nipuro naaryaaya, masi waakhala toko wiira aanhala waapwaha.
49 Umoona waya eettaka waculu maaci, yahancera woona toko naari nlayikha, ni yahiira: “Ala malavi!” Ni yahokhuwela,
50 kontha otheene caya yahomoona ni yahotuthuwa. Masi, woohipica, Yesu aheera: “Nlipe nrima! Nhoove, thi miiva Yesu.”
51 Vano, uyo ahowela nkalawani yaaryaaya etthucyaawe, ni iphyoo yahomaala. Nlattu wo iyo itthwiiyo, ayo yahokhala ootikhinihiya venci.
52 Kontha khayaakhitiri ucuwela itthu yeetthucihaaya mwiirirya wophaawu, nanlelo yaari ahineeweeha.
53 Ulapuwa waya, yahophiya u Genesaree ni yaheemesa ikalawaaya wonwo.
54 Masi, ukhuruwa waya nkalawanimmo, atthwaayo yahoncuwelela Yesu.
55 Vano, atthwaayo yahovira yahimyacaka ncoko wotheene wo Genesaree ni yahopacera unrwaanela aretta nipuro neewaaya wiira phiryaawe, anaateesile wanrepani.*
56 Ni mapuro otheene aarwaawe, mmaaliteeya ni mmasittatti, yaaneesiya aretta mmaparapaarani* ni anlepeliya wiira aahiye ukwanya nanka miripwe conkuwoni wawe, ni otheene ale yaakwanyale yanvona.
Notas
^ Awula: “ncokwaawe.”
^ Awula: “nrupa woyoolya.”
^ Niikereeku: “ikoopere.”
^ Niikereeku: “ahiware ihancu piili.”
^ Awula: “Namapattisa.”
^ Awula: “ahanca unrusa.”
^ Awula: “Namapattisa.”
^ Awula: “nthaaluni.”
^ Awula: “nthaaluni.”
^ Awula: “uthunku.”
^ Awula: “isestu.”
^ Awula: “wankorini.”
^ Mapuro yaacaraaya atthu ni waatumihaciya.
