Ihapari Comaana Cantikhiye ni Markus 7:1-37
7 Vano, mafariseu ni anamantikha yaakhuma u Yerusalemu yahonthukumanela Yesu.
2 Ni yahowoona eetthuci akhwaawe a Yesu yalyaaka nimatata oohiirya, iyo maanaaya wiira woohinyawa.*
3 (Kontha mafariseu otheene ni a Yuuta khayaalya woohinyawa mpaka mwiikookwinoni;* ayo yeettela ilema caatthu okhalayi,
4 ni, yaturuwaka upacari, khanlya woohinyawa. Cihaavo ilema cinci cikiina yiitthucilyaaya ni cihinhiyaaya weettela, toko upacera ucuwyaa mmaacini ikoopu, ijaaru ni ikaraafa cokoopere ahinancera uvarela nteko.)
5 Mafariseu ni anamantikha yahonkoha co: “Kontha isiyani eetthucyeenyu ahineettelaaya ilema caatthu okhalayi, ni anlyaaya nimatata oohiirya?”
6 Uyo ahowaakhula, eeraka: “Isaiya aawaacani nyuuva ukati wenryaawe co: ‘Ala atthwaala ankittitthimiha wamalakuni paasi, masi wanrimani waya vaa, khankiwacera hataa vakaani.
7 Ayo atthwaayo ahinhiyerera ukiswalela mahala, kontha marumo aniitthucihaaya akhanle aapinaatamu.’
8 Nyuuva nnaahiya nlamulo na Nluku ni nnovaresesa ilema caapinaatamu.”
9 Uyo ahowiirela-tho co: “Nyuuva nnaacuwela sana-saana weesa mphanttyaayaru nlamulo na Nluku wiira nvaresese ilema cinyu.
10 Wootakihera Moceesi hantikha eeraka: ‘Waahisime athumwana ni anumwana’ ni ‘Ule naaveeha* athumwaane awula anumwaane haana eeviyaka.’
11 Masi nyuuva nneera: ‘Ntthu awiirelaka athumwaane awula anumwaane co: “Citthu cotheene kirinaaka, kaahalaaka wuuvahani, cikhanle ikorpani, (iyo maanaaya wiira: itthuvo coohala unvaha Nluku),”’
12 nyuuva khannonhiya ntthu waakavihera athumwaane ni anumwaane.
13 Ala manannaala, nyuuva khanniiriha ukhalana ifayita nuulumo na Nluku nlattu wo ilema cinci cineetthuciheenyu, ni nnaapanka citthu cinci khampa nnya.”
14 Ahowiihana-tho atthwaayo ni ahowiirela: “Nvriyane otheene cinyu ni mwiiweehe utaphuleliya waya citthu cinhimyaaka.
15 Itthu inonhiiriha pinaatamu khinakhala phiitthu inkela mmirimani wawe, masi inonhiiriha phiile inkhuma wanrimani wawe.”
16 ——
17 Waahiya wawe atthwaayo, Yesu ahokela inupa imoca ni eetthucyaawe yahopacera unkoha itthu yaataphulelaaya nlattanihero naapankilyaawe.
18 Vano, uyo ahaakoha: “Khampa atthwaale vale, nyuuva ciicammo khannocuwela itthu intaphulelaaya? Khannocuwela wiira khiivo itthu inkela mmirimani wapinaatamu inhala unkhaliha oohiirya,
19 ukhala wiira khinkela wanrimani masi inkela nnapwiipwini,* nuukhumela vate?” Wiira wawe commo, uyo aahoreeriha iyoolya cotheene.
20 Uhiya commo, uyo aheera: “Itthu inkhuma wanrimani wapinaatamu phinonkhaliha oohiirya.
21 Kontha wanrimani wapinaatamu pinkhumaaya moopuwelelo oohinamaana, toko: urupihana woohiloka,* winnya, wiiva,
22 uluva, upheela citthu cotheene, upanka citthu coohinamaana, wootha, makhalelo oohinamaana, nttima, unveeha Nluku, wiicoona ni ankhili oohinamaana.
23 Nnya citthu cotheene cootakhalannya cinkhuma wanrimani ni phinonkhaliha pinaatamu oohiirya.”
24 Uyo ahokhuma ni aahorwaa ncoko wo Tiro ni wo Sitoni. Nwo, ahokela inupa imoca ni aapheela wiira hicuwele hataa ntthu, masi khawaakhitiryeele uhicuweliya.
25 Vano, athiyana amoca yaarina mwaana mwanthiyana aavariye nimaciini, yaheewa oolumiyaka Yesu ni yahorwaa mpaka nipuro naaryaawe, ni yahokhoroma uhoolo wawe.
26 Ayo athiyanaayo yaari nkereeku yaayariye u Siiro-feniisiya, ni ayo yahokhanyerera unlepela wiira oomole maciini yankenle mwanaya.
27 Masi Yesu, ahowiirela: “Mwaahiyeke toko asaanaayo yaatoseke iyoolyeeyo, kontha khunreera uwaakha iyoolya asaana, ni waavaha asaana aasilapwa.”
28 Ayo athiyanaayo yahaakhula, yeeraka: “Iyeeni, Pwiiya, masi asaana aasilapwa anaalyaaka iyoolya immoramora ukati unlyaaya asaana.”
29 Vano, uyo ahomwiirela: “Nlattu womananna yaakhunleenyu, nrweeke; mwaninyu ahonkhuma maciini yankenle.”
30 Vano, ayo yahoturuwela uwannya, ni yahomphwanya mwanaya narupile wankorini, anankhumile maciinnyaayo.
31 Yesu uturuwa wawe ncoko wo Tiro, ahovira u Sitoni ni aahorwa ipahari yo Kalileya ni aaholapuwela ncoko wo Tekaapoli.
32 Nwo, aahowaaneliya ntthu oohiiwa ni ahaakhitiri wuulumaca saana ni aaholepeliya wiira amweeserere ntata nawe.
33 Ni uyo aahonkusa mphanttyaaweru, uttayi naatthwaayo. Vano, ahohela makokhwaawe mmaaruni wawe uyo nlopwanooyo ni, usuwa wawe, aahovara nlimi nawe uyo nlopwanooyo.
34 Awehaka wiirimu, aaheettha iphumu ni aheera: “Efata,” iyo maanaaya: “Utthukuwe.”
35 Wiira wawe commo, nlopwanooyo ahopacera wiiwa ni wuulumaca saana-saana.
36 Vano, ahowiirela atthwaayo wiira ahaahimeerye atthu itthu yeerannyaale, masi awiirelaka commo, atthwaayo phaatepaaya waahimeerya atthu itthu yiirannyeele.
37 Khweeliini, ayo yaari ootikhinihiya venci ni yeera: “Uyo naapanka citthu cotheene saana. Mpaka nawaavoniha atthu oohiiwa ni oohuulumaca.”
Notas
^ Iyo maanaaya, unyawa yattharihaka ilema caya.
^ Awula: “mwiikookunoni.”
^ Awula: “naaruwana.”
^ Awula: “mmirimani.”
^ Niikereeku: “porneía.”
