Ihapari Comaana Cantikhiye ni Markus 8:1-38
-
Yesu nawaavaha iyoolya atthu 4.000 (1-9)
-
Yesu naalepeliya upanka miiriirya akaviheriyaka ni Nluku (10-13)
-
Ifermentu yo mafariseu ni ya Herooti (14-21)
-
Nlopwana oohoona naavonihiya u Petesaayita (22-26)
-
Peturu naahimya wiira Yesu phiri Kristu (27-30)
-
Yesu naahimya wiira naahala wiiviya (31-33)
-
Ntthari eekhweeli (34-38)
8 Ale mahukwaale, yahonthukumanela-tho atthu enci, ni ayo atthwaayo khayaarina iyoolya wiira alye. Vano Yesu ahowiihana attharyaawe ni ahowiirela:
2 “Kinaawoonela uthunku atthwaala vaa, kontha ahovira mahuku mararu anari ni miiva ni kharina iyoolya.
3 Kawiirelaka aturuwele mmawannyaya anari niitala, anaahala unkhwa naaphuumu niiphiro ni akiinaayo ankhuma uttayi.”
4 Eetthucyaawe yahomwaakhula yeeraka: “Ninhala uphwanya vayi iyoolya yowaatosera atthu otheene vaa, ukhala wiira nna nipuro nna uttayi niwaaliteeya?”
5 Vano, Yesu ahaakoha co: “Mwaatthuva nrina iphaawu kavi?” Ayo yaahomwaakhula: “Nirina iphaawu 7.”
6 Vano, ahaalepela atthu otheene wiira yonkome, ahocisa iphaawu 7 ni aholompa, ahokawanihaca ni ahaavaha attharyaawe wiira akawe, ni attharyaawe yahaakawela atthu otheene.
7 Ciicammo cahaavo ihopa vakaani, cooyevaca; ulompela wawe, ahaavaha attharyaawe wiira akawe.
8 Atthu otheene yaaholya ni yaahorupala; ipetaasu caahanlennyo cahocara itthuttu 7.
9 Yaari alopwana oophiyaka 4.000. Vano, Yesu ahowiirela arweeke mmawannyaya.
10 Woohipica, Yesu ahokela nkalawani nkhayi naattharyaawe ni ahorwaa ncoko wo Talmanuta.
11 Uphiya wawe nwo, mafariseu yahowa nipuro naaryaawe ni yahopacera unnyakulihanana, yanlepelaka wiira awoonihere nthoonyero ninkhuma wiirimu, yapheelaka unttehatteha paasi.
12 Yesu ahoriipiya nrima cinene ni aheera: “Nlattuni ala atthwaala ampheelaaya nthoonyero? Kinoohimeeryani ikhweeli wiira ala atthwaala khanhala woona hataa mwiiriirya mmoca.”
13 Vano, Yesu, umaliha wawe wuuluma, ahaahiya mafarisewu ni aahokela nkalawani ni ahorwaa mphantte nkhwaawe.
14 Masi, ukati waakhumaaya, yaholiyala ucisa iphaawu ni khayaarina hataa itthu yoohala ulya, ihikhanle iphaawu imoca.
15 Vano, Yesu ahowiirela attharyaawe co: “Nhiitthaale; ratta niifermentu yo mafariseu ni ya Herooti.”
16 Vano, nlattu woohikhalana iphaawu, ayo yahopacera unyakulihana.
17 Ucuwela wawe iyo itthwiiyo, uyo ahaakoha: “Nlattuni nnonyakulihaneenyu nlattu woohikhalana iphaawu? Nanlelo khannaaya wiiweeha itthu inoohimeeryaakani? Nanlelo khannaaya wiiweeha?
18 Nhookhalanaru miitho, khannoona; ni nhookhalanaru maaru, khanneewa? Khannoopuwela
19 itthuttu kavi cophaawu caattottenleenyu ukati waamyaanihilyaaka iphaawu 5 wiira naavahe alopwana 5.000?” Ayo yaahaakhula co: “Naattottenle itthuttu 12.”
20 “Vano, iphaawu 7 waakhitireelyaaya ukhuura alopwana 4.000, itthuttu kavi cuulupale copetaasu caattottenleenyu?” Ayo yaahaakhula, yeeraka: “Caari 7.”
21 Vano, uyo ahaakoha-tho co: “Nyuuva nanlelo khanneeweeha?”
22 Vano, yaahophiyaca u Petesaayita. Nwo, ahowaaneliya nlopwana oohoona ni aholepeliya wiira anvare.
23 Ni uyo ahovarela ntata nawe uyo nlopwana oohoonooyo ni ahoncisa useresere aliteeya. Uhela wawe isenye mmiithoni wawe nlopwanooyo, ahonkoha co: “Unawoona itthu?”
24 Vano, nlopwanooyo ahoweha uculu ni aheera: “Kinwoona atthu, masi ayo ankhala toko miri ceettaka.”
25 Yesu ahovara-tho miithwaawe uyo nlopwanooyo ni uyo ahopacera woona sana-saana. Miithwaawe yaahovonihiya ni ahopacera woona citthu cotheene saana.
26 Ahomwiirela arweeke uwaani, alipiheraka umwiirela: “Uhikele mwaaliteeya.”
27 Vano, Yesu naattharyaawe yaahorwaa mmaaliteeya o Sesareya wa Filipe, ni niiphiro Yesu ahaakoha attharyaawe co: “Atthwaayo aneera wiira miiva tipani?”
28 Ayo yahaakhula, yeeraka: “Ahaavo aneera Joau Mpattisa; akinaayo aneera Eliyasi ni akinakwaayo aneera porofeeta mmoca-mmoca okhalayi.”
29 Vano, uyo ahaakoha co: “Vano nyuuva, nneera miiva tipani?” Peturu ahaakhula, eeraka: “Nyuuva nkhanle Kristu.”
30 Vano, uyo ahowiirela wiira ahinhimeerye ntthu iyo itthwiiyo.
31 Vano, ahopacera waahimeerya wiira Mwaana a Pinaatamu anhala uhuva cinene, uthanyiya naahooleli a Yuuta, ahooleli aanankuttho ni anamantikha, ni ciicammo aanhala wiiviya, ni anhala wunwelelihiya nihuku noneeraru.
32 Khweeliini, Yesu ahooluma woohivithavitha. Masi, Peturu ahoncisa mphantte nkiina ni ahanca unvaanyiha.
33 Uyo ahorukunuwa, ahaaweha attharyaawe, ni ahomwiirela Peturu co: “Ukhume vaa, Sotwani! Kontha khurina moopuwelelo a Nluku masi aapinaatamu.”
34 Vano ahowiihana atthwaayo ni ciicammo eetthucyaawyaayo, ni ahowiirela co: “Ntthu mpheela ukhala nttharyaaka, haana eekhottaka, uteesa nipotto nawe noohuviheriya ni ukitthara mpaka.
35 Kontha ule nohala umananiha woopola ukumyaawe, naahala uhaleela, masi ule nohala uhaleela nlattu waawaka ni nlattu wohapari comaana, naahala uphwanya.
36 Khweeliini, pinaatamu nohala uphurani aakhelaka ituninya yotheene, ni ahalaka uhaleela ukumyaawe?
37 Khweeliini, pinaatamu nohala uvahani wiira oopole ukumyaawe?
38 Ule nohala woona ihaaya nlattu waawaka ni nlattu wo moolumwaaka iriyari yaatthu oohikhuluvelya ni anamatampi, Mwaana a Pinaatamu ciicammo naahala woona ihaaya nlattu wo uyo ntthuuyo ukati nohalaawe uwa muuttitthimani waathumwaane nkhayi ni malayikha owaarya.”
