Ihapari Comaana Cantikhiye ni Markus 9:1-50
-
Yesu naatathuwaca (1-13)
-
Mmirawo aavariye nimaciini naavonihiya (14-29)
-
Citthu cotheene cinaakhitiryaa nintthu rina waamini (23)
-
-
Yesu naahimyaca-tho wiira naahala wiiviya (30-32)
-
Atthari anaanyakulihana yapheelaka ucuwela tipani khanle muulupale (33-37)
-
Ule hinnilupattha ri ni hiiva (38-41)
-
Maluku ankakathula (42-48)
-
“Nkhale khampa maakha muukumini winyu” (49, 50)
9 Yesu aheera-tho: “Ahaavo ari nkhayi ni hiiva ahinhala ukhwa ahipacale woona Umwene wa Nluku uwaaka niikuru caya.”
2 Uvira waya mahuku 6, Yesu aahonkusa Peturu, Tiyaku ni Joau, ni ahaarweeha umwaakoni woorekama. Uphiya waya nwo ahothatuwaca uhoolo waya;
3 ikuwo caawanryaawe caahopacera upharela ni caahokhala cootteela venci, ni ntuninyani motheene khaavo aahala ukhitiri utteeliha toko ayo manannaayo.
4 Ciicammo, aahokhumelela Eliyasi ni Moceesi, ni yaahopacera umoopana mwaha Yesu.
5 Peturu aahomwiirela Yesu co: “Rabi, uhoreera ukhala wihu vaa. Nttwee naateke aheema araru: Mmoca awinyu, nkhwaawooyo a Moceesi ni nkinakuuyo a Eliyasi.
6 Khweeliini, khayaacuwela yoopheela upanka, kontha yaanoova cinene.
7 Ni nahowa nihutte naakhuneelacile ni, nnihuttenimmo, naheewannya ncu, neeraka: “Ula phi mwanaka, nonfentaaka. Mmwiiwelele.”
8 Woohipica, yaahowehaweha ni khayaamonne-tho ntthu, hikhanle Yesu paahi.
9 Yakhuruwakoono wamwaakoni vaa, Yesu aahahimeerya attharyaawe wiira ahinhimeerye ntthu itthu yoonilyaaya, mpaka ukati Mwaana a Pinaatamu waahalaawe wunwelelihiya.
10 Attharyaawe yaaheewelela moolumo yaahimilyaawe, masi yannyakulihana nlattu woohicuwela itthu yaataphulelaaya eeraka vale wiira uyova anhala wunwelelihiya.
11 Ni attharyaawe yahonkoha, yiiraka: “Kontha isiyani anamantikha aneeraaya wiira Eliyasi phinhala upacera uwa?”
12 Yesu aahowaakhula, eeraka: “Khweeliini, Eliyasi phinlamuliya upacera uwa wiira alokihe citthu cotheene. Masi yantikhiye cani wiira Mwaana a Pinaatamu naahala uhuvihiya venci ni uthanyiya?
13 Kinoohimeryani ikhweeli wiira Eliyasi howa ni ahopanka citthu cotheene caapheelaaya, toko cantikhiyaaya aaciyaka uyova.”
14 Uphiyaca waya nipuro yaaryaaya atthari akhwaawyaayo, yaahowoona atthu enci anaarukurenrye, ni anamantikha yaanyakulihananaka attharyaayo.
15 Masi, atthwaayo umoona waya Yesu awaaka, yaahokhala ootikhinihiya ni yahontthimakela wiira ansalamihe.
16 Vano, Yesu ahaakoha, eeraka: “Innyakuliheraniya isiyani vale?”
17 Vano, ntthu aari nkhayi naatthwaayo, ahomwaakhula co: “Mwiitthucihi, kaahowuuwaanelani mwanaka, kontha uyo ri ninciini nihinonkhitiriha wuulumaca.
18 Nno nciininno ninammoroselaka vathi, ni uyo anankhuma maphooru mmwano, naakhura miino ni hataa ikuru khankhalana. Vano, mi kihowaalepela atthariinyu wiira yoomole nno nciininno, masi ayo khaakhitinri.”
19 Yesu ahomwaakhula, eeraka: “Oo atthu oohaamini, kinhala wuukhalanani mpaka yaakhani? Ni kinhala wuuvilelani mpaka yaakhani? Munwaane mwaanooyo va!”
20 Vano, ahocisiya arwaniyaka nipuro naaryaawe Yesu, masi nciininno, umoona waya Yesu, nahommorosela vathi mmirawooyo ni ahopacera uthukumelaca. Ummorusela waya vathi, ahopacera wuupuruwa ni unkhuma maphooru mmwano.
21 Vano, Yesu aahaakoha athumwaane uyo mmirawooyo, eeraka: “Ila itthwiila imwancere mwaani?” Ayo yahaakhula: “Ikhumelo inamwane,
22 ni nno nciininno ninammoroselaka ikwaha cinci wamooroni ni ciicammo mmaacini, wiira nimwiive. Mwakhitiri vale, nnoonele uthunku ni nnikavihere.”
23 Yesu ahowiirela: “Kontha isiyani nneereenyu ‘mwakhitiri vale?’ Citthu cotheene cinaakhitiryaa nintthu rina waamini.”
24 Woohipica, athumwaane mmirawooyo yaheera: “Mi kihaana waamini! Nkikavihere wuncerera waamini waka!”
25 Woona wawe wiira atthu enci yanwa nipuro naaryaawe, Yesu ahopwapwela nciininno, eeraka: “Nciini noohikhitiri wuuluma ni wiiwa, kinwiirela ukhume mwiirutthuni wawe ula mmirawoola ni uhinturuwele-tho!”
26 Ukhuwela waya ni unthukumeliha waya mmirawooyo nciininno nahonkhuma; ni mmirawooyo aakhanle khampa hookhwa, mpaka atthu enci yaheera: “Ula hokhwa!”
27 Masi Yesu ahonvarela ntata ni ahonwusa, ni uyo aheemela.
28 Vano, Yesu ni etthucyaawe ukela waya inupa imoca, yahonkoha anari veekha caya yiiraka: “Nlattuni uhikhitinriihu woomola nne nciininne?”
29 Yesu ahowaakhula: “Ile inanna yo maciiniile ankhuma walompaka.”
30 Yesu naattharyaawe yahokhuma vale ni yaahovira u Kalileya, masi uyo khaaphenle wiira atthu acuwele,
31 kontha aawiitthuciha attharyaawe. Ni uyo aanahimeeryaaka wiira: “Mwaana a Pinaatamu naahala uvariya ni naahala uvahereriya mmatatani waatthu, ni ayo atthwaayo anaahala umwiiva. Masi hataa eeviyaka, uyo naahala wunwelelihiya yaviraka mahuku mararu.”
32 Masi, khayeeweeha itthu Yesu yaahimyaawe ni yaanoova unkoha.
33 Ni yahophiyaca u Kafarnau. Vano, anaryeene mpaani, Yesu ahaakoha: “Mwaanyakuliherana isiyani mparapaaranimmo?”
34 Ayo khayaakhunle itthu, kontha mparapaaranimmo yahonyakulihana wiira tipani aari muulupale.
35 Yesu ahonkoma, ahowiihana attharyaawe otheene, ni ahowiirela: “Ntthu nopheela ukhala oopacera, haana akhalaka ookhicera ni nanteko aatthu otheene.”
36 Vano, Yesu ahomwiihana mwanhima mmoca ni ahomweesa iriyaryaaya; vano aahonkapatta ni aahaahimeerya attharyaawe wiira:
37 “Ule nomwaakhelela mwaana mwancina naka ciicammo naakaakhelela miiva; vano ule nokaakhelela miiva, kahi nokaakhelela miiva paasi, masi ciicammo nomwaakhelela Ule kirumile.”
38 Joau ahomwiirela Yesu co: “Mwiitthucihi, nihomoona ntthu oomolaka maciini mwancina ninyu, ni hiiva nihomananiha umwaateeliha, kontha uyo khaneetta nihiiva.”
39 Masi Yesu ahomwiirela: “Munhiye, kontha khaavo nopanka mitikiniho mwancina naka, wahoolo nuurwaa ukuuluma pusya.
40 Kontha ule hinnilupattha ri nihiiva.
41 Kinoohimeeryani ikhweeli wiira ule nohala wuuvahani maaci nlattu wookhala ntthari a Kristu, khweeliini, khanhala uhaleela itthuvwaawe.
42 Masi ule nohala waakakathula ala ooyevaca ankaaminnyaala, phataari uyova utthukeleliya nluku nuulupale nsikoni, nne ninrukureerihaawe puuru, ni uyo ntthuuyo uvonyeriya* mpahari.
43 “Wakhala wiira moonnweenyu unaawiirihani uttheka, nthikile. Phataari urwaa uphwanya ukumi nnarina moono mmoca, uhiya uvonyeriya* Ncehena ni myoono cinyu coomiili, nipuro mooro uhinttiphyaacaaya.
44 ——
45 Wakhala wiira mwettweenyu unaawiirihani uttheka, nthikile. Phataari urwaa uphwanya ukumi nttumpelaka, uhiya uvonyeriya* ncehena nnarina metto cinyu coomiili.
46 ——
47 Ni ciicammo, wakhala wiira niitho ninyu nimoca ninawuutthekihani, mkumihe ni mvonyere uttayi. Phataari ukela muumweneni wa Nluku nnarina niitho nimoca, uhiya uvonyeriya Ncehena nnarina miitho oomeeli,
48 nipuro myunku cihinkhwaaya ni mooro uhinttiphyaacaaya.
49 “Kontha ayo atthwaayo anaahala ulukiya ni mooro.*
50 Maakha ikhanle itthu yomaana, masi maakha yahiyaka uciva, nnohala ukhitiri cani uturusela uciva waya? Nkhale khampa maakha muukumini winyu ni nkhalane nnema naakhunaninyu.”