Ihapari Comaana Cantikhiye ni Matewus 10:1-42
10 Vano, ahowiihana attharyaawe 12, ni ahaavaha ukhulupale wowoomola maciini ni ciicammo woovoniha khula inanna yoretta.
2 Macinaaya ayo atthari 12 ayo, phaala: oopacera, Simau, ciicammo eehaniya Peturu, ni mwanhimaawe eehaniya Antere; Tiyaku, mwaana a Sepeteu, ni mwanhimaawe eehaniya Joau;
3 Filipe, Partolomeu, Tomee ni Matewus, ari namaliviha nsokho; Tiyaku, mwaana Alifeu; ni Tatewu;
4 Ciicammo Simau, aari nkananita; ni Yuda Iskariyoti, nuuwakatyaaya anvariihile Yesu.
5 Yesu ahaaruma ayo attharyaayo, ni waavaha malakihero awiirelaka co: “Nhirwee iparapaara co maloko makhwaawe ni nhikele mmasittatti co Samariya;
6 masi, nrwee paasi mwawaavye asarayeli, ankhala khampa ikhontwaa coorimela.
7 Woorwaa va, nlalyeere mweeraka: ‘Umwene wo Wiirimu uhanle vakaani wancera ulamulela.’
8 Mwaavoniheke aretta, nwunwelelihe atthu ookhwa, mwaavonihe anamakuttula, ni moomoleke maciini. Nyuuva nvahiyee mahala ni ciicammo nvaheke mahala.
9 Munrupani unheleenyu nsurukhu, nhicise iwooru, iparaata ni ikoopiri,
10 ciicammo nhicise iyoolya wiira nlye niiphiro, ikuwo coovate, isantaaliya, ni hataa nttontto, kontha nanteko unamphwanela uvahiya iyoolya.
11 “Khula isittatti awula aliteeya anhaleenyu ukela, muntothe ntthu unoncivela wuuviriyanani, ni nkhale wapuwani wawe mpaka unhaleenyu ukhuma.
12 Mwaphiyaka wapuwani va, mwaasalaamihe amucyaayo.
13 Mwamphwanyaka wapuwani va ntthu unoncivela wuuviriyanani, nnema ninyu nikhale nuuyova; masi mwaahimphwanyeke ntthu unoncivela wuuviriyanani, nnemanno nuuturuweleni.
14 Khula nipuro ninhaleenyu ukela nhaakheleliyaka saana ni nhiiweleliyaka moolumweenyu, mwaakhumaka iyo inupeeyo awula isittattiiyo, nkukutthe ntthupi nonnyaani winyu.
15 Kinoohimeeryani ikhweeli wiira: Nihuku Nohukhumu ya Nluku, citthu coohinamaana cinhala wiirannya iyo isittattiiyo, cinaahala utepa urika uvikana citthu cinhala wiirannya isittatti yo Sotoma ni yo Komora.
16 “Mi kinuurumani khampa ikhontwaa iriyari yo miici. Phimaana, nkhale oowalaala toko inwaa, masi oomaala toko ikhuntta.
17 Ratta naatthu, kontha ayo anaahala wuurwaanani mmatiripunaali ni uwuufyulacani mmasinakooka waya.
18 Nnaahala urwaaniya uhoolo waahooleli ni womamwene, nlattu woncina naka, wiira mwaavahe usaahiti ayova ni ciicammo atthu ontuninyani.
19 Masi yoovarakani, nhisanke nlattu woohicuwela itthu yoorwaa wuuluma ni mananna owuulumaca, ukhala wiira uyo ukatyuuyo nnaarwaa ucuwelihiya itthu yowuuluma.
20 Kontha khannakhala nyuuva paasi nnohala wuulumaca, masi nnepa wowaarya Waapaapeenyu, phinhala wuukaviherani wuuluma.
21 Uhiya commo, ntthu ni mwaamunnawe anaahala wiiviihana, nyari naahala umwiiviiha mwanawe ni asaana anaahala waarukunuwela asithumwanaya, mpaka uwiiviiha.
22 Ni nyuuva nnaahala uthanyiya naatthu otheene nlattu woncina naka. Masi ntthu nohala uvilela mpaka wuumaleloni, phinhala woopwa.
23 Mwalupatthiyaka-vale, ntthawele isittatti ikhwaawe; kinoohimeeryani ikhweeli wiira: Khannohala umaliha utthawela isittatti cotheene co Isarayeli, hinawa Mwaana Apinaatamu.
24 “Ule neetthucihiya, khanompwaha funttyaawe, ni hataa ipottha khinaapwaha apwiiyaaya.
25 Ule neetthucihiya, haana akhalaka ootteeliya alikanihiyaka nifunttyaawe, ni ipottha yalikanihiyaka naapwiiyaaya. Vano wakhala wiira mwaneene itthoko nawiihaniya Sotwani,* atthu owapuwani wawe, anhala wiihaniya ciicammo!
26 Phimaana, nhoove, khiivo itthu yoovithiya ihinhala wooneleliya ni khiivo isiiri ihinhala ucuweliya.
27 Itthu kinoohimeryaakani kinari wapiphini, nhimyace nnari nipuro nowoonnya; ni itthu kinwaapelaakani, nlalyee nnari waculu inupa.
28 Nhiwoove ale ankhitiri uwiivani, masi ahinkhitiri wuuhaleelihani uphwanya ukumi woohoolo; uhiya commo, mmoove ule nokhitiri wuumalamalihani Ncehena.
29 Keera iphera piili cinaatumihiya ninsurukhu mmoca urina ifayita vakaani? Masi khiivo hataa iphera imoca immorela awula inkotela vathi, Apaapeenyu owiirimu woohicuwela.
30 Masi, hataa ikharari cotheene commuru winyu cihaalikeliya.
31 Phimaana, nhoove, nyuuva nhaana ifayita cinene uvikana iphera cinci.
32 “Phimaana, khula ntthu nohala uhimya uhoolo waapinaatamu wiira ri wamoca ni miiva, ni miiva kinaahala uhimya uhoolo Waapaapa owiirimu, wiira kiri wamoca nuuyova.
33 Masi, ule nohala ukikhotta uhoolo waapinaatamu, ni miiva kinaahala unkhotta uhoolo Waapaapa ari wiirimu.
34 Nhoonihe toko wiira kiwaanale nnema watuninyani, akiwaanale nnema, masi kiwaanale uhiiwananiya.
35 Uhiiwananiya: Nlopwana naathumwaane, nthiyana naanumwaane ni ciicammo nthiyana naamwaramwanawe.
36 Khweeliini, alupatthi antthu, anhala ukhala amucyaawe.
37 Ule naafenta cinene athumwaane awula anumwaane uvikana mananna cinkifentaawe miiva, khunomphwanela ukhala nttharyaaka, ciicammo ule naafenta cinene asaanaawe uvikana mananna cinkifentaawe miiva, khunomphwanela ukhala nttharyaaka.
38 Ni ule hintthuna ucisa nipotto nawe noottaruseliya* ni ukitthara miiva, khunomphwanela ukhala nttharyaaka.
39 Ule nomananiha woopola ukumyaawe, naahala uhaleela, masi ule nohaleela ukumyaawe nlattu wawaka, naahala uphwanya.
40 “Ule nowaakhelani, ciicammo naakaakhela miiva ni ule nokaakhela miiva, ciicammo naawaakhela Apaapa owiirimu akiveleelihile.
41 Ule nomwaakhela porofeeta nlattu wookhala porofeeta, naahala waakhela itthuvo cinaakhelaawe porofeeta, ni ule nomwaakhela nlopwana omaana nlattu wookhala nlopwana omaana, naahala waakhela itthuvo cinaakhelaawe nlopwana omaana.
42 Ule nohala waavaha maaci ala attharyaakaala, hataa yakhalaka ikoopu imoca paasi, nlattu wookhala attharyaaka, kinoohimeeryani wiira, uyo khanhala uhaleela itthuvo citthenkaceriyaawe.”
Notas
^ Niikereeku: “Pelsepu.” Weeriyaka Pelsepu, naaciya nhooleli o maciini.
