Ihapari Comaana Cantikhiye ni Matewus 11:1-30
11 Yesu umaliha wawe waavaha malakihero eetthucyaawe 12, uyo ahokhuma nne nipuronne wiira eetthucihe ni alalyeere mmasittatti waya.
2 Vano, Joau naryeene nkhattya, wiiwa wawe citthu caapankaawe Kristu, uyo ahaaruma eetthucyaawe,
3 wiira yankohe co: “Weeva phi yoole nowa, awula nihaana umwanriiha nkhwaawe?”
4 Yesu ahowaakhula, eeraka: “Nrwee mwanhimeerye Joau citthu ciniiweenyu ni cinooneenyu:
5 Atthu oohoona anawoona, atthu oottumpela anaweetta saana, atthu omakuttula anaavonihiya, atthu oohiiwa anawiiwa, atthu ookhwa anawunwelelihiya ni atthu oohuva anaalalyeeriya ihapari comaana.
6 Ootteeliya phi ule hinhiya waamini nlattu waawaka.”
7 Ukati ayova waaturuwenlyaaya wa Joau, Yesu ahanca umuuluma Joau iriyari yaatthwaayo, eeraka: “Isiyani yaarweeleenyu woona muuthakoni? Nthathi wooveverusiya niiphyoo?
8 Vano, mwaarweele woona isiyani? Mwaarweele umoona nlopwana nowara ikuwo coovevyaala? Ntthu nowara ikuwo coovevyaala, nokhala mmanupani comamwene.
9 Khweeli-khweeliini mwaatthiva mwaarweenleni? Urwaa umoona porofeeta? Kinoohimeeryani ikhweeli wiira, uyo hompwaha porofeeta.
10 Joau phi yoole oolumiye weeriyaka wiira: ‘Woone! Kinaahala unveleeliha nrumyaaka ni uyo naahala utthenkaca nttala uhoolo waa!’
11 Kinoohimeeryani ikhweeli wiira: Iriyari yaapinaatamu, khaavo muulupale unvikana Joau Mpattisa; masi ule khanle mwankaani Muumweneni wa Nluku, phiri muulupale unvikana uyova.
12 Ukhuma ukati wa Joau Mpattisa mpaka mahukwaala, atthu anawiikurumica ukela Muumweneni wa Nluku, ni ale aneekurumica, anaakhitiri ukela.
13 Kontha maporofeeta ni malamulo, yaanuuluma citthu caahala umwiirannyeela Joau awaaka vale.
14 Ni mwatthuna vale, pooti ukupali wiira Joau khanle ‘Eliyasi aahimiye ni maporofeeta wiira naahala uwa’.
15 Ule nopheela wiiwa, eewe.
16 “Atthu omahukwaala kaalikaniheke naapani? Ayo anlikanaca naamirawo ari wapacari anaakhuwelela amirawo akhwaawe yiiraka:
17 ‘Nihowiipelani mpetta, masi nyuuva khamwiinile; nihowiipelani macipo ooriipiha nrima, masi nyuuva khanriipiye nrima.’
18 Inanna imocaaru, Joau khanlya ni khanwurya, masi atthu aneera: ‘Ula haana maciini.’
19 Mwaana Apinaatamu naalya ni naawurya, masi ayo aneera: ‘Mmooneke! Nlopwana oolya cinene ni oowurya venci, mpatthani aanamaliviha nsokho ni aanamatampi.’ Khweeliini, ntthu nooniya ucuwelaca ni citthu cimpankaawe.”
20 Uyo ahaapwapwela atthu osittatti cipankilyaawe miiriirya cuulupale, kontha atthwaayo khayaarukunusile makhalelwaaya:
21 “Nhotakhaliya nyuuva atthu o Korasi wamoca ni atthu o Petesaayita! Kontha citthu cootikhiniha ciirannyeele isittattiinyu, cineerannyaale isittatti yo Tiro ni yo Sitoni, atthu onnyo isittattinnyo yanhala uttharuwa, yawaraka isaakhu ni yonkomaka wattuurani.
22 Mi kinoohimeeryani wiira: Nihuku Nohukhumu ya Nluku, citthu cinhala wiirannya nsittatti winyu, cinhala ukhala coowerya cinene uvikana nnye cinhala wiirannya isittatti yo Tiro ni yo Sitoni.
23 Vano, nyuuva atthu nnokhala isittatti yo u Kafarnau, nnooniha toko nnaahala uttitthimihiya mpaka wiirimu?* Mena, khannohala uttitthimihiya, nyuuva nnaahala ukhwa. Kontha, citthu cootikhiniha ciirannyeele nsittatti winyu, cineerannyeele isittatti yo Sotoma, ayo atthwaayo yanhala ukhala mpaka mahukwaala.
24 Kinoohimeeryani ikhweeli wiira: Citthu cinhala wiirannya nsittatti winyu Nihuku Nohukhumu, cinhala ukhala coowerya cinene uvikana cinhala wiirannya isittatti yo Sotoma.”
25 Nlattu wo iyo itthwiiyo, ule ukatyuule Yesu aheera: “Kinawuuttottopelani waatthuni, Apaapa, Apwiiyaaka ooculu ni oovathi, kontha nhaavithela nnya citthunnya acuwelaci ni anamasoma,* masi nhaathoonyera atthu ankhala khampa anamwane.*
26 Iyeeni Paapa, kontha co, phuucivenlyaayani upanka nnya citthunnya.
27 Citthu cotheene kivahiye ni Apaapa ni khaavo noncuwela sana-saana mwaana, ahikhanle athumwaane. Ni khaavo naacuwela sana-saana athumwaane, hikhanle mwaanooyo ni ule notthunaawe uncuweliha.
28 Nwe nipuro niryaaka, otheene nyuuva moocyeeleva ni nyuuva nlemeliyeeva, miiva kinaahala wuuvahani ikuru.
29 Nkupali ukhala attharyaaka* ni nkiitthucere, kontha miiva kintthu oomaala ni owiiyeviha, ni upanka commo unaahala wuuphwanyihani ikuru.
30 Kontha ukhala nttharyaaka khunrika ni nrinttyaaka khunlemela.”
Notas
^ Awula: “weesiya ni Nluku uculu wo citthu cotheene.”
^ Awula: “atthu oosoma cinene.”
^ Atthu owiiyeviha antthuna wiitthucihiya.
^ Awula: “ucisa nikonkwa naka.” Nikonkwa yaakhalaka ithaapwa awula iyuuma yeesiyaka wa nikhatani wa ntthu awula wonaama piili wiira cicise nrintti awula cilime mmattani.
