Ihapari Comaana Cantikhiye ni Matewus 12:1-50
-
Yesu, “Mwaneene isaapatu” (1-8)
-
Nlopwana oopahuwa ntata naavonihiya (9-14)
-
Nrumiya oofentiya ni Nluku (15-21)
-
Maciini anawoomoliya ninnepa wowaarya wa Nluku (22-30)
-
Itampi ihinleveleliya (31, 32)
-
Mwiri uncuweliya ukhala womaana awula woohinamaana, nlattu wo mihokorokho caya (33-37)
-
Nthoonyero na Jonas (38-42)
-
Naturuwaka nlayikha noohinamaana (43-45)
-
Anumwaane ni asihimaawe Yesu (46-50)
12 Ule ukatyuule, Yesu aahovira mmattani nihuku nosaapatu. Vano, eetthucyaayo yaahovoliya itala ni yahancera wuurula* itiriku ni ukhuura.
2 Mafariseu woona waya iyo, yahomwiirela: “Mooneke! Eetthuciinyu ampanka itthu ihintthunihiya upanka isaapatu.”
3 Uyo aahowiirela co: “Khansomile itthu yaapankilyaawe Davidi nkhayi naalopwana yaarinaawe ukati waavonlyaaya itala?
4 Khansomile wiira aahokela nnupani ya Nluku ni ukhuura iphaawu caavahereriyaawe Nluku, itthu yahaalamuliyaawe upanka uyova wamoca naalopwana yaarinaawe, masi yaalamuliyaaya upanka anankuttho paasi?
5 Awula, ciicammo khansomile munlamuloni wiira, mmasaapatuni anankuttho anaavara nteko ntempulu masi khanttheka?
6 Masi kinoohimeeryani wiira, haavo ntthu va muulupale uvikana itempulu.
7 Mweeweehile moolumo aneeraale: ‘Mi kimpheela uthunku kahi itthuvo,’ khamwaahala waahukhumu atthu oohittheka.
8 Kontha Mwaana a Pinaatamu Phimwaneene isaapatu.”
9 Ukhuma wawe nne nipuronne, ahokela nsinakooka waya,
10 ni mmo ahaavo nlopwana oopahuwa ntata. Vano, wiira mafarisewaayo amootherye Yesu, yahonkoha co: “Unaatthunihiya uvoniha isaapatu?”
11 Uyo ahowiirela: “Tipani va iriyariinyu narina ikhontwaa, ni iyo ikhontweeyo imorelaka munlikittini nihuku nosaapatu, ahaahala ukumiha?
12 Pinaatamu haana ifayita uvikana ikhontwaa! Phimaana, unaatthunihiya uvoniha isaapatu.”
13 Vano, Yesu ahomwiirela nlopwanooyo co: “Utaphuleke ntatanno.” Vano, uyo ahotaphula ni woohipica aahovona, ni ntatanno naaholikana ninno nikhwaawenno.
14 Vano, Mafariseu yahokhuma nne nipuronne ni wanca uleehana wiira amwiive.
15 Yesu ucuwela wawe iyo, ahokhuma nne nipuronne. Vano, atthu enci yaahonttara ni Yesu ahaavoniha otheene,
16 masi Yesu, ahaahimerya woohaakhuwakhuwa, wiira ahinhimeerye ntthu wiira uyova aari tipani,
17 wiira yiirannye moolumo aporofeeta Isaiya, enre:
18 “Mmoone nrumyaaka kinthanlilyaaka, kinonfentaaka ni kimmwaaminnyaaka, kinaahala unvaha nnepaaka wowaarya ni uyo naahala waahimerya atthu isariya ikhanle isiyani.
19 Uyo khanhala ukhuwaca, ni khanhala uwusa ncu nawe, uyo khanhala uhiya ncu nawe niiwiyaka mmaparapaarani.
20 Khanhala umalamaliha ntathi wowuntya, ni khanrwaa uttipiha nthupo* wosaminiiya untthuwa mwiisi, uhaleelaka vakaani uttiphya; mpaka wanhalaaya umalamalihiya citthu cotheene coohinamaana.
21 Khweeliini, atthu onlaponi anaahala unweherera uyova.”
22 Vano, ahorwaaneliya nlopwana yankenle maciini, uyo nlopwanooyo khooluma ni khoona, vano Yesu aahonvoniha ni uyo aahancera wuulumaca ni woona.
23 Nlattu wo iyo itthwiiyo, atthu otheene yaahotikhinihiya, ni yahancera wiira: “Masi ula khanakhala mwaana a Davidi?”
24 Mafariseu wiiwa waya iyo itthwiiyo, yaheera: “Ula nlopwanoola noomola maciini akaviheriyaka ni Pelsepu,* nhooleli omaciini.”
25 Ucuwela wawe itthu yuupuwelaaya, Yesu aahowiirela co: “Umwene uneekawaniha unaamalamala, ni isittatti awula inupa ineekawanihaca, inaakwanyuwaca.
26 Inanna imocaaru, Sotwani amoomola Sotwani, paasi uyo heekawanihaca. Vano wakhala commo, niireke unaakhitirya umwennyaawe uhimalamala?
27 Uhiya commo, wakhala wiira miiva kinoomola maciini kakaviheriyaka ni Sotwani, vano atthweenywaayo anoomola yakaviheriya naani? Nlattu wo yeeyeeyo atthwiinywaayo phinhalaaya wuuhukhumuni.
28 Vano wakhala wiira kinoomola maciini kikaviheriyaka ninnepa wowaarya wa Nluku, khweeliini Umwene wa Nluku* uhoophwanyani.
29 Awula, niireke wiira unaakhitirya ntthu umwinnyera nlopwana oolipa, uhikhanle wiira hoopacera toko untthuka uyo nlopwanooyo? Khweeliini, apanka commo naahala ukhitiri umwinnyacera.
30 Ule hiri mphanttyaaka, khanle nwanannyaaka, ni ule hinthukumaniha ni miiva, nawaaca umwarusa.
31 “Kinoohimeeryani ikhweeli wiira: Khula matampi anvaraaya apinaatamu ni ciicammo moolumwaaya ooveeha, anaahala uleveleliya, masi ule nuuluma puysa nnepa wowaarya, khanhala uleveleliya.
32 Wootakihera, ule nomuuluma puysa Mwaana a Pinataamu naahala uleveleliya; masi ule nuuluma puysa nnepa wowaarya wa Nluku, khanhala uleveleliya, ukhuma yaala mahuku ninkhaleehwaala mpaka.
33 “Mwaalaka mwiri womaana, nnohala uhepha mihokorokho comaana; ni mwaalaka mwiri woohinamaana, nnohala uhepha mihokorokho coohinamaana. Mwiri uncuweliya ukhala womaana awula woohinamaana, nlattu womihokorokho caya.
34 Ucuulu wonwaa coohapala, nnohala wuuluma cani citthu comaana ni nyuuva nnari atthu oohinamaana? Malaku anooluma itthu iri wanrimani.
35 Ntthu ooreera nrima, nuuluma citthu comaana, kontha wanrimani wawe ciri citthu comaana, masi ntthu ootakhala nrima nuuluma citthu coohinamaana, kontha wanrimani wawe cicanre citthu coohinamaana.
36 Kinawuuhimeeryani wiira, naphiyaka Nihuku Nohukhumu na Nluku, atthu otheene anaahala uhukhumwiya nlattu wo citthu coohinamaana cinuulumaaya;
37 kontha nlattu wo moolumweenyu, phinhaleenyu wooniya ukhala nasariya ni nlattu wo moolumweenyu phinhaleenyu uhukhumwiya.”
38 Vano, anamantikha ni mafariseu yaahomwiirela: “Mwiitthucihi, nnoonihere nthoonyero ninyu.”
39 Woowaakhula ahowiirela co: “Ucuulu wootakhala ni woohikhuluvelya, khunhiyerera waavya mathoonyero, masi khunhala uvahiya nthoonyero hataa nimoca, nihikhanle nthoonyero na Jonas, porofeeta.
40 Kontha, khampa Jonas waavirihalyaawe mahuku mararu nari mmirimani wohopa yuulupale, ciicammo Mwaana a Pinaatamu naahala uviriha mahuku mararu nari mmahiyeni.
41 Atthu o Niinive, anaahala wunwelelihiha wamoca naatthu omahukweehwaala, ni ayo anaahala waahukhumu ayo atthwaayo, kontha atthu o Niinive yahorukunusa mirima caya, wiiwa waya itthu yaahimilyaawe Jonas. Masi vano va haavo ntthu ofayita cinene umpwaha Jonas.
42 Apwiyamwene oohitto ilapo, anaahala wunwelelihiya wamoca naatthu omahukwaala, ni anaahala waahukhumu, kontha ayo yahokhuma ncoko woottayi wiira yawiiwe ucuwelaca waarinaawe Salomau. Masi vano, va haavo ntthu ofayita cinene unvikana mwene Salomau.
43 “Nciini nakhumaka mwiirutthuni wantthu, nno ninaweetteetta muuthakoni naavyaka nipuru noomumula, masi khanimphwanya.
44 Phimaana, nno ninawiira co: ‘Kinaaturuwela inupa kinkhumaaka,’ ni naphiyaka ninaaphwanya inupeeyo woohintthu, inakwecakweciye ni inareerihaciye.
45 Vano, nno ninaarweela malayikha 7 ootepa ukhala oohinamaana uvikana nno, ni anawancera ukhala wapuwani va ni nlopwanooyo naatepa ukhalana makhalelo oohinamaana uvikana arinaawe. Iyo phiitthu inhala uwiirannyeela atthu omahukhwaala.”
46 Yesu awuulumanaka atthu yaarinaawe, yahowa anumwaane ni asunnawe vate waya inupa yaaryaawe, ayo yapheelaka umuulumana.
47 Vano, ahokhumelela ntthu mmoca aamwiirenle: “Nyuuva! Anumwaninyu ni asunninyu ari vate vaava ni anaapheela uwuulumanani.”
48 Vano Yesu aahomwaakhula co: “Amaama ni asunnaka phaapani?”
49 Ahotaphula moonnwaawe aathoonyaka eetthucyaawe ni aheera: “Ala phari amaamaaka ni asunnaka!
50 Kontha ule nopanka itthu inaacivela Apaapa ari wiirimu, phiri munnaaka, nrokoraka ni amaama”
Notas
^ Awula: “uwulula.”
^ Nttapwatta naaheliyaka nsaminiinyani.
^ Nna nikhanle ncina nikhwaawe na Sotwani.