Ihapari Comaana Cantikhiye ni Matewus 13:1-58
-
MALATTANIHERO O UMWENE WA NLUKU (1-52)
-
Namalima (1-9)
-
Kontha Yesu aanwiitthuciha nimalattanihero (10-17)
-
Itthu inhimyaaya nlattanihero na namalima (18-23)
-
Itiriku ni malasi oohonona icoolya (24-30)
-
Inuku yankaani ni ifermentu (31-33)
-
Nlattu Yesu woopanka malattanihero nawiirannyeeha inatiri (34, 35)
-
Itthu inhimyaaya nlattanihero notiriku ni nomalasi oohonona icoolya (36-43)
-
Nhakhu woosunkiya ni nluku nofayita venci cinene (44-46)
-
Ntthavi nohopa (47-50)
-
Mihakhu cokhalayi ni conaanaano (51, 52)
-
-
Yesu naathanyiya nsittatti wawe (53-58)
13 Nenno nihukunno, Yesu ahokhuma inupa yaaryaawe nuurwaa wonkoma nseresere ipahari.
2 Nlattu atthu yanviriyanaayo wowinciva, uyo aahokela nkalawani ni ahonkoma mommo, ni atthwaayo yahancera unviriyana anari nkerekhere ipahariiyo.
3 Ahaahimyacera citthu cinci apankaka malattanihero, uyo aheera: “Nviriyane! Namalima mmoca aahorwaa waala.
4 Ukati waalaawe, ipho cikiina cahomorela nseresere iparapaara, vano inuni cahowa ni caholya.
5 Cikhwaawe cahomorela wamwalani, nipuro nahaari itthaya yinci ni cahomela woowaakuvya, ukhala wiira nno nipuronno khayaarivo itthaya yinci.
6 Masi ukati ncuwa waapharenlyaaya cinene, cahovya ni mititharinnyo cahonyaala, ukhala wiira khaceethipenle.
7 Ipyo cikhwaawennyo caamorenle wamwiiwani, vano mwiiwooyo wahoonuwa ni wahophunyaca* mwiryuuyo.
8 Vano ipyo cikhwaawennyo, caamorenle watthayani yomaana ni cahancera wiima mihokorokho, cikiinannyo imaara 100, cikhwaawennyo imaara 60 ni cikinakunnyo imaara 30.
9 Ule nopheela wiiwa, eewe.”
10 Vano, eetthucyaawe yahowa ni yahonkoha: “Kontha isiyani nnowiitthuciheenyu nimalattanihero?”
11 Yesu ahowaakhula co: “Nyuuva nhovahiya ucuwelaca isiiri co Umwene wa Nluku, masi ayo atthwaayo mena.
12 Kontha ule rina naahala wuncereriya ni naahala ukhalana cinci; masi ule hirina, naahala waakhiya hataa itthu vakaani irinaawe.
13 Phimaana, kinwiitthucihaaka nimalattanihero; kontha hataa yoonaka, anoona mahala ni hataa yiiwaka, aniiwa mahala, ayo khaaniiweeha itthu inhimyaaka.
14 Ni ayo anawiirannyeeha inatiri* ya porofeeta Isaiya ineera: ‘Nyuuva nnaahala wiiwa masi khannohala wiiweeha, nyuuva nnaahala woona, masi khannohala wooneeha itthweene isiyani.
15 Ala apovwaala aholipiha nnrimaaya, ahottiyela maarwaaya ni ahotthuka meethwaaya, wiira ahoone, wiira ahiiwe ni aheese wanrimani waya itthu kinaahimeryaaka; ni yarukunusaka makhalelwaaya wiira kaavonihe.’
16 “Phimaana, ootteeliya thi nyuuva, kontha nnawoona ni nnawiiwa nnya citthunnya.
17 Masi kinoohimyeerani ikhweeli wiira: Maporofeeta ni alopwana enci yanswalela Nluku, yaanaapheela woona nnya citthunnya masi khayoonale, ni yampheela wiiwa masi khayiiwile.
18 “Vano nviriyane saana nlattanihero nanamalimanne.
19 Ipyo caamorenle nseresere iphiro, maanaaya ule neewa moolumo o Umwene wa Nluku ni hincuwelela maanaaya isiyani, vano naawa ntakhali ni naaphela ipyo caaliye wanrimani wawe uyo ntthuuyo.
20 Ipyo yaamorenle wamwalani, maanaaya ule niiwa nuulumo na Nluku, nuukupali wowaakuvyaaca woohipica wantteelaka nrima.
21 Masi uyo kharina ntithari, unookhalaru commo, uyo naavilela ukati vakaani, vano yankhumelelaka masakha awula alupatthiyaka nlattu wo nuulumo na Nluku, woohipica naakakathuwa.*
22 Ipyo caamorenle wamwiiwani, cinkhala khampa ule niiwa nuulumo na Nluku masi masukhuli ontuninyani ni ikuru yoothepya cirinaaya mihakhu, cinaaphunyaca* nuulumo na Nluku niiwilyaawe ni uyo khaneemiha mena nhokorokho mmoca.
23 Ipyo caamorenle watthayani yomaana, maanaaya ule aneewa nuulumo na Nluku nuucuwela maanaaya isiyani, vano nawiimiha mihokorokho, nkinooyo imaara 100, nkhwaawyooyo imaara 60 ni nkinakuuyo imaara 30.”
24 Vano, ahaahimerya nlattanihero nikhwaawe eeraka: “Umwene wa Nluku pooti wanlattanihiyaaya ninlopwana anle ipyo comaana mmattani wawe.
25 Ukati atthwaayo waarupaaya, aahowa nwanannyaawe, ahaala malasi oohonona iyoolya mwaalalyaawe itirikummo ni ahorwa.
26 Wuunuwa waya ncaasyuuyo ni wiima waya itirikwiiyo, malasyaayo ciicammo yaahoonuwa.
27 Vano, anantekwaawe mwaneene imattooyo yahowa ni yahaakoha: ‘Pwiiya, keera mwaalale ipyo comaana mu, vano ala malasi oohinamaanaala ankhuma vayi?’
28 Uyo ahowaakhula eeraka: ‘Nwanannyaaka phipankacile ila itthwiila.’ Vano anantekwaayo yahonkoha co: ‘Vano, niphelakaceke malasyaayo?’
29 Uyo ahowaakhula eeraka: ‘Mena, kontha woophela malasyaayo, unoopiha ciicammo uphela niitirikwiiyo.
30 Nhiyeke cuunuweke nkhayi mpaka uphiya ukati woohephiya icoolya, vano waphiyaka uyo ukatyuuyo, kinaahala uwiirela mayoohepha co: Mpacere utthukaca malasyaayo wiira apahiye; vano, itirikwiiyo nsunkeke nnikhupini waka.’”
31 Ahaahimeerya-tho nlattanihero nikhwaawe eeraka: “Umwene wa Nluku unlikanaca itthaka* yankaani yaalilyaawe nlopwana mmoca mmattani wawe.
32 Iyo itthaka yootepa uyeva cinene, uvikana cotheene, masi mwiryaayooyo wuunuwaka vale unkhala muulupale mpaka asinuni anaateka ipuuru mmirittani waya.”
33 Ahaattonkela nlattanihero nikhwaawe, eeraka: “Umwene wa Nluku unlikanaca niifermentu athiyana amoca yaahenlyaaya mphepani yoophimiya miliko miraru co iseeya,* iyo iphepeeyo yaholovotari.”*
34 Yesu aahimenrye citthu cotheene nnyo atthwaayo apankelaka malattanihero. Khweeliini, khiivo itthu yaahimeeryaawe woohipanka malattanihero,
35 wiira yirannye moolumo a porofeeta enre: “Kinaahala wuuluma citthu nimalattanihero ni kinaahala ulalyaa citthu cahaacuweleliya ikhumelo yokhalayi.”
36 Vano, waaleva wawe atthwaayo, uyoova aahokela inupa imoca, eetthucyaawe yaahorwaa mpaka nipuro naaryaawe, ni yahomwiirela: “Nnitaphulele nlattanihero no malasi oohonona icoolya.”
37 Uyo aahowaakhula eeraka: “Namalima anle ipyo comaanooyo khanle Mwaana Apinaatamu;
38 imatteeyo ikhanle ituninya, ni ipyo comaanannyo akhanle asaana omuumweneni wa Nluku, masi malasi oohonona icoolya comaanaannyo akhanle asaana a Ntakhali,
39 ni nwanani anle malasi oohonona icoolya khanle Tiyapu. Uhephiiya wocoolyaanwo, ukhanle wiimaleloni ulumwenku wo citthu coohinamaana,* ni anamahepha icoolyaayo akhanle malayikha.
40 Phimaana, khampa malasi oohonona icoolya anthukumanihiyaaya ni ampahiyaaya, iyo phiitthu inhala wiirannya wiimaleloni ulumwenku wo citthu coohinamaana.
41 Mwaana a Pinaatamu, naahala uruma malayikhaawe, ni ayo anaahala uwa ni anaahala waathukumaniha muumweeneni wawe atthu otheene anaatthekiha akhunanaya ni ale ahineettela malamulo,
42 ni anaahala waavonyera ayo atthwaayo nttukutthani omooro. Ni mommo phinhalaaya wunla ni ukhuura meenwaaya.
43 Yooyo ukatyuuyo, ale ammwiiwelela Nluku anaahala waarya khampa ncuwa, Mumweneni Waapaapaaya ari wiirimu. Ule nopheela wiiwa, eewe.
44 “Umwene wa Nluku unlikanaca ninhakhu nlopwana mmoca oonenenlyaawe mmattani, nuusunka-tho mmattani mommo, ni nlattu wootteeliya, uyo aahorwaa utumiha citthu cawe cotheene wiira athume iyo imatteeyo.
45 “Umwene wa Nluku, ciicammo unlattanaca ni namatumihaca neetta ikwaha cinci aavyaka ipeerola.*
46 Uphwanya wawe nluku nofayita venci cinene, ahorwaa utumiha citthu cotheene caarinaawe nuuthuma nno nlukunno.
47 “Ciicammo Umwene wa Nluku, unaalattanaca nintthavi naavonyeriye mpahari ni naavarale ihopa co khula nkwartati.
48 Ihopannyo ucara waya muntthavinimmo, ntthavinno nahopuruleliya vate ni cahancera uthanleliya ihopa comaanannyo nipuro ni coohinamaanannyo cahorihiya.
49 Iyo phiitthu inhala wiirannya wiimaleloni ulumwenku wo citthu coohinamaana. Malayikha anaahala uwa ni anaahala waathanlela nipuro atthu ammwiiwelela ni ahimmwiiwelela Nluku,
50 ni anaahala waavonyera nttukutthani omooro, mmo phinhalaaya wunla ni ukhuura meenwaaya.
51 “Nhiiweeha sana-saana nnya citthunnya?” Ayo yahaakhulaca: “Iyee.”
52 Vano, uyo aheera co: “Paasi ntthu neetthuciha myaha co Umwene wa Nluku, nolikanaca ni nlopwana mwaneene itthoko, nokumiha mmihakhuni wawe citthu conaanaano ni citthu cokhalayi.”
53 Yesu umaliha wawe uttonkaca ala malattaniherwaala, ahokhuma.
54 Uphiya wawe isittattyaawe, ahancera uwiitthuciha atthwaayo mmasinakooka waya, ni atthwaayo yahancera utikhinaca ni yaheera: “Aaphwanya vayi ucuwelaca ula nlopwanoola ni ikuru cirinaawe coopanka miiriirya?
55 Ula keera phi yoole mwaana akalipinteerule? Anumwaane keera aneehaniya Maria ni keera Tiyaku, Yusufu, Simau ni Yuda akhanle asihimaawe?
56 Ni keera asirokorawe otheene ari wamoca ni hiiva vaava? Vano, ucuwelacanwo ni ikurunnyo aaphwanya vayi?”
57 Vano, ayova yaahanca uhinkupali. Phimaana, Yesu aheera co: “Khaavo porofeeta nottitthimihiya ncokhwaawe ni hataa uwannyawe.”
58 Ni khaapankale miiriirya cinci ule ncokoole, nlattu woohaamini waya ayo atthwaayo.
Notas
^ Awula: “wahohutikiha.”
^ Nwehe Moolumo o Mbiibiliyani Ootaphuleliya.
^ Awula: “naahiya umwaamini Nluku.”
^ Awula: “cinaahutikiha.”
^ Itthaka ineehaniya mostarta. Iyo imphwanyannya u Isarayeli, nryaaya unaaphiya imeeturu 4 ni unaakhalana irittha.
^ Iseeya, waari mphimo waakela iliituru 7,33.
^ Awula: “yahorurummwa.”
^ Awula: “maluku ookhalana ifayita cinene.”
