Ihapari Comaana Cantikhiye ni Matewus 14:1-36
14 Ule ukatyuule nsatoro mmoca eehaniya Herooti, aheewa oolumiyaka Yesu
2 ni ahowiirela anantekwaawe co: “Uyo Joau Mpattisa. Howunwelelihiya, phimaana nopankaawe nnyo miiriirya cootikhinihannyo.”
3 Kontha Herooti, ahotoko uruma utthukeliya Joau nkhattya, nlattu wa Herotiya, amwaarawe Filipe, nyeenyaawe;
4 kontha Joau aahoomwiirela Herooti co: “Nyuuva khannotthuniheriya waathela ala athiyanaala.”
5 Masi, hataa ukhalaka wiira uyova ampheela umwiiva, khawaakhitirya, uyo aanaawoova atthu, kontha ayo yanwacera Joau khampa porofeeta.
6 Vano, nihuku nosukuhuulu noopiihera mwaakha Herooti, mwaana a Herotiya aheena uhoolo waatthu yaalattuliye ni Herooti wahoncivela cinene,
7 mpaka aholapha wiira anhala unvaha itthu-phi-itthu yaahalaawe uthanla.
8 Vano, nlattu wootheperiya naanumwaane, uyo aheera: “Nkivahe mpanteecani* muru wa Joau Mpattisa.”
9 Herooti waahookhalaru wiira ahoriipiya nrima, uyova ahoruma wiira avahiye muruuyo, ukhala wiira aholapha eewiyaka naatthu otheene yaalyanaawe.
10 Phimaana, ahoruma wiira ahitiye Joau nkhattya waaryaawe.
11 Wahoheliya murwaawooyo nthaaluni* ni ahovahiya mwaarusyuuyo ni uyova ahaarweehela anumwaane.
12 Uhitiya wawe, eetthucyaawe yahowa ucisa irutthwaawe ni yahorwaa usikha; vano yahokhuma ni yahorwaa unhimyeera Yesu itthu yeerannyeele.
13 Yesu wiiwa wawe iyo itthwiiyo, ahokela nkalawani ni ahorwaa nipuro nahaaviravira atthu, wiira akhale veekha. Masi atthwaayo ucuwela waya, yahontthara mweentto* yaviraka mmasittatti.
14 Ukhuruwa wawe nkalawani, ahowoona atthu enci; ahowoonela ikiriri ni ahaavoniha ale yaawerennya.
15 Masi wiila waya, eetthucyaawe yahorwaa mpaka nipuro naaryaawe, ni yahomwiirela co: “Nipuro niriihunna va khanviravira atthu ni uhiila. Mwaaleve atthwaayo wiira arwee mmaaliteeya wiira yathume iyoolya.”
16 Vano, Yesu ahowaakhula eeraka co: “Ayo khanlamuliya urwaa, nyuuva pooti waavaha itthu yoohala ulya.”
17 Vano eetthucyaayo yahaakhula yiiraka: “Khanirina itthu va, cihikhanle iphaawu thanu ni ihopa piili paasi.”
18 Uyo ahowiirela: “Nkawaanani.”
19 Yesu ahowiirela atthwaayo wiira yunkomace. Vano, ahocisa iphaawu thanunnyo ni ihopa piilinnyo, ahoweha wiirimu ni ahancera ulompa. Umyaanihaca wawe iphaawunnyo, ahaavaha eetthucyaawe ni eetthucyaawyaayo yahaavaha atthwaayo.
20 Vano, otheene yaaholya ni yahorupala; cahottotteliya iphaawu cahanle ni cahophiya itthuttu* 12.
21 Atthu yaakhunre yahophiya 5.000, woohiwaalikelela athiyana ni anamwaane.
22 Vano, woohipica Yesu ahowiirela eetthucyaawe akele nkalawani ni arwee mphantte nkhwaawe wopahari.
23 Waaleva wawe atthwaayo, uyova ahowela umwaakoni ni mpaka wahiila naryeene wonwo veekha.
24 Ikalawa yaaryaaya eetthucyaawyaayo, yaari uttayi ninseresere ipahari, ni ayo yaari mmasakhani nlattu womawimpi.
25 Masi, mapikoosa Yesu ahokhuma eettaka waculu maaci, arwaaka nipuro naaryaaya eetthucyaawe.
26 Eetthucyaawe yaamonnyaaya ntthu eettaka waculu maaci, yahotuthuwa ni yaheera: “Ala malavyaala!” Ni yahokhuwela nlattu wowoova.
27 Masi woohipica Yesu aheera: “Nlipe nrima! Nhoove thi miiva Yesu.”
28 Peturu aheera: “Wakhala wiira khweeliini phi nyuuva Pwiiya, kinawuulepelani ukilevela uwa nipuro niriinyu keettaka waculu maaci.”
29 Uyo ahomwiirela: “Uweeke!” Ni Peturu ahokhuma nkalawanimmo ni ahancera weetta waculu maaci arwaaka nipuro naaryaawe Yesu.
30 Masi, waawehilyaawe iphyo yuulupale yaavuka nne nipuronne, uyo ahoova. Wancenryaawe ucama, ahokhuwela eeraka: “Pwiiya, nkoopole!”
31 Yesu ahonvara moono ni ahomwiirela: “Nlopwana ookhalana waamini vakaani, nlattuni unaanyihaceraa?”
32 Ukela waya nkalawanimmo, iphyeeyo yahomaala.
33 Vano, eetthucyaawe yaari nkalawannyaayo, yahooromela vathi ni yahomwiirela: “Nyuuva khweeliini mwaana a Nluku.”
34 Vano yahophiya nseresere ipahari ni yahokhuruwa u Genesaree.
35 Alopwana o ule ncokoole uncuwelela waya wiira ari Yesu, yahoruma uhimeriya atthu otheene o ule ncokoole, ni uyo ahowaaneliya aretta otheene.
36 Ni yahonlepela ukwanya nnakhala miripwe conkuwoni wawe, ni otheene ale yaakwanyale yahovona.
