Ihapari Comaana Cantikhiye ni Matewus 15:1-39
15 Vano mafariseu ni anamantikha yaakhuma u Yerusalemu, yahowa mpaka nipuro naaryaawe Yesu, ni yahomwiirela:
2 “Kontha isiyani eetthucyeenyu ahineettelaaya ilema caatthu okhalayi? Wootakihera, ayo khannyawa yapheelaka ulya.”
3 Vano, Yesu ahaakhula eeraka: “Vano nyuuva nlattuni nhineeweleleenyu nlamulo na Nluku nlattu wo ilema cinyu?
4 Wootakihera, Nluku neera: ‘Waattitthimihe athumwana ni anumwana’ ni ‘Ule naaveeha athumwaane awula anumwaane, haana eeviyaka.’
5 Masi nyuuva nneera: ‘Ule nowiirela athumwaane ni anumwaane co: “Citthu cotheene cirinaaka caahaleenyu uphwanyera ifayita, cikhanle itthuvo ca Nluku.”
6 Uyo ntthuuyo pooti uhaattitthimiha athumwaane ni anumwaane.’ Ala manannaala, nyuuva khannovaha ifayita nuulumo na Nluku nlattu wo ilema cinyu.
7 Anawootha, porofeeta Isaiya, aawaacani nyuuva ukati wenryaawe co:
8 ‘Ala atthwaala ankittitthimiha wamalakuni paasi, masi wanrimani waya va, khankiwacera hataa vakaani.
9 Ayo atthwaayo ahinhiyerera ukiswalela mahala, kontha marumo aniitthucihaaya akhanle aapinaatamu.’”
10 Vano, ahaalepela atthwaayo ucusera nipuro naaryaawe ni ahowiirela: “Nviriyane ni mwiiweehe maanaaya isiyani:
11 Ile inkela wamalakuni wapinaatamu khinomphwanyiha matampi, masi ile inkhuma wamalakuni wawe phinomphwanyiha matampi.”
12 Vano, eetthucyaawe yahowa mpaka nipuro naaryaawe ni yahomwiirela: “Mwancuwela wiira moolumweenyo ahaatikhiniha cinene mafariseu?”
13 Uyo ahowaakhula eeraka: “Khula mwiri uhinaalaaya Apaapaaka o wiirimu, unaahala upheliya.
14 Nhikhale niiwasiwaasi nlattu wo ayo atthwaayo, ayo anaahoolela atthu oohoona ni ayo akhanle atthu oohoona. Ni ntthu oohoona anhoolelaka oohoona nkhunanawe, ooyeeli anaamorela munlikittini.”
15 Peturu ahaakhula eeraka: “Nnitaphulele nno nlattaniheronno.”
16 Vano Yesu aheera: “Ni nyuuva ciicammo khannaaya wiiweeha?
17 Nyuuva khannocuwela wiira citthu cinkela mmirimani cinaavira nnapwiipwini ni wiitthunwaciya?
18 Masi citthu cotheene cinkhumela wamalakuni cinkhuma wanrimani, ni nnyo citthunyo phimmwiiriha ntthu wooniya ni Nluku ukhala oohiirya.
19 Wootakihera, wanrimani phinkhuma moopuwelelo oohinamaana, toko: wiiva, weetta uluva, urupihana woohiloka, winnya, wootha ni uveeha.
20 Nnya phi citthu cimmwiiriha ntthu wooniya ni Nluku ukhala oohiirya, masi ulya woohinyawa, khummwiiriha ntthu wooniya ukhala oohiirya.”
21 Yesu ukhuma wawe nne nipuronne ahorwaa ncoko wo Tiro ni wo Sitoni.
22 Ni athiyana amoca o Fenisiya yaakhala ule ncokoole, yahaattamela nipuro naaryaawe Yesu ni yahokhuwela yiiraka: “Pwiiya, nkoonele uthunku, mwaana a Davidi. Mwanaka honkela maciini ni uyo nanhuviha cinene.”
23 Masi uyo khaawaakhunle itthu. Phimaana, eetthucyaawe yahowa ni unlepela co: “Nwoomole ayo athiyanaayo, kontha khanhiyerera uninyakula uttulinwo.”
24 Uyo ahaakhula eeraka: “Nluku kiveleelihile wiira kaakavihere asarayeli paasi, ankhala khampa ikhontwaa coorimela.”
25 Masi athiyanaayo yahowa ni yahokhoroma uhoolo wawe, nuumwiirela: “Pwiiya, nkikavihere!”
26 Yesu ahowaakhula eeraka: “Khunreera uwaakha iyoolya asaana, nuwaavaha asaana aasilapwa.”
27 Ayo athiyanaayo yaheera: “Phiyeeyo pwiiya, masi asaana aasilapwa anaalyaaka iyoolya immoramora wameecani waasipwiiyaaya.”
28 Yesu ahowaakhula eeraka: “Waamini urineenyu nyuuva wuulupale, yiirannye ile impheeleenyu.” Ni mwaanooyo ahovona ikhumelo yoole ukatyuule.
29 Vano, Yesu ahokhuma ni ahorwaa nipuro nowaattamela ipahari yo Kalileya. Nuuwakatyaaya, ahowela wamwaakoni nuwonkoma wonwo.
30 Vano, atthu enci yahowa mpaka nipuro naaryaawe Yesu, yanwaanelaka atthu oottumpela, oorakala, oohoona, oohiiwa ni aretta akhwaawe, uyo aawaaneliya ayo atthwaayo mpaka nipuro naaryaawe ni aanaavoniha.
31 Nlattu wo iyo itthwiiyo, atthwaayo yaahotikhinihiya nlattu woowoona atthu yahoorya wuulumaca yuulumacaka, yaarakanle yavonaka, yahoorya weetta yeettaka ni yahoona yoonaka; phimaana ayo atthwaayo yahonttitthimiha Nluku o Isarayeeli.
32 Vano Yesu ahowiihana eetthucyaawe ni ahowiirela: “Kinaawoonela uthunku atthwaala vaa, kontha ahovira mahuku mararu anari ni miiva ni kharina iyoolya. Ni mi akimpheela waaleva anari niitala, kontha anaavya ukhwa niiphiro.”
33 Phimaana, eetthucyaawe yahonkoha co: “Nna nipuro noohiviraviriyanna, ninhala uphwanya vayi iphaawu coohala waatosera atthu otheennyaala va?”
34 Yesu aheera: “Mwaatthuva nrina iphaawu kavi?” Ni ayo yaahaakhula yeeraka: “Nirina iphaawu 7 niihopa vakaani.”
35 Vano, waalepela wawe atthwaayo wookomaca,
36 ahocisa iphaawu 7 niihopannyo, aholompa ni umaliha wawe ulompa, ahaakawela eetthucyaawe ni eetthucyaawe yahanca waakawela atthwaayo.
37 Ni atthu otheene yaaholya ni yahorupala, ipetaasu caahanlennyo cahocara itthuttu 7.
38 Atthu yaalilye yahophiya 4.000, woohiwaalikelela athiyana ni anamwane.
39 Vano, waaleva wawe atthwaayo, uyo ahokela nkalawani ni ahokhuruwa ncoko wo Makata.