Ihapari Comaana Cantikhiye ni Matewus 16:1-28
16 Mafariseu ni masatuseu yahowa mpaka nipuro naaryaawe Yesu, vano wiira anttehattehe, yahonlepela wiira apanke miiriirya akaviheriyaka ni Nluku.
2 Yesu ahowaakhula eeraka co: “Wapheelaka wiila nyuuva nneera co, ‘unaahala ukhala ukati wo maana, kontha wiirimu unooseerya,’
3 ni wakhalaka uwicisu nneera: ‘Ilelo unaahala uririya ni inaahala urupa ipula, kontha irimwiiyo ihooseerya cinene ni ihooripelihana.’ Nyuuva nnaakhitiri utaphulela makhalelo owiirimu, masi khannokhitiri utaphulela mathoonyero ookati.
4 Nyuuva atthu ootakhala nrima ni oohikhuluvelya, khannohiyerera waavya woona miiriirya cipankilyaaka mwancina na Nluku, masi khannohala woona hataa mwiiriirya mmoca, uhikhanle wa Jonas.” Vano, Yesu umaliha wawe wuulumaca, ahokhuma nne nipuronne.
5 Vano, eetthucyaawe yahorwaa mphantte nkhwaawe wopahari, masi yaholiyala ucisa iphaawu.
6 Yesu ahowiirela co: “Nhiitthaale, ratta niifermentu yo mafariseu ni masatuseu.”
7 Vano, atthari a Yesu yahanca wuulumaca ayaayoru, yiiraka: “Khaniwaananne iphaawunnyo.”
8 Yesu ucuwela wawe iyo, aheera co: “Alopwana ookhalana waamini vakaani, kontha isiyani nnoopeleenyu mwaha nlattu woohikhalana iphaawu?
9 Khanneweeha sana-saana nanlelo, khannoopuwela iphaawu thanu waakhitirelyaaya ukhuura alopwana oopwahaka 5.000, ni itthuttu* cophaawu caahanle?
10 Awula khannoopuwela iphaawu 7, waakhitirelyaaya ukhuura alopwana 4.000, ni itthuttu cuulupale caahanle?
11 Vano nhineeweeha cani wiira miiva akinaacaka itthu iphaawu? Mi kinwiirelani ratta niifermentu yo mafariseu ni masatuseu.”
12 Vano ayo yahiiweeha wiira Yesu aawiirela ratta, kahi niifermentu yophaawu, masi nimeetthucihero o mafariseu ni masatuseu.
13 Yesu ni eetthucyaawe yaaphilyaaya ncoko wo Sesareeya-Oofilipe, uyo ahaakoha co: “Toko cinwiiwakeenyu atthwaayo, Mwaana a Pinaatamu tipani?”
14 Ayo yahaakhula yeeraka co: “Ahaavo aneera Joau Mpattisa, akinaayo aneera Eliyasi, akhwaawyaayo aneera Jeremiya ni akinakwaayo aneera porofeeta mmoca-mmoca okhalayi.”
15 Uyo ahaakoha co: “Vano nyuuva, nneera miiva tipani?”
16 Simau Peturu ahaakhula eeraka: “Phi nyuuva Kristu, mwaana a Nluku eekhweeli.”
17 Yesu ahomwiirela co: “Ootteeliya phi weeva Simau, mwaana a Jonas, kontha khuhimeriye iyo itthwiiyo naapinaatamu, masi uhimeriye Naapaapaaka ari wiirimu.
18 Ni ciicammo kinwiirela co: Weeva u Peturu, ni waculu waya nna nlukunna kinaahala uteka nlokonaka, ni mikhora commahiye khacinhala wiiriha itthu.
19 Kinaahala wuuvaha isaavi co Umwene wa Nluku, citthu cotheene cinhalaa utthuka watuninyani, ciicammo wiirimu cinaahala utthukiya, ni citthu cotheene cinhalaa utthukula watuninyani, ciicammo wiirimu cinaahala utthukuliya.”
20 Vano, uyo ahowiirela eetthucyaawe woohaakhuwakhuwa, wiira ahihimyace wiira uyo phaari Kristu.
21 Ukhuma nne nihukunne, Yesu ahancera waahimyera eetthucyaawe wiira aanhala urwaa u Yerusalemu ni nwo aanhala uhuvihaciya ni mahumu, ahooleli aanankuttho ni anamantikha, ni ciicammo aanhala wiiviya. Masi nihuku naahalaawe upiihera mahuku mararu nakhwileene, anhala wunwelelihiya.
22 Peturu ahoncisa mphantte nkiina ni ahanca unvaanyiha amwiirelaka: “Mwiicooneleke ikiriri Pwiiya, iyo itthwiiyo khinhala uwiirannyeelani hataa vakaani.”
23 Vano, Yesu ahonrerya ittuli Peturu ni ahomwiirela: “Ukhume vaa Sotwani, weeva ukhanle nluku ninkikakathula, kontha khurina moopuwelelo a Nluku, masi aapinaatamu.”
24 Vano, Yesu aahowiirela eetthucyaawe co: “Ntthu mpheela ukhala nttharyaaka haana eekhottaka, uteesa nipotto nawe noohuviheriya* ni ukitthara mpaka.
25 Kontha ule nohala umananiha woopola ukumyaawe, naahala uhaleela, masi ule nohala uhaleela ukumyaawe nlattu wawaka, naahala uphwanya.
26 Khweeliini, pinaatamu nohala uphurani aakhelaka ituninya yotheene, masi ahalaka uhaleela ukumyaawe? Awula, pinaatamu nohala uvahani wiira oopole ukumyaawe?
27 Kontha Mwaana a Pinaatamu, nohala uwa muuttitthimani mwaathumwaane, nimalayikhaawe, ni naahala unhukhumu khula ntthu, aweheraka citthu caapankaawe.
28 Kinoohimeeryani ikhweeli wiira: Ahaavo vaa ahinhala ukhwa woohimoona Mwaana a Pinaatamu awaaka Muumweneni wawe.”