Ihapari Comaana Cantikhiye ni Matewus 17:1-27
17 Uvira waya mahuku 6, Yesu ahomwiihana Peturu wamoca naasihimaawe, Tiyaku ni Joau, ni ahaarwaanana wamwaakoni woorekama.
2 Uphiya waya nwo, Yesu ahotathuwaca; uwiitho wawe wahoonnyeela khampa ncuwa ni ikuwo cawennyo cahopharela* khampa iluusu.
3 Vano, nipuro naaryaaya ahokhumelela Moceesi ni Eliyasi ni yahopacera umoopana mwaha Yesu.
4 Peturu ahomwiirela Yesu co: “Pwiiya, uhoreera ukhala wihu va. Mwapheelaka vale, pooti wanaatthenkacaaka aheema araru vaava: Heema mmoca awinyu, nkhwaawooyo a Moceesi ni nkinakuuyo a Eliyasi.”
5 Oolumacakoono, mahutte owoonnyeela yahaakhuneela, ni woohipica, yahiiwa ncu niiraka: “Ula mwanaka kinonfentaaka ni nokitteeliha nrima venci. Mmwiiwelele.”
6 Ayo wiiwa waya nno nlovenno, yahokhoroma, yahooromela vathi ni yahoova venci.
7 Vano Yesu ahowaattamela ni ahowiirela: “Munweke, nhoove.”
8 Wunwa waya ni utthukula waya miitho, khayaamoonale-tho ntthu, hikhanle Yesu paasi.
9 Yakhuruwakoono wamwaakoni va, Yesu ahowiirela co: “Nhinhimerye hataa ntthu ila iwooniila, mpaka Mwaana a Pinaatamu nohalaawe wunwelelihiya.”
10 Vano, attharyaawe yahonkoha co: “Kontha isiyani anamantikha aneeraaya wiira Eliyasi phinhala upacera uwa?”
11 Woowaakhula, uyo aheera co: “Khweeliini, Eliyasi naahala uwa ni naahala ulokiherera citthu cotheene.
12 Mi kinoohimeeryani ikhweeli wiira Eliyasi howa ni ayo khancuwelenle, masi yahompanka citthu caacivenle. Nimananna mamocaaru, ayo anaahala unhuviha Mwaana a Pinaatamu.”
13 Vano, atthari yahocuwelela wiira aamwaaca Joau Mpattisa.
14 Uphiya waya nipuro naaryaaya atthu enci, nlopwana mmoca ahokhoroma uhoolo wa Yesu ni ahomwiirela:
15 “Pwiiya, mmoonele uthunku mwanaka, kontha uyo haana icili ni ciicammo naawerennya. Ikwaha cinci naamorelaka wamooroni ni ciicammo mmaacini.
16 Kahaawaanela atthariinyu, masi ayo khaakhitinri unvoniha.”
17 Yesu ahowaakhula, eeraka: “Atthu oohaamini ni ootakhala nrima, kinhala wuukhalanani mpaka yaakhani? Ni kinhala wuuvilelani mpaka yaakhani? Munwaane va.”
18 Yesu ahopwapwela nno nciininno ni nno naahonkhuma uyo mmirawooyo; ukhuma ule ukatyuule, uyo aahovona.
19 Woohipica, atthari anari nkhayi ni Yesu, yahonkoha: “Kontha isiyani hiiva nihikhitinriihu woomola nciininno?”
20 Uyo aahowaakhula: “Nlattu wookhalana waamini vakaani. Phimaana, kinoohimeryani ikhweeli wiira: Mwakhalanaka waamini woolikana niitthaka* yankaani cinene, nnaahala wiirela ula mwaakoola: ‘Uthame va, urwee nwe,’ ni uyo unaahala uthama, ni khiivo itthu inhaleenyu wooceela.”
21 ——
22 Anathukumanne u Kalileya, Yesu ahuulumaca, eeraka: “Mwaana a Pinaatamu naahala uvariya ni naahala uvahereriya mmatatani waatthu.
23 Ni ayo atthwaayo anaahala umwiiva, masi nihuku ninhalaawe upiihera mahuku mararu nakhwileene, naahala wunwelelihiya.” Vano, ayo atthwaayo yahoriipiya nrima cinene.
24 Uphiya waya u Kafarnau, alopwana yaaliviha nsokho wontempuluni yahomwaattamela Peturu, ni yahonkoha: “Mwiitthucihiinyu khanliva nsokho wontempuluni?”*
25 Peturu ahaakhula co: “Naaliva.” Masi ukela waya inupa imoca, Peturu hinaaya wuulumaca, Yesu phaapacenre wuulumaca, eeraka: “Unoonela cani, Simau? Mamwene o watuninyani vaava, phaapani anaalivihaaya nsokho? Asaanaaya awula atthu ahinaacuwelaaya?”
26 Waakhunlyaawe eeraka: “Atthu ahinaacuwelaaya,” Yesu aheera: “Khweeli, ayo khaanaaliviha nsokho asaanaaya.
27 Masi wiira hikhumelele nanrokottole, urwee upahari, ni wavonyere mpaharimmo nimenco. Ihopa yoopacera inhalaa ukumiha, watthukulaka malakwaayaayo, unaahala uphwanya nsurukhu woparaatha.* Vano, ucise yooyo nsurukhuuyo ni walive nsokhwaa ni wakilivele miiva.”
Notas
^ Awula: “cahotteela.”
^ Va inaaciya itthaka yo mwiiri uneehaniya mostarta. Uyo umphwanyannya u Isarayeli ni nryaaya unaaphiya meeturu 4.
^ Awula: “idraakima piili.” Nsurukhu waakhelaawe ntthu avaraka nteko mahuku meeli. Nwehe Moolumo o Mbiibiliyani Ootaphuleliya.
^ Niikereku: “estaater.” Estaater waakhala nsurukhu waavaleri idraakima 4. Uyo waari nsurukhu waaliviyaawe ntthu avaraka nteko mahuku macese.
