Ihapari Comaana Cantikhiye ni Matewus 18:1-35
18 Yooyo ukatyuuyo, yahomwaattamela eetthucyaawe ni yahonkoha: “Tipani khanle muulupale Muumweneni wo wiirimu?”
2 Vano, Yesu ahomwiihana mwanhima mmoca, ahomweesa iriyaryaaya,
3 ni ahowiirela: “Kinoohimeeryani ikhweeli wiira: Mwaahirukunuseke makhalelweenyu, mwakhalaka khampa mwaana mwankaani, khannohala ukela Muumweneni wo wiirimu hataa vakaani.
4 Phimaana, ule neeyeviha khampa ula mwaanoola, yooyo phiri muulupale Muumweneni wo wiirimu;
5 ule nomwaakhelela mwaana mwancina naka, ciicammo naakaakhelela miiva.
6 Masi ule nohala waakakathula* ala ooyevaca ankaaminnyaala, phataari uyova utthukeleliya nsikoni nluku nuulupale,* ninrukureerihaawe puuru ni uvonyeriya mpahari nipuro nowiisa.
7 “Ahotakhaliya atthu ontuninyani anaakakathula akhunanaya!* Khweeliini, unaarika uhikhala atthu anaakakathula akhunanaya, masi hotakhaliya ule naakakathula akhunanawe!
8 Vano, wakhala wiira moono awula mwettweenyu unaawiirihani uttheka, nthikile ni nvonyere uttayi. Kontha phataari mphwanye ukumi nnarakanle awula nttumpelaka, uhiya uvonyeriya mmooroni woohittiphya,* nnarina myoono ni metto coomiili.
9 Ciicammo, wakhala wiira niitho ninyu nimoca ninawuutthekihani, nkumihe ni nvonyere uttayi. Kontha phataari uhaleela mphantte mmoca worutthwiinyu, uhiya uvonyeriya irutthwiiyo yotheene Ncehena.
10 Ratta, nhinthanye nanka mmoca ala mayowaamini ooyevacaala. Kinohimyeeryani ikhweeli wiira, malayikha owiirimu anaawoona ukati wotheene Apaapa owiirimu.
11 ——
12 “Nnoonela cani? Nlopwana mmoca akhalanaka ikhontwaa 100, vano irimelaka imoca, niireke uyo khanhala uhiya ikhontwaa 99 mmamyaakoni ni upacera waavya imoca irimenleeyo?
13 Ni aphwanyaka vale iyo imoceeyo, kinawuuhimyerani wiira nohala ukhala ootteeliya uvikana ukati waarinaawe 99 cahaarimenlennyo.
14 Inanna imocaaru, Apaapa ari wiirimu, khampheela unhaleela hataa mmoca ala ooyevacaala.
15 “Uhiya commo, munneenyu avaraka matampi, nrwee mwanthoonyere itthu itthekilyaawe, nnari ooyeeli cinyu paasi. Awiiwelelakani, nhonkhitiri munneenyu.
16 Masi akhottaka uwiiwelelani, nrwee mwamuulumane nnari nintthu mmoca-tho awula naatthu-tho eeli, wiira nimoolumo omasaahiti eeli awula araru, mwaha wotheene umalihiye.
17 Vano, akhottaka wuuviriyanani, nrwee mwahimyace wanlokoni. Akhottaka ciicammo uviriyana nloko, munwehere khampa mmalaponi ni khampa namaliviha nsokho.
18 “Kinoohimeeryani ikhweeli wiira citthu cotheene cinhaleenyu utthuka va watuninyani va, wiirimu ciicammo cinhala ukhala cootthukiyeene, ni citthu cotheene cinhaleenyu utthukula va watuninyani va, wiirimu ciicammo cinhala ukhala cootthukuliyeene.
19 Kinoohimeeryani ikhweeli wiira: Wakhala wiira atthu eeli iriyariinyu anaakupali waalepela Apaapaaka owiirimu itthu yofayita, ayova anaahala waavaha.
20 Nipuro nithukumanne atthu eeli awula araru mwancina naka, ni miiva kiri vaava.”
21 Vano, Peturu ahomwaattamela Yesu ni ahonkoha co: “Pwiiya, munnaaka akitthekelaka, kinleveleleke mpaka ikwaha kavi? Mpaka ikwaha 7?”
22 Yesu ahomwaakhula co: “Mi akinwiirela ikwaha 7, masi mpaka ikwaha 77.
23 “Phimaana, Umwene wo wiirimu pooti ulikanihiya ni mwene aapheela waaliviha anantekwaawe yankophenle.
24 Ukati wancenryaawe waalepela wiira anlive, ahowaaniya nanteko mmoca ankophenle italentu 10.000.
25 Masi ukhala wiira uyo khaarina mananna ooliva, uyo mwennyooyo ahoruma wiira atumihiye nantekooyo, amwaarawe, asaanaawe ni citthu cotheene caarinaawe, wiira anlive mwennyooyo.
26 Vano, nantekooyo ahokhoroma uhoolo wa mwene ni aheera: ‘Nkiweherere, kinaahala wuulivani nsurukhu wotheene unkilokiheenyu.’
27 Nlattu woomoonela uthunku, mwene ahonhiya urwaa ni ahonlevelela nsurukhu wotheene wanlokihaawe.
28 Masi uyo nantekooyo ahorwaa ni ahomphwanya nkhunanawe anlokihaawe itenaariyu 100. Vano, ahonsokota nsikoni, amwiirelaka: ‘Ukilive nsurukhu unoolokihaaka.’
29 Nanteko nkinooyo ahokhoroma ni ahonlepela: ‘Sontte, ukiweherere. Mi kinaahala wuuliva.’
30 Masi uyo nantekooyo, khaatthunile unlevelela. Ni ahontthukiiha nkhattya, mpaka waahalaawe uliva nsurukhu wotheene wanlokihaawe.
31 Ukati ananteko akiinaayo wonnyaaya itthu yaakhumelenle, yahoriipiya nrima cinene ni yahorwaa unttonkela mwene itthu yeerannyeele.
32 Vano, mwene ahomwiihana ule nantekoole ni ahomwiirela: ‘Nanteko ootakhala nrima, ukati ukilepenlyaa wiira kuweherere mi kihoolevela nsurukhu wotheene waakikophenlyaa.
33 Khawaalamuliya weeva ciicammo umoonela uthunku nkhunanaa, toko miiva kiwoonenlyaaka uthunku?’
34 Nlattu wo iyo itthwiiyo, uyo mwennyooyo ahoviruwa venci ni ahaaruma makwaarta ookhatteya wiira ancise ni yantthukele, mpaka waahalaawe uliva nsurukhu wotheene waalokihiyaawe.
35 Apaapa owiirimu, anaahala wuutafitini inanna imocaaru, mwaahinleveleleke munneenyu ninrimeenyu wotheene.”
Notas
^ Awula: “uwiiriha uhiya waamini.”
^ Nno nlukunno naavareliya nteko wiira isiliye itiriku.
^ Awula: “anwiiriha akhunanaya uhiya waamini.”
^ Awula: “uhiya utankanyiya.”
