Ihapari Comaana Cantikhiye ni Matewus 19:1-30
19 Yesu umaliha wawe wuulumaca nnya citthunnya, ahokhuma u Kalileya ni ahorwaa u Yuteya mphantte nkhwaawe wo mooloko Jordau.
2 Ciicammo, atthu enci yaanontthara, ni ahaavoniha nne nipuronne.
3 Mafariseu akiina yahorwaa mpaka nipuro naaryaawe, yapheelaka unttehatteha, ni yahomwiirela: “Unaatthunihiya nlopwana waahiya amwaarawe nlattu wo khula itthu?”
4 Yesu ahaakhula: “Khansomile wiira ule wumpile wuupaceroni mpankile nlopwana ni nthiyana?
5 Ni aheera-tho: ‘Phimaana, nlopwana naahala waahiya athumwaane ni anumwaane, urwaa waavaresesa amwaarawe ni ayoca anhala ukhala irutthu imoca’?
6 Phimaana, khaanakhala-tho atthu eeli, masi akhanle irutthu imoca. Vano, itthu ikumaanihilyaawe Nluku, pinaatamu khanlamuliya waawanyaniha.”
7 Ayo yahonkoha co: “Vano kontha isiyani Moceesi enryaawe wiira nlopwana pooti waavaha amwaarawe itukumentu yoohimya wiira haamwalanana ni uwoomola?”
8 Uyo ahowaakhula eeraka: “Nlattu woohitthuna winyu uhimeriya, phimaana Moceesi aawiirenlyaaweni wiira pooti waamwalanana amwaarinyu, masi wiipaceroni khawaari ciicammo.
9 Miiva kinoohimeeryani wiira, ule nohala waamwalanana amwaarawe, uhikhanle nlattu ayova wooraruwa ni unthela nthiyana nkiina, naweetta uluva.”
10 Vano attharyaawe yaheera: “Wakhala wiira commo phinlamuliyaaya wiirannya, paasi phataari uhithela.”
11 Uyo ahowiirela: “Kahi wiira atthu otheene anaakhitiri upanka ila itthu ihimilyaakeela, masi paahi ale ankhitirihiya ni Nluku.
12 Ahaavo ahinthela nlattu wooyariya ciicammo, ni ahaavo ahinthela nlattu woopankaciya naapinaatamu, ciicammo ahaavo ahinthela nlattu wo Umwene wowiirimu. Ule nokhitiri ukhala ciicammo pooti ukhala.”
13 Vano, uyo aahowaaneliya asaana wiira aacaalihe* ni aalompele, masi attharyaawe yanwaateeliha atthwaayo.
14 Masi Yesu ahowiirela co: “Mwaahiye asinamwannyaayo, nhiwaateelihe uwa mpaka nipuro kiryaaka, kontha Umwene wo wiirimu, ukhanle waatthu anlikana naayova.”
15 Uyo ahaacaaliha ni ahokhuma nne nipuronne.
16 Vano, mmirawo mmoca ahorwaa mpaka nipuro naaryaawe Yesu, ni ahonkoha: “Mwiitthucihi, itthuni yomaana inlamuliyaaka upanka wiira kiphwanye ukumi woohimala?”
17 Uyo ahomwaakhula eeraka: “Unkikoherani itthuni iri yomaana? Nluku paasi phiri omaana. Phimaana, wapheela uphwanya ukumi woohimala, wiiwelele malamulwaawe.”
18 Uyo ahonkoha co: “Malamuloni?” Yesu ahomwaakhula: “Uhiive, uheette uluva, uhinnye, uhoothe;
19 waattitthimihe athumwana ni anumwana, ni unfente nkhunanaa khampa cineefentaa.”
20 Uyo mmirawooyo aheera: “Kinawiiwelelaka ayo malamulwaayo otheene. Vano inkihaleela isiyani?”
21 Vano Yesu aahomwiirela co: “Wapheela umalihera citthu cotheene, urwee watumihe maalyaa ni nsurukhuuyo waavahe amasikhini, wapanka commo, unaahala ukhalana mihakhu wiirimu ni uwe wookhale nttharyaaka.”
22 Uyo mmirawooyo wiiwa wawe iyo itthwiiyo, ahokhuma nne nipuronne nariipiyeene nrima, kontha ahaana mihakhu cinci.
23 Vano, Yesu aahowiirela attharyaawe co: “Kinoohimeeryani ikhweeli wiira: Unaahala urika cinene thaciri ukela Muumweneni wo wiirimu.
24 Kinawuuhimeeryani-tho wiira: Khunhala urika ikamelu uvira wamwiitheni* wosinkano, uvirikana thaciri nohala upheela ukela Muumweneni wa Nluku.”
25 Attharyaawe wiiwa waya iyo, yahokhala ootikhinihiya cinene, ni yaheera: “Tipani khweeliini nohala ukhitiri ukela Muumweneni wa Nluku?”
26 Yesu ahaaweheeha ni ahowiirela: “Apinaatamu pooti wuupuwela wiira iyo itthwiiyo khinhala wiirannya, masi Nluku kahi phinoopuwelaawe commo, kontha Nluku khiivo itthu inooceelaawe.”
27 Peturu ahaakhula eeraka: “Masi Pwiiya, hi nihohiya citthu cotheene wiira nuutthareni. Vano ninhala uphwanyani?”
28 Yesu ahowiirela co: “Kinawuukhuvelihani wiira: Ukati unhalaaya upankiya citthu cotheene conaanaano, Mwaana a Pinaatamu ookomaka wakhaterani wawe yoomwene yowaarya, nyuuva nnokitthara va, nnaahala wonkoma wahiceni 12 ni nnaahala ulamulela maloko 12 o Isarayeeli.
29 Khaavo nohala uhiya inupaawe, asunnawe, asirokorawe, athumwaane, anumwaane, asaanaawe awula imattaawe nlattu woncina naka, hinhala waakhela imaara 100 citthu cihiyalyaawe, ni uhoolo uphwanya ukumi woohimala.
30 “Masi enci ari oopacera anhala ukhala oomalela, ni ari oomalela phinhala ukhala oopacera.
