Ihapari Comaana Cantikhiye ni Matewus 2:1-23
2 Uyariya wawe Yesu u Pelee, ncoko wo Yuteya, ukati waalamulelaaya amwene Herooti, anamasomasoma itthonttwa* yaaweela mphantte unkhuma ncuwa, yahowa u Yerusalemu,
2 ni ayo yaheera: “Ri vayini mwaana yariyooyo wiira akhale mwene aayuuta? Kontha nihowoona itthonttwaawe ninari mphantte unkhumaaya ncuwa, ni naawile unttitthimiha.”
3 Amwene Herooti wiiwa waya iyo itthwiiyo, yahosanka cinene, ni ciicammo atthu otheene yaakhala isittatti yo Yerusalemu.
4 Ayo yahaalattula ahooleli aanankuttho ni anamantikha otheene, ni yaahaakoha nipuroni naahalaawe uyariya Kristu.
5 Vano, ayo yahowaakhula co: “U Pelee, ncoko wo Yuteya, kontha maporofeeta hantikhilyaaya yeeraka co:
6 ‘Ni weeva, Pelee ilapo yo Yutaa, uhiicoone uhikhalana ifayita uhoolo wo mamwene o Yutaa, kontha iriyaryaa, phinhalaawe ukhumelela mwene nohala waahoolela apoovwaaka asarayeli.’”
7 Vano, Herooti ahowiihana mmwiitihoni anamasomasoma itthonttwa ni ahaakohakoha apheelaka ucuwela ukatini waakhumelenlyaaya itthonttwa.
8 Ahaaruma urwaa u Pelee ni ahowiirela: “Nrwee ni mwamwaavye mwaanooyo sana-saana, mwamphwanya vale, nkihimeerye, wiira ni miiva ciicammo kirwee kanttitthimihe.”
9 Umaliha waya waaviriyana amwene, yahorwaaca. Yeettakoono ninttala, yahoona wiira itthonttwa yoonilyaaya unkhuma ncuwa, yaaneetta uhoolo waya, mpaka weemenlyaaya nipuro naaryaawe mwaana.
10 Uwakati woonalyaaya itthonttwa, yahotteeliya nrima cinene.
11 Uphiya waya wapuwani vaa, yahomoona mwaanooyo nkhayi ni Maria, anumwaane, yaahokhoromaca ni yahonttitthimiha mwaanooyo. Vano, yahokumiha mihakhu caya ni yaahontthuva: iwooru, lumpani ni makhura o mwiri uneehaniya miira.
12 Vano, ukhala wiira yaaholohihiya ni Nluku wiira ahituruwele wa mweene Herooti, yahoturuwela uwaani yaviraka nttala nkhwaawe.
13 Urwaa waya ayo alopwanaayo, nlayikha na Yehova nahowa umuulumana Yusufu arupaka, nno nenre co: “Wunwe, uncise mwaanooyo ni amwaaraayo, utthawele ilapo yo Wiciipitu ni uhaakuve uturuwa, mpaka kinhalaaka wuuhimeerya, kontha Herooti nopheela umwaavya mwaanooyo wiira amwiive.”
14 Vano, yoole uhiyuule Yusufu ahonwa, ahoncisa mwaanooyo naanumwannyaayo ni ahorwaa Wiciipitu.
15 Uyo ahokhala wonwo, mpaka ukati waakhwilyaaya amwene Herooti. Ni ala manannaala, yaheerannya itthu Yehova yanrumilyaawe porofeetaawe uhimyaca: “Kinaahala umwiihana mwanaka ilapo yo Wiciipitu.”
16 Woona waya wiira yaahothepiya naanamasomasoma itthonttwa, amwene Herooti yahoviruwa ni yaahoruma wiiviya asaana asilopwana otheene yaari ahinapiihera myaakha miraru, yaaphwanyannya u Pelee ni micoko caattamenle u Pelee. Yoolumacile iyo itthwiiyo, yattharihaka nihuku naahimeriyaaya naanamasoma itthonttwaale wiira phaayariyaawe Yesu.
17 Ni iyo inanneeyo, yaheerannya moolumo a porofeeta Jeremiya, uyo enre:
18 “U Ramaa aheewiya ntthu onlaka ni akhuwelaka cinene, nno naari ncu na Rakeli, aawunlela asaanaawe, ni uyo khaapheela umaalihiya, ukhala wiira ahokhwaaca.”
19 Ukhwa wawe Herooti, nlayikha na Yehova nahowa umuulumana Yusufu arupaka,
20 ni nno nahomwiirela co: “Wunwe, uncise mwaanooyo naamwaaraayo ni uturuwele ilapo yo Isarayeli, kontha atthu yaamananiha umwiiva mwaanooyo ahokhwa.”
21 Vano uyo ahonwa, ahoncisa mwaanooyo wamoca naanumwannyaayo ni yahohokoleela Usarayeli.
22 Masi, Yusufu weewalyaawe wiira mwaana a Herooti eehaniya Arikilau, vano phaalamulela u Yuteya, uyo ahoova urwaa u Yuteeyaanwo, uhiya commo, ulohihiya wawe ni Nluku iyo itthwiiyo, uyo ahorwaa u Kalileya.
23 Uyo ahorwaa ukhala isittatti yo Nasaree, wiira yiirannye moolumo o maporofeeta, yenre: “Uyo naahala wiihaniya Nnasareenu.”
