Ihapari Comaana Cantikhiye ni Matewus 21:1-46
-
Yesu naakela nsittatti yo Yerusalemu attitthimihiyaka (1-11)
-
Yesu naareeriha itempulu (12-17)
-
Yesu naalaphakaca mwiri wo ifiiku (18-22)
-
Atthu anaatikhinaca ukhulupale urinaawe Yesu (23-27)
-
Nlattanihero naasaana eeli (28-32)
-
Nlattanihero naanamalima ootakhala nrima (33-46)
-
Nluku nootepa ukhalana ifayita cinene ninaakhottiya (42)
-
21 Waattamela waya u Yerusalemu, yaheemela u Petifase, umwaakoni wo Oliveera, vano Yesu ahaaruma attharyaawe eeli,
2 awiirelaka: “Nrwee aliteeya ari uhoolo winyu ni mwaphiyaka vale, nnaahala umphwanya puuru onthiyana natthukeleliye wamoca nimwanawe, vano mwaatthukule ni nkiwaanele.
3 Wakhala wiira nnaahala ukohiya itthu, mwaakhule co: ‘Apwiiya anawaapheela.’ Vano, nnaahala uhinnya wiira nkiwaanele wowaakuvya.”
4 Yaakhumelenle iyo itthwiiyo commo, wiira yiirannye moolumo a porofeeta enre:
5 “Uviriyane mwaana mwanthiyana o Siyau: ‘Mwennyaa neera awaaka mpaka nipuro niryaa, uyo khanle owiiyeviha ni nowaa nanwenle mwannama neehaniya puuru, iyeeni, mwaana omwannama noteesa mirintti.’”
6 Vano, attharyaawe yahorwaa ni yahopanka citthu cotheene caarumalyaawe.
7 Ahowaaniya puuru ni mwanaawyooyo, cahaatalaciya ikuwo coovate waculu apuurwaayo, ni uyo ahonwela puuru mwankaannyuuyo.
8 Atthu enci yaanawaatala mparapaarani ikuwo caya coovate ni akinaayo yaathikila miritta co mwiri, nuumwarusela mparapaaranimmo.
9 Uhiya commo, atthu enci yaari uhoolo wawe ni uttuli wawe, yaanaakhuwela yeeraka: “Sontte, Pwiiya Nluku, mmoopole mwana a Davidi!* Ooreeriya phuule nowa mwancina na Yehova! Sontte, Pwiiya Nluku, mmoopole, nyuuva nnokhala wiirimu vaa!”
10 Waaphiilyaawe u Yerusalemu, atthu otheene nsittattimmo yaahosanka ni yahancera ukohana: “Tipani ula?”
11 Atthwaayo yaakhula yeeraka co: “Porofeeta Yesu ula, o Nasare-Ookalileeya!”
12 Yesu ahokela ntempulu ni ahowoomola atthu otheene yaatumihaca ni yaathuma-thuma ntempulu, ni ahopinttulaca meeca aatthu yaakakhaniha nsurukhu, ni ikhatera caatthu yaatumiha ikhuntta.
13 Ni uyo aheera: “Uhantikhiya: ‘Inupaaka inhala wiihaniya inupa yo mavekelo,’ masi nyuuva, mpankale nikhuku no malatarawu.”
14 Ciicammo, atthu oohoona ni oottumpela, yahorwaa mpaka nipuro naaryaawe ni uyo ahaavoniha.
15 Vano, ahooleli aanankuttho ni anamantikha wona waya citthu cootikhiniha caapankaawe, ni anamwane yaakhuwela anari ntempuluni yiiraka, “Sontte, Pwiiya Nluku, mmoopole mwaana a Davidi!”, yaahokasiriya cinene.
16 Vano, ahokohiya co: Nnaawiiwaka anamwannyaayo itthu inhimyaayeeyo?” Yesu ahaakhula eeraka: “Iyeeni. Nyuuva khannatoko usoma moolumo aneera: ‘Wamalakuni waasaana ankaani ni asinamwane ommatatani nheeriha ukhuma moolumo oottottopela’?”
17 Waahiya wawe atthwaayo, ahorwaa isittatti yo Petaaniya ni ahorupa wonwo.
18 Uwicisu ukati waaturuwelaawe usittattinwo, yahonvola itala.
19 Vano, uyo ahoona mwiri wo ifiiku nseresere iparapaara ni ahorwaa mpaka nipuro naaryaaya, masi khaaphwanyile mihokorokho, masi mataakhuru paasi, ni uyo ahiirela: “Uhiime-tho mihokorokho.” Vano, uyo mwiryuuyo wahooma yooyo ukatyuuyo.
20 Attharyaawe woona waya iyo itthwiiyo, yahosanka ni yahiira: “Unwa cani ula mwiri wofiikuula wuumaka woohipica?”
21 Yesu ahowaakhula eeraka: “Kinoohimeeryani ikhweeli wiira, mwakhalanaka waamini ni woohaanyihacera hataa vakaani, nnaahala ukhitiri upanka kahi paasi itthu kipankilyaaka ula mwiri wofiikuula, masi ciicammo hataa mwiirelaka ula mwakoola: ‘Wiiphele vaa ni wiivonyere mpahari’, iyo itthwiiyo inaahala wiirannya.
22 Cotheene nnohaleenyu ulepela nlompaka, mwaakhalanaka waamini, nnaahala uphwanya.”
23 Ukela wawe ntempulu, ahooleli aanankuttho ni mahumu aapoovu, yahomwaattamela ukati weetthucihaawe, ni yahonkoha co: “Tipani oovahale ikuru yoopanka nnya citthunnya? Mena tipani oorumale wiira upanke nnya citthunnya?”
24 Yesu ahaakhula awiirelaka co: “Miiva ciicammo kimpheela wuukohani itthu imoca, mwakaakhulaka vale, ni miiva kinaahala wuucipwani tipani kivahale ikuru yoopanka nnya citthunnya:
25 Mpattiso wa Joau, unkhuma vayi? Wiirimu awula waari waatthu?” Vano ayova yaahancera woopela mwaha iyo itthwiiyo yiirelanaka: “Neeraka vale: ‘Wiirimu,’ uyo naahala unikoha co: ‘Vano kontha isiyani khamwaamwaminni?’
26 Masi niiraka vale waari waatthu, ratta naatthu otheene anniiwaala va, kontha ayo anaamini wiira Joau, ari porofeeta.”
27 Vano, ayo yahomwaakhula Yesu yeeraka: “Khanincuwela.” Ni uyova ahowiirela co: “Ni miiva ciicammo, akinoohimeeryani tipani kivahale ukhulupale woopanka nnya citthunnya.
28 “Nnoonela cani? Nlopwana mmoca ahaana asaana eeli. Vano nihuku nimoca, ahorwaa umwiirela mmocooyo co: ‘Mwanaka, urwee wavare nteko mmattani waka yo uuva.’
29 Vano, uyo ahaakhula eeraka: Akintthuna, masi ahoopuwelaca saana ni ahorwaa.
30 Vano, uyo ahorwaa mpaka nipuro waaryaawe mwanawe onayeelyuuyo, ni ahonlepela itthu imocaaru. Ni uyo ahomwaakhula eeraka: ‘Iyeeni Paapa, kinaahala urwaa,’ masi khaarweele.
31 Vano ahaakoha eeraka: “Ala asaana eelyaala, phuuvi wiiwelenle athumwaane?” Ayo yahomwaakhula: “Oopacerooyo.” Yesu ahowiirela co: “Kinawuukhuluvelihani wiira, anamaliviha nsokho ni anamararuwa, phinhala upacera ukela Muumweneni wa Nluku, nyuuva nhinaaya.
32 Kontha Joau ahowa uwiitthucihani nyuuva nttala wosariya, masi nyuuva khamwankupanli. Vano, anamaliviha nsokho ni anamararuwa, ahonkupali, ni hataa ukhalaka wiira mwahoona iyo itthwiiyo, khanttharuwale ni khamunkupanli.
33 “Nviriyane nlattanihero nikhwaawe: Ahaavo nlopwana mmoca aarina imattaawe yo uuva, uyo ahotekelela iluwani iyo imatteeyo, ahothipa nluwanimmo nlikitti naapankeliya iviinyu yo uuva ni ahoteka inupa ya kwaarta; vano, imaatteeyo ahowaacimiha anamalima ni ahorwaa ilapo ikhwaawe.
34 Waaphiyalyaaya ukati woohephiya mihokorokho co uuvannyo, mwaneene imattoole, ahaaruma anantekwaawe urwaa uwoonanana anamalima aawaacimihilyaawe imattaawe, wiira yaakhele mihokorokho cawe.
35 Vano, ale alopwana yaacimiye imattaale, yahaavara anantekwaayo, mmocooyo yahomwaattakaca, nkinakuuyo yahomwiiva ni nkhwaawyooyo yahompwesakaca ni maluku.
36 Ahaaruma-tho ananteko akhwaawe, enci waapwaha ale yaapacenryaawe waaruma, masi ayo yahaapanka citthu cimocaaru.
37 Vano, ahonruma mwanawe eeraka: ‘Ukhala wiira mwanaka, anaahala unhisimu.’
38 Umoona waya mwanawyooyo, ayo yahanca uleehana yeeraka: ‘Ula phinhala uhalana imatteeyo. Phimaana, nttwee nimwiive nihalane citthu cotheene!’
39 Vano, yahonvara ni yahonvonyera vate waya imatteeyo ni yahomwiivela wonwo.
40 Vano woonela winyu, mwaneene imaatteeyo aturuwaka, isiyani inhalaawe waapanka ale alopwana yaacimale imattaale?”
41 Ayova yahaakhula yeeraka: “Nlattu wootakhala waya nrima ayo atthwaayo, uyu naahala waamalamaliha ni naahala uwaacimiha atthu akhwaawe imatteeyo, anhala unvaha mihokorokho waphiyaka ukatyaaya.”
42 Yesu ahowiirela co: “Nyuuva khannapaca usoma nhina Cowantikhiya Cowaarya moolumo aneera wiira ‘nluku anamateka yaakhottilyaaya, nenno nihokhala nluku nootepa ukhalana ifayita. Nno ninkhuma wa Yehova, khannoona wiira iyo ihotepa ukhala itthu yoonitikhiniha cinene?’
43 Phimaana, kinoohimeeryani wiira: Umweene wa Nluku nnaahala waakhiya ni ninhala uvahiya nloko nikhwaawe nimpanka citthu cinoncivela.
44 Ntthu nohala umorela waculu waya nno nlukunno, irutthwaawe inaahala ukawannyaaca. Ni ule ninhala ummorela nno nlukunno, naahala unyakatyaaca.”
45 Vano, ahooleli aanankuttho ni maafarisewu wiiwa waya ayo malattaniherwaayo, yahocuwelela wiira ayova phaaciya.
46 Hataa ukhalaka wiira yaanaapheela untthuka, yanwoova atthwaayo, kontha ayo yaamoona Yesu ukhala porofeeta.
Notas
^ Nwehe Moolumo o Mbiibiliyani Ootaphuleliya.
