Ihapari Comaana Cantikhiye ni Matewus 23:1-39
23 Vano, Yesu ahowiirela atthwaayo ni attharyaawe co:
2 “Anamantikha ni mafariseu yonkomile nipuro na Moceesi.
3 Phimaana, mpanke ni mweettele citthu cotheene anoohimeeryaayani, masi nhaatakihe ayo atthwaayo, kontha ayo anawuuluma paahi, masi khaaneettela itthu inhimyaaya.
4 Ayo anaatthukaca mirintti ni anawaarya atthu mmakhatani waya, masi ayo khantthuna ucusiya hataa vakaani ninikokho.
5 Citthu cotheene ampankaaya, ampanka wiira yooniye naatthu, toko uwara ihirisi cuulupale wiira akhikicere irutthwaaya ni uhela miripwe coorekamaca mmakuwoni waya.
6 Yarwaaka mmasukuhuuluni, waacivela wonkoma mapuro owoonannya ni mmasinakooka, wacivela wunkoma ikhatera coohoolo,
7 ciicammo waacivela usalamihiya mapuro ari atthu enci ni waacivela wiihaniya ‘Rapi.’
8 Masi nyuuva nhiihaniye ‘Rapi,’ ukhala wiira nrina mwiitthucihi mmoca ni otheene cinyu nkhale ntthu ni mwaamunnawe.
9 Uhiya commo, hikhale ntthu watuninyani vaava nnomwiihaneenyu Paapa, kontha Apaapeenyu ari amoca paahi, ale ankhala wiirimu.
10 Nhiihaniye mahooleli, kontha nrina nhooleli mmoca paahi, Kristu.
11 Masi, ule nopheela ukhala muulupale iriyariinyu, haana akupaliki ukhala ipottheenyu.
12 Ntthu neettitthimiha naahala wuulihaciya muru, ni ntthu neeyeviha naahala uttitthimihiya.
13 “Nhotakhaliya nyuuva anamantikha ni mafariseu, anamootha! Kontha nnawaatthukela atthu Umwene wa Nluku; nyuuva mwaaneneenyu khannokela ni khannaahiya ukela ale ampheela ukela.
14 ——
15 “Nhotakhaliya nyuuva anamantikha ni mafariseu, kontha nnaweetta mpahari motheene ni ntuninyani motheene mmwaavyaavyaka ntthu onkeliha ittiiniinyu, ni mwamphwanyaka uyo ntthuuyo, nnaamwiiriha umphwanela uvonyeriya Ncehena ikwaha piili, wuuphwahani nyuuva.
16 “Nhotakhaliya nyuuva ahooleli ohoona, nneera: ‘Ntthu alaphaka aromolaka itempulu, khinakhala itthu; masi ule nolapha aromolaka iwooru yontempulu, haana eerannyeehaka ile ilaphilyaawe.’
17 Alolo ni atthu oohoona! Khweeli-khweeliini, vaavaa phiiyi ikhanle itthu yofayita: iwooru awula itempulu inkhaliha yowaarya iwooru?
18 Uhiya commo, nyuuva nneera, ‘ntthu alaphaka aromolaka ikhilompe, iyo khinakhala itthu, masi ntthu alaphaka aromolaka itthuvo iri wakhilompeni, uyo haana eerannyeehaka iyo itthu ilaphilyaaweeyo.’
19 Atthu ohoona! Khweeli-khweeliini vaavaa phiiyi ikhanle itthu yofayita: itthuvweeyo awula ikhilompe ineeriha waakheleliya itthuvweeyo?
20 Nhiithepye, khula ntthu nolapha aromolaka ikhilompi, naaca ikhilompiiyo ni citthu cotheene ceesiye wakhilompini;
21 ni ule nolapha aromolaka itempulu, naaca itempulwiiyo ni Mwaneene itempulu;
22 ni ule nolapha aromolaka irimu, naaca ihice ya Nluku ni Ule onkomile wahiceni vaa.
23 “Nhotakhaliya nyuuva anamantikha ni mafariseu, anamootha! Kontha nnaavaha micanko* co ile ineehaniya ortela, entro ni ikomiinyu, masi khannovaha ifayita citthu cofayita cinhimyaaya malamulo, toko weettela isariya, uthoonyera uthunku ni ukhala ntthu ookhuluvelya. Nnya phi citthu caalamuliya upankiya, masi woohihinnya uttuli citthu cikhwaawennyo.
24 Ahooleli oohoona, nnaakikittha isencema, masi nnaamirya ikamelu!
25 “Nhothakhaliya nyuuva anamantikha ni mafariseu, anamootha! Kontha nnorapiha ikoopu ni iparatho vate waya paasi, masi nhinawayammo nnohiya cinacanre wiipheelela citthu ni uhitosyaa.
26 Nfariseu oohoona, upacere toko urapiha ikoopu ni iparatho nhinawayammo, wapanka commo, vate wayava ciicammo inaahala ureera.
27 “Nhotakhaliya nyuuva anamantikha ni mafariseu, anamootha! Kontha nnokhala khampa mahiye ootteelihiya, vate waya ankhala khampa ooreera, masi nhinawayammo anacanre makhuva aatthu ookhwa ni citthu coohiryaca.
28 Inanna imocaaru, nyuuva nnokhala khampa alopwana aneettela isariya, masi nhina winyu nkhanle anamootha ni atthu oovirikaniha malamulo.
29 “Nhotakhaliya nyuuva anamantikha ni mafariseu, anamootha! Kontha nnaatekelela mahiye omaporofeeta ni nnaareerihaca mahiye aatthu yeettela isariya,
30 ni mwiiraka: ‘Hiiva ninakhanle ukati waatthu okhalayi, khanaahala wiitakaneeliha naatthu yaawiiva maporofeeta.’
31 Masi nyuuva nnawoonihera wiira nkhanle asaana aatthu yaawiiva maporofeeta.
32 Vano, mmalihe miteko cipacenryaaya amuciinyu okhalayi.
33 “Inwaa, ucuulu wo inwaa coohapala, munhala ukhitiri cani utthawa ihukhumu yoovonyeriya Ncehena?
34 Nlattu wo iyo itthwiiyo, kinawuuveleeliherani maporofeeta, acuwelaci ni eetthucihi. Akhwaawyaayo nnaahala uwiiva, akiinaayo waakhomela mmapottoni ni akinakwaayo nnaahala uwuufyulaca mmasinakooka wiyu ni waalupatta mmasittatti,
35 wiira yuumoreleni iphome yaatthu otheene yiiviye ntuninyani yeettela isariya, ukhuma iphome ya nasariya Apeli mpaka iphome ya Zakariya, mwaana a Parakiya, ule aamwiivileenyu iriyari yo inupa ya Nluku ni ikhilompe.
36 Kinoohimyeerani ikhweeli: Nnya citthu cotheene nnya, cinhala uwiirannyeela atthu omahukwaala.
37 “Yerusalemu, Yerusalemu, nowiivakaca maporofeeta ni naapwesakaca nimaluku ale anveleeliheriyaawe . . . Koomananiha ikwaha cinci waathukumaniha asaanaa, khampa mwalakhu cinaathukumanihaawe asaanaawe mmapuphani wawe! Masi nyuuvano khantthunile.
38 Vano, inupeenyu inaahala uthamiya.
39 Kinoohimeeryani ikhweeli wiira: Ukhuma nenna co, khannohala ukoona-tho, mpaka wanhaleenyu wiira: ‘Ooreeriya phi ule nowa mwancina na Yehova!’”
Notas
^ Nlamulo naahimya wiira, ntthu ahephaka icoolya cawe ciphiyaka itthuttu 10, itthuttu imoceeyo aalamuliya unvaha Nluku.