Ihapari Comaana Cantikhiye ni Matewus 24:1-51
-
CITTHU CAAHALA UTHOONYERA WIIRA KRISTU HOWA (1-51)
24 Ukati Yesu waakhumaawe ntempulu, attharyaawe yahowa mpaka nipuro naarwaawe wiira anthoonyere inupa co watempulunni.
2 Nlattu wo iyo itthwiiyo, uyo ahowiirela: “Keera nnawoona nnya citthunnya vaa? Kinoohimyeerani ikhweeli wiira, khanivo nluku hataa nimoca ninhala uhala vaa woohimalamalihiya.”
3 Nonkomileene wa mwaakoni wo Oliveera, yahomwaattamela attharyaawe ni yaheera: “Nnihimyacere: Cinhala wiirannya yaakhani nnyo citthunnyo ni isiyani inhala uthoonyera wiira nyuuva nhoturuwa* ni wiira uhaattamela ukati unhalaaya umalamalihiya ulumwenku wo citthu coohinamaana?”*
4 Yesu ahaacipwa eeraka co: “Ratta, wiira hikhale nohala wuuthepyani,
5 Kontha enci anaahala usipa ncina naka, yeeraka: ‘Phi miiva Kristu,’ ni anaahala waathepya atthu enci.
6 Nyuuva nnaahala wiiwa cuulumiyaka ikhotto ni nnaahala wiiwa ihapari cokhotto. Ratta, wiira nhihale woova, kontha nnyo citthunnyo cihaana cikhumelelaka, masi khunakhala ukati unhalaaya umalamalihiya ulumwenku.
7 “Kontha ilapo inaahala waanihana niilapo ikhwaaya ni umwene unaahala waanihana nuumwene nkhwaaya. Inaahala uthwaa iyoolya ni unaahala ukhala uttettemelaca wo itthaya mapuro menci.
8 Citthu cotheene nnya cinhala uthoonyera wancera wo masankiho.
9 “Ni atthu anaahala wuuhuvihani ni uwiivani, ni nnaahala urusa nlaponi motheene, nlattu wo ncina naka.
10 Ni enci anaahala uhiya weettela moolumo a Nluku, anaahala waarukunuwela akhwaaya ni anaahala uthanyana.
11 Anaahala wiikhumeleliha maporofeeta enci owootha, anhala waathepya atthu enci.
12 Nlattu wowinciva citthu cinci cinvirikaniha malamulo, nifento naatthu enci ninaahala uvukuwa.
13 Masi ule nohala uvilela mpaka wuumaleloni, phinhala woopwa.
14 Ni nnya ihapari comaana co muumweneninnya cinaahala ulalyeennya ntuninyani motheene unkhaliya, yahimeeriyaka atthu o khula ilapo. Vano phinhalaaya umalamalihiya ulumwenku.
15 “Phimaana, moonaka itthu yoohiirya inwaana ihasara, yuulumilyaawe porofeeta Daniele, inari nipuro nowaarya (ntthu nosoma akhalane ankhili wiira eeweehe ila itthwiila),
16 uyo ukatyuuyo, ule nohala uphwanyannya u Yuteya, atthawele mmyaakoni.
17 Nlopwana nohala uphwanyannya waculu inupa, hikhuruwe wiira acise mpaani wawe mihakhu cawe,
18 ni nlopwana nohala uphwanyannya uyo ukatyuuyo umattani, hituruwe wiira acise ikuwaawe yoovate.
19 Ahotakhaliya athiyana eerukulu ni athiyana anhala ukhalana mwaana hinahiya waamwa uyo ukatyuuyo!
20 Nhihiyerere ulompa, wiira ukati unhaleenyu utthawa, uhikhale ukati wooririya* ni hataa nihikhale nihuku nosaapatu;
21 kontha, anaahala uwa masakha moolupale, ahinapaca wiirannya ukhuma ukati wumpiyaaya ituninya mpanka nna, ni yawaaka, khanhala waakulela-tho uwa.
22 Khweeliini, unari wiira ayo mahukwaayo khanhala uvukuliya, khaavo aahala woopwa. Masi nlattu wo ale athanliye, ayo mahukwaayo anaahala uvukuliya.
23 “Vano, ntthu awiirelakani co: ‘Mmooneke! Kristu ula va!’awula: ‘Ule vale!’, nhinkupali uyo ntthuuyo.
24 Kontha anaahala wiikhumeleliha akristu enci owootha ni maporofeeta owootha, ni ayo anaahala upanka mathoonyero ni hataa ciicammo miiriirya wiira yaathepye atthu, ni atthunaka anaahala ukhitiri waathepya ale athanliye.
25 Nkiviriyane saana! Kinoohimeeryani nnya citthunya cihinancera wiirannya.
26 Phimaana, mweereliyaka co: ‘Mmooneke, ri muuthakoni!’, nhirwee; awula: ‘Mmooneke, ri mpaani!’, nhikupali.
27 Kontha, toko vaavale uverunya umpaceraaya mphantte unkhuma ncuwa ni unrwaaya umalamalela mphantte unkela ncuwa, ciicammo phinhalaaya ukhala uturuwa wa Mwaana a Pinaatamu.
28 Nipuro ninhalaaya upwanyannya atthu ookhwa, nno nipuronno anaahala uthukumana asaanuni aneehaniya saaka.
29 “Yamalaka masakha moolupale anhala uwa ayo mahukwaayo, mweeri ni ncuwa khacinhala upharela, itthonttwa cinaahala umorakaca wiirimu ni ikuru cowiirimu cinaahala uttikhinyiya.*
30 Vano, ninaahala woonnya wiirimu nthoonyero na Mwaana a Pinaatamu, ni atthu omaloko otheene anaahala wiicunlela, ni anaahala umoona Mwaana a Pinaatamu awaaka mmahutteni, niikuru ni nuuttitthima wawe venci.
31 Ni uyo, naahala uruma malayikhaawe, yoopaka cinene mapalapatta, ni ayo anaahala waathukumaniha atthu yaathanlilyaawe, ankhumelela miphantte cooceese cotuninya,* ukhuma umpaceraaya irimu mpaka immalelaaya.
32 “Mwiitthucere nna nlattanihero no mwiri wofiikunna: irittha conaanaano canceraka uphuwa ni mataakhurwaaya yanceraka woonnya, nyuuva nnaacuwelela wiira ilimwe ihaattamela.
33 Inanna imocaaru, moonaka citthu cotheene nnya ciirannyaaka, ncuwele wiira Mwaana a Pinaatamu ri wakhiviru, wankhorani.
34 Kinawuukhuluvelihani wiira, atthu omahukwaala, khanhala umalamala nnya citthunnya cihiirannyeele cotheene.
35 Irimu ni ituninya, cinaahala uvira, masi moolumwaaka kanhala uvira hataa vakaani.
36 “Nno nihukunno ni iyo iwooreeyo, khaavo nocuwela, hataa malayikha o wiirumu, ni mwaana a Nluku khancuwela, masi Apaapa paasi phincuwela.
37 Kontha, toko caaryaaya mahuku a Nowee, ciicammo phinhalaaya ukhala uturuwa wa Mwaana a Pinaatamu.
38 Kontha uhinaaya uwa ucara wo maaci, atthu yaanaalya, uwurya, alopwana yaanaathela ni athiyana yaanaatheliya, mpaka nihuku Nowee naakenlyaawe nkalawani,
39 ayo khayaawacenre ile yaahimeriyaaya, mpanka nihuku naawilyaaya ucara womaaci ni yahokhupiya otheene caya; commo phinhalaaya ukhala awaaka Mwaana a Pinaatamu.
40 Alopwana eeli anhala uphwanyiya mmattani; mmoca naahala ucisiya ni nkinakuuyo naahala uhiiya.
41 Athiyana eeli anhala upwanyiya yasilaka; nthiyana mmocooyo naahala ucisiya ni nkinakuuyo naahala uhiiya.
42 Phimaana, nhiitthaale, kontha khannocuwela nihuku ninhalaaya uwa Apwiiyeenyu.
43 “Masi mwiiweehe ila itthwiila: unari wiira mwaneene inupa aanaacuwela iwoorani yaahalaawe uwa latarawu uhiyu, khweeliini uyo khaahala urupa, ni khaahala uhiya inupaawe ikeliyaka nilatarawu.
44 Inanna imocaaru, nyuuva ciicammo nkhale owiitthenkaceene, kontha Mwaana a Pinaatamu nohala uwa iwoora nyuuva yahaweherereenyu.
45 “Tipani khanle khweeliini ipottha yookhuluvelya ni yaankhili, ivahaceriye naapwiiyaaya waawacera atthu owapuwani waya ni wiira yaavahe iyoolya ukati umpheelaaya?
46 Ikhale yootteeliya iyo ipottheeyo, wakhalaka wiira ukati unhalaaya uwa Apwiiyaaya, inaahala uphwanyiya yapankaka nnyo citthunnyo!
47 Kinoohimeeryani ikhweeli: Ayo anaahala uvahacera iyo ipottheeyo mihakhu caya cotheene.
48 “Masi, ipottha yoohinamaaneeyo yoopuwelaka co: ‘Apwiiyaaka anaapica uwa’,
49 ni wancera waattakaca ipottha cikhunanayannyo, ulya ni uwurya naananhapaliya,
50 apwiiyaaya iyo ipottheeyo anhala uwa nihuku nahaawehereraaya ni ukati uhincuwelaaya.
51 Iyo inaahala uhuvihiya venci cinene ni inaahala urwaaniya nipuro naanamootha. Vano nwo phinhalaaya wunla ni ukhuura meenwaaya.
Notas
^ Awula: “uhikhale iyiita.”
^ Awula: “upukunyiya.”
^ “Miphantte coocese cotuninya” unaaciya mphantte unkela ncuwa, unkhuma ncuwa, uculu ni uhitto ilapo.
