Ihapari Comaana Cantikhiye ni Matewus 25:1-46
25 “Umwene wa Nluku pooti ulattanihiya naasithiyana 10, yaakhumile niisaminiiya caya wiira yamoonanane ntheli.
2 Asithiyana athanwaayo yaari alolo, masi asithiyana athanu akiinaayo yaari oocuwelaca.
3 Asithiyana alolwaayo yaacisile isaminiiya paasi, woohicisa makhura makhwaawe,
4 vano asithiyana oocuwelacaayo, kahi paasi yaacisile isaminiiya cayannyo, masi ciicammo yahocisa makhura mmitiitani.
5 Ukhala wiira nthelyuuyo aanaapicapica, otheene caya cahaavola ikhove ni yahorupa.
6 Uphiya waya uhiyu iriyari, ayo yahiiwa ukhuweliyaka wiiriyaka co: ‘Nthelyuuyo howa! Mummwe nrwee mwamoonanane.’
7 Vano, asithiyana otheene yahommwa ni yahotthenkaca isaminiiya caya.
8 Asithiyana alolwaale, yohowiirelaca asithiyana oocuwelacaayo co: ‘Ninawuulepelani unimeela makhuraayo, kontha isaminiiya cihu cihanle vakaani uttiphyaaca.’
9 Asithiyana oocuwelacaale yahaakhula yeeraka: ‘Unawiira khaavo makhura oonitosera otheene cihu va. Phimaana, nrwee mwawoonanane ale antumiha ni mwaathumanane vakaani.’
10 Ukati waarwaalyaaya uthuma makhuraayo, ahowa nthelyuuyo. Asithiyana yeetthenkacilyaayo, yahokela nsukuhuuluni yokacamentu, wamoca ninthelyuuyo ni nkhorooyo wahotthukiya.
11 Nuuwakatyaaya, yahowa asithiyana akinakwaale, ni ayo yaheera: ‘Pwiiya, pwiiya, ninawuulepelani unitthukulela nkhorooyo!’
12 Uyo ahowaakhula eeraka: ‘Kinoohimeeryani ikhweeli wiira: Akinoocuwelani.’
13 “Phimaana, nhiitthaale, kontha nyuuva khannocuwela nihuku ni hataa ukati.
14 “Itthu imocaaru yaahomwiirannyeela nlopwana mmoca, aawiihanne anantekwaawe, nuwaahiyera mihakhu cawe, hinaaya urwaa ilapo ikhwaawe.
15 Mmocooyo anvahile italentu thanu, nkinakuuyo italentu piili ni nkhwaawooyo italentu imoca, khula ntthu anvahile waahalaawe ukhitiri uwacera, upanka wawe iyo, vano uyo ahorwaa ilapo ikhwaawe.
16 Ule aakhenle italentu thanu, ahorwaa umweetta nakoso nuuyo nsurukhuuyo, ni ahophwanya-tho italentu thanu.
17 Inanna imocaaru, ule aakhenle italentu piili, umweetta wawe nakoso, ahophwanya italentu piili.
18 Masi, nanteko aakhenle italentu imocoole, aahowaaca ucisa nsurukhuuyo nuurwaa uthipela.
19 “Unavinreene ukati mwinci, pwiiyaaya ale anantekwaale ahowa ni ahanca waapankana ikontha.
20 Vano, ule aahiyeriye italentu thanu, ahorwaa uwoonanana apwiiyaawyaayo ni ahowaana-tho italentu thanu, ni uyo aahowiirela: ‘Pwiiya mwaakihiyenre italentu thanu. Vano mooneke, kihophwanya-tho italentu thanu!’
21 Apwiiyaawe yahomwiirela: ‘Uhopanka saana! Nanteko omaana ni ookhuluvelya. Uhothoonyera ukhuluvelya ukati waawaceraa citthu vakaani. Phimaana, kinaahala wuuvahacera uwacera citthu cinci, utteeliye nrima wamoca naapwiiyaa.’
22 Vano, ule aakhenle italentu piili, ahowa ni aheera co: ‘Pwiiya, mwaakihiyenre italentu piili; masi mooneke, kihokhitiri-tho uphwanya italentu piili!’
23 Apwiiyaawe yahomwiirela: ‘Uhopanka saana, nanteko omaana ni ookhuluvelyaa! Uhothonyera ookhuluvelyaa ukati waawaceraa citthu vakaani. Phimaana, kinaahala wuuvahacera uwacera citthu cinci, utteeliye nrima wamoca naapwiiyaa.’
24 “Wuumaleloni, ahowa nanteko aakhenle italentu imocoole ni ahowiirela apwiiyaawyaayo co: ‘Pwiiya miiva kinaacuwela wiira nyuuvano uviheriya, nyuuva nnaahepha nipuro nhaalileenyu ni nnaathukumaniha nipuro nhimwarusenleenyu itthu.
25 Nlattu wo iyo itthwiiyo, kaanaawoovani, phimaana kaahoothipela nsurukhuuyo. Ni nsurukhwiinyuuyo phuuloola.’
26 Apwiiyaawyaayo yahomwaakhula yeeraka co: ‘Ipottha yoohinamaana ni yowoolwaa, iyo maanaaya wiira weeva unaacuwela wiira mi kinaahepha nipuro kihaalalyaaka ni kinaathukumaniha nipuro nihimwarusenlyaaka itthu?
27 Paasi, waalamuliya urwaana nsurukhuuyo upanku, wiira kawaaka vale kiphwanye ununcereryaleene.
28 “‘Vano apwiiyaawyaayo yahiira, aakhiye italentu imoca irinaaweeyo ni avahiye ule rina italentu 10.
29 Kontha ule rina, naahala wuncereriya ni naahala ukhalana cinci. Masi, ule hirina, naahala waakhiya hataa itthu vakaani irinaawe.
30 Ni iyo ipottha yoohinamaaneeyo, nvonyere vate vaava wapiphini. Ni nwo phinhalaaya wunla ni ukhuura meenwaaya.’
31 “Ukati Mwaana a Pinaatamu nohalaawe uwa nuuttitthima wawe, ni nimalayikhaawe otheene, uyo naahala wonkoma wakhaterani wawe yeemwene yoottitthima.
32 Vano atthu olapo cotheene anaahala uthukumana uhoolo wawe. Uyo naahala waakawaniha, khampa makampuci cinkawanihaawe ikhontwaa ni ipuri.
33 Ni naahala weesa ikhontwannyo moono nlopwana masi ipurinnyo nohala weesa moono nthiyana.
34 “Vano mwennyooyo, naahala uwiirela ale nhala ukhala moono nlopwana: ‘Nwaace, nyuuva ncaalihiye Naapaapa ni mwaakhele Umwene utthenkaceriyeenyu yumpiyeru ituninya.
35 Kontha yahokivola itala ni nyuuva mwahokivaha itthu yoolya, nahokivola ntthona ni nyuuva mwahokivaha maaci wiira kiwurye; mi kaari mmalaponi, masi nyuuva mwahokaakhela saana.
36 Kahothaaleliya, masi nyuuva mwahokivaha itthu yoowara. Kahowerennya, masi nyuuva mwahokiwacera saana. Mi kaari nkhattya, masi nyuuva mwanwaaka ukootola.’
37 Vano ale aneettela isariaya, anaahala waakhula yeeraka: ‘Masi Pwiiya, mahuku makavi niwoonileehuni nnari niitala ni hiiva nuuvahakani iyoolya, awula mahuku makavi niwoonileehuni nnari nintthona ni hiiva nuuvahakani itthu yoowurya?
38 Ni mahuku makavi niwoonileehuni nnari mmalaponi ni hiivano niwaakhelakani, ni ciicammo mahuku makavi niwoonileehuni nnathaaleliye ni hiiva nuuvahakani yoowara?
39 Ni mahuku makavi niwoonileehuni nwerennyaka awula nnatthukeliye nkhattya ni hiiva niwaaka wuuthotolani?’
40 Mwennyooyo naahala waakhula co: ‘Kinoohimeeryani ikhweeli wiira: Itthu mumpankenleenyu khula munnaka mwaankani va, ni miiva ciicammo nhokipankela iyo itthwiiyo.’
41 “Vano, naahala uwiirela ale anhala ukhala moonwaawe wonthiyana: ‘Nkhume va waryaaka va, atthu oolaphakaciya; nrwee wamooroni uhinhala uttiphya, utthenkaceriyaawe Sotwani ni malayikhaawe.
42 Kontha yahokivola itala, masi nyuuva khamwaakivahile itthu wiira kilye; ni nahokivola ntthona, masi nyuuva khamwaakivahale itthu wiira kiwurye.
43 Mi kaari mmalaponi, masi nyuuva khamwaakiwacenre saana; mi kaahothaaleliya masi nyuuva khamwaakivahile ikuwo; mi kaahowerennya ni kaahotthukeliya nkhattya, masi nyuuva khamwaakitafitile.’
44 Uyo ukatyuuyo ayo ciicammo anaahala waakhula yeeraka: ‘Pwiiya, nawoonneni vayini inoovonleni itala, nnari nintthona, nnari mmalaponi, nnathaaleliye, nwerennyaka awula nnari nkhattya hi woohuuwacerani?’
45 Uyo naahala waakhula eeraka: ‘kinoohimeeryani ikhweeli wiira: Itthu ihaapankenleenyu ala asunnaka ooyevacaala, ni miiva ciicammo khankipankenle.’
46 Ayo atthwaayo anhala umalela wuutankanyiyani; masi ale aneettela isariya, anaahala waakhela ukumi woohimala.”
