Ihapari Comaana Cantikhiye ni Matewus 26:1-75
-
Anankuttho anaaleehana umwiiva Yesu (1-5)
-
Makhura oonukhela cinene nawoottihiya Yesu (6-13)
-
Paasikuwa oomalela ni uvariihiya (14-25)
-
Upacerihiya uliya Iyoolya Yoohiyu Yaapwiiya (26-30)
-
Yesu naahimyaca wiira Peturu anhala unkhotta (31-35)
-
Yesu naalompa u Getseemani (36-46)
-
Yesu naatthukiya (47-56)
-
Uhukhumwiya uhoolo waatthu ootiripunaali (57-68)
-
Peturu nankhotta Yesu (69-75)
26 Vano, Yesu umaliha wawe wuulumaca nnya citthunnya, ahowiirela attharyaawyaayo co:
2 “Nyuuva nnaacuwela wiira nrotto ninhala ukhala nihuku Nopasikuwa, ni Mwaana a Pinaatamu, naahala uleviya wiira eeviye.”
3 Uyo ukatyuuyo, ahooleli aanankuttho ni mahumu aapoovu, yahothukumana wapuwani* wawe nankuttho mmoca muulupale eehaniya Kayifasi,
4 ni yaaholeehana untthuka ni umwiiva Yesu.
5 Ni ayo yaaneerelana co: “Uhikhaleke ukati wopaasikuwa, kontha atthwaayo anaahala unyakulaca.”
6 Yesu naryeene u Petaaniya, uwanuwawe Simau, namakuttula,
7 athiyana amoca yahorwaa mpaka nipuro naaryaawe Yesu, anacisile ikaraafa yankaani yomakhura oonukhela ni oorika cinene, ni ayo yahancera umoottiha mmuru wawemmo, uyova alyaaka.
8 Attharyaawe woona waya iyo itthwiiyo, yahokasiriya cinene, ni yaheera: “Nnorihakacelani makhuraayo?
9 Kontha ayo pooti waatumihiyaaya nsurukhu mwinci, ni nsurukhuuyo uvahiya atthu oohuva.”
10 Yesu uwiiwa wawe attharyaawe, uyo ahowiirela co: “Nnoolumacerani commo? Ala athiyanaala ahokipanka itthu yomaana cinene.
11 Kontha nyuuva nnawaakhalana amasikhini nenne-nenne, masi miiva, khannohala ukikhalana mahuku otheene.
12 Ala athiyanaala akoottihile makhuraayo mwiirutthuni waka, wiira irutthwaaka ikhale yootthenkaciyeene wiira ivithiye mmahiye.
13 Kinoohimyeerani ikhweeli wiira: Khula nipuru unhaalaaya ulalya ihapari comaana ntuninyani motheene, itthu ipankilyaaya va ala athiyanaala, ciicammo inaahala wuulumiya, wiira yuupuweleliye.”
14 Vano, ntthari mmoca eehani Yuda Iskariyote, ahokhuma ni ahorwa uwoonanana ahooleli aanankuttho.
15 Ni uyo aheera: “Nnohala ukivahani kookaviherakani unvara?” Ayo yahonkhuluveliha unvaaha misurukhu 30 coparaatha.
16 Vano, ukhuma nne nihukunne, uyo aanaavya ukati womaana wiira anvariihe.
17 Nihuku noopacera nomikatthe coohiheliya ifermentu,* atthari yahonkoha Yesu co: “Nipuroni noocivenleni wiira nirwee natthenkace iyoolya yopasikuwa?”
18 Uyo aheera co: “Nrwee mapaka uparasa, mwamoonanane nlopwana mmoca ni mmwiirele co: ‘Mwiitthucihi enre: “Uhophiya ukatyaaka; kinhala umuupuwelela paasikuwa wapuni wawaa, wamoca naattharyaaka.”’”
19 Vano, atthari yahopanka toko ceereliyaaya ni Yesu, ni yahotthenkaca iyoolya yopaasikuwa.
20 Wiila waya, Yesu wamoca naattharyaawe, yahookomaca anaphiteeryale meeca.
21 Yalyaakoono, uyo ahowiirela co: “Kinoohimyeerani ikhweeli wiira: Mmoca-mmoca va naahala ukivariiha.”
22 Ayo yahoriipiya nrima cinene ni yahancera unkoha yeeraka: “Pwiiya, phi mi kinhala upanka iyo?”
23 Uyova ahowaakhula eeraka: “Ule nokeliha ntata nawe mparathuni wamoca ni miiva, phinhala ukivariiha.
24 Khweeli, Mwaana a Pinaatamu naarwaa, masi toko cantikhiyaaya, hotakhaliya ule nohala unvariiha Mwaana a Pinaatamu! Phataari uyo ntthuuyo hiyariye.”
25 Yuda, aahala unvariha Yesu woohipica, ahonkoha eeraka: “Rapi, phi mi kinhala upanka iyo itthwiiyo?” Yesu ahaakhula eeraka: “Phi we uneehimyaca.”
26 Nanleelo yalyaacakoono, Yesu ahokusa iphaawu, umaliha wawe ulompa, ahomyaaniha ni ahaavaha attharyaawe, awiirelaka: “Nkhuureke. Ila iphawiila inthoonyera irutthwaaka.”
27 Ni ciicammo, ahokusa ikopu yoviinyu, ulompa wawe, ahaavaha attharyaawe, awiirelaka: “Nwuryaceke, otheene cinyu,
28 ila iviinywiila, inthoonyera ‘iphomyaaka yonleehano,’ inhala umwaarusiya wiira yaakavihere atthu enci uleveleliya matampyaaya.
29 Kinoohimyeeryani ikhweeli wiira: Khannohala-tho uwurya nkhayi ni miiva ila iviiywiila, mpaka nihuku kinhalaaka uwa-tho wuuwuryanani iviinyu yonaanaano, Mumweneni Waapaapa.”
30 Vano, umaliha waya wiipa, yahorwaa umwaakoni Oliveera.
31 Vano Yesu ahowiirela co: “Ula uhiyuula, otheene cinyu nnaahala ukikhotta, kontha uhantikhiya: ‘Kinaahala unrakaliha makampuuci, ni ikhontwaa cawe cinaahala umwaryaana.’
32 Masi konwelelihiyaka vale, kinaahala uhoolela urwaa u Kalileeya.”
33 Vano, Peturu ahaakhula eeraka co: “Hataa atthu otheene yookhottakani, mi akinhala wuukhottani!”
34 Yesu ahomwiirela co: “Kinoohimyeera ikhweeli: Ula uhiyuula, unaahala ukikhotta imaara tthaaru, nthupi hinaaya wiipa.”
35 Peturu aheera co: “Mi akinhala wuukhottani, pooti waneeriyaaya wiira kinahala wiiviya nkhayi ni nyuuva.” Vano attharyaawe akhwaawyaayo yahoolumaca itthu imocaaru.
36 Yesu naattharyaawe, yahophiya nipuro neehaniya Getseemani, ni ahowiirela attharyaawyaayo co: “Munkomaceke va, mi kinrwaa vale, kinkoolompa.”
37 Uncisa wawe Peturu ni asaana eeli a Sepetewu, ahosanka ni ahoriipiya nrima cinene.
38 Vano uyo ahowiirela co: “Kiri ooripiya nrima cinene, mpaka kihanle ukhwa. Nhale va ni nhiitthaale wamoca ni miiva.”
39 Neettaleene vakaani, ahokhoroma ni nooromenleene vathi, aholompa eeraka: “Paapa, wakhitiryaa vale, nkumihe ila ikoopwiila uhoolo waka. Masi, ihiirannye khampa kimpheelaaka, yiirannye khampa mumpheeleenyu.”
40 Uturuwela wawe nipuro naaryaaya attharyaawe, ahaaphwanya yarupaka, ni ahomwiirela Peturu co: “Khankhitinri ukhala woohiitthaala nanka iwoora imoca paasi?
41 Nhiitthaale ni nlompe woohihiyerera, wiira nhikhitiriye mwattehiyaka vale. Khweeliini, nrima unaatthuna, masi irutthu khinlipa.”
42 Ahokhuma-tho ikwaha yonayeeli, ni ahorwaa ulompa, eeraka: “Paapa, waahikhitiryee ukumiha ila ikoopwiila uhoolo waka miiva woohiwurya, yiirannye ile impheeleenyu.”
43 Ahoturuwa-tho ni ahaaphwanya yarupaka, kontha yaari niikhove cinci.
44 Vano, ahokhuma-tho ikwaha yoneeraru, ni aholompa oolumaka moolumo mamocaaru.
45 Uturuwela wawe nipuro naaryaaya attharyaawe, ahowiirela: “Nanlelo nyuuva nnaarupa ni nnaamumula! Mooneke! Uhaattamela ukati, anamatampi anhalaaya uvahiya Mwaana a Pinaatamu.
46 Munwe, nttwee nikhume va. Mmooneke! Ule nohala ukitumiha, neera awaaka.”
47 Woohipica, oolumacakoono nanlelo, ahowa Yuda, aapanka mphantte waatthari 12, nari naatthu enci, niikatana caya ni ikopo. Ayo atthwaayo yaarumiye naahooleli aanankuttho ni mahumu aapoovu.
48 Vano, ule aahala unvariiha Yesu, ahaavaha nthoonyero eeraka: “Ule kinhalaaka unvaha ipeecu; muntthuke yooyo.”
49 Ni ahorwaa mpaka nipuro naaryaawe Yesu, nuumwiirela co: “Cani Rapi!” ni ahonvaha ipeecu.
50 Vano, Yesu ahomwiirela co: “Mpatthani, isiyani iwiirihale ukhala nna nipuronna?” Vano atthwaayo yahonvara ni yahontthuka.
51 Wiirannya waya iyo itthwiiyo, woohipica, ntthari mmoca a Yesu ahotholola ikatanaawe, ni ahothikila nnyaru nananteko anankuttho muulupale.
52 Yesu ahomwiirela co: “Uturusele ikataneeyo wanipuroni waya, kontha otheene ale anvarela nteko ikatana, anaahala wiiviya niikatana.
53 Awula unoopuwela wiira kaapheelale akaahala waalepela Apaapa, wiira yoola ukatyuula aveleelihe malayikha imiliyau cene?
54 Kinapankile commo, manannani caahalaaya wiirannya cowantikhiya cowaarya, cinhimya wiira nnyo citthunnyo cihaana ciirannyaaka ala manannaala?”
55 Yoole ukatyuule, Yesu ahowiirela atthwaayo co: “Nkiweelale ukitthuka niikatana ni ikopo, toko wiira miiva kihookhala nakhirini? Khula nihuku, miiva konkomaka ntempuluni keetthucihaka; masi uhookhalaru commo, nyuuva khamwaakitthukile.
56 Masi citthu cotheene nnya, cikhumelenle wiira ciirannye nnye cantikhiye nimaporofeeta.” Vano, attharyaawe otheene yahotthawa.
57 Ale yantthukile Yesu, yahonrwaana wa nakuttho muulupale, eehaniya Kayifasi, waathukumannyaaya anamantikha ni mahumu.
58 Vano, Peturu aanontthara naryeene uttayi-nuuttayi, mpaka waaphiiyaaya uwanuwawe nankuttho muulupalyooyo. Vano ahokela nluwanimmo ni uyo ahonkoma nkhayi naananteko owapuwannyaayo, wiira oone ittthu yaahala wiirannya.
59 Ahooleli aanankuttho ni itiripunaali yotheene yaayuuta, yaanawaatotha atthu oomootherya Yesu wiira amwiiviihe.
60 Uhookhalaru wiira, yahaaviya atthu, khaavo oolumile itthu yoocuwannya. Masi uhoolo waya, yahokhumelela atthu eeli yaamoothenrye.
61 Ayo atthwaayo yaheera: “Ula nlopwanoola enre co: ‘Mi pooti ukwanyula ila itempulu ya Nlukwiila ni uteka nhina wo mahuku mararu paasi.’”
62 Vano, nankuttho muulupalyooyo ahunwa ni ahomwiirela co: “Khunaakhula itthu? Unoonela cani itthu ihimilyaaya ala alopwanaala?”
63 Uhookhalaru commo, nanlelo Yesu ahomaala. Vano, nankuttho muulupalyooyo ahomwiirela co: “Kinaalapha mwancina na Nluku nkumi, wiira weeva unihimyere wakhala wiira ukhanle Kristu, mwaana a Nluku!”
64 Yesu aheera co: “Phi nyuuva nnohimya iyo. Masi kinoohimyeerani ikhweeli: Ukhuma nenna co, nnaahala umoona Mwaana a Pinaatamu nonkomile moono wonlopwana wokuru ni awaaka mmahutteni.”
65 Vano, nankuttho muulupalyooyo ahaanyula ikuwaawe ni aheera: “Ula honveeha Nluku! Nihaana-tho itthu yoopheela uwaavya masaahiti? Nhoona mananna civeehilyaawe.
66 Nnoonela cani?” Ayo yahaakhula yeeraka: “Haana eeviyaka.”
67 Yahonsuwela uwiitho, yahonvaha isooku ni akina yahompataha uwiitho,
68 yeeraka co: “Kristu, wakhala wiira weeva uporofeeta, unhimye ntthu waattile?”
69 Peturu nookomileene wapuwani, nthiyana mmoca nanteko, ahorwaa mpaka nipuro naaryaawe ni ahomwiirela: “We keera ciicammo waari ni Yesu, nkalilewu!”
70 Vano, uyo ahonkhotta uhoolo waatthu otheene, eeraka: “Akincuwela itthu inoolumeenyu.”
71 Ukati waarwaawe wankhorani wowapuwani, mwaarusi nkhwaawe ahomoona ni ahowiirela atthu yaari nne nipuronne co: “Ula nlopwanoola aari ni Yesu, nnasareenu.”
72 Uyo ahonkhotta-tho, alupelaka eeraka: “Akinoncuwela uyo nlopwanooyo!”
73 Woohipica, atthu yaari nne nipuronne, yahorwaa mpaka nipuro naaryaawe Peturu ni yahomwiirela: “Khweeliini, weeva waari yeeyo ikhurupwiiyo, iluukeeyo inawuuhimyaca.”
74 Vano, uyo ahopacera wiilaphakaca ni aholupela eeraka: “Akinoncuwela uyo nlopwanooyo!” Woohipica, nthupi aheepa.
75 Ni Peturu ahoopuwela itthu yoolumilyaawe Yesu eeraka: “Unaahala ukikhotta imaara tthaaru, nthupi hinaaya wiipa.” Vano, ahokhuma nne nipuronne onlaka venci.
