Ihapari Comaana Cantikhiye ni Matewus 27:1-66
-
Yesu naarwaaniya wa Pilatu (1, 2)
-
Yuda nawiitthukacera (3-10)
-
Pilatu nankoha Yesu wakhala wiira uyo mwene Aayuuta (11-26)
-
Yesu naatarawaciya waatthuni (27-31)
-
Yesu naakhomeliya wanipottoni u Kolkota (32-44)
-
Ukhwa wa Yesu (45-56)
-
Yesu naweesiya mmahiyeni (57-61)
-
Mahiye anaakhikiceriya sana-saana (62-66)
27 Usa waya, ahooleli aanankuttho ni mahumu otheene aapoovu, yaahothukumana wiira alakele mananna oopheela omwiiva Yesu.
2 Untthuka waya, yahonrwaana wa Pilatu, aari kovernatoore.
3 Vano, Yuda anvariihile Yesu, woona wawe wiira Yesu aalakeliye wiiviya, ahottharuwa itthu yaapankilyaawe ni ahaaturusela misurukhu 30 coparaatha ahooleli aanankuttho ni mahumu aapoovu,
4 eeraka: “Kihovara itampi nlattu wonvariiha ntthu hitthekile itthu.” Vano ayo yahomwiirela: “Hi nirina naatani? Iyo phi we uncuwela!”
5 Vano, uyo ahovonyera nsurukhu woparaata ntempulu ni ahokhuma. Ukhuma wawe, ahorwaa wiitthukacera.
6 Vano, ahooleli aanankuttho yaaholokotthaca nsurukhu woparaatha ni yaheera: “Khuntthunihiya uhela ula nsurukhuula nkoofirini yontempuluni, kontha nsurukhu wophome.”
7 Ukohakohana waya meerihelo, yahokusa nsurukhuuyo ni yahorwaa uthuma imatta yaari nipuro coopiya myaapu, wiira yaasikhe atthu oohicuweliya unkhumaaya.
8 Phimaana, iyo imatteeyo ineehaniya imatta yophome mpaka mahukweehwaala.
9 Vano, yaheerannya itthu porofeeta Jeremiya aahimilyaawe eeraka: “Yahocisa misurukhu 30 coparaatha, iperesu yaalakeliye wiira athumiye ntthu, ni iyo iperesweeyo yaalakeliye naasaana akiina o Isarayeli,
10 ni yahothumela imatta khampa Yehova caakirumilyaawe.”
11 Yesu aari uhoolo wawe kovernatoore. Ni kovernatooryooyo ahonkoha co: “Thi weeva ukhanle mwene aayuuta?” Yesu ahaakhula: “Thi nyuuva nnohimya.”
12 Masi uyo khaakhunle itthu ukati ahooleli aanankuttho ni mahumu aapoovu waamootheryaaya.
13 Vano, Pilatu ahonkoha co: “Khuneewa citthu unootheriyaannya va?”
14 Masi Yesu khaakhunle hataa itthu, nlattu wo iyo itthwiiyo, kovernatooryooyo ahotikhinihiya cinene.
15 Ukati wosukuhuulu, yaari itthu yaalamaleliye, kovernatoore untthukula peresu mmoca apoovu yanthanlaaya.
16 Ayova yahaana ciicammo, peresu nkhwaawe eehaniya Parapaasi nakhirini muulupale aacuwelaciya.
17 Vano, ukati waathukumannyaaya, Pilatu ahaakoha co: “Nnopheela kintthukuleke pani? Parapaasi awula Yesu neehaniya Kristu?”
18 Kontha Pilatu ancuwela wiira yanvariihile nlattu wonkhalela nttima.
19 Uhiya commo, nonkomileene utiripunaali, amwaarawe Pilatu, yahonveleelihera moolumo yeera: “Nhipanke hataa itthu uyo nlopwana nasariyooyo, kontha akimala uhuva ukati waalohaaka nlattu wawawe.”
20 Vano, ahooleli aanankuttho ni mahumu aapoovu, yaanaatheperya apoovu wiira atthukuliye Parapaasi ni eeviye Yesu.
21 Vano, kovernatooryooyo ahaakoha co: “Nnopheela kintthukuleke pani?” Ayo yahaakhula yeeraka: “Parapaasi.”
22 Pilatu ahokoha co: “Kimwiirihekeni Yesu neehaniya Kristu?” Ayo yahaakhula, yeeraka: “Mwankhomele wanipottoni!”
23 Uyo ahaakoha co: “Nlattuni? Isiyani ipankilyaawe yootakhala?” Atthwaayo yaaneera utepa ukhuwela, yeeraka: “Mwankhomele wanipottoni!”
24 Pilatu, woona wawe wiira khaakhitiri upanka itthu wiira amwaakihe Yesu, ni atthwaayo yaaneera utepaca unyakula, ahokusa maaci ni ahonyawa uhoolo waatthu otheene, ni aheera: “Mi akirina nlattu wophome yawawe ula nlopwanoola. Phi nyuuva nrina nlattu.”
25 Vano, apoovu otheene yahaakhula, yeeraka: “Iphomyaawe inimorele hi nkhayi naasaaneehu.”
26 Pilatu ahoruma utthukuliya Parapaasi, masi ahoruma wuufyulaciya Yesu ni ahonleva urwaa ukhomeliya wanipottoni.
27 Anatoropa akovernatoore, yahonkusa Yesu ni yahonrwaana nluwani wakovernatoore, ni ikhurupu yotheene yaanatoropa yahonrukureerya Yesu,
28 yahonrula ikuwo cawe ni yaahonwariha ikuwo yooseerya,
29 yahopanka ikhara yomwiiwa ni yaahonwariha mmuruni wawe, ciicammo yaahonvareliha ntathi moono wonlopwana. Vano, yahopacera unkhoromela uhoolo wawe yanveehacaka, yiiraka: “Salaama, amwene aayuuta!”
30 Vano, yahonsuwelaca ni yahokusa ntathyuuyo ni yahomwaattana mmuru wawe.
31 Umaliha waya unveehaca, yahonrula ikuwo yanwarihilyaaya yooseerya ni yaahonwariha ikuwo cawe, vano yahoncisa wiira akhomeliye wanipottoni.
32 Ukati waakhumaaya, yahonkumanana nlopwana mmoca eehaniya Simau, o Sireeni. Ni yahonkhanyereriha uteesa nipotto naarwaawe ukhomeliya Yesu.
33 Ni waaphiilyaaya nipuro nineehaniya u Kolkota, awula nipuro caari myuru coohala makhuvaru,
34 yahonvaha iviinyu yootakaniheriya itthu yoowaawa ineehaniya feeli wiira awurye, masi ulawiha wawe, uyo khaatthunne uwurya.
35 Unkhomela waya wanipottoni, yahokawana ikuwo cawe yapankaka mwaavi,
36 ni yahonkomaca nenno nipuronno yankhalelelaka.
37 Ni ciicammo, yahantikha ithaapwa ni ukhomela waculu nipotto naakhomeliyaawe, wathaapwani vaa yantikhiye moolumo yeera: “Ula Yesu mwene aayuuta.”
38 Ni malatarawu eeli yahokhomeliya nkhayi nuuyo, mmoca moono wonlopwana ni nkiinooyo moono wonthiyana.
39 Ni atthu enci yaavira nne nipuronne, yaanonruwanakaca yattikhinyeraka muru,
40 yeeraka: “Keera phi weeva weeraka wiira wanhala ukwanyulaca itempulu ni uteka mahuku mararu paahi? Wiicoopoleke umwaneennya! Wakhala wiira weeva mwaana a Nluku ukhuruweke wanipottoni va!”
41 Ni ciicammo, ahooleli aanankuttho, anamantikha ni mahumu aapoovu, yahopacera unveehaca, yeeraka:
42 “Uyo howoopola atthu akhwaawe, masi khankhitiri wiicoopola! Ule mwene aasarayeli; akhuruweke wanipottoni va, ni hiiva ninaahala unkupali.
43 Ule honkhuluvela Nluku; vano Nlukuuyo amoopoleke wakhalaka wiira nantteeliha nrima, kontha ule enre: ‘Mi kimwaana a Nluku.’”
44 Mpaka malatarawu yaakhomeliye nkhayi nuuyo yaanonruwanakaca.
45 Ukhuma 12 oora, yahoripela ile ilapweele yotheeneele mpaka 15 oora.
46 Yeettaka 15 oora Yesu ahokhuwela, eeraka: “Eli, Eli, lama sabactâni?” Iyo intaphulela: “Nlukwaaka, Nlukwaaka, ukihiyenreni?”
47 Atthu yaari nno nipuronno umwiiwa waya, yaheera: “Ula nlopwanoola nomwiihana Eliyasi.”
48 Ni ntthu mmoca aari nne nipuronne, ahotthawa ni ahokusa isponja ni ahoruwya nviinyuni akre ni ahotthukelela wantathini nunvaha Yesu wiira awurye.
49 Masi, atthu akhwaawe yahokhuwela, yeeraka: “Munhiye ciicammo! Noone wakhala wiira Eliyasi naawa umoopola.”
50 Yesu ahokhuwela-tho venci ni ahokhwa.
51 Yoole ukatyuule, yahaanyuwa ikortiina yontempulu ukhuma uculu mpaka vathi, ni yahottettemela itthaya ni cahoparuwaca myaako.
52 Vano, mahiye yahotthukuwa, ni irutthu caatthu ookhuluvelya caari mmahiyeni cahokhumela vate
53 (ni atthu yaakhuma mmahiyeni ukhwa wawe Yesu yahokela isittatti yowaarya), ni ayo yahooniya naatthu enci.
54 Masi, ukati nhooleli aanakhotto naatthu yaari nkhayi nuuyo yankhalelaka Yesu yoonilyaaya uttettemela wotthaya, ni citthu cotheene caakhumelenle, yahoova ni yaheera: “Ula khweeliini, aari mwaana a Nluku.”
55 Ni yahaavo athiyana yoona uttayi-uttayi citthu caakhumelela. Ayo yaahonveleela Yesu ikhumelo yo Kalileya wiira anvarele nteko.
56 Iriyari ayo athiyanaayo yahaavo Maria Madalena, ciicammo Maria anumwaane Tiyaku ni Yusufu, ni anumwanaya asaana a Sepeteu.
57 Ukhala wiira waanawiila, ahowa nlopwana mmoca o Arimateya eehaniya Yusufu, ciicammo aari ntthari a Yesu.
58 Uyo nlopwanooyo ahomuulumana Pilatu ni ahonlepela irutthu ya Yesu. Ni Pilatu aheera wiira pooti waavahiyaawe.
59 Ni Yusufu ahokusa irutthu ya Yesu ni ahonvilinkelela ikuwo yoovevyaala,
60 ni aheesa mmahiye onaanaano, aathipilyaawe wamwalani. Vano, ukhuneela wawe ninluku mahiyaayo, ahorwaa.
61 Masi Maria Madalena ni Maria nkhwaawyooyo yahohala umahiye anonkomile.
62 Nihuku naatthenkaciyaaya isaapatu, ahooleli aanankuttho ni mafariseu, yahothukumana wa Pilatu,
63 ni yahomwiirela: “Pwiiya nihoowuupuwela va wiira ule nlopwana owoothoole, aaneeraka: ‘Yaviraka mahuku mararu kinaahala wunwelelihiya.’
64 Phimaana, nrume wiira akhalenliye mahiyaawe mpaka nihuku noneeraru, wiira attharyaawe ahirwee winnya irutthwaawe, nuuwiirela apoovwaayo: ‘Uyo honwelelihiya!’ Kontha yapanka commo, anaahala wootha venci cinene uvikana yoothilyaaya wiipaceroni.”
65 Vano, Pilatu aheera: “Mwaakuseke anatoropa. Ni nrwee mwakhikicere sana-saana ayo mahiyaayo.”
66 Vano, ayo yahokhuma ni yahorwaa ukhikicera ayo mahiyaayo, yahotthuka ninluku ni yahaahiya anatoropa wiira akhalenle.